Nitre gure ñan töbikai ja erebe kukwe ruärebätä, akwa ja mikai ütiäte kwetre jai ye köböire ja taredi jankunu kwetre. Tärä kädekata Diez claves para transformar tu matrimonio tä niere: “Nitre gure ye ñaka tä ja töi mike jerekäbe muko kwe ye töi kwitabätä jakri, ñakare aune tätre blite kukwe yebätä aune tä ja kukwei nuin kwin. Aune kukwe meden kwin niaratre kräke ye ererebätä tä kukwe ye ükete jabe”.

BIBLIA TÄ KUKWE NE DRIERE: “Nita ni mda mda tarere metre abko nere: [...] ñan nita jändrän kuin känene kaibe jakrä” (1 Corintios 13:4, 5).

“Tikwe ti muko mikadre ütiäte jai ye abokän dre matadre tarebätä aune dre ñaka raba nun mike nüne kwin jabe ye ti ñaka nuainne” (Michael).

Nitre gure ñaka ja mike ütiäte jai ngwane, tätre blite jabe ye ngwane, tätre ja mike yakrä, kukwe tare niere jai aune kukwe niere ja rüere. Nitre ja tötikaka kukwe yebätä tä niere, kukwe ye erere tä kite nemen bare ye tä mike gare nitre ye käkwe ja tuainmetre.

“Nita ni muko mike yakrä jai, kukwe tare niere ie o ñaka kukwe niere metre ta ie yebätä ja rabai ruin ngwarbe ie aune ñaka tö ngwain kwe nie” (Brian).

TÖBIKE JABÄTÄ

Bämän känente drebätä mäkwe blitabare mä muko ben aune mäkwe ja ngwani ño ben yebätä mäkwe töbika. Biti kukwe ngwantarita ne mäkwe mika gare:

• ¿Bäbe mäkwe ñäkäbare rüere aune bäbe mäkwe käikitaninkä?

• ¿Mäkwe mikani ütiäte jai ye mäkwe bämikani ño ie?

KUKWE NE EREREBÄTÄ MUN RABA BLITE JABE

• ¿Munta dre nuainne aune dre niere jai köböire jata nemen ruin ütiäte munye?

• ¿Munta dre niere aune dre nuainne köböite ja ñan tä nemen ruin ütiäte munye

NE NUAIN RABA

• Kukwe ketamä meden abokänbiti mun muko raba mun mike ütiäte jai ye munkwe tika jai. Biti, munkwe bian jai aune ja di ngwan ye erere nuainne mun muko kräke.

• Kukwe meden tuin kwin mä mukobätä mäi ye mäkwe tika jai aune ñobätä ütiäte mä kräke ye mäkwe mika gare ie.

“Tita ti muko mike ütiäte jai ye abokän tita dre dre nuainne yebiti ti tö kä tuai jutobätä ye tita bämike ie. Tita dre nuainne aune dre niere yebiti ti muko ütiäte ti kräke tä nemen gare ie” (Megan).

Mätä mä muko mike ütiäte jai rabadre ruin mäi ye ñan ai ütiäte, ñakare aune ja rabadre ruin ütiäte ie ye bäri ütiäte.

BIBLIA TÄ KUKWE NE DRIERE: “Munkwe ni mda mda ngwian ruen bobre jae, munkwe ja moto mika kuin mi mda mdakrä amne, munkwe bika tidrä ni mda mdabtä. Erere arato, munkwe ja moto mika jäme amne munkwe jändrän jökrä ngibia bätärekä ja täritäri” (Colosenses 3:12).