1. ¿Ja ngökata ñöte ye ñobätä ütiäte krubäte? (Üai bämikani kena mikadre ñärärä).

KÄ KWATIRE kwatire te, nitre ja tötikaka Bibliabätä kwati krubäte tätre ja ngökö ñöte. Nitre ye ngätäite monsotre bati o monsotre kia kwati krubäte tä ja ngökö ñöte. Niaratre ye rün aune meye kristiano käkwe ngübabare raba ruin nunye. ¿Aune mäkwe ja ngökanina ñöte? Ye erere ngwane, nunta kwin niere mäi. Ütiäte krubäte ni jökrä rabadre ja ngökö ñöte rabakäre kwäre (Mat. 28:19, 20; 1 Ped. 3:21).

2. ¿Ñobätä nikwe ñaka kä jürä ngwandre jabätä ja diankakäre mento Jehová kräke?

² Ja ngökata ñöte ye köböire kukwe kwin keta kabre raba nemen mäkwe, akwa kukwe ruäre rabai nuaindre mäi arato. ¿Ñobätä? Ñan ñobätä aune mäkwe ja ngökani ñöte ye näire kukwe ngwanintari mäi ne kräke mäkwe jän niebare: “Jesukristo ja nire biani ni ütiäre ie mätä tödeke ngwane, ¿mäkwe ja töi kwitanina ja mika ngite yebätä aune mäkwe ja dianinkä mento Jehová kräke niara mikakäre täte?”. Mäkwe Jehová taredi aune mikai täte käbämikani mäkwe ie ye kukwe bäri ütiäte mäkwe diani nuaindre jai. ¿Mäkwe  kukwe ütiäte diani jai yebätä mä rabadre ja töi kwiteta? Ñakare. Mäkwe ja dianinkä mento Jehová kräke ye kukwe kwin nuainbare mäkwe. Akwa, mäkwe ñaka Jehová mikai täte ngwane, Satana rabai mä gobraine. Aune niara ñaka tö mä tuai nemen kwäre. Ñakare aune, mäkwe ja mikadre niarakri aune mäkwe ñaka ja mikadre gobran Jehovakwe yekri köböite mäkwe ñaka nünandre kärekäre ye käi rabadre jutobätä.

3. ¿Mäkwe ja dianinkä mento Jehová kräke ye köböire kukwe meden meden kwin namanina mäkwe?

³ Mäkwe ja dianinkä mento Ngöbö kräke aune mäkwe ja ngökani ñöte ye köböire kukwe kwin keta kabre namanina mäkwe yebätä mäkwe töbika. Nengwane mäkwe ja dianinanka mento Jehová kräke, yebätä mä raba kukwe ne niere: “Jehová tä tikri; tikwe ñaka kä jürä ngwain jabätä. ¿Ni kä nebätä raba dre nuainne tibätä?” (Sal. 118:6). Nikwe ja mikadre Ngöbökri aune niarakwe ni kadre ngäbiti ye bäri ütiäte.

4, 5. a) ¿Ñobätä ja diankata mento Ngöbö kräke ye tä nuaindre akwle nie? b) ¿Kä kwäbe nibiti akwa ni kristiano jökrä tä ja tuin kukwe medenbe?

⁴ Mäkwe ja ngökanina ñöte ngwane, mäkwe ñaka nütüdre ja ketadre Jehovabe ye abokän celular rabadre mäkwe aune mä rün bätä mä meye rabadre ütiä bien mä kräke ye kwrere. Mä tädre nüne mä rün aune mä meye ben, akwa mä rabadre kwäre ye tä gare mäi aune ñaka niaratre ie. ¿Ñobätä ütiäte mäkwe ye ngwandre törö jai? Ñan ñobätä aune kukwe medenbe mäkwe ja tuai ja känenkäre ye ñaka gare mäi. Ñodre, mä nämene chi ye ngwane mäkwe ja ngökani ñöte raba ruin nunye. Akwa, nengwane mätä bati yebätä, ja ñaka niena ruin käne ye erere mäi aune mä ñaka tä ja tuin kukwe ja erebe ben raba ruin nunye. Meri bati käkwe mikani gare krörö: “Mätä chi ye ngwane, mä testiko Jehovakwe yebätä mäkwe ñaka pastel cumpleaño kräke kwetadre kwelate ye mäkwe ñaka töibikai. Akwa, kätä niken ta aune mä töita nemen bäri rababätä ni madabe ye ngwane, käre Ngöbö kukwei mikadre täte ye bäri kwin ye tädre gare metre mäi”.

⁵ Monsotre ye ñan aibe kisete kukwe mada tä nemen. Nitre ünä tä ja ngökö ñöte ye tödeka kwe nuateta arato. Ñodre, kukwe raba nemen jabätä ietre mukobe, raba nemen bren o sribikänti kukwe raba nemen kisete. Erametre, kä kwäbe nibiti, akwa ni jökrä tä ja ngwen metre Jehovai yebätä ni nuateta (Sant. 1:12-14, TNM).

6. a) ¿Mäkwe ja brukwä tätebiti ja dianinkä mento Jehová kräke ye dre gärätä? b) ¿Filipenses 4:11, 12 aune 2 Corintios 4:7 ye tä dre driere mäi?

⁶ Kukwe meden erere ben mäkwe ja tuadre, akwa ja brukwä tätebiti mäkwe ja dianinkä mento Jehová kräke ye käre mäkwe ngwandre törö jai yekwe mä dimikai ja ngwen metre Ngöböi. Ye tä mike gare, mä rün aune mä meye o ja ketamuko mäkwe ñaka Ngöbö mikadre täte jankunu, akwa mäkwe Jehová mikai täte jankunu ye mäkwe käbämikani ie (Sal. 27:10). Kukwe jökräbätä, Jehovakwe mä dimikadre mäkwe ja dianinkä mento niara kräke ye erere nuainkäre ye mä raba ribere ie (ñäkädre Filipenses 4:11, 12; 2 Corintios 4:7 yebätä).

7. Ngöbö mikadre täte “kä jüräbe kwärä aune grükarekä kwärä” rabakäre kwäre nieta, ¿ye tä dre mike gare?

⁷ Jehová tö mä tuai ja kete ben. Akwa mäkwe ja di ngwandre krubäte ja ketakäre jankunu ben aune rabakäre kwäre. Ñodre, Filipenses 2:12 tä niere: “Munkwe Ngöbö mika täte jankunu kä jüräbe kwärä aune grükarekä kwärä rabakäre kwäre”. Ye tä mike gare, kukwe meden meden rabadre bare mäbätä yebiti ta, mäkwe dre nuaindre ja ketakäre jankunu Jehovabe aune ja ngwankäre metre ie yebätä mäkwe töbikadre kwin. Aune mäkwe ñan tö ngwan akwle jai. Nitre ruäre käkwe Ngöbö mikani täte kä kwati krubäte te akwa biti ja mikani ngite kwetre ye mäkwe ngwan törö  jai. Aisete, ¿dre käkwe mä dimikai rabakäre kwäre?

8. a) ¿Ja tötikadre kaibe ye dre gärätä? b) ¿Ja tötikadre ye ñobätä ütiäte krubäte?

⁸ Ja ketakäre Jehovabe, nikwe niara kukwe nuadre aune blitadre ben. Ja tötikata kaibe Bibliabätä ye köböire metrere niara tä dre niere nie ye nita kukwe nuin. Ye abokän ni rabadre ñäke Biblia, tärä bätä täräkwata tä blite Bibliabätä yebätä aune töbiketaribätä. Mäkwe ngwan törö jai, ja tötikata Bibliabätä ye ngwane, ñaka kukwe mikadre gare töbitibe jai nuainta examen kwelate kräke ye kwrere. Ñakare aune kä mikata gare jai ye kwrere mäkwe Jehová töi keta kabre mada ye mikadre gare jai. Ye köböire, mä rökrai niara ken aune niara rökrai mä ken (Sant. 4:8).

9. ¿Dre dre käkwe mä dimikanina ja tötikakäre kaibe?

⁹ Juta ükaninte Jehovakwe ye käkwe jondron keta kabre bianina mäi mä dimikakäre ja tötike. Kukwe meden meden raba kwen mäi internet käi jw.org yekänti ye ani mike gare ruäre jai. Sección “Jóvenes” yekänti “Actividades para estudiar la Biblia” nieta ye kwain mäi, abokän raba mä dimike kukwe mike gare jai kukwe namani bare nieta Bibliakwe yebätä. Sección ye arabe känti, guías de estudio “¿Qué enseña realmente la Biblia?” ye kwain mäi, abokän raba mä dimike tödeke bäri aune kukwe mikata täte mäkwe ye mike gare ni madai. Aune ¡Despertad! abril 2009 yebätä “Los jóvenes preguntan. ¿Cómo disfrutar la lectura de la Biblia?” nieta yekänti kukwe rabai gare bäri mäi ja tötikakäre Bibliabätä. Mäkwe ja tötikadre aune töbikadretari ye ütiäte krubäte rabakäre kwäre (ñäkädre Salmo 119:105 yebätä). *

10. ¿Ñobätä orasion ye ütiäte krubäte ni ja ngökanina ñöte kräke?

¹⁰ Nita ja tötike Bibliabätä ye ngwane nita Jehová kukwe nuin ye nibira gare nie. Akwa, ni törbadre blitai ben ngwane nikwe oradre ie. Ni kristiano ñaka rabadre orare ne kwe kukwe rabadre bare kwin nie ye aibe kräke. Ñakare aune orasion yebiti nita blite Ni ni Sribekä yebe. Aune Jehová tö mä kukwe nuai (ñäkädre Filipenses 4:6 yebätä). Kukwe meden tädre mä mike töbike ye ngwane, Biblia tä kukwe niere mäi ne mäkwe ngwan törö jai: “Mäkwe tribe mäkwe ye mika Jehová kisete” (Sal. 55:22). ¿Kukwe ye raba mä dimike raba ruin  mäi? Kukwe yekwe ja mräkätre kwati krubäte dimikanina ye niedi metre kwetre mäi. Aune ye erere raba mä dimike arato.

11. ¿Ñobätä mä rabadre käre debe bien Jehovai?

¹¹ Nita ja di ribere Jehovai ye ñan aibe ngwane nikwe oradre, ñakare aune nikwe nuaindre käre. Biblia tä niere: “Munkwe debe bian” (Col. 3:15, TNM). Ruäre ngwane ni raba nemen töbike krubäte kukweta nemen ni kisete yebätä, ye köböite kukwe kwin keta kabre tä nemen nikwe ye raba kite käi nikwitekä nibiti. Mä raba töbike köbö kwatire kwatire te kukwe ketamäbätä debe biankäre Jehovai. Monso merire kädekata Abigail yebiti kä nämene 12 ye ngwane ja ngökani ñöte kwe. Niara tä niere: “Ni mada ñaka Jehová erere abokän ie ni rabadre debe bien krubäte ruin tie. Niarakwe dre dre bianina nie yebätä nikwe debe biandre käre ie. Bati tikwe kukwe keteiti kukwe nuaba ye tita käre ngwenta törö jai: ‘Ni rükadre dekä ngwäte ngwane, nikwe drebätä debe biani Jehovai ye aibe tädre nikwe ye ni raba bämike ja töite. Kukwe ye erere rabadre bare ngwane, ¿dre dre tädre nikwe?’”. *

12, 13. Jehová töi kwin namani gare akwle mäi yebätä mäkwe töbikadretari, ¿ye ñobätä ütiäte krubäte?

¹² Jehovakwe rei David dimikani ja tuin kukwe tare keta kabre ben. Aisete David ie kukwe namani gare akwle yebätä kukwe ne niebare kwe: “Jehová töi kwin ye gain aune mike ñärärä; nireta ngitie niara kokwäre ja kriemikakäre yebätä kätä juto” (Sal. 34:8). Bersikulo ye tä mike gare, ütiäte krubäte Jehová töi kwin ye rabadre gare akwle mäi. Mätä ñäke Biblia aune tärä bätä täräkwata sribeta nunkwe yebätä aune mätä niken gätäbätä ye ngwane, Ngöbökwe nitre dimikanina ño ja ngwen metre ye rabai gare mäi. Akwa, mä jatai nirien kukwe ja üairebiti ye ngwane, Jehovakwe mä dimikai ño ye rabai gare akwle mäi. ¿Jehová töi kwin ye ñokänti namani gare akwle mäi?

¹³ Kukwe ruäre känti ni kristiano jökrä ie namanina gare Jehová ye töi kwin. Niara tä ni nübaire krötö ja ken aune Monso kwe ye ken. Jesukwe niebare: “Ti Rün ti juani, ye ñan jatadre ni ngwena tie angwane, ni ñan jatadre jire iti ja töi jenbti tie” (Juan 6:44). ¿Jehová jatani mä ngwena ja kokwäre ruin mäi? Monso bati raba töbike krörö: “Jehová jatani ti rün aune ti meye ngwena ja kokwäre, yebätä tita näin jerekäbe jiebiti”. Akwa, mäkwe ja dianinkä mento aune ja ngökani ñöte yebiti mäkwe bämikani mätä ja kete kwin Jehovabe. Nengwane mä niena gare metre ie. Biblia tä mike gare metre nie: “Nire nire käta Ngöbö tarere, ni ye abko gare kuin Ngöböye” (1 Cor. 8:3). Mätä juta Jehovakwe yete ye mäkwe mika tuin ütiäte käre jai.

14, 15. ¿Ñobätä kukwe driedre ye raba tödeka mäkwe mike dite?

¹⁴ Jehová tä mä dimike ño blitakäre kukwe mikata täte mäkwe yebätä kukwe driekänti aune kwelate ye tuin mäi ngwane, Jehová ye töi kwin tä nemen gare mäi arato. Monsotre ruäre kräke ñaka tä nemen nuäre kukwe driekäre nitre nänkä kwelate bentre ie, ñan ñobätä aune niaratre ja töi mikai ño ye ñan gare ietre. Kukwe ye tärä nemen bare mäbätä raba ruin nunye. Aune mäkwe kukwe driedre nitre kwati krubäte ie ye bäri ñaka raba nemen nuäre mä kräke. ¿Dre raba mä dimike?

¹⁵ Käne, kukwe mikata täte mäkwe ye ñobätä mätä mike era jai yebätä mäkwe töbika. Internet käi jw.org yete, guías de estudio ye tä mikani kukwe keta kabrebiti mä dimikakäre töbike kukwe nebätä: Mätä kukwe meden mike era jai, ñobätä mätä mike era jai aune ño mä raba mike gare ni madai. Mäkwe kä dianka jai kukwe ye känänkäre. Kukwe mikata täte  mäkwe ye mätä mike era jai aune mäkwe ja tötikai kwin ye ngwane, mä tö rabai blitai Jehová kä yebätä (Jer. 20:8, 9).

16. ¿Dre raba mä dimike ñaka kä jürä ngwen jabätä blitakäre kukwe mikata täte mäkwe yebätä?

¹⁶ Mäkwe ja tötikadre kwin akwa kä jürä raba nemen jankunu mäbätä blitakäre kukwe mikata täte mäkwe yebätä. Meri Testiko bati abokänbiti kä niena 18, yebiti kä nämene 13 ngwane ja ngökani ñöte kwe. Niara tä niere: “Tita kukwe meden mike era jai ye gare tie, akwa ruäre ngwane ñaka tä nemen nuäre ti kräke mikakäre gare”. Akwa, ¿tä dre nuainne? Niara tä ja di ngwen blitakäre kukwe metrebätä töi jämebiti nieta kwe. Tä niere: “Nitre nänkä kwelate tibe tä blite kukwe kwetre yebätä töi jämebiti. ¿Se ñobätä ti ñan rabadre ye erere nuainne arato? Aisete, tita kukwe ruäre mike gare ietre ngwane, tita kukwe ne niere: ‘Kä nuära ti nämä ni iti tötike Bibliabätä aune...’. Biti, tita dre niere ietre ye tita mike gare jankunu ietre. Ti ñaka blite metre ta Bibliabätä bentre, akwa niaratre ruäre töta nemen kukwe mikai gare jai aune tita nitre tötike Bibliabätä ye ngwane, tita dre nuainne ye tätre ngwentari tie. Tita kukwe ye erere nuainne ngwane, tä nemen bäri nuäre ti kräke blitakäre ni madabe. Aune tita blite käre kukwe metrebätä ye ngwane, jata nemen ruin kwin tie”.

17. Kukwe mikata täte nikwe yebätä nikwe blitadre töi jämebiti, ¿ye ñobätä ütiäte krubäte?

¹⁷ Mäkwe ni mada mikai ütiäte jai aune mä törbai niaratre dimikai ngwane, ni mada raba ja töi mike ye erere mä kräke. Olivia abokänbiti kä niena 17, niara nämene monsore ye ngwane ja ngökani ñöte kwe. Tä niere: “Tikwe blitadre Bibliabätä ye ngwane, ti abokän bike töi kwin ye nitre mada rabadre nütüre ye jürä nämä tibätä”. Akwa biti jatani ja töi kwite. Kä jürä nämenebätä ye ñan aibätä ja töi mikani kwe ñakare aune töbikabare krörö kwe: “Ni testiko Jehovakwe ye abokän ño ñaka gare monsotre bati kwati ie aune nun Testiko ye aibe gare ietre. Aisete nunkwe ja ngwandre ño ye ererebätä niaratre raba ja töi mike nun kräke. Kä jürä krubäte nibätä yebätä ni ñaka blite kukwe mikata täte nikwe yebätä o nita blite kukwe yebätä kä jüräbe kwärä ye ngwane, ni abokän Testiko ye ñaka ütiäte ni kräke rabai ruin ietre. Arato nikwe blitadre kä jüräbe kwärä yebätä niaratre raba ja töi mike ñaka kwin ni kräke. Akwa, kukwe mikata täte nikwe ye nita mike era jai ye nikwe bämikadre ietre aune nikwe blitadre töi jämebiti kukwe yebätä bentre ngwane, niaratre raba ni mike tuin ütiäte jai”.

18. ¿Mäkwe dre dre nuaindre rabakäre kwäre?

¹⁸ Nibira gare nie ye erere, mäkwe Ngöbö mikadre täte rabakäre kwäre ye kukwe ütiäte tä nuaindre mäi. Yekäre, mäkwe ñäkädre Bibliabätä aune töbikadretaribätä, mäkwe oradre Ngöböi aune kukwe kwin mikanina nemen bare kwe mä kräke yebätä mäkwe töbikadre. Ye köböire Jehová ye ja ketamuko mäkwe rabai gare bäri kwin mäi. Aune yekwe mä töi mikai blite kukwe mikata täte mäkwe yebätä (ñäkädre Salmo 73:28 yebätä). *

19. ¿Nikwe ja di ngwandre rabakäre kwäre ye ñobätä ütiäte?

¹⁹ Jesukwe niebare: “Nire nire tö ja töi mikai kwatibe nänkrä tibe, ni ye abko tö dre dreye jakrä abko raba käikwitekä jabti amne köbö kwatirekwatire ja kwata raba ruentari tare ñakare ie nünakäre tikrä abko jata ti jiebti” (Mat. 16:24). Erametre, nikwe ja diandrekä mento Jehová kräke aune nikwe ja ngökadre ñöte nänkäre Jesús jiebiti. Ye köböire, kukwe keta kabre kwin rabai nikwe nengwane aune kä mrä käbämikata Ngöbökwe nie yete ja nire kärekäre rabai nikwe. Aisete kukwe keta kabrebätä nikwe Ngöbö mikadre täte jankunu rabakäre kwäre.