Ti jataba nirien ngwane, ti ñan jatabara ja kete kwin Jehovabe. Monsotre nänkä kwelate tibe ie kukwe ñäkäi ñaka nämäne. Aune ti tö jataba ja ngwain ye erere, akwa ti rün aune Biblia nämä kukwe ñäkäire krubäte tie jataba ruin tie. Kukwe ja üaire ye jataba tuin tribe doboko ye kwrere tie. Jehová tärä ye nämä gare metre tie, akwa ja üairebiti ja jataba ruin ngwarbe tie.

Kukwe driedre ye ti ñan tuametreba, akwa ti nämä nuainne ja bämikakäre jerekäbe. Ti ñan nämä ja tötike kwin kukwe driekäre, aisete blita kömikadre o blitadre ño jankunu ye ñan nämä nemen nuäre ti kräke. Ye köböite ti ñan nämä ni tuinbiti aune ni tötike. Kukwe driedre ye käi ñaka nämä juto tibätä, ye jataba ti töi mike bäri ñaka kukwe driebätä. Ño ni raba kukwe driere bämän kratire kratire aune sö kratire kratire ye ti jataba ngwentari jai.

Kä rababa 17 tibiti ngwane, nünandre kaibe ye ti jataba ribere krubäte jai. Aisete tikwe ja tribe ükateba biti ti rikaba Australia. Ti rün aune ti meye rababa ti töibikare krubäte, akwa ti rabai  yete ngwane, ti täi sribi ja üairebiti ye nuainne jankunu yei niaratre rababa tö ngwen.

Ti rababa Australia ngwane, bäri jire ti töi ñan jataba sribi Jehovakwe ye nuainbätä. Ti nämä gätä juen krubäte ja bäre aune monsotre bati bati ti erere yebe ti nämä ja kete. Nun nämä niken gätäbätä ye bitikäre köbö madate nun nämä niken dö ñan aune bailare. Nengwane tita töbike kukwe yebätä ngwane, ti brukwä nämä ñäkäninbiti, ruäre ngwane ti tö nämä kukwe metre nuainbätä aune ruäre ngwane ti töi nämä kukwe kä nebätä ye jiebiti, akwa ja ñaka nämä ruin kwin tie.

Kä rikaba kubu ta ye bitikäre, ja eteba iti rababa gare tie abokän käkwe ti mikaba töbiketari ti nämä ja ngwen ño yebätä. Nun nirike kaibe nämä nüne jakänti. Nunkwe ni circuito tuabitikä aune muko kwe Tamara nübaiba nemen bämän krati jakänti. Ja ngwai ye nämä sribi konkrekasionkwe tuinte ngwane, Tamara nämä nemen nunbe, nun nämä kötö aune kä ngwen juto jabätä. Ye mataba kwin tibätä. Ni dite kukwe ja üairebiti abokän raba kä ngwen juto jabätä, ja töi mike bobre aune nuäre blitakäre ben ye ti ñan nämä ngübare.

Kukwe metre aune kukwe driedre ye Tamara nämä tarere krubäte, ye köböire nitre mada tö nämä kukwe ye nuainbätä arato. Akwa ti abokän ñan nämä ja di ngwen krubäte sribikäre Jehová kräke, niara abokän nämä ja di ngwen täte sribi ye nuainkäre yebätä kä nämä jutobätä. Niara nämä ja ngwen kwin aune kä nämä jutobätä ye käkwe kukwe kwin bämikaba ti käne. Kukwe bämikaba kwe ye käkwe kukwe nieta Salmo 100:2 ye ngwanba törö tie, Jehová tö ni jökrä rabadre niara mike täte kä jutobiti.

Kä nämä juto Tamarabätä ye erere ti tö rababa ja tuai, akwa yekäre ti rabadre kukwe ruäre ükete. Ye ñan rababa bare bengwairebe, mrä mada ti jatabara nuainne kiakia jatäri. Ti nämä ja tötike kukwe driekäre, ruäre ngwane ti nämä precursor ausiliar nuainne. Ye käkwe ti dimikaba ñan ja töibikaire aune ja nämä ruin kwin tie. Ti nämä kukwe driere Bibliabiti ye nämä kä mike juto tibätä.  Biti mada tikwe ja töi mikaba prekursor ausiliar nuainne sö kratire kratire.

Ja mräkätre nämä kwin kukwe ja üairebiti aune nämä sribi Jehovakwe nuainne kä jutobiti yebe ti jataba ja kete. Kukwe kwin bämikani kwetre ye käkwe ti dimikaba kukwe ütiäte ye mike nuaindre käne jai aune ja tötike kwin Bibliabätä. Kukwe driedre ye käi jataba bäri juto tibätä, biti mada tikwe ja mikaba prekursor regular. Aune mrä mada, kä rababata juto tibätä aune ja rababa ruin kwin konkrekasionte tie.

Kä rikaba kwati ta ye bitikäre, Alex rababa gare tie. Niara ye abokän töi kwin aune töbike ni madabätä, nämä Jehová aune kukwe drie ye tarere. Niara abokän siervo ministerial aune kä nikanina kwä ti ta yete niara nämä sribi prekursor nuainne. Kä Malaui yekänti ni kukwe driekä ribe nämä bäri yekänti sö ruäre te niarakwe kukwe driebare. Yete namani nüne nitre misionero ruäre ben abokän käkwe kukwe kwin bämikani käne aune töi mikani sribi Gobran Ngöbökwe ye nuainne käne.

Kä 2003 yete nunkwe ja mäkäteba aune nun täbe sribire gwairebe köbö täte Jehová kräke. Kukwe kwin keta kabre namanina gare nunye aune Jehová kukwe kwin keta kabre nuainbarera nun kräke.

Kä 2009 yete, nun nübaiba sribi misionero ye nuainne Timor Oriental, juta chi nemenkä bäsi Indonesia ye ken. Nun töi rababa ñan krütare, kä rababa juto nunbätä aune nun rababa nekwetekä arato. Sö rikaba krärike ta ye bitikäre nun rababa juta bäri kri, Dili yekänti.

Nitre nämä nüne ño, blite ño aune ja ngwen ño bätä dre dre kweta nämä yebätä rababa ja kitadre nunye. Nun nämä kukwe driere ngwane, nitre ñaka jondron bökäne aune ñan ja tötikani krubäte kwe aune nämäne ja tare nike ye nämä ngwen nunye. Aune nitre ye nämä ja tare nike krubäte  aune nämä ja töibikaire rü köböite rababa gare nunye. *

Nun nämä kukwe driere ngwane, kukwe nämä nemen gare nunye ye nämä nun töi mike ñan krütare. Ñodre, bati nun nämä kukwe driere ngwane, monso chi merire kä 13 biti kädekata María kwanba nunye. * Niara nämä ulire krubäte ñobätä ñan aune meye krütani kän ye käi nikani ruäre ta aune bäsi ñan nämä ja tuin rün kwe ben. Monsotre mada erere, Mariakwe dre nuaindre ye ñaka nämä gare ie. Bati muare kwärä ja nämä ruin ño ie ye mikaba gare kwe tie. Akwa ti jämi blite kwin niara kukweibiti yebätä dre nie nämä kwe ye ñan rababa nüke gare tie. Aisete tikwe oraba Jehovai ne kwe ti dimikadre kwe niara töi mike jäme. Biti tikwe ñäkäba texto ruärebätä ie töi mikakäre jäme. Kä rikabara kwati ta ye bitikäre kukwe metre namani gare María ie ye käkwe dimikani. Niara nämäne nüne ño, ja ngwen ño, ja dätere ño, ye tikwe tuaba. Ja ngökaba ñöte kwe ye bitikäre rababara ni tötike Bibliabätä. Ja mräkätre kwati ja üairebiti ngätäite tä, yete ja ruin kwin ie.

Kukwe drieta Timor Oriental ye Jehovata mike nemen bare kwin. Kä kwäjätäbe näre te nitre kwati käkwe ja ngökani ñöte, akwa ruäre niena sribi prekursor regular nuainne, siervo ministerial aune konkrekasion jie ngwen. Mada abokän tä sribire oficina kukwe kwitakäre yekänti. Tätre kantare gätäte, käta kötare ngwärebätä, tätre nirien kukwe ja üairebiti ye tä kä mike juto tibätä.

Ti nämä nüne Timor Oriental ye ñaka ja erebe tita nüne Australia nete yebe. Akwa yete kä nämä juto tibätä. Ruäre ngwane, nun nämä niken bu chi te känti nitre kwati nämä näin, niaratre ye nämä niken gwa nötare aune jondron ngwä kökö jai. Köbö ruäre te nun nämä nitre tötike Bibliabätä ju chi te känti kä ngire krubäte, piso ye abokän dobro be aune kwi nämä kwati krubäte ja kaintari jubäre. Akwa yebiti ta, tikwe töbikaba bati bobu: “Nete ja ruin bäri kwin tie”.

Ti nämä monsore ngwane, ti meye aune ti rün käkwe ja di ngwanba kukwe metre Jehovabätä ye mike gare tie. Aune ti nämä bati ngwane, ti ñan nämä ja ngwen kwin, akwa yebiti ta niaratrekwe ja di ngwanba ti dimike. Yebätä tita töbiketari ngwane, tita debe bien krubäte. Kukwe nieta Proverbios 22:6 ye rababa bare tibätä. Ti aune Alex nun käi juto ti rün aune ti meyebätä. Nunta sribere Jehová kräke ye käi juto niaratrebätä. Sukursal Australasia tä kukwe drie jie ngwen yekänti nunta circuito tuinbiti kä 2016 yete ja käne.

Kenanbe kukwe drie ye nämä tuin tribe doboko ye kwrere tie, akwa nengwane ti tö kukwe driei krubäte. Ja töi mikadre kukwe driere ja brukwä tätebiti kukwe tare yebiti ta, ye aibe köböire kä juto raba nemen nikwe ye gare tie. Kä nikanina 18 ta yete, nunta sribire gwairebe Jehová kräke Alex ben ye tä kä mike bäri juto tibätä. Aisete Davidkwe kukwe niebare Jehová ie Salmo 5:11 yete ye tuin metre tie. Yete nieta: “Nire nire tä ja kriemikamana mäi yebätä kä täi juto. Käre ngwänäinkä kä jutobiti kwe. [...] Nire nire tä mä kä tarere yebätä kä rabai juto mä köböire”.