1. ¿Dreta kä mike juto nibätä?

 KÄ TÄDRE käre juto nibätä ye ie Jehová tö. Ye gare nie ñobätä ñan aune üai deme tä ni tö mike keta kabre kwin, ye ngätäite kä juto tä (Gál. 5:22). Jondron bianta nie ye ñan tä kä mike bäri juto nibätä, ñakare aune nita jondron bien ni madai ye tä kä mike juto krubäte nibätä. Ye medenbätä, käre nita kukwe driere aune ja mräkätre mada dimike ngwane, jata nemen ruen kwin krubäte nie (Hech. 20:35).

2, 3. a) Gálatas 6:4 tä niere erere, ¿dre raba ni dimike ne kwe kä juto ñaka riadrete nikän? b) ¿Dre rabai gare nie kukwe ja tötikara nekänti?

² ¿Dre raba ni dimike ne kwe kä juto ñaka riadrete nikän? Kukwe ketebu raba ni dimike kukwe nekänti ye apóstol Pablo mikani gare. Raba kwen nie Gálatas 6:4 yete (ñäkädrebätä). Kena, nita sribire Jehová kräke ye nita nuainne bäri kwin ngwane, kukwe tärä nie kä ngwankäre juto jabätä. Aune kukwe ye ni jökrä raba nuainne (Mat. 22:36-38). Ketebu, ni ñaka rabadre ja ñäke ni madabe. Nita kwin, ni tötikabare kwin o kukwe ruäre nuain gare kwin nierare nie, ye köböire kukwe ruäre nuain gare kwin nie. Yebätä ni rabadre debe bien Jehovai, ñobätä ñan aune dreta nikwe ye Jehová tä bien nie. Ne madakäre, kukwe ruärebätä ja mräkätre mada ie kukwe drie gare bäri kwin kukwe driebätä ni kräke ngwane, ñan tä nuainne ja mikakäre ütiäte ni mada okwäbiti o töita jabebätä yebätä tä nuainne, ñakare aune tä nuainne Jehová käikitakakäre ye käi tädre juto nibätä. Nikwe ñaka ja gadre niaratre ben, ñakare aune nikwe ja kitadre bätätre.

³ Ni tö dre nuainbätä ye jökrä ñan tä nemen bare nie sribi nuainbätä Jehová kräke ngwane, dre käkwe ni dimikai ñaka ja di ngwen nekä ye rabai gare nie kukwe ja tötikara nekänti. Kukwe ruäre tä nemen gare nie ni madabätä ja töi kräke aune kukwe ruäre mada abokän nuain gare kwin nie yebiti ni raba sribi nuainne ño kwin ye rabai gare nie kukwe ja tötikara nekänti arato.

4. ¿Dre raba ni ngwen di nekä? Dre namani bäre Carolbätä ye mä raba mike gare.

⁴ Ja mräkätre ruäre niena umbre o tä bren yebätä ñan raba sribi nuainne krubäte Jehová kräke, yebätä jata nemen ruin di nekä ietre. Ye erere namani bare meri iti testiko kädekata Carol yebätä. Niarakwe sribibare kä ruäre te, konkrekasion känti nitre dirikä ribe nämäne yekänti. Niarakwe nitre 35 näre tötikani Bibliabätä aune nitre kwati dimikani kwe ja denkä mento Jehová kräke aune ja ngökö ñöte. ¡Kukwe kwin krubäte namani bäre! Akwa niara näkäni bren aune ñan namani dikekä kwäräkwärä. Niara tä niere: “Ti bren yebätä ti ñan raba kukwe nuainne krubäte ye gare tie. Akwa yebiti ta ti ñan tä ja ngwen metre ja mräkätre mada erere tä nemen ruin tie. Ti tö kukwe nuainbätä akwa ti ñan raba nuainne jökrä ye tä ti ngwen di nekä krubäte”. Carol raba dre nuainne ye jökrä tö nuainbätä Jehová kräke aune ye kwin krubäte. Niara tä juto biarebe ye ütiäte krubäte Jehová ni mikaka tuin bobre jai kräke, ye tädre gare metre nie.

5. a) Ni tö dre nuainbätä ye jökrä ni ñan raba nuainne yebätä ja ruen di nekä nie ngwane, ¿nikwe dre ngwandre törö jai? b) Üai kukwe ja tötikara ne kräkebätä tä mikani erere, ¿ja mräkä ne tä käre sribi nuainne ño kwin Jehová kräke?

⁵ Ni töta nemen kukwe nuain akwa ruäre ñaka tä nemen bare jökrä nie, yebätä ja raba nemen ruen di nekä nie. Ni rabadre kukwe ne ngwentari jai: ¿Jehová tä dre ribere tie? Nikwe sribidre bäri kwin kräke ye ngübata kwe, ye abokän kukwe meden tä ni kisete ye ererebätä ni rabadre ja di ngwen sribi nuainne kräke. Kukwe bämikabike nebätä töbike. Meri testiko iti kä niena 80 biti, ja ruin di nekä ie ñobätä ñan aune kä nämäne 40 biti ngwane, nämäne sribire krubäte Jehová kräke ye erere ñan raba nuainne yebätä. Niara tä ja di ngwen sribikäre Jehová kräke, akwa yebiti ta niara käi ñaka nuäre Jehovabätä tä nütüre. ¿Akwa ye metre? Ani mike ñärärä. Kä nämäne 40 biti ye ngwane, nämäne ja di ngwen sribi nuainne kwin Jehová kräke aune kä niena 80 niarabiti täbe ja di ngwen sribi nuainne kwin Jehová kräke, metrere niara täbe sribire kwin Jehovakrä. Nita sribi nuainne ye ñan kwin dikaro Jehová okwäbiti ni jatadre töbike ngwane, dre kwin aune dre ñaka kwin Jehová kräke ye tä gare niarai ye nikwe ngwandre törö jai. Nikwe ja di ngwain sribi nuainne kwin ye ngwane, “bäri kuin” Jehovakwe niedi nie (Mateo 25:20-23 mikadre ñärärä).

6. ¿Kukwe namani bare Mariabätä ye tä dre driere nie?

⁶ Kukwe keteiti raba ni dimike ye abokän, ni ñaka raba dre nuainne yebätä nikwe ñan ja töi mikadre metrere, ñakare aune ni raba dre nuainne yebätä nikwe ja töi mikadre metrere, ye käkwe ni dimikai käre kä ngwen juto jabätä. Meri testiko iti kädekata María tä bren, yebätä ñan raba kukwe driere krubäte yebätä ani blite. Kenanbe, ja nämäne nemen ruen ulire ie aune ja nämäne nemen ruen ngwarbe ie. Akwa konkrekasion kwe yete meri testiko mada nämäne bren jänbiti o camanbiti ye namani gare ie. Aisete ja töi mikani kwe dimike. María tä niere: “Tikwe kukwe ükateba jai nänkäre niara gwirete dirikäre ben telefonobiti aune tärä tike. Käre ti nämä nikenta gwäta kä jutobiti aune ja nämä nemen ruen kwin tie ñobätä ñan aune ti nämä ti eteba ye dimike krubäte”. Ye erere arato ni ñaka raba dre nuainne yebätä ni ñaka ja töi mikadre metrere, ñakare aune ni raba dre nuainne yebätä nikwe ja töi mikadre metrere, ye käkwe ni dimikai käre kä ngwen juto jabätä. Ni raba sribire bäri o kukwe ruäre nuain gare bäri kwin nie kukwe driebätä ngwane, ¿dre raba nemen bare?

7. ¿Apóstol Pedro mäträbare ño kwin nitre kristianobätä?

⁷ Apóstol Pedro tärä tikani kena üai deme köböire, yekänti ja mräkätre töi mikani kwe kukwe nuain gare ietre yebiti ja mräkätre mada dimike. 1 Pedro 4:10 yekänti tikabare kwe: “Ngöbökwe ja moto mikani kuin munkrä, käkwe ja di biani bätäkä ngwarbe munye abkobti munkwe sribidre,  ye kwrere munkwe sribi kuin ni mda mdakrä, Ngöbökwe ja moto mikani kuin bätäkä ngwarbe munkrä, ye kwrere munkwe sribi”. Dre nuain gare nie yebiti nikwe ja di ngwandre sribi nuainne aune ye köböite ni mada raba bätä ngwen nibätä o ni raba ngwen di nekä, yebätä nikwe ñaka ja töi mikadre krubäte dikaro. Ñobätä ñan aune dre nuain gare kwin nie yebiti nikwe ñaka sribidi ngwane, ni ñaka tädi sribire kwin Jehová kräke.

8. 1 Corintios 4:6, 7 tä niere erere, ¿ñobätä nikwe ñaka ja dikaidre kukwe nuain gare nie yebiti?

⁸ Dre dre nuain gare nie yebiti ni rabadre sribi nuainne, akwa nikwe ja ngübadrebiti ñan ja dikaikäre (ñäkädre 1 Corintios 4:6, 7 yebätä). Ñodre, tä nemen nuäre krubäte mä kräke ja tötika Bibliabätä kömikakäre. ¡Mä raba nuainne jankunu! Akwa dre nuain gare kwin mäi yebiti mäkwe sribidre aune mäkwe nuaindre ja dikaikäre ye ñaka ja erebe. Bitinkä kukwe kwin namani bare mäbätä kukwe driebätä aune mäkwe ja tötika kömikani ni iti ben ye bämike ja okwäte. Yebätä namani bare ño ño ye mä tö mikai gare grupo kukwe dirikä mäbe ye ie. Akwa mä nibira grupo mäbe dirikäre yekänti ngwane, meri testiko mada käkwe täräkwata mikaninte kati ni iti ie ye tä mike gare ye kukwe juruani mäi. Niarakwe täräkwata mikaninte kati, mä abokän käkwe ja tötika Bibliabätä kömikani ni iti ben. ¿Mäkwe dre nuaindi? Kukwe kwin namani bäre mäbätä ye käkwe ja mräkätre dimikai krubäte gare mäi, akwa meri testiko käkwe täräkwata biani kati yebätä kä tädre juto jankunu yekäre, mä ja töi mikadre kukwe kwin namani bare mäbätä niekäre köbö madabiti ruin nunye. ¡Mätä ja töi mike kwin krubäte ni mada kräke! Akwa mäkwe ja tötika Bibliabätä ye drie jankunu. Kukwe nuain gare mäi yebiti mäkwe sribi.

9. ¿Kukwe nuain gare nie yebiti ni raba dre nuainne?

⁹ Kukwe ruäre gare kwin nie ye Jehová tä bien nie ye nikwe ngwandre törö jai. Aisete kukwe nuain gare kwin nie yebiti nikwe ja mräkätre dimikadre aune ñaka ja bämikakäre ütiäte (Filip. 2:3). Ni die aune kukwe nuain gare nie yebiti nita Ngöbö töi nuainne ngwane, kukwe tärä nie kä ngwankäre juto jabätä. ¿Ñobätä? Ñobätä ñan aune dreta nikwe yebiti nita sribi nuainne ñan ja bämikakäre ütiäte ni madabätä o ja rabadre ruen ngwarbe ni madai nibätä yekäre ni ñan tä nuainne, ñakare aune yebiti nita kukwe nuainne Jehová käikitakakäre.

10. ¿Ja ñäkätä ni madabätä ye ñobätä ñaka kwin?

¹⁰ Ni ñaka ja ngübarebiti ngwane, dre nuain gare kwin nie yebiti ni raba kite ja ñäke ni madabe kukwe nuain ñan gare kwin ie yebätä. Ani bämike keteiti. Ja mräkä iti ie kukwe kädrie gare kwin raba ruen nie. Ye abokän kukwe nuain gare ie. Akwa ja mräkä mada kräke ñan nemen nuäre kukwe kädriekäre, yebätä ja ruen ütiäte ie ja brukwäte raba ruen nie. Akwa ja mräkä ie ñan tä nemen nuäre kukwe kädriekäre ye ie kukwe mada  nuain gare kwin. Ñodre, tä nitre mada kai ngäbiti kwin ja gwirete, monsotre kwe ngübata kwin kwe aune tä käre kukwe driere kä jutobiti raba ruin nie. Etebantre aune ngwaitre kwati ie kukwe nuain gare kwin, yebiti tä sribire Jehová kräke aune ja mräkätre dimikakäre yebätä nita debe bien krubäte.

11. ¿Ñobätä nikwe ja di ngwandre jankunu ja ngwankäre Jesús erere?

¹¹ Nikwe ja ñäkädre ni madabätä ye ñaka kwin, akwa ja mräkätre mada Jehová mikaka täte tä kukwe kwin bämike ye nikwe mikai ñärärä ngwane, nikwe ja kitai krubäte niaratrebätä. Ani töbike Jesubätä niara abokän kukwe kwin bämikaka ni käne. Ni ñan töi metre niara erere, akwa niara töi kwin keta kabre bä nuäre aune ja ngwanta ño kwe yebätä kukwe raba nemen gare nie (1 Ped. 2:21). Nikwe ja di ngwain näin Jesús tä jiebiti ngwane, ni rabai Jehová mike täte bäri kwin aune kukwe kwin rabai bare nie kukwe driebätä.

12, 13. ¿Rei David yebätä dre raba nemen gare nie?

¹² Nitre kwati brare aune merire töi ngite, akwa kukwe kwin bämikani kwe ni käne yebätä Biblia tä blite (Heb. 6:12). Iti ye abokän rei David. Jehovakwe niebarebätä: Ni “käkwe nünandre ño, ie ti tö, erere tä nüne amne, dre nuendre kwe, ie ti tö, erere tä biare nuene” ye kwanina tie (Hech. 13:22). David ye ñan töi metre aune ruäre ngwane ja mikani ngite krubäte kwe. Akwa yebiti ta kukwe kwin bämikani kwe ni käne. ¿Ñobätä? Ñobätä ñan aune mäträbarebätä ngwane, ñaka kukwe mikani jabiti kwe. Ñakare aune mäträbarebätä ye kani ngäbiti kwe aune ja töi kwitani bökän kwe. Yebätä Jehovakwe ngite kitani tabiti (Sal. 51:3, 4, 10-12).

¹³ Davidkwe kukwe bämikani ye raba ni dimike, kukwe ngwantarita ne kwrere nikwe ngwaintari jai ngwane: “¿Ni iti tä mäträre tibätä ngwane tita kain ngäbiti ño? ¿Tita ja mike ngite ye bengwairebe nüke gare tie o tita nemen kukwe mike jabiti? ¿Bengwairebe tita ngite kite ni madabiti? ¿Tita ja di ngwen ñaka ja miketa ngite?”. Nitre brare aune merire ja ngwanka metre kädekateta Bibliabätä yebätä ja tötikadre ngwane, kukwe ne erere ni raba ngwentari jai. ¿Kukwe ben nita ja tuen ye erere ben ja tuani kwetre? ¿Töi kwin meden meden bämikani kwetre? Kukwe nekänti ni raba ngwentari jai: “¿Ni Jehová mikaka täte metre ne erere ti raba ja ngwen ño?”.

14. Ja mräkätre tä kukwe kwin bämike ye nita mike ñärärä ngwane, ¿kukwe ye tä ni dimike ño?

¹⁴ Ja mräkätre umbre aune bati yebätä ni raba ja kite krubäte arato. Ja mräkä konkrekasion nikwe te tä ja tuen kukwe tare ben, akwa tä tödeke jankunu, ñodre, monsotre bati mada tä mike ja dibiti kukwe käme nuainne, mräkätre kwe tä ja mike rüere o tä bren raba ruin nie. ¿Ja mräkä ye tä töi meden kwin bämike ye erere ni raba ja töi ükete kwin? Ja mräkä tä kukwe kwin bämike ye  nikwe mikai ñärärä ngwane, kukwe kwin rabai gare niarabätä nie ye käkwe ni dimikai ja tuakäre kukwe tare ben. Nitreta kukwe kwin bämike yebätä nita mike ütiäte krubäte jai, ¿ñan ererea? Ye tä kukwe kwin bämike ni käne yebätä nita debe bien krubäte (Heb. 13:7; Sant. 1:2, 3).

15. Kukwe meden niebare Pablokwe mäträkäre, ¿ye raba ni dimike sribire kä jutobiti jankunu Jehová kräke?

¹⁵ Ni jökräkwe ja di ngwain sribire bäri Jehová kräke ngwane, nikwe nünandi jäme aune keteitibe konkrekasionte. Ye erere nitre kristiano siklo kena nuainbare. Niaratre ie kukwe jene jene nuain nämäne gare aune sribi jene jene nämäne kötärä (1 Cor. 12:4, 7-11). Akwa kukwe nebiti niaratre ñaka nämäne ja gain aune ja ñäkebiti. Ñakare aune Pablokwe kukwe tikani nitre efesio ie yete itire itire rabadre ja di ngwen “Kristo ngrabare rabadre niren nebe täte jökrä abkokäre” niebäre kwe. Aune niebare kwe arato: “Nita kuin jökrä ngrabare gwaire Kristobtä, ye ngwane ni itire itire käkwe sribi jen kwe nuendre niara mräkä mda mda die mikakäre angwane, ni rikai niren kuin gwaire jökrä jabtä, käta niken ja tarere kwärikwäri” (Efes. 4:1-3, 11, 12, 16). Nitre ye käkwe kukwe ye nuainbare ngwane, ja mräkätre konkrekasionte töi mikani nüne jäme aune keteitibe kwetre aune töi kwin ne erere tuen nie konkrekasionte kä nengwane.

16. ¿Mäkwe ja töi mikadre kwatibe dre nuainne? (Hebreos 6:10).

¹⁶ Mäkwe ja töi mika kwatibe ñaka ja ñäke ni madabe. Ñakare aune mäkwe Jesús mika ñärärä aune niara töi kwin keta kabre ye erere mäkwe ja di ngwan ja töi mike. Nitre kira aune kä nengwane tä tödeke yebätä mäkwe ja kita. Mäkwe ja di ngwan jankunu sribi nuainne bäri kwin Jehová kräke ‘ñobätä ñan aune niara töi ñaka ngite aune mäkwe sribibare ye niara ñaka käi kwitekä jabiti’ ngwen törö jai (ñäkädre Hebreos 6:10 yebätä). b Mäkwe sribi jankunu kä jutobiti Jehová kräke ñobätä ñan aune mätä ja di ngwen kä mikakäre jutobätä, ye niara tä mike ütiäte jai tädre ye gare metre mäi.