Nita ngite juen ta ni madabiti ye abokän kukwe nuainbare nibätä ye käi kwitakata jabiti aune ñaka ngwanta törö jai mada. Akwa ye ñan tä mike gare, nikwe ñaka kukwe ye töibikadre o ñan nakaninkä kwrere nikwe ja bämikadre.

BIBLIA TÄ KUKWE NE DRIERE: “Ni mda mda tä kukwe nuene mun rüere ne ngwane, munkwe ñan ja ngie mika amne, kukwe tärä ja rüere kwärikwäri munkwe ne ngwane, munkwe kukwe ye dian jabti ta kwärikwäri” (Colosenses 3:13).

“Nita ni muko tarere ngwane, kukweta nainte ie ye ñan aibätä nita ja töi mike, ñakare aune tä ja di ngwen ja ngwankäre kwin yebätä nita ja töi mike” (Aaron).

Ja mikata ngite ni rüere ye ni ñan tä käi kwitekä jabiti ngwane, ye käkwe ni mikai bren, ja ñan rabai ruin kwin nie aune ni ñaka rabai ja kete kwin ni mukobe.

“Bati, ti muko käkwe kukwe tare nuainba tibätä yebätä ngite juanmana ta jabiti kwe tie. Tikwe ñaka nuainba bengwairebe yebätä ja ñan rababa ruin kwin tie. Tikwe nuaindre bengwairebe akräke nun ñaka ja tare nikadre krubäte” (Julia).

TÖBIKE JABÄTÄ

Mä muko kukwe nuaindre ye matadre tare mäbätä ngwane, töbike kukwe nebätä:

• ¿Kukwe jökrä mate tare mäbätä?

• Ngite juan manandre ta jabiti mäi, ¿ye ngwane batibe mä raba ngite juen ta mä mukobiti? ¿O mä raba kukwe ye käi kwitekä jabiti jerekäbe?

KUKWE NE EREREBÄTÄ MUN RABA BLITE JABE

• ¿Munta ngite juen ta jabiti jötrö ngwarbe o kätä niken raire ta?

• ¿Mun raba dre nuainne ngite juankäre ta jabiti jötrö ngwarbe?

NE NUAIN RABA

• Mä muko kukwe nuaindre ye matadre tare mäbätä ngwane, nunie nierare kwe mäbätä ye mäkwe ñaka nütüdre.

• “Ni jökrä käta ja mike ngite bätäkä ngwarbe” ye mäkwe ngwan törö jai, aisete mäkwe mä muko töi mika nüke gare jai (Santiago 3:2).

“Nun nibu ja mikadre ngite ngwane, ngite juandre ta jabiti kwärikwäri ye bäri nuäre. Akwa itibe käkwe ja mikadre ngite ngwane, ñan tä nemen nuäre nuainkäre. Ngite juandre ta ni mukobiti aune ngite juan manandre ta jabiti yekäre ja töi bobre ye ribeta” (Kimberly).

BIBLIA TÄ KUKWE NE DRIERE: “Ja di ngwen kukwe ükete jötrö ngwarbe jabe” (Mateo 5:25, TNM).