1, 2. Kukwe nieta 1 Pedro 2:21 ye rükadre gare nie yekäre, ¿kukwe meden bämikata?

KUKWE ne bämike ja töite: ni mada tä näin nibe aune ni iti ie kä gare tä ni jie ngwen ngudre ngrabare kä käme yekänti ta. Batibe niara ñan rabadrera tuin nie, akwa kä jürä ñaka rabadre nibätä ñobätä ñan aune nita näin niara tä ye jiebiti.

² Kukwe bämiri ye erere, ni kristiano erametre tä näin kä käme yete ta. Akwa Jehovakwe ni ni jie ngwanka kwin biani nie ne kwe nikwe nändre “niara ngoto tä jiebiti”, ye abokän monso kwe Jesukristo (1 Ped. 2:21, NGT). Pedro nämäne Jesús ye bämike ni ji ngwanka erere, ye tärä keteiti tä mike gare. Ni ji ngwanka ie kä gare ye tä jiebiti ni iti tä näin, ye erere arato ni raba näin Jesús ye tä jiebiti. ¿Ye dre gärätä? ¿Ñobätä nuaindre? ¿Aune nuaindre ño?

3. ¿Nändre ni iti tä jiebiti nieta ye abokän dre gärätä?

³ ¿Nändre ni iti tä jiebiti nieta ye abokän dre gärätä? Bibliabätä nändre aune tä nieta ye abokän ni iti tä dre nuainne aune tä ja ngwen ño ye meden gärätä (Gén. 6:9; Prov. 4:26). Aisete nändre ni iti tä jiebiti nieta ye abokän nikwe ja ngwandre niara erere.

4. ¿Nändre Jesús tä jiebiti nieta ye abokän dre gärätä?

⁴ Aisete nändre Jesús tä jiebiti nieta ye abokän kukwe braibebiti nie raba, ni rabadre ja ngwen niara erere. Texto dianinkä kukwe ja tötikara ne kräke känti Pedrokwe niebare, Jesukwe  ja tare nikani aune kä ngwani nüke kwe jai yebiti kukwe kwin bämikani kwe ni käne. Akwa kukwe kwin keta kabre mada nuainbare Jesukwe ye erere ni raba ja ngwen arato (1 Ped. 2:18-25). Metrere Jesús nämäne kä tibienbätä ngwane, dre nuainbare kwe aune dre niebare kwe yebiti kukwe kwin bämikani kwe ni käne arato.

5. ¿Ni töi ngite raba ja ngwen Jesús erere? Mä raba mike gare.

⁵ Akwa, ¿ni töi ngite raba ja ngwen Jesús erere? Jän nie raba. Ñobätä ñan aune Jesús töi nämäne metre ye erere nikwe ja ngwandre ribe ñaka nie, akwa dre nuainbare kwe aune ja ngwani ño kwe ye nikwe ja di ngwandre nuainne ribeta nie. Dre drebätä ni raba ja di ngwen nänkäre Jesús jiebiti ye erere nikwe nuaindi ngwane, Jesukristo käkwe nünanbare ño kä nebätä ye kwrere nikwe ja di ngwandre nuainne jankunu niebare apóstol Juankwe ye ni täi mike täte (1 Juan 2:5, 6).

6, 7. Nikwe nändre Jesús tä jiebiti, ¿ye ñobätä raba ni mike nökrö bäri Jehová ken?

⁶ Nikwe ja ngwandi Jesús erere ngwane, ni raba nökrö Jehová ken. ¿Ñobätä? Ñobätä ñan aune Ngöbö tö ni tuai nüne ño ye ererebätä Jesukwe kukwe kwin bämikani ni käne (Juan 8:29). Nita ja ngwen Jesús erere ye käita nemen juto Jehovabätä. Ne madakäre, nire tä ja di ngwen ja ketakäre ni Rün kä kwinbiti yebe ye ken niara tä nökrö (Sant. 4:8).

⁷ Ketebukäre, Jehová ño ye erere Jesukwe bämikani metre. Ye medenbätä niebare kwe: “Nire nire käta ti tuen, ye abko tä ti Rün tuen arato” (Juan 14:9). Jesús töi kwin keta kabre aune nämäne nitre mike tuin ño jai ye erere nikwe ja di ngwain nuainne ngwane, nikwe ja ngwain Jehová erere arato. Ñodre, ni iti nämäne bren lepra kisete ye mikani tuin bobre kwe jai. Meri nämäne ja tare nike bren kisete kä kwati krubäte te ie ja nämäne ruin ño ye  mikani gare kwe jai. Aune nitre kän mräkä krütani ye nämäne mike tuin bobre jai (Mar. 1:40, 41; 5:25-34; Juan 11:33-35). Nikwe ja di ngwain ja ngwankäre Jehová erere ngwane, ni täi bäri niara ken.

8. Nändre Jesús jiebiti, ¿ye raba ni dimike ño ñaka ja töi kwitamana nitre kä nebätä ie? Mä raba mike gare.

⁸ Nikwe ja ngwain Jesús erere ngwane, nikwe ñaka ja töi mikai jondron kä nebätä ye jiebiti. Jesús nämäne mrä kä tibienbätä ngwane, niebare kwe: “Kukwe jökrä Ngöbö rüere kä nebtä abko tikwe ganaibarera kwäräbe” (Juan 16:33). Jesukwe kukwe niebare nebiti mikani gare kwe, niara nämäne töbike ño, nämäne ja ngwen ño aune dre nuaindi kwe ye ñaka tuanimetre kwe kwitadre ni kä nebätä töita ño ie, ñakare aune niara jatani kä tibienbätä Jehová kä mikakäre deme ye ñaka käi kwitaninkä kwe jabiti. ¿Ni abokän käkwe dre nuaindi? Kukwe keta kabre kä nebätä raba ni töi kwite, akwa nikwe ja töi mikai kwatibe Jehová töi nuainne Jesukwe nuainbare erere ngwane, kukwe jökrä Ngöbö rüere kä nebätä nikwe ganaindi (1 Juan 5:5).

9. ¿Nikwe dre nuaindre ne kwe nikwe nändre jankunu ji ja nire kärekäre yebiti?

⁹ Nikwe nändi Jesús jiebiti ngwane, ja nire kärekäre rabai nikwe. “¿Ja nire kärekäre rabadre tikwe yekäre tikwe dre nuaindre?” ye monso bati jondron bökäne ere käkwe ngwanintari Jesús ie aune Jesukwe niebare ie: “Jakwre ja mike nänkä ti jiebiti” (Mat. 19:16-21, TNM). Nitre judío ruäre ñaka nämäne Jesús kain ngäbiti Kristo erere ie niebare kwe: “Obeja tikwe erere tä niken ti jiebti [...]. Amne tikwe obeja tikwetikwe mikadi nüne kärekäre” (Juan 10:24-29). Jesús nämäne dre driere ye Nicodemo ni kukwe ükatekä Sanedrín tö namani mikai gare jai ngwane, Jesukwe niebare ie, nire nire nämäne tödeke niarabiti yekwe ja nire kärekäre rabai (Juan 3:16). Jesukwe dre nuainbare aune dre driebare kwe ye erere nita nuainne ngwane, nita tödeke niarabiti nita bämike. Ye erere nikwe nuaindi ngwane, ji niken ni ngwena ja nire kärekäre kokwäre yebiti nikwe nändi jankunu (Mat. 7:14).

10. ¿Ni raba dre nuainne ne kwe Jesús ye rabadre gare bäri kwin nie? (Juan 17:3).

¹⁰ Ja di ngwandre nänkäre erametre Jesús jiebiti yekäre niara mikadre gare kwin jai (ñäkädre Juan 17:3 yebätä). * Jesús rabadre gare kwin nie yekäre nikwe ja di ngwandre käre niara mike gare jai, ye abokän kukwe kwin nuainbare kwe, nämäne töbike ño aune kukwe ükaninte kwe ye nikwe mikadre gare jai. Nita mekerabe o bitinkä kukwe metre yebätä, akwa ni jökrä raba ja di ngwen Jehová aune Jesús ye mike gare kwin jai.

11. ¿Dre raba nemen gare Evangelio ketabokä yebätä nie?

 ¹¹ Ni tare Jehovakwe, aisete Evangelio ketabokä ye tikamana kwe Bibliabätä ni dimikakäre Jesús mike nüke gare kwin jai. Evangelio ketabokä yete Jesukwe kukwe driebare ño, dre nuainbare kwe, ja ngwani ño kwe aune ja namani ruin ño ie mikata gare. Aune ye käkwe ni dimikai töbiketari kwin Jesukwe kukwe bämikani yebätä (Heb. 12:3). Yete Jesús ye ni ño mikata gare metre. Nikwe ja tötikai Evangelio yebätä ngwane, Jesús rabai gare bäri kwin nie aune nikwe ja di ngwain nänkäre niara jiebiti.

12. Nita ja tötike Evangelio yebätä ngwane, ¿ni raba dre nuainne kukwe mikakäre gare bäri jai?

¹² Nikwe ñaka ñäkädre jerekäbe Evangelio yebätä, ñakare aune nikwe kä diandrekä jai ja tötikakäre aune nita ñäke drebätä yebätä töbikadretari kwin (Josué 1:8 mikadre ñärärä). Nita ñäke Evangelio yebätä ngwane, kukwe ketebu raba ni dimike töbiketaribätä aune mike täte ye ani mike gare jai.

13. Kukwe namani bare mikata gare Evangelio yebätä ye bämikadre metre ja okwäte, ¿yekäre ni raba dre nuainne?

¹³ Kena, kukwe namani bare mikata gare Evangelio yebätä ye bämikadre metre ja okwäte. Yekäre ja rabadre ruin yete nie, dre nämäne nemen bare ye tuakäre aune kukwe nuakäre. Juta Ngöbökwe tä tärä sribere yebätä nikwe kukwe känändre aune textobätä nita ñäke ye känenkri aune bitikäre dre namani bare ye nikwe mikadre gare jai. Nitre kirabe aune kä kirabe yebätä nikwe kukwe mikadre gare jai. Kukwebätä nita ñäke ye mikata gare Evangelio madabätä ngwane, nitre kukwe tikaka käkwe kukwe meden ja erebe aune kukwe meden ñaka ja erebe mikani gare kwetre ye nikwe mikadre gare jai, ye köböire kukwe ütiäte kwain nie.

14, 15. Kukwe mikata gare tärä Evangelio yebätä, ¿ye nikwe mikadre täte yekäre nikwe dre nuaindre?

¹⁴ Ketebu, kukwe tä nemen gare tärä Evangelio yebätä nie ye nikwe nuaindre (Juan 13:17). Nikwe ja tötikadre nguseta tärä Evangelio  yebätä, biti nikwe kukwe ne ngwandretari jai: “¿Ne tä dre driere tie? ¿Ti raba nitre mada dimike ño kukwe yebiti?”. Nita ja tötike ngwane, nikwe töbikadre ni itibätä, biti kä rabadre nie ngwane, blitadre ni yebe kukwe namani gare nie yebätä, akwa töi jämebiti.

¹⁵ Ñodre, meri kän muko krütani nämäne templote tuani Jesukwe yebätä nita ñäke Bibliabätä ngwane, kukwe kädrite ketebu ye ni raba mike ño täte ye ani mike gare jai.

16. ¿Kukwe nieta Marcos 12:41 ye mäkwe tändre ño?

¹⁶ Kukwe bämikadre metre ja okwäte (ñäkädre Marcos 12:41 yebätä). Dre namani bare ye bämike ja okwäte. Köbö 11 nisán kä 33 yete, kä namanina braibe Jesús käne murie ketakäre, akwa niara nämäne kukwe driere jankunu templo yete. Nitre kukwe ngwarbe jie ngwanka namani niara nuinte aune dre nie nämäne kwe ye niaratre ñaka nämäne mike ütiäte jai. Mada abokän namani kukwe ngwentari ie, ne kwe dre niedre kwe ñan rabadre gare ie yekäre (Mar. 11:27-33; 12:13-34). Biti Jesús nikani kä meritre kräke templote yekänti aune jondron dätebare ngwian ükakrökrä ye bäsi ken namani. Nitre jondron bökäne ere nämäne niken ngwian kite krubäte jondron dätebare ngwian ükakrökrä yete. Ngwian kita nämäne jondron dätebare ngwian ükakrökrä yete ye ngö namani ruin menteni ie.

17. Meri bobre kän muko krütani kädekateta Marcos 12:42, ¿yekwe dre nuainbare?

¹⁷ (Ñäkädre Marcos 12:42 yebätä). Kä nikani braibe ta ye bitikäre meri bobre kän muko krütani aune nämäne jondron ribere jai yebätä Jesús okwä namani (Luc. 21:2). Ngwian ñaka nämäne ie jondron kökakäre jai aune dre ribe nämäne kwe jai nünankrä ye ñaka nämäne kwe raba ruin nie. Akwa yebiti ta, nikani käbube jondron dätebare ngwian ükakrökrä yekänti aune ngwian chi kubu kitani kwe yete, bäsi ngö ñan namani. Akwa ngwian kitani kwe yete ye nuäi ye Jesús ie nämäne gare, ye abokän leptón kubube, kä ye näire ñaka nämäne ütiäte krubäte. Nukwä kia rürübäin nämäne bäri brai, akwa ngwian kubu ye ütiä ñan raba näre raba ruin nie.

18. Marcos 12: 43, 44 tä niere erere, ¿meri kän muko krütani käkwe ngwian biani yebätä Jesukwe dre niebare?

¹⁸ (Ñäkädre Marcos 12:43, 44 yebätä). Meri kän muko krütani käkwe dre nuainbare yebätä Jesús töi namani ñan krütare. Aisete nitre ja tötikaka kwe käräbare kwe aune niebare kwe ietre: “Meri bobre kän brare krütani se käkwe ngwian bini bäri kabre ni ngwian bkäne krikri käkwe ngwian kiti kajate Ngöbökrä se ngwä, [...] niaratre käta ngwian namaninte ie aibe bien, akwa meri bobre ye abko käkwe ngwian ngörä nünankrä kwe erere bini jökrä”. Meri kän muko krütani aune ja ngwanka metre yekwe ngwian ngörä nämäne, akwa biani jökrä kwe yebiti Jehovakwe ngübai yei nämäne tö ngwen bämikani kwe (Sal. 26:3).

19. Meri kän muko krütani abokänbätä Jesukwe blitabare, ¿yebätä ni raba kukwe meden ütiäte mike gare jai?

¹⁹ Kukwe tä nemen gare nie ye nikwe nuaindre. Kukwe ne ngwentari jai: “Meri kän muko krütani abokänbätä Jesukwe blitabare, ¿yebätä ti raba dre mike gare jai?”. Töbike niara yebätä. Tö namani ngwian biain bäri, akwa ñan namani bare ie. Akwa yebiti ta, ngwian nämäne nuäi kwe ye erere biani jökrä kwe. Yebiti mikani gare kwe ngwian ye biani ja brukwä tätebiti kwe Jehová kräke. Niarakwe ngwian chi biani, akwa ye namani ütiäte Jehová kräke ye nämäne gare Jesús ie. Ye tä kukwe ütiäte mike gare nie, ye abokän nikwe Jehová mikadre täte ja brukwä tätebiti ye tä kä mike juto Jehovabätä (Mat. 22:37; Col. 3:23). Ñodre, nita ja di ngwen kä denkä jai niara  mikakäre täte, kukwe driekäre, ja tötikakrä gätä kräke ye tä kä mike juto niarabätä.

20. Meri bobre kän muko krütani yebätä kukwe nibi gare nie, ¿yebiti ni raba dre dre nuainne?

²⁰ Meri bobre kän muko krütani yebätä kukwe nibi gare nie, ¿yebiti ni raba dre dre nuainne? Ja mräkätre o ja ngwaitre niena umbre yebätä ni raba töbike. Niaratre ñan niena kukwe driere käne erere yebätä ja ruin ngwarbe ietre. O ruäre abokän tä ja tare nike bren tare kisete yebätä ñan raba näin gätäbätä o kukwe driere yebätä ja ruin ngite ie. ¿Ni raba niaratre dimike ño? Ni raba kukwe kwin niere ietre niaratre töi mikakäre jäme (Efes. 4:29). Meri bobre kän muko krütani yebätä kukwe ütiäte nibi gare nie ye nikwe niedre ietre. Nikwe dre niei ietre yebiti, niaratre tä ja di ngwen Jehová mikakäre täte ye käita juto Jehovabätä rabai gare ietre (Prov. 15:23; 1 Tes. 5:11). Ja mräkätre tä ja di ngwen Jehová mikakäre täte yebätä nita kukwe kwin niere ie ngwane, nita ja ngwen Jesús erere.

21. ¿Mäkwe ja töi mikai kwatibe dre nuainbätä?

²¹ Jesukwe ja ngwani ño aune dre nuainbare kwe ye mikata gare bä kabre Evangelio yebätä ne kwe nikwe ja ngwandre niara erere, yebätä nita debe bien krubäte. Ni raba kukwe ükete jai ja tötikakäre kaibe o ni mräkäbe kukwe mikakäre gare bäri jai Evangelio jökräbätä. Yekäre, dre namani bare ye nikwe bämikadre metre ja okwäte, biti nikwe nuaindre. Akwa Jesukwe dre nuainbare ye nikwe nuaindre ye ñan aibe ngörä, ñakare aune dre niebare kwe ye nikwe kukwe nuadre ye ütiäte krubäte. Aisete Jesús nämäne metani kribätä ngwane, dre niebare mrä kwe yebätä nikwe ja tötikai kukwe ja tötikara mada yekänti.