¿“Ja mräkä” ye käkwe ja mäkädrete Rut ben ye köböire “jondron rabadre niarakwe ye riadrete kän” ye ñobätä niebare kwe? (Rut 4:1, 6).

Nitre kirabe kädrieta Bibliabätä ye näire nitre nämäne krüte akwa monsoi ñaka nämäne nemen ye ngwane, ¿kä nämäne kwe yebätä dre rabai bare? ¿riate jerekäbe? ¿mräkätre ñan rabai jire jatäri? ye nämäne nemen töibikadre. Kukwe jökrä ne mika nämäne gare kukwe biani Moises ie yebätä.

Ni iti nämäne krüte o nämäne kä rürübäine nämäne nemenkä bobre yebätä ngwane, eteba iti o mräkä mada rabadre kä ye kököta ne kwe kä ye tädre jankunu mräkätre yekwe (Lev. 25:23-28; Núm. 27:8-11).

Ni brare iti nämäne krüte ye ngwane, ¿mräkätre kä ñan riadrete yekäre dre nuain nämäne? Eteba kwe nämäne ja mäkete muko namaninkä kaibe yebe ne kwe rabadre monso bien ie ne kwe niara kä aune kä namani ie ye rabadre monso yekwe yekäre. Ja töi mika nämene kwin ye kädeka nämäne matrimonio de levirato o de cuñado ye abokän meri nämäne nemenkä kaibe muko nämäne krüte yebätä nämäne ja mäkete yärä kwe yebe. Kukwe ükate nämäne kwin ye köböire meri kän muko nämäne krüte ye rabadre nüne kwin (Deut. 25:5-7; Mat. 22:23-28) Rutbätä ye erere namani bare.

Ani töbike Noemí yebätä. Niara nämäne ja mäkäninte Elimélec yebe. Akwa Elimélec krütani aune ngobo nibu kwe krütani ngwane, niara nguabaka ñan nämäni (Rut 1:1-5). Noemí nikanta Judá ngwane, Rutkwe blitadre Boaz ben ne kwe Elimélec mräkätre ye rabadre kä ye kököta ribebare Noemikwe ie (Rut 2:1, 19, 20; 3:1-4). Akwa Elimélec mräkä bäri jeñe kwe nämänena ye nämäne gare Boaz ie ye mikaninta käne kwe ne kwe rabadre kä ye kököta. (Rut 3:9, 12, 13). Biblia tä kädeke “ja mräkä” (Fulano).

Kenanbe, ja mräkä ye nämäne juto biare kä ye kökaköreta (Rut 4:1-4). Ja mräkä ye käkwe ngwian ribei krübäte jai kä ye kökakäre nämäne gare ie. Noemí namanina umbre krübäte aune monsoi ñan raba nemen ye nämäne gare ie. Ye medenbätä kä kökadre kwe ye ñan rabadre jire Elimélec mräkätre yekwe ñakare aune rikadre jökrä niara kisete. Aisete kenanbe namanina tuin debe ie.

Ja mräkä yekwe ja mäkädrete Rut ben namani gare ie ngwane, ñan tö namani kä ye kökai mada. Niebare kwe: “Ti ñan raba kä ye kököta ñan ñöbätä aune jondron rabadre ti mräkätrekwe ye jökrä riadrete tikän” (Rut 4:5, 6). ¿Ñobätä ja töi kwitani kwe?

Ja mräkä ye o mräkätre mada käkwe ja mäkädrete Rut ben ngwane, monsoi rabadre yekwe kä Elimélec jökrä ye rikadre kisete. ¿Ne käkwe jondron rabadre ja mräkä yekwe ye “juandre ngwarbe” ño kän? Biblia ñan mike gare metre ta. Kukwe ruäre rabadre bare yebätä kukwe ye niebare kwe raba ruin nie ye ani mike gare jai.

• Kena, ja mräkä ye ngwian gitadrekä ngwarbe kwe ñan ñöbätä aune kä kökadre kwe ye rikadreta Elimélec monsoi ye kisete aune ñaka rabadre kwe yebätä.

• Ketebu, Noemí aune Rut rabadre ngübadre ie yebätä.

• Ketamä, ngäbäkre ngübadre bäri Rut ben kwe ngwane, rabadre kä ñäkebiti ja mräkä ngobo yebe ye jürä namanibätä.

• Ketabäkä, ja mräkä yekwe monso mada ñan tädre ngwane, monso ngübadre kwe Rut ben ye kisete kä kwe aune kä Elimeleckwe ye jökrä rikadre yebätä ñan tö namani Noemí dimikai. Boaz ye niara mräkä arato, ye ie kä ye biani kwe aune nakaninbiti ie. Namani debe Boaz kräke ¿ñobätä? Niarakwe niebare erere: “Ne kwe Elimélec kä aune jondron kwe ye tädre jankunu jatäri mräkätre ye köböire” (Rut 4:10).

Ja mräkä ye kä tädre jankunu jatäri aune kä kwe ye arato ye nämäne bäri ütiäte kräke. ¡Ni käbäre rä sera! Ngwarbekäre ja di ngwani kwe, ñan ñäbätä aune kä kwe ye ñan ngwaninta törö. Ne madakäre, kukwe ütiäte juani kwe jabäre ye abokän niara rabadre Mesías Jesukristo mräkätre yekri, Boazkwe abokän kukwe kwin ye namani. Ja mräkä ye käkwe ñaka nire nämäne ja di ribere dimikani, ye köböite ngite ütiä nikani kabre niarabiti ja ngwanbätä käbäre. Kukwe tare krubäte namani barebätä (Mat. 1:5; Luc. 3:23, 32).