Kukwe kwin bämikadre monsotre käne ye abokän nitre rüne tä dre driere ye erere nuaindre käne kwetre. Ñodre, ni iti rükadre ju bäre aune mäkwe niedre monso mäkwe ie: “Ti ñan gwi nän niere ie”. Ye erere ngwane, monso ye rabadre käre kukwe metre niere ye mäkwe ñaka ngübadrebätä.

“‘Tita dre niere ye nuainne. Tita dre nuainne ye ñan mika ñärärä’, ye nitre kwati tä niere. Akwa ye erere ni ñan raba niere monso nikwe ie, ñobätä ñan aune niaratre ye abokän esponja ye kwrere, dre nuainta nikwe bätä dre nieta nikwe ye erere niaratreta nuainne. Nita kukwe driere ietre akwa biti nita kukwe mada nuainne okwäbiti ngwane, gai kwetre aune niedi kwetre nie” (David).

BIBLIA TÄ KUKWE NE DRIERE: “¡Niaratrekwe ñan godre dirita mäkwe ietre amarebti mata gore!” (Romanos 2:21).

Monsotre kitera ja gäibiti, akwa nitre rüne tä ja ngwen ño yebiti raba dirire bäri kwin monsotre nänkä kwelate ben ye kräke. Ye tä mike gare, mun monsotre rüne, mun raba niaratre jie ngwen bäri kwin ji metrebiti, akwa yekäre dre nieta munkwe ye erere munkwe nuaindre käre.

“Ni raba kukwe niere bä kabre, akwa monsota ni kukwe nuin ya ñaka gare nie, akwa nita dre niere ye ni ñaka nuainne ngwane, niedita kwetre ni ngwärebätä. Niaratre ñaka kä töibikare raba tuin nie, akwa käre nita dre nuainne ye gare ietre” (Nicole).

BIBLIA TÄ KUKWE NE DRIERE: “Kukwe töbätä kite kä kwinbiti ye ñaka ni töi mikai ja bämike jerekäbe” (Santiago 3:17, TNM).

Ngwentari jai: “¿Tita ja ngwen ño ti muko aune monsotre tikwe ben? ¿Kukwe meden tuata tikwe? ¿Ja ketamuko ño ño tä tikwe? ¿Tita ja töi mike nitre madabätä?”. ¿Ja känenkäre monsokwe ja ngwandre mä erere ie mä tö?

“Ti aune ti muko, kukwe meden ñan nuainta nunkwe ye nun ñan tä nuainmana monsotre ie” (Christine).

Mäkwe ngite juanmana ta jabiti. Nitre rüne ye ñaka töi metre ye gare monsotre ie. Yebätä, mäkwe ngite juanmana ta jabiti mä muko ie o monsotre mäkwe ie, kukwe yebiti mätä kukwe ütiäte driere ja töi kräke ietre ja ngwankäre metre aune ja töi mikakäre bobre.

“Nita ja mike ngite ngwane, nikwe ngite juanmana ta jabiti ye ütiäte, ñobätä ñan aune nikwe ñaka nuaindi ngwane, monsotre nikwe ñaka nuaindi jire” (Rebeca).