David kukwe niebare Salmo 22:1, ¿ye ñobätä Jesukwe kädekaninte niara jämi murie niken ye känenkri?

Mateo 27:46 tä niere erere, Jesús jämi murie niken känenkri niebare kwe: “Ngöbö tikwe, Ngöbö tikwe, ¿ñobtä makwe kä mirikä tibtä?”. Kukwe niebare kwe yebiti profecía niebare Davidkwe Salmo 22:1 yete ye namani bare (Mar. 15:34). Nierare Jehovakwe Jesús mikaninte kaibe o Jesús ñan namanina tödeke ye ñan aibätä kukwe ye niebareta kwe, ñakare aune ñobätä ja nire biandre kwe ye nämäne gare metre ie aune töi nämäne kwatibe nuainbätä (Mat. 16:21; 20:28). Arato, Jesús krütadre känenkri Jehová ñan rabadre kriemike ye nämäne gare metre ie (Job 1:10). Jehová ñaka Jesús kriemikani ne kwe ja tare nikadre kwe yebiti ta rabadre ja ngwen metre ye bämikadre kwe (Mar. 14:35, 36).

Ye erere akräke, ¿ñobätä Jesukwe kukwe ye niebare? Ye ñaka gare metre ta nie, akwa kukwe ruärebätä kukwe ye niebare kwe raba ruin nie ye ani mike gare jai. *

Jesús murie ketadre ye ngwane, Jehovakwe ñaka kriemikai ye niara tö namani mikai gare kukwe niebare kwe yebiti raba ruin nie. Jehovakwe ñaka niara dimikadre ni kökatarikäre, ñakare aune kaibe ja nire biandre kwe murie ketadre ni jökrä täte aune ni jökrä kräke (Heb. 2:9).

Jesukwe kukwe ruäre Salmo 22 yebätä kädekaninte ne kwe Salmo ye jökrä rükadreta törö nitre ie raba ruin nie. Kä ye näire, nitre  judío nämäne Salmo jökrä mike gare ja töibiti jai. Ye medenbätä, bersikulo keteiti ngwandre törö ietre ngwane, Salmo jökrä rükadre törö ietre. Ye erere Jesús tö namani nuaindi akräke, niara murie ketadre yebätä profecía nämäne keta kabre Salmo 22 yete ye niara tö namani ngwainta törö nitre ja tötikaka kwe ie raba ruin nie (Sal. 22:7, 8, 15, 16, 18, 24). Ne madakäre, Jehová aibe rabai gobrane kä jökräbiti tibien ye mikata gare Salmo mrä yebätä (Sal. 22:27-31).

Davidkwe kukwe niebare ye Jesukwe kädekaninte, yebiti niara ñaka ngite tö namani mikai gare raba ruin nie. Jesús nämäne blite blo Ngöbö rüere nie nämänebätä, yebätä kukwe ñaka kwin ükaninte kräke niara murie keta jämi ye känenkri (Mat. 26:65, 66). Nitre käkwe ja ükaninkrö jötrö ngwarbe dibire ta kukwe ye ükatekäre, akwa ükadrete ño ye erere ñan ükaninte kwetre (Mat. 26:59; Mar. 14:56-59). Kukwe kädekaninte kwe yebiti tö namani mikai gare niara ñaka ngite, aisete ñan ngwandre ja tare nike kore, raba ruin nie.

David, ni Salmo ne tikaka ye nämäne ja tare nike, akwa ye ñan aibätä Jehová ñan nämäne kai ngäbiti ye Jesús tö namani ngwainta törö nitre ie, medenbätä kukwe ye kädekaninte kwe raba ruin nie. David ñan namanina tödeke ye ñan ai gäräbare kwe ñobätä ñan aune kukwe ngwanintari kwe ye bitikäre, Ngöbö raba ni niara mikaka täte ye mike kwäre ye ie nämäne tö ngwen mikani gare kwe. Aune Jehovakwe kukwe kwin mikani nemen bare jankunu kräke (Sal. 22:23, 24, 27). Ye erere arato, Jesús, David monsoi nämäne ja tare nike kribätä ngwane, Jehová ñan nämäne kain ngäbiti ye ñan ai mika nämäne gare kukwe yebiti (Mat. 21:9).

¿Akräke Jehovakwe ñaka Jesús kriemikani kukwe yebätä ye namani tare ie medenbätä kukwe ye niebare kwe raba ruin nie? Adán aune Eva ja mikani ngite ye bitikäre, Jesús ja tare nikadre aune ja nire biandre murie ketadre ye ribe namani. Akwa ye erere Jehová ñan töi nämäne kena. Jesús ñan ja mikani ngite, ñakare aune ja tare nikani kwe aune ja biani murie ketadre kwe, ne kwe Satana nämäne kukwe ngwarbe niere mikakäre gare, ni kökatarikäre aune kukwe nianinte ni kä nebätä yekän ye jökrä rabadreta nikwe yekäre (Mar. 8:31; 1 Ped. 2:21-24, TNM). Akwa kukwe ye rabadre bare yekäre, Jehovakwe ñaka Jesús kriemikadre nämäne ja tare nike ye ngwane.

Ñobätä Jehovakwe Jesús tuanimetre ja tare nike kore yebätä Jesús tö namani nitre ja tötikaka kwe ye tuai töbike medenbätä kukwe ye niebare kwe raba ruin nie. * Jesús murie ketani kribätä ni ja ngwanka käme erere, ye käkwe nitre kwati ngwain ngoto ritekä nämäne gare ie (1 Cor. 1:23, TNM). Aisete, ñobätä niarakwe ja tare nikadre kore yebätä nitre ja tötikaka kwe käkwe ja töi mikadre ngwane, ye käkwe niaratre dimikadre kukwe ye mike gare kwin jai (Gál. 3:13, 14, TNM). Ye köböire, ñaka Jesús mikai tuin kwetre jai ni ja ngwanka käme ye kwrere, ñakare aune ni ni mikaka kwäre ye erere.

Ñobätä Jesukwe kukwe ye niebare ye ñaka gare metre ta nie. Akwa niara murie ketani kribätä ye köböire Jehová töi mikani nemen bare kwe ye nämäne gare metre ie. Ye bätäräbe niebare kwe: “Nibira bare” (Juan 19:30; Luc. 22:37). Ja tare nikani kwe ngwane, Jehovakwe ñaka kriemikani ne kwe jatani dre dre nuainne kä tibienbätä ye rabadre bare jökrä ie yekäre. Ye köböire dre tikani Moisekwe, nitre Ngöbö kukwei niekä yekwe aune tärä Salmos yebätä ye jökrä rabadre bare niarabätä (Luc. 24:44).