Ni brare iti ja mäkäninteta ye ngwane, nämäne ja mäkäninte käne ye mikani krüte kwe aune tä ja mäkäninte bitinkä ye metre, ye erere konkrekasion rabadre mike tuin jai. Ñobätä kukwe ye erere nieta ye mikakäre gare jai, yekäre ja tuadremetre aune ja mäkädreteta yebätä Jesukwe dre niebare ye ani mike gare jai.

Kukwe keteiti aibebätä nitre gure raba ja tuenmetre ye mikani gare Jesukwe Mateo 19:9 yebätä. Yete nieta: “Meri ja mike ngite ñakare brare mda mdabe, akwa brare kwe käkwe tuadremetre, bti ja mikadre gure meri mdabe kwe, ye ngwane ni brare ye tä ja mike ngite meri yebe meri käne kwe rüere”. Kukwe niebare Jesukwe yebätä kukwe ketebu nemen gare nie 1) ni ja mäkäninte nemen kämekäme ni madabe ye aibe ngwane, raba ja tuenmetre aune kukwe ükete jai ja tuametrekäre ye mikata gare Bibliabätä aune 2) ni brare iti käkwe ja tuadremetre muko kwe ben akwa dre nieta Bibliabätä ye ñan ererebätä biti tä ja mäketeta ni madabe ngwane, tä nemen kämekäme ni madabe. a

Ni brare iti rabadre kämekäme meri madabe aune ja tuadremetre kwe muko kwe ben ye ngwane kukwe ñaka ketebätä ja mäkätekäreta, ¿ye ai gäräbare Jesukwe? Ye ñan ai gäräbare Jesukwe. Nitre ja mäkäninte ye iti rabadre kämekäme ni madabe ye ngwane, meden ñaka ja mike ngite ye raba ja töi mike ngite juen tabiti o ñan kain ngäbiti. Ja töi mikai kwe ñaka kain ngäbiti aune kukwe ükaite kwe ja tuametrekäre ngwane, niaratre nibu ye kukwe ñaka raba ketebätä ja mäkätekäreta tärä ükateta ünä kwetre ye bitikäre.

Ne madakäre, muko ñaka ja mikani ngite ye tö rabadre ngite kitai ta muko ja mikani ngite yebiti ta ne kwe tädre ja mäkäninte jankunu. Akwa muko kwe ja mikani ngite käkwe ñaka kukwe ye kadre ngäbiti aune ja töi mikadre kwe tärä ükete ja tuametrekäre ngwane, ¿dre nie raba? Muko tä juto biare ngite kitakäre tabiti ne kwe tädre jankunu ja mäkäninte aune muko kwe brare ñaka raba ja mäketeta ñobätä ñan aune kukwe ye ñäkäita Bibliabätä. Kukwe ñäkäita Bibliabätä ye ñaka mikata ütiäte kwe jai aune yebiti ta tä ja tuenmetre aune ñaka raba ja mäkete akwa tä ja mäkäteta ngwane tä nementa kämekäme ni madabe. Kukwe ye erere rabadre bare ngwane, nitre umbre ji ngwanka konkrekasionte rabadre comité judicial nuainnenta kukwe ye tuabitikäreta (1 Cor. 5:1, 2; 6:9, 10, TNM).

Kukwe nieta Bibliabätä ye ererebätä ni brare iti ñaka raba ja mäkete akwa ja mäkädreteta kwe ngwane, nämäne ja mäkäninte käne aune ja mäkäninte bitinkä kwe, ¿ye konkrekasionkwe mikadre tuin ño jai? ¿Nämäne ja mäkäninte käne ye täbe ütiäte kukwe nieta Bibliakwe ye ererebätä? ¿Meri ñaka ja mikani ngite ye raba ja töi mike känime ngite juen ta muko kwebiti o ja töi mike kain ngäbiti? ¿Niaratre tä ja mäkäninte bitinkä ye abokän tä nemen kämekäme jabe ye nie rababätä?

Nire nämäne ja mäketeta ye nämäne nemen kämekäme ni madabe ye erere mika nämäne tuin jai. Ñobätä ñan aune muko kwe ñaka ja mikani ngite ye tä nire, ñaka ja mäketeta aune nemen kämekäme ni madabe yebätä. Ja tuadremetre biti ja mäkädreteta yebätä blitabare Jesukwe ngwane, nitre  gure meden ñaka ja mikani ngite yebätä Jesukwe ñan blitabare metrere, ñakare aune kukwe nieta Bibliabätä ye ni iti ñaka tä mike ütiäte biti tä ja mäketeta ni madabe ye ngwane, tä nemen kämekäme ni madabe ye kwrere ye mikani gare Jesukwe. Ye erere rakadrekä ngwane ja tuanimetre kwe aune tä ja mäketeta ye ngwane, tä nemen kämekäme ni madabe ye kwrere aune nämäne ja mäkäninte käne ye tä mike krüte ye mikani gare Jesukwe.

Nire tä ja tuenmetre biti tä ja mäketeta ni madabe ngwane, nämäne ja mäkäninte käne ye tä mike krüte aune muko kwe ñaka ja mikani ngite ye rabadre ngite juen tabiti o kain ngäbiti ye ñaka tä nuaindre ie mada. Ye medenbätä, muko meden ñaka ja mikani ngite ye käkwe kukwe ütiäte ye diandre jai ye ñaka tä nuaindre ie mada. Ne madakäre, muko meden ñan ja mikani ngite jämi krüte, ñaka ja mäkete aune ñan nemen kämekäme ni madabe, yebätä ja mikata gure mrä ye ñan ütiäte ye erere konkrekasion ñaka mikadre tuin jai. b

Kukwe bämiri kena yete muko brare namani kämekäme ni madabe yebätä ja tuanimetre kwe miri gare. Akwa muko brare ye ñaka ja rabadre kämekäme ni madabe aune ja tuadremetre kwe biti ja mäkädreteta kwe, ¿yebätä dre nie raba? O ni brare ye ñaka rabadre kämekäme ni madabe jämi ja tuametre ye känenkri aune bitikäre rabadre kämekäme ni madabe aune muko kwe tädre juto biare ngite kitakäre tabiti akwa yebiti ta ja mäkädreteta kwe ngwane, ¿dre nie raba? Kukwe ne känti nire tä ja tuenmetre aune tä ja mäketeta yebiti tä nemen kämekäme ni madabe ye kwrere. Aisete nämäne ja mäkäninte käne ye mikata krüte kwe aune tä ja mäketeta mrä ye tä nemen ütiäte. “Nire tä ja mäketeta ye ñaka raba muko kwe tuenmetre biti nikenta muko käne kwe yekänti, ñobätä ñan aune namani kämekäme ni madabe aune ja mäkäninteta kwe yebiti nämäne ja mäkäninte käne ye mike krüte”, ye mikani gare La Atalaya 15 febrero 1980, página 30 yebätä.

Kukwe mikata gare mrä nebiti ja mäkäteta ye ñan ütiäte krubäte aune ni tä nemen kämekäme ni madabe ye ñan käme krubäte ye ñan ai mikata gare. Nire ñaka raba ja mäketeta kukwe nieta Bibliakwe ye ererebätä aune yebiti ta tä ja mäketeta ngwane, nitre umbre ji ngwanka rabadre comité judicial nuainne ñobätä ñan aune ni ye namani kämekäme ni madabe. (Muko mrä kwe ye testiko arato ngwane comité judicial mada nuaindre ñobätä ñan aune niara ye namani kämekäme ni madabe arato). Niara ja mäkäninteta yebiti tä nemen kämekäme ye erere ñaka mikadre tuin jai, akwa kä kwati krubäte te niara ñaka kädeka raba sribi ütiäte ütiäte nuainkäre konkrekasionte. Kukwe nuainbare kira kwe ye täbe mate tare nitre madabätä ye rikadre ta ye ngübadre ken. Ne madakäre, nane muko käne ngökani kwe aune nane monsotre jämi ünä tuanimetre kwe ngwane, niaratre ie ja ruin ño, tua ño ngwianbiti aune jondron mada mada yebiti, ye mikadre gare kwin jai (Mal. 2:14-16).

Kukwe Bibliabätä ñan mikata ütiäte jai aune ja tuametreta biti ja mikata gure yebätä kukwe tare tä nemen bare ye nikwe ngwandre törö jai, yebätä ja mäkäteta ye tuin deme krubäte Jehovai ye erere ni kristiano käkwe mikadre tuin jai ye kwin (Ecl. 5:4, 5; Heb. 13:4).