1. ¿Kä bä nuäre ja üaire nieta ye dre gärätä aune ni töi tädre kwatibe dre nuainbätä?

 NENGWANE kä bä nuäre yete nitre kwati tä aune tädre sribire krubäte. Aune nitre kwati ye tä sribire kä jutobiti aune kä jäme te, ye medenbätä töita kwatibe ñaka kämikekä jire kä bä nuäre yete. Ne madakäre, nitre kwati rikadre ben ie tö. ¿Drebätä blitata? ¡Kä bä nuäre ja üaire yebätä! a

2. ¿Kä bä nuäre ja üaire tärä ye ñobätä tä ni töi mike ñan krütare?

² Kä ja üaire yete nünanta jäme Jehová köböire, ye raba ni töi mike niä, ñobätä ñan aune kä te nita nüne nete, nitre tä ja nuainne tare, moto rubun aune kukwe tare tä nemen bare käbiti tibien (1 Juan 5:19; Apoc. 12:12). Kä gobrainta Satanakwe ne käme krubäte ye gare Jehovai. Ye medenbätä, tä niken ni ngwena kä jäme aune kriemikani känti ne kwe kä tädre juto nibätä, ñobätä ñan aune ni tare kwe. Kä bä nuäre ja üaire ye abokän “kä ni kriemikara” aune “jardinbiti ñö metakata kwin” ye kwrere Biblia tä bämike (Is. 4:6; 58:11). Jehová köböire nire nire tä nüne kä bä nuäre ja üaire te ye ie ja ruin kriemikani aune käta juto bätätre, kä käme te nita nüne kä nengwane yebiti ta (Is. 54:14; 2 Tim. 3:1).

3. ¿Kukwe nieta Isaías 65 ye meden namani bare kena?

³ Isaías kapitulo 65 yete kä bä nuäre ja üaire ye abokän ño ye Jehovakwe mikani gare Bibliabätä. Ni Ngöbö kukwe niekä käkwe kukwe niebare ye keteiti namani bare kä 537 Kristo känenkri. Kä ye näire, nitre judío nämäne Babilonia ja töi kwitani ye mikaninta kwäre aune nikaninta ja käite. Jehovakwe niaratre dimikani aune kukwe kwin mikani nemen bare kräketre, ye köböire Jerusalén nämäne ganinte ye ükaninteta kwe juta bä nuäre.  Aune templo ükaninteta kwetre Ngöbö mikakäre täte metre kä Israel yete (Is. 51:11; Zac. 8:3).

4. ¿Kukwe nieta Isaías 65 ye tä nemen bare ño kä nengwane o Kristo bitikäre?

⁴ Kukwe niebare Isaiakwe, ye ketebu namani bare kä 1919 Kristo bitikäre. Nitre Jehová mikaka täte ye mikaninte kwäre Babilonia kri yebätä. Yete ja käne kä bä nuäre ja üaire ye tä kä jökräbiti tibien. Nitre kwati Gobran Ngöbökwe kukwe driekä kä jutobiti ye tä kwati konkrekasionte kä ngrabare. Nitre brare aune merire nämänentre ja ngwen käme aune nitre nuainne tare ye ja töi kwitani aune tätre nirien ja üairebiti “ni btin kwrere. Ngöbö abko kukwe nuenkä metre amne niara abko deme, ye kwrere” (Efes. 4:24). Kukwe kwin mikani gare Isaiakwe ye rabai bare jökrä kä bä nuäre yete, tä niebare ye erere ye gare metre nie. Akwa nengwane kukwe kwin ye niena nemen bare nibätä ye nita käi ngwen juto jabätä arato. Nita kä bä nuäre ja üaire te yebätä dre kwin tä nikwe aune ñobätä nikwe ñaka kä mikadrekä bätä ye ani mike gare jai.

KUKWE KWIN TÄ NEMEN NIKWE KÄ BÄ NUÄRE JA ÜAIRE YETE

5. Isaías 65:13 tä kukwe niere erere, ¿kukwe meden kwin tä nikwe kä bä nuäre ja üaire yete?

⁵ Jata nemen ruin kwin aune dite nie. Nire tä kä bä nuäre te aune nire ñan kä bä nuäre te ye ñan tä nüne ja erebe ye tä ni töi mike ñan krütare Isaías mikani gare (ñäkädre Isaías 65:13 yebätä). b Ni Jehová mikaka täte ye tä dre ribere jai ja üairebiti ye Jehová tä bien ie. Ñodre, üai deme, niara kukwei aune kukwe keta kabre mada tä nikwe, ye abokän mrö kwrere kwetadre aune ñadre yebätä käi juto krubäte nibätä (Apocalipsis 22:17 mikadre ñärärä). Nitre ñaka kä bä nuäre ja üaire te yebätä tä nemen bare jene. Niaratre tätre “mrö nike”, “tomana nike” aune “ngwanta ja gaire”. Kukwe ja üaire ribeta kwetre jai ye ñaka kwetre (Amós 8:11).

6. ¿Joel 2:​21-24, yete mrö ñobätä blitata, tä dre bämike aune ñobätä kwin ni kräke?

⁶ Ni Ngöbö kukwe niekä, Joel käkwe mikani gare, juta Ngöbökwe käkwe dre bäri ütiäte ribedre jai ye Jehovakwe bian töi mantiamebiti ie, ñodre, nüra ngwä, vino aune oliva aceitei ye erere (Joel 2:​21-24). Nita dre ribere ye jökrä Jehovakwe bian nie tö namani mikai gare, ye abokän kukwe ja üaire arato. ¿Kukwe ye tä nemen bare ño nengwane? Biblia, täräkwata, tärä, sitio JW, gätä, gätä kri ye tä bien nie. Yebätä mrö ja üaire kweta raba köbö kwatire kwatire köböire ja rabai ruin dite aune kwin nie.

7. ¿Ñobätä ja ruin kwin krubäte nie? (Isaías 65:14).

⁷ Käta juto nibätä aune jondron jökrä tä nikwe yebätä ja ruin kwin nie. Yebätä ni kristiano tä debe bien ja brukwä tätebiti Jehovai (ñäkädre Isaías 65:14 yebätä). c ¿Ñobätä “jata nemen ruin kwin” nie? Ñobätä ñan aune Ngöbö kukwei yebätä kukwe metre aune kukwe käbämikata ye tä aune tä ni dimike krubäte. Ne madakäre, Jesús ja nire biani ni ütiäre ye tä tödekara nikwe mike dite. Ye medenbätä, kä jutobiti nita blite kukwe yebätä ja mräkätre ben (Sal. 34:8; 133:​1-3).

8. ¿Kukwe ketebu meden bäri ütiäte kä bä nuäre ja üaire yebätä?

⁸ Kukwe ketebu tä kä bä nuäre ja üaire yete ye abokän nitre tä juta Ngöbökwe te ye tä keteitibe aune ja tarere, ye köböire, “nita ja  mäke kwin”. Nikwe nünain ño kä bä nuäre yete ye ni raba bämike ja töite. Yete ni täi bäri keteitibe aune ja tarere bäri kä nengwane ye kräke (Col. 3:14). Meri testiko iti ie nitre testiko namani gare ye ngwane ja namani ruin ño ie tä mike gare, niara tä niere: “Ño ti raba nüne kä jutobiti ye ñan nämä gare tie aune ti mräkätrebe nünandre ño kwin ye ñan ñan nämä gare tie arato. Ja tare ye metre rababa gare tie nitre testiko Jehovakwe ye köböire”. Nire nire tö nünain kä jutobiti aune ja rabadre ruin kwin ie yekäre tädre juta ja üaire Ngöbökwe yete, kä käme te nita nüne yebätä kukwe ño erere niei nibätä akwa Jehová aune mräkätre kwe ja üaire ye ngwärekri ni kädriei kwin aune nikwe ja ngwain kwin (Is. 65:15).

9. ¿Kukwe tare tä ni ngwen ja tare nike yebätä dre rabai bare? (Isaías 65:​16, 17).

⁹ Ja ruin jäme nie aune ni ñaka ja töibikaire jire. Isaías 65:14 tä niere “mun abokän käkwe ja muaidi mun brukwäta tare yebätä aune mun rabai ulire yebätä mun rabai ngetrekä” ñobätä ñan aune nitre ye käkwe ñaka ja töi mikai nemen juta Ngöbökwe bä nuäre ja üaire yete yebätä. ¿Ni Ngöbö mikaka täte yebätä dre rabai bare? ¿Tädi ja tare nike jankunu? Jehová tä kukwe ne käbämike: “Jondron nämäne känekäne ye ñaka rabaira törö aune ñaka rükaita jire mun brukwäte” (ñäkädre Isaías 65: 16, 17 yebätä). d Kukwe ben nita ja tuin ye riaikä jökrä kä näin ta ngwane, kukwe nämäne ni mike ja tare nike ye diainkä jökrä yebätä ñaka rabaira nüketa törö nie.

10. ¿Ni tädre keteitibe ja mräkätrebe ye ñobätä kwin? (Üai mikadre ñärärä).

¹⁰ Nita niken gätäte ja mräkätre ben ye ngwane jata nemen ruin jäme aune kwin krubäte nie. Aune kukwe tare tä nemen bare käbiti tibien yebätä ni ñan tä nemen töbike krubäte. Akwa ¿dre nuaindre ne kwe kä bä nuäre ja üaire yete käre kä jäme ye tädre? Yekäre töi kwin keta kabre Ngöböbätä ye bämikadre, ñodre, nita ni mada tarere, käta nemen bäri juto nibätä, nita nüne jäme Ngöböbe aune ni madabe, nita ni mada mada kain ngäbiti ja moto jämebiti, nita ja moto mike kwin ni mada madakrä ye erere (Gál. 5:​22, 23). Nita juta Ngöbökwete ye kukwe bäri kwin tä nikwe. Nikwe ñaka kä mikadrekä jire chi kä bä nuäre ja üaire Ngöbökwe yebätä ngwane kukwe käbämikani Ngöbökwe “kä tibien mrä aune kä kwinta mrä sribekäre” ye jökrä nikwe tuai nemen bare.

11. ¿Nita nüne kä bä nuäre ja üaire te yebätä ja rabadre ruin ño nie? (Isaías 65:​18, 19).

 ¹¹ Käta juto nibätä aune nita debe bien krubäte Jehovai. Ni Ngöbö mikaka täte ye ie kukwe keta kabre tärä ne kwe kä tädre jutobätä mikani gare Isaiakwe. Kä bä nuäre ja üaire te nita ne Jehovakwe sribebare (ñäkädre Isaías 65:​18, 19 yebätä). e Ye arabätä nitre tä kä käme Satanakwe te ye abokän tä kä nötare te ja üairebiti, ye nita dimike ne kwe jatadre kä bä nuäre ja üaire yete nibe. Kä jutobiti kukwe keta kabre kwin kukwe metrebätä ye ni töta mikai gare ni madai (Jer. 31:12).

12. ¿Mäta ñäke Isaías 65:​20-24 yebätä ngwane, jata nemen ruin ño mäi aune ñobätä?

¹² Nire nire tä nüne kä bä nuäre ja üaire te kä nengwane yebätä käta juto krubäte aune kukwe käbämikata ja känenkäre ie tä tö ngwen ye tä ngübare kisere aune tä debe bien krubäte. Nikwe dre tuai aune dre nuaindi kä bä nuäre te ye bämike ja töite. Biblia tä kukwe ne käbämike: “Kä yekänti monso kia kä braibebiti ye ñaka rabaira aune ni umbre käkwe ñaka nünain kä braibe te”. Aune “niaratre ju sribedi aune nünain te kwetre, niaratre uva nökai aune ngwä kwetai kwetre”. Arato tä mike gare, “ñaka ja di ngwain ngwarbekäre” ñobätä ñan aune Ngöbökwe kukwe kwin mikai nemen bare yebätä. Nikwe nünain jäme aune kriemikani ye Ngöböta käbämike nie. “Ni jämi kukwe niere” ye ngwane, “ni itire itire tä dre ribere jai” ye rabaira gare ie aune ye erere mikai nemen bare kwe ni kräke (Is. 65:​20-24; Sal. 145:16).

13. ¿Ja töi kwitadre dre drebätä ye mikata gare ño Isaías 65:25 yekänti?

¹³ Nita nüne kä jäme aune kriemikani te ye kwrere. Nitre kwati nämäne ja ngwen jondron nire romon ye kwrere, akwa üai deme köböire ja töi kwitani kwetre (ñäkädre Isaías 65:25 yebätä). f Nämäne ja ngwen rubun yebätä ja gobrain niena gare ie (Rom. 12:2; Efes. 4:​22-24). Ni töi tä ngite yebätä kukwe raba nainte nie. Aisete, Jehová tä kukwe ñan tuabare nuainne ye “ni kä jökräbiti tibien” tä nüne keteitibe, ja tarere aune nüne jäme jabe (Tito 2:11). Ngöbö dite krubäte ye aibe ie kukwe ne kwrere raba nemen bare.

14. ¿Isaías 65:25 ye namani bare ño ja mräkä itibätä?

¹⁴ ¿Erametre ni raba ja ngwen kwin? Jän, kukwe namani bare ne tä mike gare. Ni brare iti biti kä nämäne 20 ye nämäne nitre nuainne tare aune ja ngwen käme, ja mika gure yebiti yebätä kitani bä kabre ngite. Nämäne gore, ñodre carro aune jondron mada goibare kwe arato nämäne ngüdrärekä krubäte. Kukwe metre namani gare ie Bibliabätä aune nämäne niken gätäbätä nitre testiko Jehovakwe yebe ngwane, namani gare ie ñan ngwarbekäre nämäne nüne yebätä ja töi kwitani kwe. Nünankäre kä bä nuäre ja üaire yete: Ja ngökani ñöte kwe ye bitikäre, Isaías 65:25 ye namani bare ño niarabätä yebätä nämäne töbiketari. Nämäne ja ngwen rubun kwra lion ye kwrere akwa ja töi kwitani kwe aune tä ja ngwen cordero jäme ye kwrere.

15. ¿Ñobätä ni tö nitre kwati dimikai nemen kä bä nuäre ja üaire yete? ¿Raba nemen bare ño nie?

¹⁵ Isaías 65:13 ye kömikata krörö: “Däkien Gobranka Kri Jehová tä kukwe ne niere”. Aune bersikulo 25 ye mikata krüte krörö: “Nieta Jehovakwe”. Jehová tä kukwe käbämike ye käre tä mike nemen bare (Is. 55:​10, 11). Kä bä nuäre ja üaire ye metre, kukwe  mikani gare Jehovakwe juta yebätä ye niena nemen bare. Juta ye abokän ngöräbe ñobätä ñan aune jata ruin kriemikani aune jäme nie kä käme te nita nüne nete (Sal. 72:7). Kukwe jökrä nebätä ni tö nitre kwati dimikai nemen juta Ngöbökwe yete. ¿Raba nemen bare ño nie? Ja töi mike kwatibe nitre dimike nemen ja tötikaka (Mat. 28:​19, 20).

NI RABA KITE NITRE NGWENA ÑO KÄ BÄ NUÄRE JA ÜAIRE YETE

16. ¿Dre tä nitre töi mike kite kä bä nuäre ja üaire yete?

¹⁶ Ni jökrä raba ja dimike siba ne kwe kä bä nuäre ja üaire yete ni kwati tö rabadre kite. ¿Nuain raba ño? Ja töi mikadre ja ngwen Jehová erere. Jehová ñan tä kite ni ngwena ja dibiti ja kokwäre, ñakare aune tä nuainne töi kwinbiti (Jer. 31:3; Juan 6:44). Nitre tö kukwe mikai gare jai brukwä kwinbiti ye ie kukweta nemen gare Jehovabätä ngwane töta nemen Jehová mikai täte. ¿Nikwe ja töi mikadre ño kwin ne kwe nitre kwati mada tö rabadre kite kä bä nuäre ja üaire yete?

17. ¿Nikwe dre nuaindre ne kwe nitre jatadre kä bä nuäre ja üaire yete?

¹⁷ Kukwe ruäre nuain raba ne kwe nitre kwati ja töi mikadre kite juta Ngöbökwe yete ye abokän ja tare bämikadre ja mräkätre ie aune ja töi mikadre kwin kräketre. Nitre ñaka Ngöbö mike täte jananbare gätäbätä Corinto ngwane kukwe niebare kwetre ye erere nitre janandre gätäbätä käkwe kukwe niedre ie ni tö. Niebare kwetre: “Ngöböta era metre bkänä mun ngätäite” (1 Cor. 14:​24, 25; Zac. 8:23). Ye medenbätä “munkwe nüna jäme jabe kwärikwäri” nieta ye ütiäte krubäte ni kräke (1 Tes. 5:13).

18. ¿Dre raba nitre töi mike kite juta Jehovakwe yete?

¹⁸ Ja di ngwandre ja mräkätre ye mike tuin jai tuin ño Jehovai erere. Ja töi mikadre kukwe kwin bätätre yebätä aune ñaka kukwe tä nainte ietre yebätä, ñobätä ñan aune kukwe tä nainte  ie ye kä näin ta ngwane ñan rabaira. Ja tare yebiti kukwe raba nemen bare nie ni madabätä ngwane ni raba ükete mäträta nibätä nebiti: “Munkwe ja moto mika kuin jakrä kwärikwäri amne ja raba ruentari tare kwärikwäri munye amne, Ngöbökwe ni ngite dianinkä ño nibtä Kristo köböire, ye kwrere munkwe ja ngite dian jabti ta kwärikwäri arato” (Efes. 4:32). Nire nire tö ja ka ngäbitimana kwin ye töi rabai niken kä bä nuäre ja üaire yete. g

ÑAKA KÄMIKADREKÄ JIRE KÄ BÄ NUÄRE JA ÜAIRE YEBÄTÄ

19. a) ¿Nitre ruäre jataninta kä bä nuäre ja üaire te yekwe dre niebare? (Recuadro “ Nikanintre, akwa jataninta” ye mikadre ñärärä). b) ¿Ni töi täi kwatibe dre nuainbätä? (Üai mikadre ñärärä).

¹⁹ Nita kä bä nuäre ja üaire te ye kwin krubäte. Nitre kwati kä jökräbiti tibien tä kä bä nuäre ja üaire te ye bä nuäre krubäte. Yebätä nita debe bien krubäte Jehovai kä bä nuäre sribebare kwe ni kräke yebätä. Nire nire tö nünain kä jutobiti, ja tuai dite, jäme aune kriemikani ye rabadre niken kä bä nuäre ja üaire yete aune ñaka kämikekä jirebätä. Akwa nikwe ja di ngwandre ja ngübarebiti krubäte ñobätä ñan aune Satana tö ni ngökai aune nikwe kämikadrekä kä bä nuäre yebätä ye ie tö arato (1 Ped. 5:8; Apoc. 12:9). Akwa nikwe ñaka ja tuadremetre ganaindre ie. Kä bä nuäre ja üaire ye tädre käre deme, bä nuäre ye ie ni tö yebätä nikwe ja di ngwandre krubäte ngübakäre.