Meta mikata ja käne ye ñan köböta o kukwe ni tö tuai nemen bare ja kräke ye ñan aibe, ñakare aune rabadre nikwe yekäre nikwe töbikadre kwinbätä, kukwe ükadrete jai aune sribidre ja di tätebiti.

Meta mikata ja käne ye raba nemen bare nie köbö braibe te, söta niken ruäre ta o kä kwati te. Meta bäri ja käne rabadre bare nie yekäre meta mada kia kia mikadre ja käne arato.

Mätä meta mike ja käne ye rabai bare mäi ngwane, mä rabai tö ngwen bäri jai, mäkwe ja ketai bäri kwin ja ketamuko mäkwe ben aune kä rabai bäri juto mäbätä.

Mäkwe tö ngwain bäri jai. Mäkwe meta kia mikai nuaindre jai aune rabai bare mäi ngwane, mä törbai meta bäri kri mikai ja käne. Arato mä dimikai kwe ja tuin kukwe köbö kwatire kwatire yebe, ñodre mä töi mikata ja dibiti kukwe blo nuainne ye ngwane.

Mä rabai ja kete bäri kwin ja ketamuko mäkwe ben. Nitre töita ja erebe nibe aune töta nemen dre nuaindi ye erere tädre ja di ngwen nuainne yebe ni töta nemen ja ketai. Aune nita sribire gwairebe jabe kukwe arabe känänkäre ngwane, nita nemen ja kete bäri kwin nitre yebe.

Kä rabai bäri juto mäbätä. Mätä meta mike nuaindre ja käne aune tä nemen bare mäi ngwane, jata nemen ruin ütiäte mäi.

“Tita meta mike nuaindre jai ye kwin ti kräke, ñobätä ñan aune tä ti töi mike kukwe nuainne aune ja di ngwen mike nemen bare. Meta tä nemen bare tie ngwane, tita nikren ja jiebiti aune tita niere: ‘¡Nibira bare!’” (Christopher).

BIBLIA TÄ KUKWE NE DRIERE: “Nire okwäta kwekebe murie yebätä ye ñaka nura nökai aune nire tä nikren muta yebätä ye ñaka nura ngwä ötai” (Eclesiastés 11:4).

Meta mikadre nuaindre jai aune mikakäre nemen bare yekäre, kukwe jatäri ne nuainne.

Mä tö meta meden diain jai yebätä töbike. Dre dre mä tö nuaindi ye jökrä tike täräbätä jai. Biti, meden meden mäkwe nuaindi käne ye mäkwe dian jai.

Mäkwe nuaindi ño ye mäkwe ükate jai. Meta keteitire keteitire ye kräke mäkwe ne nuain:

• Köbö nuäi te mä tö nuaindi ye mäkwe tika

• Dre dre nuaindi mäkwe mikakäre nemen bare ye mäkwe tika

• Dre raba nemen bare aune mäkwe ükaite ño yebätä mäkwe töbika

Kömike mada. Kukwe ñaka tädre ükaninte jökrä meta kömikakäre. Dre nuaindre käne mäkwe ne kwe meta rabadre bare mäi yebätä töbike aune nuainne. Kukwe ruäre rabai bare mäi ngwane, mätä nuainne kwin ya ye mäkwe mika gare jai.

BIBLIA TÄ KUKWE NE DRIERE: “Ni kukwe ükatekä käne jai ye kräke kukwe kwin tä nemen bare” (Proverbios 21:5).