Kukwe kwin ja jie ngwankäre ye ererebätä mätä nüne. Ñodre, ¿mätä ja ngwen metre kukwe jökräbätä? Ye erere ngwane, monso mäkwe rabadre ja ngwen mätä ja ngwen ye erere ye ie mä tö.

Arato rabadre sribire, ja ngwen metre aune nitre mada mike ütiäte jai ye mä tö driei ietre, ñobätä ñan aune monsotre tä kia ngwane, bäri nuäre kukwe ye driekäre ietre.

BIBLIA TÄ KUKWE NE DRIERE: “Ji medenbiti monsotre nändre ye mäkwe drie ie; niara rabaira umbre akwa ñaka näin ji madabiti” (Proverbios 22:6).

Tecnología ne näire kukwe kwin driedre monsotre ie ye bäri ütiäte. Ni meyere iti kädekata Karyn tä kukwe ne niere: “Nengwane celular aune jondron mada mada yebiti kukwe käme ye raba kwen jötrö monsotre ie. Monsotre ye tädre täkäni ni ken, akwa tädre video ñaka kwin ye mike ñärärä”.

BIBLIA TÄ KUKWE NE DRIERE: “Ni ünän ünän [...] abko dre dre kuin amne dre dre käme [...], yebtä ja töitikanina kabre kwetre, aisete tärä nebe gare ietre” (Hebreos 5:14).

Monsokwe ja ngwandre kwin nitre mada ngätäite ye ütiäte arato. Ñodre, “mä raba” aune “tä debe” niedre, bätä ni töita nitre dimikabätä ye bäri ütiäte. Kukwe ye nuain ñaka niena bäsi kä nengwane, ñobätä ñan aune nitre tä ja näkwite teléfono ye aibebätä.

BIBLIA TÄ KUKWE NE DRIERE: “Ni mda mdakwe jändrän kuin nuendre munkrä, ie mun töta nebe, ye kwrere munkwe jändrän kuin nuen ni mda mdakrä” (Lucas 6:31).

Dre kwin aune dre käme mä kräke ye mäkwe mika gare metre. Ñodre, nitre jämi ja mäkete ye känenkri tä nemen bati bati jabe ye käme, kukwe yebätä munkwe blitai monsotre ben ngwane, ye käkwe niaratre dimikai ñaka ja töi mike kukwe ye nuainne, ye mikata gare nitre ja tötikaka kukwe yebätä käkwe.

NE NUAIN RABA: Bitinkä kukwe mikani gare noticiate yebiti mä raba blite monsotre ben, ne kwe kukwe meden kwin aune kukwe meden käme mä kräke ye mäkwe driedre ietre. Ñodre, noticia yete nitre brukwä ja kräke yebätä blitadre ngwane, mä raba kukwe niere krörö: “¡Ye käme krubäte, ye ñaka kwin! ¿Ñobätä nitre ruäre tä ja ngwen kore raba ruin mäi?”, mäkwe ngwandretari monso ie.

“Kukwe meden kwin aune kukwe meden käme ye rabadre gare monsotre ie ne kwe rabadre bäri nuäre kräke kukwe kwin diankäre nuaindre jai” (Brandon).

Ja ngwandre kwin ye mäkwe drie monsotre ie. Monsotre tädre kia, akwa raba ja töi mike ni madabätä, jondron kärere töi kwinbiti aune debe bien. Tärä kädekata Monsotre ngübata ño juta madate (Parenting Without Borders) tä niere: “Monsotre ye ñan aibe kräke jondron nuaindre, ñakare aune tä mräkä ngätäite, monsotre mada tä kwelate ben, tä nüne ye käite nitre mada tärä rabadre gare ie. Ye käkwe dimikai ja töi mike jondron nuainne ni mada kräke aune ñaka töbike ja aibebätä”.

NE NUAIN RABA: Sribi kia kia ju bäre o gwi ye mika monso kisete, ye käkwe mikai gare ie ütiäte krubäte nitre mada dimikadre kwe.

“Sribi gwita ye mäkwe driei monso mäkwe ie ngwane, rabai nüne kaibe ngwane, ñaka rabai ja töibikaire. Dre dre nuaindre kwe ye rabaira gare ie” (Tamara).