Ni sribikä balente yebätä sribi jürä ñaka, ñobätä ñan aune tä sribire jume ja ngübakäre aune nitre mada dimikakäre. Sribi nuainta kwe ye ni mada ñaka tö nuain, akwa niara tä nuainne kä jutobiti.

Käre sribita nuaindre nie. Kä nengwane, nitre kwati ñaka tö sribi jume ye nuaindi, akwa ni sribikä balente ye kräke kukwe kwin tä (Eclesiastés 3:13).

“Tita sribire ja di tätebiti ye tä kä mike juto tibätä aune jata nemen ruin kwin tie. Bati bati ti töta nemen sribidi käre. Nita sribi nuainne kwin käre ye köböire kukwe kwin nieta nibätä” (Ricky).

BIBLIA TÄ KUKWE NE DRIERE: “Sribi jökrä nuainta ja di tätebiti ye köböire jondron kwin tä nemen nikwe” (Proverbios 14:23).

Kukwe mika bike gare jatäri ne käkwe mä töi mikai sribi mike tuin ütiäte jai.

Mäkwe jondron jökrä nuain kwin. Mätä sribi gwita nuainne o tarea kwelate nuainne o sribi mada nuainta mäkwe yebätä mäkwe ja töi mika. Jondron nuain niena gare kwin mäi, akwa nuaindre bäri kwin o bäri jötrö yebätä mäkwe ja kita. Mäkwe nuaindi bäri kwin ngwane, bäri kä rabai juto mäbätä.

BIBLIA TÄ KUKWE NE DRIERE: “¿Mä tärä ni sribikä kwin ye tuin sribi kwe ye nuainne? Nitre reire ye ngwärekri rabai; ñaka rabai nitre ngwarbe ye ngwärekri” (Proverbios 22:29).

Mäkwe töbika ni madabätä. Sribi tä nuaindre mäi ye mäkwe nuaindi täte ngwane, raba nitre mada dimike. Ñodre, sribi gwita bianta nuainne mäi ye mätä nuainne ngwane, ye köböire mä mräkätre raba sribi mada ye nuainne jötrö.

BIBLIA TÄ KUKWE NE DRIERE: “Nita jändrän bien ni mdaye, btä käta neme bäri nuäre nibtä ni jändrän kaka ngäbti ye ngwä” (Hechos 20:35).

Dre nuain mananta mäi ye mäkwe ñaka nuain krene kwärä. Sribi nuain mananta mäi ye ñan aibe mäkwe nuain, ñakare aune mäkwe nuain bäri. Ye erere ngwane, mä rabai jefere akwle jakwe. Bäkänä, mäkwe sribidre bäri ye ni madakwe ñaka nuainmana mäi aibätä mäkwe nuaindre, ñakare aune mä tö nuainbätä yebätä mäkwe nuaindre (Mateo 5:41).

BIBLIA TÄ KUKWE NE DRIERE: “Mäkwe ja töi mika kukwe kwin ne nuainbätä, akwa ñaka ni madakwe nuainmana mäi yebätä” (Filemón 14, TNM).

Mä ñan ja töi mika sribi aibebätä. Mä sribikä balente ye ñan tä mike gare mäkwe ja töi mikadre sribi aibebätä, ñakare aune mäkwe kä diandrekä jai ja dükakäre chi.

BIBLIA TÄ KUKWE NE DRIERE: “Ja dükadre chi ye bäri kwin, sribidre krubäte aune ja di ngwandre ngwarbe ye kräke” (Eclesiastés 4:6).