Mäträdre monsobätä ye abokän jie ngwandre, tötikadre aune ruäre ngwane töi ükadrete tä ja ngwen ño yebätä. Akwa metrere ye abokän kukwe ütiäte driedre ie ne kwe rabadre kukwe kwin den nuaindre jai.

Kä nengwane, nitre rüne ñan kitera mäträre monso kwe yebätä, ñobätä ñan aune nane monso rabadre ene ye jürätä nemen bätätre. Akwa nitre rüne töi kwin ye tä kukwe ükete monsotre kwe kräke aune mikadre ño täte kwetre ye drieta kwe ietre.

“Kukwe ükadrete monsotre kräke ye ütiäte ne kwe rabadre ünä aune ñaka rikadre ji blobiti. Ñaka ye erere nuaindi ngwane, monso ye rabai ru mrente timón ñaka ye erere, näin ngwarbe kwäräkwärä, ji blo diain kwe jai aune kukwe tare känäin kwe ja kräke” (Pamela).

Mäkwe dre niedre ye erere mäkwe nuaindre. Monso ñaka mä kukwei mikadre täte ngwane, mäkwe mäträibätä ye erere mäkwe nuaindre. Akwa, mä kukwei mikadre täte kwe ngwane, mäkwe kukwe kwin niedre ie.

“Kä nengwane, monsotre ñan niena rün aune meye kukwei mike täte. Aisete, monsotre tikwe tä ti kukwei mike täte ngwane, tita kukwe kwin niere ietre. Ye köböire tita mäträre bätätre ye ngwane, tä nemen bäri nuäre kräketre ti kukwei mikakäre täte” (Christine).

BIBLIA TÄ KUKWE NE DRIERE: “Nita nura ño ño nökö, ye erere nita ngwä ötö” (Gálatas 6:7).

Mäträdre ño ye erere mäkwe nuaindre. Kä kwäbe monsobiti, töi ngitiekä ño aune dre nuainbare kwe ye ererebätä mäträdrebätä. Bäri kwin monso tä ja ngwen blo ye ngwane mäträdrebätä. Ye köböire kukwe nieta ie ye tä neketekä töite. Ñodre, monso ñaka ja näkwitadre krubäte teléfono celular yebiti ye mäkwe niedre ie, akwa ñaka mä kukwei mikadre täte kwe ngwane, köbö ruäre te mä raba celular ye denkä kän. Akwa ne ngwen törö jai: kukwe chi ye mäkwe ñaka mika kri.

“Ti ngobo ñan tä ti kukwei mike täte nierare ya o jerekäbe kukwe naninte ie ye tita mike gare käne jai. Monso bike bäri yebätä mäträtabätä ye ñaka ja erebe mäträtabätä tä nainte ie ngwane” (William).

BIBLIA TÄ KUKWE NE DRIERE: Nitre rüne, “munkwe ñan ngra ngra ngäbäkrebti, niaratre moto mikakäre ulire dikaro” (Colosenses 3:21).

Mäkwe mäträdre töi kwinbiti. Mätä mäträre töi kwinbiti monso mäkwebätä ngwane, gai kwe aune rabai bäri nuäre kräke mätä mäträrebätä ye mikakäre täte aune ja töi ükete.

“Kukwe nämä nainte monso nunkwe ie ngwane, dre dre kwin nuainbarera käne kwe ye jökrä käi nämä juto nunbätä nun nämä niere ie. Naninte ie ye ñaka nuaindi käre kwe, ñakare aune ja töi ükaite kwe ngwane, nun täi juto dimikakäre ye nun nämä niere ie” (Daniel).

BIBLIA TÄ KUKWE NE DRIERE: “Nita ni mda mda tarere angwane, nita jändrän jökrä ngibiare bätärekä ni mdabtä amne nita ja moto mike kuin ni mdakrä” (1 Corintios 13:4).