Ti därebare kä 1955. Nun nimä ja etebare. Ti abokän mrä. Ti därebare Finlandia, kä mötörikri mrenkräbäre. Nengwane juta ye kädekata kä Vantaa.

Kä nikani ruäre ta ti meye ja mikani testiko, ti jämi därere ye ngwane. Akwa niara ja mikani testiko ye ngwane, ti rün ja mikaba kukwe metre rüere yebätä ñan nämä ti meye tuenmetre nun tötike Bibliabätä aune nun ngwen gätäbätä. Aisete ti rün ñan nämä gwi ngwane, nämä blite nunbe Jehovabätä.

Ti nämä chi ngwane, ti ja töi mikaba ja mike Jehovakri. Kä nämä 7 tibiti ye ngwane, profesora iti rababa rubun tikrä, ñobätä ñan aune ti ñaka tortilla verilättyjä ye kwetaba yebätä (ye abokän tortilla ütiäte sribeta finlandia te däri mikata). Profesora yekwe ti kada ngiankaba biti tenedor yebiti jababa tortilla o arepa ye krien ti kadate. Akwa tikwe metaba jabätä yebätä betakaba timä kän.

Kä nämä 12 tibiti ngwane, ti rün krütaba. Yete ja käne ti nämä kwen käre gätäbätä. Ja mräkätre ja töi mikaba krubäte tibätä yekwe ti dimikaba nirien ja üairebiti. Ti jataba ñäke käre Bibliabätä aune ja tötike nguseta täräkwata bianta juta Ngöbökwe nie yebätä. Ti nämä ja tötike kwin krubäte ye käkwe ti dimikaba krubäte ja ngökakäre ñöte kä nämä 14 tibiti ye ngwane. Tikwe ja ngökaka ñöte 8 agosto kä 1969.

 Ti gediankaba kwelate, ye bätärabe tikwe ja mikaba prekursor regular. Bämän rikaba krati näre ta, ti rikaba kä Pielavesi, juta chi nemenkä Finlandia yete kukwe driekäre.

Kä Pielavesi yekänti Sirkka rababa gare tie ye bitikäre ja känenkäre nun ja mäkäteba. Kukwe rababa tuin bäri kwin niarabätä tie ye abokän niara kräke kukwe ja üaire ye nämä bäri ütiäte aune nämä ja töi mike bobre. Ñan töi nämä ja tuabätä ni ütiäte o jondron tuabätä krubäte jakwe. Nun nibu töi nämä kwatibe sribibätä ja di tätebiti Jehová kräke. Nun nämä juto biare dre mikadre nun kisete ye erere nuainkäre. Köbö 23 marzo 1974 ye ngwane nun ja mäkäteba. Nun ja mäkäteba ye nun ñaka rikaba käi ngwen juto jabätä, bäri kwin nunkwe ja töi mikaba niken kä Karttula, ni testiko ribe nämä kukwe driekäre yekänti.

Nunkwe ja mäkäteba ye ngwane, nunkwe dre dre ribei jai ye erere Jehovakwe biain nunye bämikaba kwe nunye, akwa yekäre nunkwe Gobran kwe mikadre käne (Mat. 6:33). Ñodre, juta Karttula yete, carro ñan nämä nunkwe yebätä nun nämä niken bicicletabiti. Akwa ñü näire kä nämä nemen tibo krubäte, yebätä nun nämä carro ribere jai kukwe driekäre territorio kri nämä gare konkrekasion ie yekänti. Akwa ngwian ñan nämä nunkwe carro kökakäre jai.

Ti eteba iti rükaba basare nun jiebiti. Nun ñan nämä jiebäre ngäbiti rababa nun känti. Rükaba nun känti ngwane, carro kwe ye mikateba kwe tie. Ñan ütiä käräba jire kwe tie aune seguro carrokwe ye mikateba kwe nunye arato. Gasolina ye aibe rababa kökadre nunye carro kräke. Köböre ngware carro rababa nunkwe.

Nun täi dre ribere jai ye Jehovakwe bian nunye mikaba gare kwe metre nunye. Akwa yekäre nun rabadre gobran kwe mike käne.

Kä 1978 ye ngwane, nun nübaiba kwela prekursor kräke yebätä. Yete ni dirikä iti nunye kädeka nämä Raimo Kuokkanen, a yekwe nun töi mikaba solicitud juen rikakäre Galaad. Akwa yekäre nun rabadre blite kukwe inglere yebiti. Aisete nunkwe ja töi mikaba ja kite kukwe inglerebiti, akwa ñan rababa solicitud ye juanbare nunye. Ñobätä ñan aune kä 1980 ye ngwane, nun nübaiba sukursal Finlandia. Aune ye näire nire nämä betelte ye ñan raba niken Galaad. Akwa nun tö nämä dre  nuainbätä ye erere nun ñan nämä nuainne, ñakare aune Jehová tö nämä nun tuai sribire medente ye erere nun nämä ja töi mike nuainne. Aisete nun nübaiba ye nunkwe ka ngäbitiba. Akwa nane mada ja känenkäre nun nübaidre kwela Galaad yete, yebätä nunkwe ja töi mikaba ja kite jankunu kukwe inglerebätä.

Kä rikaba kwati ta ngwane, nitre braibe konkrekasion jökrä ngübabitikä käkwe mikaba gare nitre nämä betelte ye raba niken kwela Galaad yete. Aisete bengwairebe nunkwe ja töi mikaba solicitud juen. Bäkänä nun nämä betelte ye käi nämä juto nunbätä. Akwa nun tö nämä näin kwela Galaad yete rikakäre kukwe driere nitre ribe nämä bäri yekänti. Nun nübaiba kwela número 79 yebätä. Nun graduaba septiembre kä 1985 yete. ¿Aune nun juanba medente raba ruin munye? ¡Colombia!

Nun rababa sukursal Colombia ngwane, sribi mikaba nun kisete ye tikwe ja di ngwama nuainkäre kwin krubäte. Akwa kä rikaba kwati ta ngwane, ti kwitadre asignación madabätä ye bäri kwin ti rababa nütüre. Aisete ye aibe ngwane tikwe ja kwita manama asignación madabätä. Aisete nun juanba kä Huila juta Neiva yete sribire misionero erere.

Kukwe drie ye käre ti töta nemen nuainbätä. Ti nämä Finlandia, ti nämä prekursor aune ti nämä kaibe ye ngwane, ti nämä niken dekä kukwe driere kä nämä niken de tibiti ruäre ngwane. Aune krire ti ja mäkäteba ye ngwane ti nämä niken kukwe driere ti muko Sirkka ben köböti jökrä. Arato nun nämä niken kukwe driere mente ngwane, nun nämä jadüke carrote ne kwe dekä ngwarbe nunkwe kukwe drie kömikadre.

Nun nämä kukwe drie käi ngwen juto krubäte jabätä ye erere ja rababa ruinta nunye nun rikabata kukwe driere misionero erere ye ngwane. Konkrekasionte nun nämä ye jataba nirien, ja mräkätre Colombia ye nämä nun mike ütiäte jai, nämä nun tarere aune käre nämä debe bien.

Juta Neiva ye bäre temen juta kiakia nämä akwa nitre testiko ñan nämä jire kä yekänti. Akwa nire ñan juta kia yete kräke ñan nämä nemen nuäre rikakäre yete ñobätä ñan aune nitre yete nämä rüre ja ben. ¿Akwa kukwe metre ye rabadre ño nitre yekänti? Ti nämä töbike krubäte kukwe yebätä. Tikwe oraba Jehovai aune nitre juta kia yekänti akwa nämäne nüne Neiva yekwe ja mikadre testiko, ja ngökadre ñöte kwe, ririadre ja üairebiti, biti ja töi mikadre nikenta kä kwe yete aune kukwe driedre kwe kä yekänti yei ti tö rababa. Aune ye rababa tuin bä tie akwa gare metre nie erere Jehová ye abokän tä kukwe ükete bäri kwin.

Kä rikaba braibe ta, ti jataba monso bati kädeka nämä Fernando González nünanka juta chi kädeka nämä Algeciras yekänti ye tötike Bibliabätä aune yete ni testiko ñan nämä jire chi. Bämän kratire kratire nämä niken sribire Neiva, aisete nämä dikekä 50 kilómetros (30 millas) näre. Drebätä nun ja tötikai yekäre nämä ja tötike kwin käne. Niara kwanba kena gätäbätä ye ngwane ñaka gätä juanba jire chi kwe ja bäre mada. Aune krire bämän kena yebätä nämä nitre nübaire ja ükekrö ne kwe dre namani gare ie kädriedre kwe bentre nämä nüne yekänti.

Sö rikaba krä ti ta Fernando nämä ja tötike Bibliabätä, enero kä 1990 ja ngökaba ñöte kwe ye bätärabe mada ja mikaba kwe prekursor regular.  Aisete ni testiko rababara iti kä Algeciras yekänti. Ye medenbätä sukursalkwe prekursor especial juanba yete. Febrero 1992 konkrekasion rababara keteiti yete.

Akwa Fernando ñan namani yete kukwe driere. Niara ja mäkäninte Olga ben ngwane, ja kwitani kwe, San Vicente del Caguán yete, kä yekänti ni testiko ñan nämäne jire. Aune nikani yekänti konkrekasion kömikani kena kwe arato. Kä 2002 ye ngwane niara nübaibare sribire ni circuito tuabitikä erere aune täbe nuainne nengwane.

Kukwe namani bare tibätä nebiti nüke gare metre tie asignación bianta nie yebätä nita orare Jehovai ngwane, nikwe kukwe niedre metre ta ie. Ñobätä ñan aune kukwe ñan raba nemen bare nie akwa niara raba nuainne. Niara Sribi ye bäkänkä yebätä (Mat. 9:38).

Kä 1990 ye ngwane, nun kädekaba circuito tuabitikä. Nun juanba Colombia juta kri Bogotá yete. Sirkka aune ti nun ñan bäri ütiäte ni mada kräke, ne madakäre nun ñan nünanbare juta kri te arato. Aisete asignación bianba nunye juta kri te yebätä kä jürä rababa nunbätä. Akwa kukwe nieta Filipenses 2:13 ye erere rababa bare nunbätä. Yete Jehová tä niere nie: “Ñobätä ñan aune Ngöböta sribire munbätä mun töi mikakäre biare sribi kwin nuainkäre aune Ngöböta sribire mun mikakäre dite sribi kwe ye ngwankäre bare”.

Kä rikaba ruäre ta ngwane, ti kwitaba circuito madate Medellín. Käre nitre nämä rüre jabe ji grabare, yebätä nitre nämä nüne kä yekänti ñaka namanina töibikaire. Bati ti nämä ni iti tötike Bibliabätä ngwane, nitre nämä ja täke kürübiti kukwe jüraba nunye jubäre. Kä jürä rababa tibätä yebätä ti jababara ja kite tibien. Ni tötika nämä tikwe ye nämä jäme aune ñäke jankunu täräbätä. Ñäkäba ünä kwe ye ngwane, rükaba krö, aune ti niki ken mento nieba kwe tie. Aune dera jäme ngwarbe jatabata monso kia nibu kani kisete ben gwäkäre. Ngite kitamanama kwe jabiti ta tie ñobätä ñan aune monsotre kia ye namani tuadreta ie nieba kwe.

Ye ñan aibe ngwane nun ngwanba nikenkä. Bati nun nämä kukwe driere ju ju te aune ti muko jataba betekä rükaba tikänti nekwetaninkä ngwen ja jiebiti. Aune kä jürä namani krubätebätä nieba kwe tie. Ni iti käkwe ti täri kürübiti nieba kwe, yebätä ti rekwetakaba niara jiebiti arato. Akwa biti mada rababa gare nunye niara ñan ai täkä nämäne, ñakare aune ni mada jatani niara bäre ta ye täkäni.

Kä rikaba ta ngwane, kukwe tare nämä nemen bare ye nun ñan jatabara töbikaire. Ja mräkätre nämä ja ngwen dite aune kä ngwen nüke jai kukwe ye kwrerebätä aune kukwe bäri tare nämä nemen bare ngwane ye nämä nun töi mike niä. Jehová nämä niaratre ngübare angwane, nun ngübai kwe arato ye nämä gare nunye. Nitre umbre ji ngwanka konkrekasionte nämä kukwe niere nunye ye nun nämä mike täte aune nun nämä ja ngübarebiti. Kukwe mräkä ye abokän nun nämä mikete Jehová kisete.

Bäkänä kukwe blo ye ñan aibe nämä nemen bare käre. Ñodre, bati nun nämä kukwe driere ju kwati te aune meri nibu nämä ñäke jai ye kwrere ni kukwe rababa ruin jubäre nunye. Ti ñan tö rababa mikai ñärärä akwa ju bäkänkäkwe nieba tie  ¡nän mike ñärärä! Tikwe nikrakaba ngwane ore kubu nämä yete nitre nünanka bäre ye jiemike.

Ka 1997 ngwane, ti kädekaba nitre kitakäre Kwela Entrenamiento Ministerial yebätä. b Käre ti tö nämä näin kwela bianta juta Ngöbökwe yete yebätä. Akwa ti kädekai nitre kitakäre ye ti ñan nämä ngübare jire.

Biti mada ti kädekaba distrito tuabitikä akwa sribi ye ñan nuain rababara ngwane ti kädekaba ni circuito tuabitikä. Kä nikanina 30 ta tita nitre kite aune konkrekasion tuinbiti. Sribi mikani ti kisete yebätä kukwe kwin krubäte namanina keta kabre tikwe, akwa kukwe ruäre ye ñan namani nuäre mikakäre nemen bare. ¿Ñobätä ti tä ne niere?

Ti tö nämä dre nuain ye erere ti nämä ja töi mike kwatibe nuainkäre. Ye medenbätä ruäre ngwane ti nämä kukwe ükete konkrekasionte yebätä ti nämä ja töi mike kwatibe mike nemen bare. Ñodre, ruäre ngwane ti nämä niere ja dibiti ja mräkätre ie, niaratre rabadre ja tarere aune ja mike ütiäte jai kwärikwäri. Akwa ti nämä kukwe niere ye ara ti nämä ribere jai nämä nemen gare tie (Rom. 7:​21-23).

Ruäre ngwane, kukwe ñan tä nemen bare kwin tie ye tä ti ngwen di nekä (Rom. 7:24). Bati ti rikadreta Finlandia aune tikwe sribi misionero tuanemetre ye bäri kwin ti rababa nütüre aune tikwe nieba Jehovai. Akwa ye ngwane nun rikaba gätäbätä ngwane sribi mikata ni kisete ye nuainkäre, kä ngwandre nüke jai mikaba gare yekwe ti dimikaba krubäte. Ti nämä orare Jehovai yebätä ti kukwe nuaba kwe ye ñan käi nikwitekä jire tibiti. Ja tare yebiti tä ti dimike ja töi ükete jankunu.

Sirkka aune ti nunta debe bien krubäte Jehovai akwa ñan raba nemen niebare nunye kukwere jerekäbe, ñobätä ñan aune niara nun mikani bäsi köbö jökrä te sribire köbö täte ja kräke. Aune tita debe bien krubäte Jehovai ñan ñobätä aune ti muko kwin krubäte biani kwe tie aune tä ti tarere aune ti dimike.

Ti köböi cumplire 70, aisete tita nitre kite aune tita ni tuabitikä erere ye rabai tuadremetre tie. Akwa ye ñan ti mike ulire, ñobätä ñan aune Jehová mikakäre täte sribi ütiäte tädre ni kisete ye ñan ai ribeta jai. Ñakare aune bäri ütiäte nikwe niara mikadre täte töi bobrebiti, tädre tare nikwe aune ni tädre debe bien krubäte ie (Miq. 6:8; Mar. 12:​32-34).

Kä nikanina kabre ta nete sribi keta kabre nuainbarera tikwe aune tita käi ngwen juto jabätä. Akwa tita töbike dre namanina bare tie yebätä ngwane, tä nüke gare tie ti abokän bäri ütiäte o kukwe nuain gare tie ye ñan aibätä tä tikwe, ñakare aune ti ngite yebiti ta Jehovakwe kukwe kwin ñan nuain bä ti kräke akwa ye biani tie. Ñobätä ñan aune niara ñan ti dimikadre akräke ñan rabadre bare jire chi. Ti raba niere metre ta kukwe tä ti ngwen di nekä akwa Jehová ara köböire tä nemen bare kwin tie (2 Cor. 12:9).