NI MIKAKA MOKRE (TÄRÄKWATA JA TÖTIKARA) Abril 2018
Kukwe nebätä ja tötikai 4 junio nemen 8 julio 2018.
¿Ñokänti ni raba nemen tikaninte erametre?
Nitre ruäre tätre ja tare nike, mikata tuin ngwarbe jai aune tätre nüne bobre yebätä rabadre tikaninte känänta kwetre, nitre mada abokän tö dre niei o dre nuain ye erere tuanemetre nuainne ye tätre ribere jai. ¿Ni raba nemen tikaninte erametre?
Jehová, Ngöbö ni tikatekä ye nikwe mikadre täte
¿Üai deme Jehovakwe ni tikaninte ño? ¿Nikwe dre nuaindre ne kwe Ngöbökwe ni tikaninte yebiti nikwe ñaka kukwe blo diandre nuaindre jai?
Ja mräkätre kädekani ji ngwanka, munkwe ja ngwan Timoteo erere
Timoteo jatani sribi misionero nuainne Pablobe ye ngwane kä jürä nämenebätä raba ruin nuen. ¿Timoteo kukwe kwin bämikani yebätä nitre umbre ji ngwanka aune nitre sribikä konkrekasionte raba dre mike gare jai?
Nikwe ja ngwandre Jehová Ngöbö ni dimikaka erere
Nitre Jehová mikaka täte ye dimikadre ye tätre ribere käre jai.
Nengwane nikwe ja dimikadre bäri kwärikwäri
Köbö Jehovakwe nibira ja ken krubäte, ye medebätä, ja mräkätre tä ja di ribere ye dimikakäre käre ni tädre juto biare.
Monso bati, ¿mä töita kwatibe kukwe ja üaire mikabätä nuaindre jai?
Monsotre bati ie kukwe keta kabre tä diandre jai yebätä ruäre ngwane raba nemen nainte. ¿Niaratre raba dre nuainne kukwe kwin diankäre nuaindre jai?
Nitre tä kukwe ngwentari
¿Ñobätä ni ñaka raba tärä aune täräkwata nitre testiko Jehovakwe ye mike Internet käi jeñe nikwe yete o Internet käi mada mada yete?
Nitre tä kukwe ngwentari
¿Kukwe tä Salmo 144:12-15 ye juta Ngöbökwe niebare o nitre menteni töi käme kädekateta bersikulo 11 niebare?
