Nitre ja mäkäninte ye abokän ja mäkäninte ñaka nünankäre kä braibe te ye gare metre ietre. Ye tä niaratre töi mike jäme. Aune kukwe keta kabre rabai bare bätätre yebiti ta rabai nüne käre jabe ye gare ietre.

Nitre ruäre ja mäkäninte ye täbe nüne jabe, ñobätä ñan aune ja ketamuko kwe o mräkätre kwe tö ye erere yebätä. Akwa tä ja tarere aune ja mike ütiäte jai kwärikwäri ye rabadre niaratre töi mike nüne käre jabe ye bäri kwin.

BIBLIA TÄ KUKWE NE DRIERE: “Ni brare käkwe merire kwe tuametre ñakare jire” (1 Corintios 7:11).

“Ni töita nünanbätä käre jabe ye tä ni töi mike ñaka nemen rubun jötrö ngwarbe. Aune tä nemen bäri nuäre ni kräke ngite juankäre ta aune ngite juanmana ta jabiti. Kukweta nemen ni kisete ye abokän jondron mikadre ni jiete ye kwrere aune ñaka rabadre ni töi mike ja tuanmetrebätä” (Michael) a.

Nitre ja mäkäninte ñaka ja töi mikai kwatibe nünanbätä käre jabe ngwane, kukwe rabai kisete ye ngwane, rabai töbike ñaka ja mäkädrete kwetre näre nuainbare kwetre, yebätä rabai kukwe känene ja tuanmetrekäre.

“Nitre kwati tä ja mäkete ngwane, tä töbike krörö: ñaka nünain kwin kwetre jabe ngwane, ja tuainmetre kwetre. Nita töbike ne erere ngwane, ni ñaka töita nünanbätä käre jabe” (Emily).

TÖBIKE JABÄTÄ

Mätä ja kwete mä mukobe ngwane, ¿mätä töbike ño?

• ¿Mä ñan ja mäkädrete ben näre mätä nemen nütüre?

• ¿Mä raba nemen nüne bäri kä jutobiti ni madabe mätä nemen nütüre?

• “Tikwe mä tuainmetre”, “ni mada raba ti mike ütiäte jai yebe ti näin”, ¿mätä kukwe ne erere niere ie?

Kukwe ngwinintari ne ruäre mä tärä nuainne ngwane, biarebe mä raba ja töi ükete ja ngwankäre metre mä mukoi.

KUKWE NE EREREBÄTÄ MUN RABADRE BLITE JABE

• ¿Mun töi ñan kitera nünanbätä käre jabe? Ye erere ngwane, ¿ñobätä nemen bare?

• ¿Mun raba dre nuainne ne kwe mun töi rabadre nünanbätä käre jabe?

NE NUAIN RABA

• Mätä mä muko tarere ye mikakäre gare ie, mä raba kukwe mane mane tike niara kräke.

• Mätä sribire yekänti mä raba foto mä mukokwe ye mike ja ken.

• Mätä sribire o kukwe mada köböire mä ñan tä mä muko ken ngwane, köbö kwatire kwatire te mä raba niara kärere teléfono yebiti.

BIBLIA TÄ KUKWE NE DRIERE: “Ngöbökwe ni mikani ni itibe kwrere, ye ni ñan rabadre denkä jire chi jene jene mentokwäre” (Mateo 19:6).