▪ Kukwe ben ni kä tibienbätä jökrä aune angeletre jökrä tä ja tuin ye rababa gare nie kukwe ja tötikara yebätä, ye abokän: Jehová bäri kri kä mikadre deme. Jehová abokän gobranka bäri kwin ye abokän, kukwe keteiti kukwe yebätä mikata gare. Aune ni kä tibienbätä käkwe ja ngwain metre Jehovai o ñakare ye abokän kukwe ketebukäre ye abokän kukwe ütiäte krubäte rababa gare nie.

¿Se ño amarebiti kukwe bäri ütiäte ye abokän Jehová kä aune niara kä mikadre deme mikata gare? Kukwe ketamäbiti mikata gare ye ani mike gare jai.

Kena, jardín Edén yete, Satanakwe ja mikani Jehová rüere, o niara nämäne kukwe nuainne ye rüere. Niarakwe töbikabare kwin käne kukwe ngwantarikäre Eva ie, yebiti mikani gare kwe Ngöbö ñaka moto kwin nikrä aune tä kukwe ñäkäire krubäte nie. Ye bitikäre, ñaka töbikabare kwe ja mikakäre kukwe niebare Jehovakwe ye rüere yebiti niara namani ni ni ngökaka. Aune ye köböite Jehová kä mikani käme kwe. Yebätä niara kädekata “Diablu”, ye abokän “ni kukwe ngwarbe niekä” meden gärätä (Juan 8:44). Kukwe ngwarbe niebare Satanakwe ye Evakwe mikani era jai yebiti ñaka Ngöbö mikani täte kwe aune ja mikani kwe gobran Ngöbökwe ye rüere (Gén. 3:1-6). Nengwane, Satana tä kukwe ngwarbe niere gobran Ngöbökwe ye rüere; aune tätre nuainne kukwe keta kabrebiti. Nire tä kukwe ngwarbe nieta kwe mike era jai ye kräke bäri nuäre Ngöbö mikakäre ngwarbe jai. Nitre Jehová mikaka täte ye kräke kukwe ngwarbe nieta Ngöbö kä rüere ye abokän kukwe bäri käme nuainta. Ye köböite kä jökräbiti tibien ja tare nikata krubäte.

Ketebukäre abokän, jondron jökrä sribebare Jehovakwe kä nebätä ye tädre kwin yekäre Jehovakwe ja kä mikai ütiäte aune mikai deme. Jehová töita kwatibe ja kä ye mikabätäta deme. Niarakwe kukwe ye nuaindre ye kräke kukwe mada ñaka bäri ütiäte kräke. Ye medenbätä tä niere: “Munkwe ti kä ütiäte mikani yakrä jai […] ye tikwe mikai deme” (Ezeq. 36:23). Oradre ño Jesukwe bämikani ye ngwane, “Nun Rün kä käinbti, ma aibe kä raba mikani ütiäte ni jökräkwe” niebare kwe. Yebiti ni Jehová mikaka täte rabadre kukwe keteiti ütiäte krubäte ye nuainne tö namani mikai gare (Mat. 6:9). Ñobätä Jehová kä mikadre ütiäte jai ye Biblia tä ngwen törö bä kabre nie. Ani mike gare ruäre jai. “Jehová kä mikadre ütiäte tä ribere ye erere nuaindre” (1 Crón. 16:29; Sal. 96:8). “Jehová kä bä nuäre krubäte yei kantadre” (Sal. 66:2). “Tikwe mä käikitaikä kärekäre” (Sal. 86:12). Ne madakäre, bati Jesús nämäne templo Jerusalén yete ngwane, Jehovakwe blitabare kä kwinbiti aune Jesukwe niebare: “Ti Rün tikwe, ja bä mike ütiäte ni jökrä okwäte, ie ti tö”. Ye ngwane, Jehovakwe niebare käre: “Tikwe ja mikanina ütiäte, akwa tikwe ja mikadita ütiäte bobuta abko nieba kä käinbti sete” (Juan 12:28). a

Ketamäkäre, Jehová kä deme ye käikitadrekä käre ie tö. Kä Mil te Kristokwe gobrandi ye bitikäre,  aune ni nuaite mrä näin ta yebätä Jehová kä ütiäte krubäte yebätä töbikadre. Ye ngwane, ¿nitre kä tibienbätä aune angeletre käkwe gobran Jehovakwe ye mikai tuin ño jai? Mikakäre gare jai, ani kukwe ketebu nibi gare nie ye ngwenta törö jai, kena ye abokän ni kä tibienbätä ja ngwandi metre, ketebu gobran kä kwinbiti. Ye ngwane, ni kä tibienbätä tä ja ngwen metre ye ñaka nuaite jire mada. ¿Ñobätä? Ñobätä ñan aune ni nuaite mrä yete ja ngwandi metre aune ni rabai nüne kärekäre kä tibienbätä. Akwa, ¿gobran Jehovakwe yebätä dre rabai bare? Kukwe yebätä ni ñaka rabaira ja ñäkebiti jire. ¿Ñobätä? Ñobätä ñan aune rabai gare metre gobran Jehovakwe ye abokän bäri kwin. Ni jökrä aune angeletre jökrä käkwe kai ngäbiti kä jutobiti. Ne madakäre, ¿dre rabai bare Jehová kä yebätä?

Niara kä rabai deme kukwe jökräbiti, kukwe ngwarbe nie ñaka rabaira niarabätä. Akwa ni Jehová mikaka täte ye kräke niara kä ye rabai bäri ütiäte kä tibienbätä aune kä kwinbiti. ¿Ñobätä? Ñobätä ñan aune niara täi kukwe ñan tuabare nuainne ye jutuadi nie. Ñodre, Jesukwe ja töi mikai bobre aune gobran biainta kwe rün ie, “Ye ngwane, Ngöbö aibe rabadre gobrane jändrän jökräbti” (1 Cor. 15:28). Ye bitikäre, nirekwe nünandi kä tibienbätä yekwe nünain kä jutobiti “Ngöbö ngäbriänkä” täi kwäre ye erere (Rom. 8:21). Jehová töta ni tuai nüne keteitibe ye kwrere mikai nemen bare kwe kä kwinbiti aune kä tibienbätä (Efes. 1:10).

Kukwe jökrä ye rabai bare ngwane, ¿Jehová mräkä yebätä kä rabai ño? Ni jökrä kä kwinbiti aune kä tibienbätä tö rabai Jehová käikitaikä kisere. Üai deme köböire Davidkwe kukwe ne tikani: “Jehová Ngöbö ye käikitadrekä […]. Aune niara kä ütiäte krubäte ye käikitaka kärekäre” (Sal. 72:18, 19). Kärekäre ni täi kukwe mrä aune bä nuäre krubäte ye känene Jehová käikitakakäre.

Nükebe nete, kukwe jökrä nibi gare nie niarabätä ye niara ara. Ye medenbätä, nita töbike niara kä yebätä ngwane, ni tare kwe tä nüke ni töite (1 Juan 4:8). Ni tare Jehovakwe yebätä ni sribebare kwe, ni tare kwe yebätä ni kökanintari kwe aune ni tare kwe ye ara tä niara töi mike gobrane kwin, ye nikwe ngwandre törö käre jai. Ne madakäre, jondron jökrä dätebare Jehovakwe ye kräke tä kukwe kwin keta kabre mike nemen bare tare kwe yebätä rabai gare nie. Kärekäre kukwe kwin krubäte keta kabre kwandi nie rökrakäre Jehová ken aune nikwe niara kä ye käikitaikä (Sal. 73:28).