Nitre gure itire itire rabadre blite jabe kukwe yebätä aune dispositivo intrauterino (kädekata “T” arato) ye abokän ño bätä kukwe nieta Bibliabätä ja jie ngwankäre ye niaratre rabadre mike gare kwin käne jai, biti kukwe diandre nuaindre kwetre jai ne kwe töi rabadre jäme Ngöbö okwäkänti.

Adán aune Eva aibe nämene ye ngwane, Jehová kukwe ne biani nuaindre ietre: “Ngäbäkre ngüba kwati munkwe aune rabadre nirien kwati jatäri”. Ñü Kri näkäni tibien ye bitikäre, Jehovakwe kukwe ye arabe niebare Noé aune mräkätre kwe yei (Gén. 1:28, Jändrän Jökrä Namani Bare Ño Kena; 9:1). Akwa, Biblia ñaka tä niere ni kristiano rabadre kukwe biani nuaindre ye mike täte. Ye medenbätä, nitre gure itire itire törbadre monso tuai jakwe o ñakare aune törbadre dre diain jai ja ngübakäre yebätä rabadre töbike kwin käne. ¿Kukwe medenbätä rabadre blite jabe?

Nitre kristiano kukwe diandre nuaindre jai ye ngwane, kukwe nieta Bibliabätä ja jie ngwankäre ye ererebätä ja töi mikadre nuainne kwetre. Aisete, monso jämi därere ye niaratre ñaka ja töi mike murie kete monso ñan rabadre kwetre gäre. Monso jämi därere murie ketadre nierare ye ngwane, Biblia tä kukwe niere ja nire yebätä ye ñaka mikata ütiäte jai. Meri tä nemen murore ye ngwane, ni kristiano ñaka ja töi mike kukwe mada nuainne monso murie ketakäre, ñakare aune tätre ngübare ne kwe monso däredre kwin (Éx. 20:13; 21:22, 23; Sal. 139:16; Jer. 1:5). ¿Dispositivo intrauterino diandre jai yebätä ni raba dre niere?

Täräkwata La Atalaya 15 septiembre 1979 página 31 aune 32 blitabare kukwe yebätä. Kä ye ngwane, metrere dispositivo intrauterino plástico ye kwrere mika nämene monso juda tä meri tuklo täni (matriz) yekänti, ne kwe meri ñaka rabadre murore. Dispositivo intrauterino ye nämene sribire ño ye ñaka nämene gare metre ta niebare täräkwata La Atalaya yebätä. Doctor kwati nämene niere dispositivo intrauterino ye mika nämene monso juda tä meri tuklo täni yekänti, ye köböire ni brare ñöi ye ñaka rabadre keteitibe jondron kia tä meri teri abokän jondron mrüke kwrere yebe. Ni brare ñöi  ye ñaka rabadre keteitibe jondron kia tä meri teri abokän jondron mrüke kwrere yebe ngwane, ni nire kite kena ye ñaka raba nemen.

Akwa, ye erere nuainbare ngwane namani gare, ni brare ñöi ye ruäre ngwane nämene nemen jondron kia tä meri teri abokän jondron mrüke kwrere yebe. Jondron kia tä meri teri abokän jondron mrüke kwrere ye tä nemen keteitibe ni brare ñöi yebe ngwane, raba kite nirien trompas de Falopio ye keteiti känti (abokän kädekata embarazo ectópico o extrauterino) o raba kite nirien monso juda tä meri tuklo täni yekänti. Arato dispositivo intrauterino ye raba jondron kia tä meri teri abokän jondron mrüke kwrere tädre nirien ye murie kete. Ye erere rabadre bare ngwane, monso jämi därere ye murie ketadre. Täräkwata La Atalaya abokänbätä blitani, ye tä niere: “Nitre kristiano käkwe mikadre gare kwin jai dispositivo intrauterino ye köböite dre raba nemen bare aune Biblia tä dre niere ja nire yebätä ye mikadre gare kwin kwetre jai” (Sal. 36:9).

Kä 1979 ye ngwane kukwe yebätä blitabare, akwa nengwane kukwe keta kabre niena gare doctor kwati krubäte ie aune nitre ja tötikaka krikri ie.

Nengwane dispositivo intrauterino ketebu tä, keteiti tä sribebare cobre yebiti aune kä 1988 yete ja käne namani nuäre kökadre kä Estados Unidos yekänti. Keteiti abokän te hormona tä mikani aune ye rürübäin jatani kä 2001 yete. ¿Dispositivo intrauterino ketebu ye tä sribire ño?

Dispositivo intrauterino sribebare cobre yebiti. Nibira gare nie ye erere, dispositivo intrauterino ye mikata monso juda tä meri tuklo täni yete ngwane, ni brare ñöi aune jondron kia tä meri teri abokän jondron mrüke kwrere ye ñaka tä nemen nire. Ne madakäre, dispositivo intrauterino sribebare cobre yebiti ye raba ni brare ñöi ye ketebätä, ñan ñobätä aune cobre ye abokän ñaka kwin ni brare ñöi ye kräke. * Arato, dispositivo intrauterino ye raba monso juda tä meri tuklo täni ye mike ñaka sribire kwin nieta.

Dispositivo intrauterino hormonal. Dispositivo intrauterino tä keta kabre abokän te hormona tä aune ye bäsi ja erebe kräkä ñata ja ngubakäre yebe. Dispositivo intrauterino hormonal ye ñaka sribire, akwa tä hormona ye kite monso juda tä meri tuklo täni yete. Ye köböire meri ruäre ñan tä nemen murore. Erametre, jondron kia tä meri teri abokän jondron mrüke kwrere ye ñaka ngwane, meri ñan raba nemen murore. Nitre ruäre ja tötika tä niere monso juda tä meri tuklo täni yebiti jondron tä mikani ye abokän dispositivo intrauterino hormonal ye tä mike bäri krä chi. * Ne madakäre, jondron müra kwrere tä nen monso juda tä meri tuklo täni yete ye dispositivo intrauterino hormonal ye tä mike nen bäri ngätäre, aune ye tä ni brare ñöi ketebätä ne kwe ñaka rabadre monso juda tä meri tuklo täni yete.

Nibira gare nie ye erere, monso juda tä meri tuklo täni yebiti jondron tä mikani ye dispositivo intrauterino ketebu ye tä mike bäri krä chi. Jondron kia tä meri teri abokän jondron mrüke kwrere raba nüke monso juda tä meri tuklo täni yete akwa ñan raba nikwite, ñobätä ñan aune monso juda tä meri tuklo täni yebiti jondron tä mikani ye abokän tä bäri krä chi. Yebätä kenanbe meri ñan raba nemen murore. Akwa nitre ja tötika krikri tä niere dispositivo intrauterino ye ñan aibe tä ye nuainne, ñakare aune kräkä mada ja ngübakäre ye ruäre ngwane raba nuainne arato.

Ye medenbätä, dispositivo intrauterino sribebare cobre aune hormonal yebiti ye tä jondron kia tä meri teri abokän jondron mrüke kwrere ye ketebätä ne kwe ñaka ririadre ye ni ñaka raba niere metre ta. Kukwe keta kabre kädrite. Akwa nitre ja tötika krikri mikani gare, dispositivo intrauterino ye köböire meri jökrä bäsi ñaka nemen murore.

Ni kristiano gure töita dispositivo intrauterino ye dianbätä jai ngwane, dispositivo meden tärä aune dre kwin bätä dre ñaka kwin raba nemen bare muko kwe yebätä ye rabadre ngwentari doctor ie mikakäre gare jai. Dre nuaindre kwetre ye ni mada o doctor niedre ietre ye ñaka ngübadre kwetre (Rom. 14:12; Gál. 6:4, 5). Kukwe ye tä gare akwle niaratre nibu ie, ne kwe kukwe meden diandre kwetre jai ye rabadre debe Ngöbö kräke aune niaratre töi tädre jäme (1 Timoteo 1:18, 19; 2 Timoteo 1:3 mikadre ñärärä).