1, 2. a) Ni iti tä ja ngökö ñöte ngwane, ¿dreta nemen bare? b) ¿Nikwe dre mikai gare jai kukwe ja tötikara nekänti?

 ¿NITRE tä ja ükaninkrö ja ngökakäre ñöte ye mä tärä tuin? Ni kukwe kädriekä tä kukwe ngwentari ietre ngwane, tätre blite töi kwatibebiti. Mräkätre aune ja ketamukotre kwebätä käta nemen juto krubäte. Aune niaratre tä kiteta ngökökäta ñöte kä mrebiti ngwane, kätä nemen jutobätä ye tä nemen tuin kwin ngwärebätä aune nitre jökrä tä kise mete gwairebe. Bämän kratire kratire nitre kwati tä ja ngökö ñöte. Köböire tä nemen ni testiko Jehovakwe ja dianinkä mento aune ja ngökabare ñöte ye kwrere.

² Mä töita ja ngökabätä ñöte ngwane, mäta “Jehová känene” ye mäta bämike, ye köböire kä iko nete mäta trä ngitiekä ye kwrere (Sal. 14:1, 2). Mä bati o mä umbre akwa kukwe ja tötikara ne mä kräke. Kukwe keta kabrebätä ni rabadre Jehová mike täte mikata gare, akwa kukwe ja tötikara nekänti ani ketamä mike gare jai. Ne madakäre, nitre ja ngökanina ñöte ye töi mikai kwatibe kwe Ngöbö nikwe mike täte kärekäre.

3. ¿Kukwe metre aune kukwe ükateta metre ye ñobätä nitre Ngöbö mikaka täte tä tarere? (Salmo 119:128, 163)

³ Jehovakwe kukwe ne niebare nitre niara mikaka täte ie: “Munkwe kukwe metre ye tare” (Zac. 8:19).Ne madakäre, kukwe nuainta metre ye känändre ye ütiäte krubäte mikani gare Jesukwe (Mat. 5:6). Yebiti ni ja töi mikadre kwatibe kukwe metre, kukwe kwin aune kukwe mrebe Ngöbö okwäkänti nuainkäre ye meden gärätä. ¿Kukwe metre aune kukwe ükateta metre ye mäta tarere? Jän, ni raba niere. Ñobätä ñan aune, kukwe ngwarbe aune kukwe käme nuainta ye kräke mä brukwä (ñäkädre Salmo 119:128, 163 yebätä). b Nitre tä ni ngökö ye tä ja ngwen ni kä tibien ne gobrainka Satana ye kwrere (Juan 8:44; 12:31).  Metrere Satanás tö Jehová kä ye bämikabätä käme. Kenanbe, kukwe ñaka kwin niebare kwe Ngöböbätä jardín Edén yete aune Jehová abokän ni gobranka töbike ja aibebätä, ni ngökö aune ñan tö kukwe kwin tuai nemen bare ni kä tibienbätä ye kräke mikani gare kwe (Gén. 3:1, 4, 5). Kukwe ye köböite nitre ñaka tä töbike kwin Jehovabätä. Nitre tä ja töi mike ñaka kukwe metre tarere ye Satana raba töi mike ñaka kukwe ükete metre aune kukwe blo krubäte nuainne (Rom. 1:25-31).

4. ¿“Kukwe metre ye kite Jehovakri” ye Jehovata bämike ño? (Üai mikadre ñärärä arato).

⁴ “Kukwe metre ye kite Jehovakri” aune nire tä niara tarere ye ie tä kukwe ye mike gare kä jutobiti (Sal. 31:5). Yebiti tä kä trä tikekä ni käne aune tä ni mike kwäre kukwe ngwarbe nieta Satanakwe yebätä. Ne madakäre, ni ja ngwandre metre aune kukwe nuaindre metre ye Jehová tä driere nie ye köböire nita nemen ütiäte kwrere aune kä jäme tä nemen nikwe (Prov. 13:5, 6). Mäkwe ja tötika kömikani ngwane, ¿mäkwe kukwe ne tuanina nemen bare jabätä? Jehovata ni jie ngwen ye bäri kwin, mä aune nitre jökrä kä tibienbätä kräke ye namanina gare mäi (Sal. 77:13). Yebätä kukwe ükateta metre Jehovakwe ye mä tö mikai täte (Mat. 6:33). Satana tä kukwe ngwarbe niere Jehovabätä ye mä tö bämikai mäta kukwe metre tarere yebiti. ¿Mä raba nuainne ño?

5. ¿Mä raba dre nuainne ja mikakäre kukwe ükateta metre aune kukwe metre yekri?

⁵ Mäta dre nuainne yebiti kukwe ngwarbe nieta Satanakwe ye mä ñaka kai ngäbiti, mäta ja mike kukwe metre yekri, Jehová mä gobraindre ye ie mä tö ngwane, mä tö kukwe erametre kwe mikai täte ye mäkwe bämikai. Akwa kukwe ye bämikakäre erametre, mäkwe Jehová mikai täte kärekäre ye mä rabadre käbämike ie orasionte. Biti, mä rabadre ja ngökö ñöte nitre kwati ngwärekri ne kwe mäkwe ja dianinkä mento niara kräke ye mikakäre gare. Kukwe ükateta metre aune kukwe metre tareta ye raba ni dimike ja ngökakäre ñöte.

6. Salmo 45:4 tä niere erere, ¿kukwe ütiäte medenbätä nikwe Jesús taredre?

⁶ ¿Ñobätä nita Jesukristo tarere? Kukwe ütiäte ruärebätä nita nuainne ye raba kwen nie Salmo 45:4 yekänti (ñäkädrebätä). c Ja töi mikadre bobre, kukwe ükateta metre aune kukwe metre yekri Jesuta ja mike. Aisete nita kukwe metre aune kukwe ükaninte metre ye tarere ngwane,  nita Jesús tarere arato. Ñodre, töbike Jesukwe ja ngwani dite ja mikakäre kukwe metre aune kukwe ükaninte metre yekri yebätä töbike (Juan 18:37). Akwa, ¿ja töi mikadre bobre ye Jesuta mike gare ño?

7. ¿Jesús tä ja töi mike bobre yebätä kukwe meden tuin bäri ütiäte mäi?

⁷ Jesús tä kukwe nuainne aune tä kukwe niere yebiti niara töi bobre bämikata kwe. Ñodre, käre tä Jehová käikitekä; nitre käkwe mikadre ütiäte jai ye niara ñaka känene (Mar. 10:17, 18, TNM; Juan 5:19). ¿Jesús tä ja töi mike bobre yebätä mä töita ño? ¿Ye ñan tä mä töi mike Ngöbö Monsoi ye tarere aune ja ngwen niara erere? Jän nie raba. ¿Ñobätä Jesús tä ja töi mike bobre? Ñobätä ñan aune, Jehová töi bobre aune Jesuta Jehová tarere aune tö ja ngwain Rün kwe ye erere yebätä niara töi bobre (Sal. 18:35; Heb. 1:3). Kukwe metre ne tä ni dimike nökrö bäri Jesús ken ¿ñan ererea?

8. ¿Jesús tä reire ye ñobätä tä kä mike juto nibätä?

⁸ Jesús tä reire ye tä kä mike juto krubäte nibätä, ñobätä ñan aune niara abokän gobranka bäri kwin. Jehová ara käkwe niara kitani aune kädekani reire (Is. 50:4, 5). Ne madakäre, Jesukwe ni tarebare krubäte akwa ñaka jondron ütiäre yebätä töbike (Juan 13:1). Jesús tä reire yebätä nikwe taredre ja brukwä tätebiti. Nitre niara tarekä aune mikaka täte abokän tä kädeke ja ketamuko kwe ye tä kukwe kwe mike täte yebiti tä bämike niara tare kwe, ye Jesús ara käkwe mikani gare (Juan 14:15; 15:14, 15). ¡Ni raba nemen ja ketamuko Ngöbö Monsoi ben ye kukwe bäri ütiäte tä nikwe!

9. ¿Jesukwe ja ngökani ñöte aune nitre nänkä niara jiebiti tä ja ngökö ñöte ye kukwe meden känti bäsi ja erebe?

⁹ Kukwe keteiti Jesukwe biani mikakäre täte ye abokän ni nänkä niara jiebiti rabadre ja ngökö ñöte (Mat. 28:19, 20). Niara ara käkwe kukwe ye bämikani ni käne. Jesús ja ngökani ñöte aune nitre nänkä niara jiebiti tä ja ngökö ñöte ye kukwe ruäre känti ñaka ja erebe akwa kukwe mada känti ja erebe (recuadro “ Jesús aune nitre nänkä niara jiebiti ja ngökani ñöte ye ñobätä ñan ja erebe” ye mikadre ñärärä). Ñodre, Jesukwe ja ngökani ñöte yebiti niarakwe Rün kwe töi mikadi nemen bare ye mikani gare (Heb. 10:7). Nitre ja tötikaka Jesukwe tä kukwe bäsi ye erere nuainne. Niaratre tä ja ngökö ñöte ye ngwane, tätre ja denkä mento Jehová kräke aune yete ja käne Ngöbö töita ño ye rabai bäri ütiäte niaratre töi ye kräke ye bämikata kwetre nitre kwati ye ngwärekri. Yebiti, ni Dirikä tä ja ngwen ño erere tätre ja nuainne.

10. ¿Ñobätä mäkwe Jesús taredre aune ye käkwe mä töi mikadre dre nuainne?

¹⁰ Jesús ye abokän Jehová monsoi itibe aune ngöräbe kwe, niarakwe dianinkä reire Gobran kwe yete ye mäta mike era jai. Jesús töi bobre aune tä ja ngwen Rün kwe ye erere ye gare mäi. Niarakwe nitre kwati bukani, nitre ulire ye töi mikani jäme kwe aune nitre bren mikaninta kwin kwe ye namanina gare mäi (Mat. 14:14-21). Ne madakäre, Jesús tä konkrekasion kristiana kä nengwane ye jie ngwen ye mäta tuin (Mat. 23:10). Aune niara Rei Gobran Ngöbökwe yete käkwe kukwe kwin nuaindi ni kräke ja känenkäre ye gare nie arato. ¿Mäta Jesús tarere ye mä raba bämike ño ie? Niarata ja ngwen ño ye erere mäkwe ja ngwandre (Juan 14:21). Ye medenbätä, kukwe keteiti mäkwe nuaindre ye abokän mäkwe ja diandrekä mento Jehová kräke aune ja ngökadre ñöte.

11. ¿Kukwe meden bäri ütiätebätä mä ja ngökadre ñöte aune ñobätä?

¹¹ ¿Kukwe bäri ütiäte medenbätä mä rabadre ja ngökö ñöte? Kukwe biani bäri ütiäte yebätä blitabare Jesukwe ngwane, kukwe ye mikani gare kwe. Niebare kwe: “Ji dokwäte kri Ngöbö mäkwe taredre ja brukwä ngöi jökräbiti, ja üai ngöi jökräbiti, ja töi ngöi jökräbiti, arato ja di ngöi jökräbiti”. (Mar. 12:30, NGT). ¿Mäta Ngöbö tarere ño ye mikata gare metre ta kukwe nieta nekänti?

12. ¿Ñobätä mäta Jehová tarere? (Üai mikadre ñärärä arato).

¹² Kukwe keta kabrebätä ni rabadre Jehová tarere. Niara “ja nire jökrä ye  Bokänkä” tä “jändrän jökrä kuin amne metre ni die mikakrä ye bien nie” (Sal. 36:9; Sant. 1:17). Jehová töi mantiame ni kräke aune tä ni tarere yekri kukwe jökrä kwin tä mäkwe ye kite.

13. ¿Ni kökanintari ye jondron bäri ütiäte biani nie ye ñobätä ni raba niere?

¹³ Ni kökanintari ye jondron bäri ütiäte biani Jehovakwe nie. ¿Ñobätä nita ye niere? Jesús aune Jehová tä ja tarere nuäi yebätä ani töbike. Jesukwe niebare: “Ti Rün tikwe käta ti tarere” aune “Tita ti Rün tarere” (Juan 10:17; 14:31). Kä kwati krubäte te niaratre nünanbare jabe ye ngwane namani ja tarere bäri (Prov. 8:22, 23, 30). Aisete Jehovakwe Jesús tuanimetre ja tare nike aune krüte ye namani tare krubäte ie, ye ni raba bämike ja töite. Akwa Jehová tä mä aune nitre jökrä kä tibienbätä ye tarere, yebätä Monso ngöräbe kwe juani kwe ni kökatarikäre ne kwe mä aune nitre jökrä mada rabadre nüne kärekäre (Juan 3:16, TNM; Gál. 2:20, TNM). ¿Kukwe ütiäte mada ne kwrere ñaka jire abokänbätä ni rabadre Jehová tarere?

14. ¿Kukwe meden bäri kwin mäkwe diandre nuaindre jai?

¹⁴ Jehovata nemen gare bäri kwin mäi yebätä mäta kite niara tarere bäri. Yebätä matare aune kärekäre mä rabadre ja kete kwin ben ye ie mä tö aune raba nemen bare mäi. Mäta dre nuainne aune dre niere yebiti mä raba kä mike juto Jehovabätä. Mä tare niarakwe yebätä raba nemen bare ño mäi ye niarakwe mikai gare mäi (Prov. 23:15, 16). Mäta dre  den nuaindre jai yebiti Jehová tare mäkwe o ñakare ye mäkwe bämikai (1 Juan 5:3). Jehová töita ño ye erere ja ngwandre ye kukwe bäri kwin mä raba den nuaindre jai.

15. ¿Mäta Jehová tarere ye mä raba bämike ño?

¹⁵ ¿Jehová tare krubäte mäkwe ye mä raba bämike ño? Kena, Ngöbö erametre ye kräke mäta ja denkä mento ye mä rabadre mike gare orasion keteitibiti (Sal. 40:8). Aune ye bitikäre, mäkwe ja dianinkä mento mäkwe mikani gare orasionte ye mä rabadre bämike nitre kwati ngwärekri mäta ja ngökö ñöte yebiti. Nikwe miri gare jai ye erere, nita ja ngökö ñöte ye kukwe käi ngwankäre juto krubäte jabätä, mä nämäne nüne jene käne aune ye bitikäre mäkwe nünain jene ye mäkwe bämikai kukwe yebiti. Yete ja käne Jehová töita ño ye ererebätä mäkwe nünandi aune ñaka mä töita ño ye ererebätä (Rom. 14:8; 1 Ped. 4:1, 2). Metrere ye kukwe bäri ütiäte tä diandre nuaindre jai nie, akwa mäkwe kukwe bäri kwin diandi nuaindre jai. Ñobätä nita ye niere ye ani mike ñärärä.

16. Salmo 41:12 tä mike gare erere, ¿nire tä ja töi mike Jehová mike täte ye kräke dre dre kwin nuaindi kwe?

¹⁶ Jehová ye aibe bäri mantiame. Mäta dre bien ie akwa niarakwe biandi bäri mäi (Mar. 10:29, 30, TNM). Aune kä käme kitra krüte nete niara raba mä mike nüne kwin aune kä jutobiti. Akwa kukwe ye ñan ngöräbe. Mäta Jehová mike täte ye mäta kömike ja ngöka ñöte yebiti, ye nuadi kä braibe te ye mäkwe ñaka nütüdre, ñakare aune mä raba Jehová mä Rün ye mike täte kärekäre. Kä rikai ta ye bitikäre mä rabadi Jehová tarere bäri aune Jehová tä nüne kärekäre ye kwrere mä rabadi nüne (ñäkädre Salmo 41:12 yebätä). d

17. ¿Kukwe meden ñaka Jehovakwe abokän mä raba bien ie?

¹⁷ Kukwe kwin tä nemen bare mäbätä aune tä kä mike juto mäbätä ye Jehová ara tä bien mäi. Mäta ja denkä mento aune ja ngökö ñöte yebiti mäta kukwe ütiäte krubäte bien mä Rün ie. Ni kä kwinta aune kä tibien bäkänkä ye ie mä raba jondron ütiäte aune ñaka kwe ye bien ie ye abokän: niara mike täte aune sribire kräke (Job 1:8; 41:11; Prov. 27:11). Yebiti mäkwe  kukwe bäri kwin diani nuaindre jai. Jehová tare mäkwe ye kukwe bäri ütiätebätä mäta ja ngökö ñöte.

18. ¿Kukwe meden meden mä raba ngwentari jai?

¹⁸ Nikwe kukwe keta kabre miri gare jai ye bitikäre ¿mä tö ja ngökai ñöte? Kukwe ye tä gare mä aibe ie. “¿Ti nibira juto ja ngökakäre ñöte?” ye mäkwe ngwaintari jai ye raba mä dimike (Hech. 8:36). Kukwe ketamäbätä nikwe ja ngökadre ñöte nikwe miri gare jai yebätä töbiketari. Kena, kukwe metre aune kukwe ükateta metre ye taredre. Ngwentari jai: “¿Nitre rabadre kukwe metre niere aune ja ngwen metre ye ie ti tö?”. Ketebukäre, Jesús taredre. Ngwentari jai: “¿Ti tö Ngöbö Monsoi ye tuai reire ja kräke aune näin niara tä jiebiti?”. Ketamäkäre bäri ütiäte, Jehová taredre. Ngwentari jai: “¿Ti tö sribi Jehová kräke aune kä mikai juto niara brukwäbätä?”. Kukwe ketamä nebätä mäkwe jän nini ngwane, ¿ñobätä mä ñan ja ngökö ñöte? ¿Dre tä mä ketebätä? (Hech. 16:33).

 19. ¿Ñobätä mä ñan rabadre töbike krubäte ja ngökakäre ñöte? Bämike keteiti (Juan 4:34).

¹⁹ Mäkwe ja ngökadre ñöte o ño ñaka gare mäi ngwane, Jesukwe kukwe bämikani nebätä töbiketari (ñäkädre Juan 4:34 yebätä). Jesukwe Rün töi mikadre nemen bare ye nämäne mrö kwrere kräke. ¿Ñobätä? Ñobätä ñan aune mrö ye kwin krubäte ni kräke. Kukwe meden ribeta Jehovakwe nie ye kwin krubäte ni kräke ye nämäne gare kwin Jesús ie. Kukwe meden meden raba kukwe tare mike nemen bare ye Jehová ñaka ribere jire chi nie. Mäkwe ja ngökadre ñöte ye ie Jehová tö (Hech. 2:38). Aisete ja ngökadre ñote Jehovata ribere mäi ye kwin krubäte mä kräke rabai gare mäi. Erametre, mrö bäri bänänte kä jökräbiti tibien biandre mäi ngwane, mä ñaka töbikadre krubäte kwetakäre ¿ñan ererea? Aisete mä ja ngökadre ñöte yebätä mäkwe ñaka töbikatari krubäte.

20. ¿Dre rabai gare nie kukwe ja tötikara ja känenkärebätä?

²⁰ ¿Ñobätä nitre ruäre ie ja ñaka tä nüke törö kukwe ne nuainkäre? Niaratre jämi juto ruin ietre yebätä. Erametre, ja diankata mento aune ja ngökata ñöte Jehová kräke ye kukwe bäri ütiäte tä diandre nuaindre jai. Yebätä, mäkwe kä dianka debe näre jai töbikatarikärebätä aune mäkwe ja di ngwan ja mikakäre juto. Akwa, mä tö ja ngökai ñöte ngwane, ¿dre raba mä dimike ja mikakäre juto? Kukwe ye rabai gare nie kukwe ja tötikara ja känenkärebätä.