1. ¿Kukwe nämäne ükaninte ño nitre Ngöbö mikaka tätekwe siklo kena yete?

 JEHOVATA sribi mike ni niara mikaka täte kisete ngwane rabadre nuainne kwin jatäri ye ie niara tö (1 Cor. 14:33). Ñodre, kukwe kwin gobran kwebätä ye mikadre gare kä jökräbiti tibien ie niara tö (Mat. 24:14). Kukwe drie ye jie ngwan mananbare kwe Jesús ie aune niara tä kukwe ye ükete kwin jatäri. Siklo kena kä Jerusalén yete nitre apóstol aune nitre umbre ji ngwanka nämäne kukwe den nuaindre aune kukwe ja jie ngwankäre ye mike gare konkrekasionte ne kwe mikadre täte (Hech. 15:2; 16:4). Konkrekasion jökrä te nitre dianka nämäne ni umbrere ji ngwankäre ne kwe kukwe diani mikakäre täte ye mikadre gare kwetre (Hech. 14:23). Ja mräkätre nämäne kukwe ye mike täte ye medenbätä, nämene “ja mräkä tödekaka Jesubiti die mike tödeke bäri Jesubiti aune köbö kwatire kwatire ni kwati mada namani Jesús kukwei kain ngäbiti” (Hech. 16:5).

2. ¿Kä 1919 yete ja käne Jehová tä juta kwe ye jie ngwen ño aune tä mrö ja üaire ye bien ño ie?

² Kä ne näire, juta Jehovakwe ye tä ükaninte kwin krubäte. Kä 1919 ye ngwane, nitre braibe dianinkä üai deme köböire ye ükaninkrö Jesukwe, ne kwe rabadre kukwe driedre ño ye ükete aune mrö ja üaire ye bien nitre ja tötikaka kwe ie (Luc. 12:42). a Nitre dianinkä tä sribire ye Jehová tä mike nemen bare kwin krubäte ye tuin nie (Is. 60:22; 65:​13, 14).

3, 4. a) Kukwe tä ükaninte kwin krubäte ye ñobätä kwin mä raba mike gare. b) ¿Dre rabai gare nie kukwe ja tötikara nebätä?

³ Kukwe ñan tädre ükaninte kwin akräke Jesukwe kukwe  biani nuaindre nie ye ñan raba nemen bare nie (Mat. 28:​19, 20). Ñodre, kä kukwe driekäre ye ñaka tädre ükaninte kwin ye ngwane, ni itire itire tö rabadre kukwe driere medente erere rabadre nuainne. Akwa yebätä kukwe driedre bati bobu kä arabe känti aune kä mada känti ñaka kukwe drie tädre jire chi. ¿Kukwe meden madabätä kukwe ükaninte ye kwin ruin mäi?

⁴ Jesús nämäne kä tibienbätä ye ngwane, nitre ja tötikaka kwe ye ükaninte kwin kwe ye erere tä nuainne kä nengwane. Kukwe ja tötikara nebätä Jesukwe kukwe kwin bämikani ye erere juta kwe tä nuainne kä nengwane ye rabai gare nie. Ni raba dre nuainne bämikakäre nita tö ngwen kwatibe juta Ngöbökwe yebiti ye rabai gare nie arato.

JESUKWE KUKWE BÄMIKANI YE ERERE JUTA NGÖBÖKWE TÄ NUAINNE NENGWANE

5. ¿Juta Ngöbökwe tä ja ngwen ño Jesús erere? (Juan 8:28).

⁵ Jesukwe dre niedre aune dre nuaindre ye namani gare ie Rün kwe yebätä. Ye erere arato juta Ngöbökwe tä mäträre aune kukwe driere Ngöbö kukwei yebiti (ñäkädre Juan 8:28 yebätä  b; 2 Tim. 3:​16, 17). Ne madakäre, batire batire ni töi mikata ñäke Bibliabätä aune dre tä nemen gare nie ye erere mike täte. ¿Mäträta nibätä ne tä ni dimike ño?

6. ¿Dre kwin tä nemen nikwe ja tötikabätä Bibliabätä?

⁶ Ja tötikadre Bibliabätä aune täräkwata bianta nie juta Ngöbökwe yebätä ngwane yekwe ni dimikai krubäte. Ñodre, Biblia tä kukwe niere ererebätä juta Ngöbökwe tä kukwe bien mikakäre täte o ño ye mika raba gare jai. Kukwe ja jie ngwankäre mikata gare ye kite kukwe Ngöbökwe yebätä ye rabai gare nie ye käkwe tödeka nikwe mikai bäri dite juta Jehovakwe yebiti (Rom. 12:2).

7. ¿Jesukwe dre driebare, aune juta Jehovakwe tä dre nuainne Jesús erere?

⁷ Jesukwe “kukwe kwin gobran Ngöbökwebätä” ye driebare (Luc. 4:​43, 44). Aune nitre ja tötikaka kwe käkwe ye erere nuaindre niebare kwe ietre (Luc. 9:​1, 2; 10:​8, 9). Kä nengwane nitre jökrä Ngöbö mikaka täte tä kukwe driere kä jutobiti tätre nüne medente o sribi ño ño tä kisete yebiti ta.

8. ¿Kukwe meden kwin krubäte ni raba nuainne?

⁸ Kukwe kwin gobran Ngöbökwebätä driere nitre ie ye abokän sribi kwin krubäte nuainta. Metrere ni jökrä ñan raba kukwe ye nuainne. Ñodre, Jesús nämäne kä tibienbätä ye ngwane, chokalitre ye ñaka tuanimetre kwe blite jabätä (Luc. 4:41). Nengwane ni iti tö rabadre kukwe driei nitre testiko Jehovakwe ben ngwane, rabadre kukwe ruäre nuainne. ¿Ni raba kukwe driere ye ütiäte krubäte ni kräke ni raba bämike ño? Nikwe kukwe driedre kä jökrä ngwane yebiti nikwe bämikai. Jesús erere ni tö kukwe metre ye nökai nitre brukwäte aune ñö metekä biti, ñö metakata nurabiti ye kwrere (Mat. 13:​3, 23; 1 Cor. 3:6).

9. ¿Juta Ngöbökwe käkwe dre nuainbarera Ngöbö kä ye mikakäre gare?

⁹ Jesukwe Rün kwe ye kä mikani gare nitre ie. Bati orabare kwe Rün ie ngwane kukwe ne niebare kwe: “Tikwe mä kä ye mikani gare ietre” (Juan 17:26). Juta Ngöbökwe ye tä ja di ngwen krubäte ja ngwankäre Jesús erere ne kwe nitre ie Ngöbö kä ño ye rabadre gare. Kukwe keteiti ütiätebiti nuainta ye abokän Biblia Traducción del Nuevo Mundo, tärä ye tä tikani täte o ruäre aibe kukwe 270 biti bäri. Biblia kwitani ne Ngöbö kä nämäne medente tikani kena ngwane, ye erere känti mikaninta.  Apéndice A4 aune A5 yete kukwe raba kwen bäri nie Ngöbö kä nämäne medente kenanbe ye erere känti mikaninta yebätä. Apéndice C tä Biblia de estudio, yebätä kukwe raba kwen keta kabre nie, ñobätä Ngöbö kä tädre tikani 237 jire Biblia tikani kukwe griegorebiti yebätä.

10. ¿Meri iti nünanka Myanmar bätä kukwe namani bare ye tä dre driere nie?

¹⁰ Ngöbö kä ño ye ni tö mikai gare nitre kwati ie, Jesukwe nuainbare erere. Kä Myanmar yete, meri Testiko iti käkwe Ngöbö kä Jehová ye mikani gare meri umbre biti kä nämäne 67 ye ie. Meri yebätä kä namani juto krubäte kukwe namani gare ie yebätä, aisete ngedeani muare ie. Niebare kwe: “Ngöbö kä ño ye nemen gare krire tie [ . . . ] Kukwe bäri ütiäte ye mä tä mike gare tie”. Kukwe namani bare nebiti nitre tä kukwe mike gare jai ye kräke tä nemen ütiäte krubäte Ngöbö kä mikata gare ietre yete ja käne.

NITA TÖ NGWEN JUTA NGÖBÖKWE IE YE BÄMIKADRE JANKUNU

11. ¿Nitre umbre tä tö ngwen juta Ngöbökwe ie ye raba bämike ño? (Üai mikadre ñärärä).

¹¹ ¿Ni umbre tä tö ngwen juta Ngöbökwe ie ye raba bämike ño? Keteiti ye abokän rabadre ñäke kwin krubäte kukwe ja jie ngwankäre bianta ietre yebätä aune ja di ngwen mikakäre täte. Ñodre, kukwe ja jie ngwankäre bianta ietre asignación nuaindre ño, orasion nuaindre ño gätäte yebätä aune oveja Kristokwe ngübadre ño kwetre yebätä. Juta Ngöbökwe tä kukwe bien nitre umbre ji ngwanka ie ye tä mike täte ngwane, ja mräkätre ie tä nemen gare Jehová tä ngübare aune tä tarere.

12. a) ¿Ñobätä nitre ji ngwanka ni käne ye mikadre täte? (Hebreos 13:​7, 17). b) ¿Nitre tä ni jie ngwen, töi kwin yebätä ja töi mikadre ye ñobätä kwin?

¹² Ni umbre ji ngwanka tä kukwe bien mikakäre täte nie ngwane, nikwe mikadre täte töi kwinbiti ye bäri kwin. Ye köböire ñan sribi mikai bäri tare kräketre. Nitre tä ni jie ngwen ye mikadre täte aune nuaindre töi kwinbiti ye Biblia tä mike gare nie (ñäkädre Hebreos 13:​7, 17 yebätä). Ruäre ngwane ñan nuäre nuainkäre ñobätä ñan aune nitre umbre ni jie ngwanka ye abokän töi ngite arato. Ye medenbätä, nikwe kukwe blo blo bätätre ye mikadre ñärärä bäri ngwane, kukwe kwin bätätre ye ñaka jutuadre nie aune kukwe ye ara ni rüe tö ni tuai nuainne. ¿Ñobätä nita kukwe ye niere? Ñobätä ñan aune töbikadre blo ni umbre ni jie ngwankabätä ngwane ni ñan jataira tö ngwen juta Ngöbökwe ie aune kukwe ye ara ie ni rüe tö. Akwa, ¿ni ñaka rakadre kä okwä ni rüekwe te yekäre ni raba dre nuainne ja ngübabitikäre raba nemen gare ño nie?

ÑAKA JA TÖI KWITAMANA NITRE IE

13. ¿Ni rüe tä juta Ngöbökwe ye bämike ño?

¹³ Juta Ngöbökwe tä kukwe kwin nuainne ye abokän ni rüe tä bämike käme ye kwrere nie. Ñodre, ni Ngöbö mikaka täte ye tädre ja ngwen kwin ja töibiti, ja üairebiti aune ja ngrabarebiti ye ie Jehová tö Biblia tä mike gare. Arato ni iti tä ja ngwen käme ye ñan ja töi kwitadre ngwane, kitadrekä kukwebätä tä niere (1 Cor. 5:​11-13; 6:​9, 10). Nita kukwe ne mike täte ye medenbätä, ni abokän ñaka nitre mike tuin bobre jai, ni käme krubäte, ja ruin bäri ütiäte nitre madabätä nie, ye kwrere ni rüe tä niere nibätä.

14. ¿Kukwe ngwarbe nieta juta Ngöbökwebätä ye kömikanintibe ño?

¹⁴ Ja mikata ni rüere ye nirekri kite metrere ye mikadre gare kwin jai. Satana “ni ngökaka”, ye ara köböite kukwe ngwarbe nieta juta Ngöbökwebätä (Juan 8:44; Gén. 3:​1-5). Nitrebiti tä kukwe ngwarbe döräire ye ñan ni töi mike niä. Ñobätä ñan aune nuainbarera kwe siklo kena yete.

15. ¿Nitre ji ngwanka kukwe ngwarbebätä yekwe dre nuainbare Jesús aune nitre ja tötikaka kwe yebätä?

 ¹⁵ Jesús Ngöbö monsoi ye töi metre aune kukwe ñan tuabare nuainbare kwe, akwa Satana käkwe nitre ruärebiti kukwe ngwarbe niebarebätä. Ñodre, “üai käme dänkien” ye meden käkwe ja di biani ni nokoye abokän diebiti tä üai käme käme juentari mento se nitre ji ngwanka kukwe ngwarbe bätä namanintre niere (Mar. 3:22). Jesús nämäne nitre gobrantre ngwärekri ye ngwane, nitre ji ngwanka kukwe ngwarbebätä yekwe niebare niara nämäne kukwe ngwarbe niere Ngöböbätä aune nitre kwati töi kwitani kwetre jakri ne kwe Jesús murie ketadre (Mat. 27:20). Bitikäre, nitre ja tötikaka Jesukwe käkwe kukwe drie kömikani ngwane niaratrekwe nitre moto mikani rubun ja mräkätre tödekaka Jesubiti ye rüere (Hech. 14:​2, 19). Hechos 14:2 yebätä, La Atalaya 1 diciembre 1998 käkwe kukwe mikani gare. Nitre judío ja mikaka nitre ja tötikaka Jesukwe nämäne kukwe driere ye rüere yekwe ñaka kukwe metre ye kani ngäbiti ye ñan namani debe kräketre yebätä campaña nuainbare kwetre ne kwe nitre juta madate ja mikadre nitre kristiano ye rüere.

16. ¿Kukwe ngwarbe nieta ye juruadre nie ngwane dre ngwandre törö jai?

¹⁶ Satana ye käre tä ni ngökö aibe aune nengwane tä ‘ni kwati kä jökräbiti tibien ngökö’ (Apoc. 12:9). Yebätä, kukwe ngwarbe niedre juta Ngöbökwe aune ja mräkätre tä ni jie ngwanka yebätä ngwane, Jesús bätä nitre ja tötikaka kwe siklo kena yebätä nitre ja mikani rüere yekwe kukwe ngwarbe niebare ye nikwe ngwandre törö jai. Biblia käkwe mikani gare erere, nitre tä ja mike nitre testiko Jehovakwe ye rüere aune kukwe ngwarbe nieta kwe ni testikobätä (Mat. 5:​11, 12). Kukwe ngwarbe ye kite nirekri tädre gare metre nie  ye ngwane, ni rüe ye ñaka ni ngökai kwäräbe bengwairebe nikwe ja kriemikai. ¿Dre nuaindre ja kriemikakäre?

17. ¿Kukwe ngwarbe nieta juruadre nie ngwane nikwe dre nuaindre? (2 Timoteo 1:13; recuadro “ ¿Kukwe ngwarbe niedre juruadre mäi, mäkwe dre nuaindre?” ye mikadre ñärärä).

¹⁷ Kukwe ngwarbe nieta ye ñaka kadre ngäbiti. Kukwe ngwarbe nieta ye nikwe kukwe nuadre ye ngwane dre nuaindre mikani gare apóstol Pablokwe. 1 Timoteo 1:​3, 4 niebare kwe: “Kukwe mikanintbe ngwarbe kirakira” ye ñaka kukwe nuadre. Aune mäträbare kwe krörö Timoteobätä: “kukwe kirakira diän diän amne kukwe mda mda mikanintbe ngwarbe, ye ie makwe ñan olo mika” (1 Tim. 4:7). Ni raba bämike krörö: monso chi ie jondron tä kwen tibienta ngwane täbe niken ngwena ja kadate, akwa ni niena ünä ñaka tä ye erere nuainne ñobätä ñan aune jondron ye tä medente gare ie aune mikadre kwe ja kadate ngwane raba mike bren ye gare ie. Ye erere arato kukwe ngwarbe nieta ye ni ñaka kukwe nuin, ñakare aune kukwe kwin kukwe metrebätä ye aibe nita kukwe nuin (ñäkädre 2 Timoteo 1:13 yebätä).

18. ¿Nita tö ngwen juta Ngöbökwebiti ye ni raba bämike ño?

¹⁸ Nükebe nete, kukwe ketamäbiti juta Ngöbökwe tä ja ngwen Jesukwe kukwe nuainbare ye erere ye nibira gare nie, akwa kukwe ne ñan ngöräbe. Mäkwe ja kitai jankunu kukwe Ngöbökwebätä ngwane, kukwe mada kwain bäri mäi. Mäkwe ja mräkätre dimika tö ngwen jankunu juta Ngöbökwe yebiti. Mäkwe Jehová mika täte metre jankunu, juta kwe yebiti tä ja töi mike nemen bare yebätä mäkwe ñaka kämikaka (Sal. 37:28). ¿Juta Ngöbökwe yete ja tareta aune ja ngwanta metre aune nita sribire ye bä nuäre krubäte ñan ererea? ¡Käre mikadre tuin ütiäte krubäte jai!