1. ¿Nitre tä nemen krire gätäbätä ye ngwane dreta töi mike niä? (Üai mikadre ñärärä arato).

 NITRE gure iti niki krire kena gätäbätä ye bämike ja töite, yete ja mräkätre tä ja tare bämike jai kwärikwäri aune niaratre kari ngäbiti kwin yebätä töi nibi niä. Tätre näinta ja jiebiti ye ngwane ja mräkä brare ye ie muko tä niere ie: “Nitre testiko Jehovakwe ye abokän ja ngwen jene ye tuin kwin krubäte tie”.

2. ¿Ñobätä nitre ruäre ñan tä kite sribire jankunu Jehová kräke?

² Nitre kristiano tä ja tare bämike jai kwärikwäri ye kukwe bä nuäre krubäte. Bäkänä, ni abokän töi ñan metre. (1 Juan 1:8). Ye medenbätä, ja mräkätre tä kite gare bäri kwin nie ngwane, tä ja ngwen ño ye tä kite gare bäri kwin nie. (Rom. 3:23). Ja mräkätre mada tä ja mike ngite ye köböite, ja mräkätre ruäre ñan töta kite sribibätä jankunu Jehová kräke ye tä ne mike ulire.

3. ¿Ni abokän kristiano erametre ye dre tä bämike? (Juan 13:34, 35).

³ Texto kukwe ja tötikara ne kräke ye miketa ñärärä (ñäkädre Juan 13:34, 35 yebätä). ¿Dre käkwe bämikai ni kristiano ye abokän nänkä erametre Jesús jiebiti? Ja tareta, ja ngwanta metre ye ñan ai gärätä. Ne madakäre Jesukwe dre niebare ye mike ñärärä, ñan niebare kwe: “Mun abkön ja tötikaka tibe ye rabadi gare mun jokräye”, ñakare aune niebare kwe “mun ja tötikaka tibe ye rabadi gare ni jökräye”. Jesús mikani gare metre ta, nitre kristiano metre tä ja tarere  kwärikwäri ye köböire rukai gare nitre ja tötikaka kwe yei aune nitre madai niebare kwe.

4. ¿Nitre ruäre raba nemen kukwe meden ngwentari jai?

⁴ Kukwe ne kwrere nitre ñaka testiko raba nemen ngwentari jai: ¿Ñobätä ja tare ye tä ni kristiano erametre bämike? ¿Jesús ja tare bämikani ño nitre ja tötikaka kwe yei? Aune ¿ño ni raba ja ngwen Jesús erere? Ni niena Testiko akwa nikwe kukwe ne kwrere ngwandreta jai ye kwin krubäte. Nikwe ye erere nuaindi ngwane ni tö rabai ja tare ye bämikai bäri nitre madai. Aune nitre tä ja mike ngite yebiti ta ni tö rabai ja tare bämikai ietre arato. (Efes. 5:2 NGT).

5. ¿Ja tare medenbätä Jesús tä blite Juan 15:12, 13 yekänti?

⁵ Nitre kristiano tä ja tarere ye abokän ja tare metre mikani gare metre Jesukwe (ñäkädre Juan 15:12, 13 yebätä). Jesukwe kukwe biani mikadre täte niaratre ie yebätä töbike: “Tikwe mun tarebare ye kwrere munkwe ja tare kwärikwäri”. ¿Ja tare medenbätä Jesús nämene blite? Niara arabe käkwe mikani gare. Ja tare metre nitre kristianokwe ye köböire raba ja nire bien eteba kwe ütiäre. b

6. ¿Ngöbö Kukweibätä ja taredre ye ütiäte krubäte mikata gare ño?

⁶ Ja taredre ye ütiäte krubäte mikata gare Ngöbö kukweibätä, versikulo ne kwrere tä nemen tuin bä nuäre nitre kwati ie. Ñodre: “Ngöbö abko ni tarekä” (1 Juan 4:8); “Mata ja tarere au, ye kwrere makwe ni mda mda tare” (Mat. 22:39); “Nita ja tarere era metre kwärikwäri angwane, ni mdata ja mike ngite ni rüere angwane nita juto biare denkä jabti ta” (1 Ped. 4:8), “Nita ja tarere kwärikwäri ye abko rabadi kärekäre” (1 Cor. 13:8). Versikulo ne aune versikulo mada keta kabre ye tä mike gare kukwe ütiäte krubäte kädekateta ne mikadre nuaindre ye ütiäte krubäte.

7. ¿Ñobätä Satanás ñan raba nitre mike nüne keteitibe aune mike ja tarere?

 ⁷ Nitre kwati tä nemen ngwentari jai: “¿Kukwen meden metre ye ñokänti raba nemen gare tie? Nitre jokrä tä kukwe metre driere tätre niere, akwa tätre kukwe jene jene driere Ngöböbätä”. Satana tä iglesia keta kabre sribere, yebätä kukwe meden metre ñan tä nemen gare nitre ie. Akwa niara ñan raba nitre kristiano kä jökräbiti tibien ye mike nüne keteitibe aune mike ja tarere ye ñan raba nemen bare jire. Jehová aibe raba kukwe ye erere nuainne aune gare nie ñan ñobätä aune ja tare ye kite Jehovakri. Nire ie niara tä üai deme bien aune kukwe kwin mike nemen bare kräke ye aibe raba ja tare erametre bämike. (1 Juan 4:7). Yebätä ja tare ye tä nitre kristiano metre bämike niebare Jesukwe.

8, 9. ¿Nitre testiko Jehovakwe tä ja tarere metre ye tä nemen tuin ño nitre kwati ie?

⁸ Jesukwe mikani gare erere ni kristiano metre ye tä nüke gare tä ja tarere yebätä. Ja mräkä testiko iti kädekata Ian känti estadio nämäne yete Gätä kri nuainbare ye törö ie. Sö nikani krire ruäre ta ngwane jadakabare yete yebätä niara ja namana niara tä niere: “Yete nitre testiko nämä ja ngwen jene, nämä ja ngwä kitani kwin arato monsotre kia ye nämä ja ngwen kwin”. Tä niere arato: “Nitre testikobätä kä nämä juto aune nämä nüne jäme jabe ye käkwe ti töi mikaba ñan krutare, ti nämä kukwe ngübare ye erere rababa jutuaba tie. Kukwe kädrieba ye ñan törö jire tie akwa nitre testiko nämä ja ngwen ño yebrä törö kwekebe tie”. c Ni kristiano metre abokän tä ja tarere ye ara jutuabare ie. Nita ja mräkätre tarere ye medenbätä nita kukwe kwin nuainne kräketre aune mike ütiäte jai.

⁹ Ja mräkä testiko iti kädekata John, janamane kena ju ja ükarakrö yete ngwane kukwe keteiti jutuabare ie. Ja mräkätre nämäne ja töi mike kwin jakrä kwärikwäri aune nämäne ja ngwen kwin ye käkwe niara töi mikani niä, niara tä niere: “Ja mräkätre nämä ja tarere metre ye köböire nämä kukwe metre mike täte ye rababa bäri era tikrä”. d Metrere kukwe ne kwrere tärä keta kabre abokän tä mike gare nitre testiko Jehovakwe ye abokän kristiano erametre.

10. ¿Nita ja tare bämike ye dre raba nuinte? (Nota mikadre ñärärä arato).

¹⁰ Nibi gare kenanbe nie erere ja mräkätre jokrä ye töi ngite, aisete ruäre ngwane kukwe niedi kwe ye matai tare nibätä tädre gare nie (Sant. 3:2). e Ruäre ngwane, ñan rabai nuäre ni kräke ja tare bämikakäre ja mräkätre ie. ¿Dre ni dimikai ni mada tarere aune töbike kwin käne kukwe nuainkäre ? Jesús kukwe bämikani ye ani mike gare jai (Juan 13:15).

11. ¿Bati Santiago aune Juan käkwe dre bämikani? (Üai mikadre ñärärä arato).

¹¹ Nitre ja tötikaka ye töi tädre metre ye Jesús ñaka ribebare. Ñakare aune, ja tare yebiti niaratre dimikani kwe ja töi ükete Jehovakwe kadre ngäbiti yekäre. Bati, apóstol Santiago bätä  Juan käkwe meye töi mikani blite Jesube ne kwe kä ütiäte biandre kwe ietre Jesús rabadre gobrane ye ngwane (Mat. 20:20, 21). Apóstol nibu ye nämäne bike kri aune töi nämäne jondron tuabätä ere jakwe ye bämikani kwetre (Prov. 16:18).

12. ¿Apóstol Santiago aune Juan ye ñan aibe töi namani blo ye ñobätä gare nie?

¹² Santiago aune Juan ñan aibe käkwe ja töi mikani blo. Ápostol mräkä käkwe ja töi mikani ño, yebätä ani töbike: ‘Ni jätä ja tötikaka Jesukwe käkwe gani ngwane, Juan bätä Santiago ye kräke moto namani rubun’ (Mat. 20:24). Nitre ja tötikaka namani rubun jakrä ye bämike ja töite. Apóstol mräkä ye käkwe niebare Santiago aune Juan ie: “¿Akräke ja ruin bäri ütiäte munye ne kwe kä ütiäte rabadre munkwe? Nunkwe sribibare ja dibiti Jesuben mun erere, kä ütiäte ie mun tö ye erere nun tö arato, kukwe ne erere niebare kwetre raba ruin nie”. Kukwe nakaninkä yebätä nitre apóstol ñaka namani blite kwin jabe.

13. ¿Apóstol ngite yebiti ta Jesukwe mikani tuin ño jai? (Mateo 20:25-28).

¹³ ¿Jesús ja töi mikani ño kräketre? Ñaka namani rubun. Nitre mada ja ngwen bäri kwin ye känändi täte kwe ye ñan niebare kwe ietre. Ñakare aune blitabare töi kwinbiti kwe bentre ñobätä ñan aune niaratre  brükwä kwin ye nämäne gare ie (ñäkädre Mateo 20:25-28 yebätä). Köbö ye ñan aibe ngwane nitre apóstol käkwe ñäkäbare jai nire bäri ütiäte yebätä, akwa yebiti ta Jesukwe käre tarebare (Mar. 9:34; Luc. 22:24).

14. ¿Nitre nämene ja ngwen ño ngätäite nitre ja tötikaka Jesukwe ririabare?

¹⁴ Nitre apóstol ye nünanbare ño ye Jesukwe ngwani törö jai (Juan 2:24, 25). Kä ye ngwane, nitre ji ngwanka iglesia madabätä ye kräke nitre jondron bäkäne ere aune sribi ütiäte nämäne kisete ye nämene bäri ütiäte (Mat. 23:6; Video Asientos del frente en la sinagoga, tä mikani nota de estudiobätä Mateo 23:6 ye mikadre ñärärä). Nitre judío ji ngwanka kukwe ngwarbebätä ye ie ja nämäne nemen ruin bäri ütiäte ni madabätä (Luc. 18:9-12). f Ye erere nitre ja tötikaka Jesukwe ye raba kite ja ngwen ye nämäne gare Jesús ie (Prov. 19:11). Niaratre ja ngwandre metre ye ñan ngübabare kwe aune nämäne ja mike ngite ye ngwane, ñaka nämäne nemen rubun. Niaratre brükwä kwin ye nämäne gare ie, ye medenbätä töi nämenentre bikabätä kri aune jondron tuabätä ere jakwe yebätä dimikani kwe ja töi mike bobre aune ni mada tarere.

15. ¿Kukwe namani bare Santiago aune Juanbätä yebätä dre raba nemen gare nie?

¹⁵ Kukwe namani bare Santiago aune Juanbätä yebätä kukwe raba nemen gare kabre nie. Niaratre käkwe kä ütiäte käräbare Jesús rabadre gobrane ngwane ye namani blo krubäte aune apóstol mada käkwe kukwe ye mikani ja ñäkebiti ye ñan namani kwin, akwa Jesus käkwe niaratre 12 ye tarebare aune töi mikani nüke gare kwe jai. ¿Dre raba nemen gare nie kukwe nebätä? Ni mada tä kukwe blo nuainne ye ñan aibe ngörä ñakare aune nikwe ja töi mikai ño kukwe blo nuainta ye ngwane. Ye medenbätä, ja mräkä iti tä kukwe blo nuainne ye ñan tä mate kwin nibätä ngwane nikwe kukwe ne ngwandretari jai: “¿kukwe nuinni kwe ye ñobätä mati tare tibätä? ¿Ti rabadre ja töi ükete ye bäri kwin? o ¿Ja mräkä tä ja tuin kwe tare ben yebätä? o ¿Tikwe kukwe ye mikadre näin ta, käi kwitadrekä jabiti aune ja tare bämikadre ie?”. Kukwe tärä nie keta kabre rabakäre rubun yebiti ta. Nikwe ja tare bämikai ni madai ye ngwane ni kristiano metre nikwe bämikai.

16. ¿Jesukwe kukwe bämikani yebätä dre mada raba nemen gare nie?

¹⁶ Jesukwe kukwe bämikani yebätä ni raba ja kite, tä driere nie nikwe ja di ngwandre ja mräkätre nikwe ye ngübare bätärekä (Prov. 20:5). Gare metre nie, dre nämäne nitre brukwäte ye nämäne gare kwin Jesús ie. Ye erere ni ñan raba nuainne akwa ni raba ja mräkätre ngübare bätärekä kukweta nainte ie ye ngwane (Efes. 4:1, 2; 1 Ped. 3:8). Kukwe keteitibe raba ni dimike ye ani mike ñärärä.

17. ¿Ni circuito tuabitikä ye käkwe ja di ngwani ja mräkä iti mike gare bäri kwin jai ye köböire dre namani bare?

¹⁷ Ja mräkä iti circuito tuabitikä nämäne sribire África Oriental känti ja mräkä iti ñan jumene bätä namani gare ie ¿ja mräkä nämäne ja ngwen ño yebätä ja töi mikani kwe? Niara tä mike gare: Tikwe ñan kämikakabätä, ñakare aune tikwe ja töi mikaba mike gare bäri kwin jai. Ja mräkä nünanbare ño  ye köböite nämäne ja ngwen kore ye nükani gare bäri kwin ie. Niara tä niere: “Nämäne ja ngwen ño käne yebätä ja töi kwitanina kri kwe ye käkwe ti töi mikaba niä aune nun rababa ja ketamuko kwin krubäte” Nikwe ja di ngwain ja mräkätre nikwe ye mike gare bäri kwin jai aune töi mike nüke gare jai ye köböire rabai bäri nuäre ni kräke tarekäre.

18. ¿Ja mräkä iti käkwe kukwe niedre o nuaindre matadre tare nibätä ngwane nikwe kukwe meden ngwandretari jai? (Proverbios 26:20).

¹⁸ Ruäre ngwane ja mräkä iti käkwe ñäkäbare tare ni rüere yebätä nikwe blitadre ben ye bäri kwin ni raba nüture. Akwa ye känenkri ni rabadre kukwe ne ngwentari jai: “¿Ñobätä kukwe nuainbare kwe ye gare jokrä tie?” (Prov. 18:13). “¿Nuini nierare kwe?” (Ecl. 7:20). “¿Käne tikwe ja ngwanbare ne kwrere?” (Ecl. 7:21, 22). “Tikwe blitai ja mräkä yebe ngwane tikwe kukwe gaikä bäri kri o tikwe kukwe ükaite?” (ñäkädre Proverbios 26:20 yebätä). g Nikwe kä diandrekä jai töbikatarikäre kukwe nebätä ngwane kukwe nakaninkä ye nikwe käi kwitakä jabiti aune ja tare bämikadre ja mräkätre nikwe ie ye bäri kwin rükai gare nie.

19. ¿Ni töita kwatibe dre nüainbätä?

¹⁹ Ni kristiano metre nänkä Jesús jiebiti ye ni testiko jokrä tä bämike akwa ¿ni itire itire raba nuainne ño? Ja tare metre ye bämikadre ja mräkätre ie ngite yebiti ta, ye köböire nitre madai kukwe meden metre ye rabai gare aune tö rabai Ngöbö ja tarekä ye mikai täte siba nibe. Nibira gare nie erere ani ja di ngwen ja tare tä ni kristiano metre bämike ye nuainne jankunu.