“Jehová köböire ni kukwe kwin nuainkä yebätä kä rabai juto”
DIANA abokänbiti kä niena 80 biti bäri. Muko kwe ye nämäne bren Alzheimer kisete aune jämi krüte ye känenkri nünanbare kwe nitre umbre ngübata ye käi känti. Diana monsoi nibu krütani aune bren cáncer nämäne niara mäträräbätä, kukwe tare yebe ja tuani kwe arato. Kukwe yebiti ta, ja mräkätre konkrekasionte tä Diana tuin gätäte aune kukwe driere ye ngwane, käre käta jutobätä nieta kwetre.
John sribibare ni circuito tuabitikä erere kä 43 te. Niara nämäne sribi ye tarere krubäte akwa nikani mräkä iti kwe ngübare, yebätä sribi ye namani ie. Ja mräkätre aune ja ngwaitre tä ngätäi ben gätä krite ngwane, niara tä känime aune käre käta jutobätä tätre niere.
¿Diana aune John tä dre nuainne ne kwe kä tädre juto bätätre? Nire tä ja tuin kukwe kri ben o sribi nuainta kwe tuin kwin ie ye tuanmetreta kwe, ¿ye ñokänti kä raba nemen juto bätätre? Biblia tä niere: “Jehová köböire ni kukwe kwin nuainkä yebätä kä rabai juto” (Sal. 64:10). Kukwe ütiäte ne mikakäre gare jai, dre köböire kä raba nemen juto nibätä aune dre ñaka raba kä mike juto nibätä, ye ani mike gare jai.
KÄTA NEMEN JUTO NIBÄTÄ KÄ BRAIBE TE
Kukwe ruäre tä kä mike juto nibätä, ñodre ja mäkäteta, monso tä nemen nikwe aune nita nemen sribire Ngöbö kräke. Aune kukwe ye metre, ñobätä ñan aune jondron ye Jehovata bien nie. Niarakwe ni brare aune meri mikani gure metre kena, niara köböire monso tä nemen nikwe aune tä sribi mike nuaindre nie juta kwe yete (Gén. 2:18, 22; Sal. 127:3; 1 Tim. 3:1).
Akwa, kukwe ruäre tä kä mike juto nibätä ye ñaka tä nuin raire. Ñodre, ni muko tä krüte o tä ja mike ngite ni madabe ye tare krubäte (Ezeq. 24:18; Os. 3:1). Monsotre ñaka rün aune Ngöbö kukwei mike täte ye köböite kitaka raba konkrekasionte. Ñodre, Samuel ni Ngöbö kukwei niekä ye ngäbriänkätre käkwe ñaka Jehová mikani täte metre; aune rei David käkwe ja mikani ngite köböite ja tuani kukwe kri ben kwe (1 Sam. 8:1-3; 2 Sam. 12:11). Kukwe ye tä nemen bare ngwane, kä ñaka tä nemen juto nibätä aune nita nemen ja tare nike.
Ye erere arato, nita sribi nuainne Ngöbö kräke ye raba nete nikän, nita bren, ni mräkätre tä nemen
ngübadre nie o juta ükaninte Jehovakwe tä kukwe mrä ükete yebätä. Ja mräkätre kwati nämäne sribi Ngöbökwe nuainne ye tuanimetre kwetre, sribi ye nämäne kä mike juto bätätre tätre niere.Kä raba nemen juto nibätä akwa ñaka raire ni raba nemen nütüre. Akwa Samuel, David aune nitre mada mada yebätä kukwe namani bare ye tä kukwe ütiäte driere nie, kukwe ngüba ñaka nikwe rabadre bare nibätä o ni rabadre ja tare nike ye ngwane, kä raba nemen juto jankunu nibätä.
KÄTA NEMEN JUTO NIBÄTÄ KÄREKÄRE
Kä raba nemen ño juto nibätä ye nämäne gare kwin Jesús ie. Nünanbare kwe kä kwinbiti ngwane, kä nämäne jutobätä. Ye medenbätä, niebare kwe “[Jehová] ngwärekri kä nämä juto käre tibätä” (Prov. 8:30). Akwa, niara nükani kä tibienbätä ngwane, ja tuani kwe kukwe kri ben. Kukwe yebiti ta, kä nämäne jutobätä Rün kukwei mikabätä täte (Juan 4:34). Niara murie jatanina niken ye känenkri ja tare nikabare krubäte kwe ye ngwane, ¿dre käkwe niara dimikani ja tuin kukwe yebe? Biblia tä niere: “Kä juto mikani niara käne yebätä kä ngwani nüke kwe jai ja tare nikakäre kribätä” (Heb. 12:2, TNM). Kukwe ketebu raba kä mike juto erametre nibätä niebare Jesukwe, ye ani mike gare jai.
Bati, nitre 70 ja tötikaka Jesukwe nämäne kukwe driere nükaninta kä jutobiti, ñobätä ñan aune chokalitre dianinkä mento kwetre nitrebätä. Angwane, Jesús niebare ietre: “Üai käme käta mun kukwei mike täte, ye munkwe ñan käi ngwian nuäre bäri jabtä, akwa munkwe nünandre kärekäre Ngöböbe, aisete mun käi nena tikani täräbtä kä käinbti, ye abko bäri käi ngwian nuäre jabtä munkwe” (Luc. 10:1-9, 17, 20). Erametre, nita sribire Ngöbö kräke ye tä kä mike juto nibätä, akwa Jehovakwe ni kadre ngäbiti ye tä kä mike bäri juto nibätä.
Köbö mada ngwane, Jesús nämäne dirire nitre kwati ie ngwane, meri iti Judea käkwe niebare ni dirikä ne meye yebätä kä rabadre juto. Akwa, Jesukwe niebare ie: “Ñakare; ñakare aune: ¡Nitre tä Ngöbö kukwei nuin aune tätre mike täte yebätä kä täi juto!” (Luc. 11:27, 28, TNM). Nirekwe monso tärä abokän tä ja ngwen kwin ye ngwane, käta nemen jutobätä. Akwa, monso ye Jehová mikai täte aune ja ketai kwin kwe ben, yekwe kä mikai bäri juto rün aune meyebätä.
Ye erere, kä rabadre juto nibätä yekäre Jehovata ni kai ngäbiti ye gare nie. Erametre, kukwe kri tä nemen ni kisete ye ngwane nita nemen ulire, akwa ni ñaka tä nemen ulire käre. Nita kä ngwen nüke jai aune Jehová mike täte metre, ye tä kä mike bäri juto nibätä (Rom. 5:3-5). Nire tä tö ngwen Jehovai, yei tä üai deme bien ye nikwe ngwandre törö jai aune üai deme ye tä kä mike jutobätä (Gál. 5:22). Yebätä Salmo 64:10 tä niere: “Jehová köböire ni kukwe kwin nuainkä yebätä kä rabai juto”.
¿Dreta John dimike ne kwe käre kä tädre jutobätä?
Kukwe ne tä mike gare, Diana aune John abokän kädrite käne yebätä kukwe tare namani bare, akwa yebiti ta kä nämäne juto bätätre. Diana tä niere: “Monso chi tä ja ketete rünbätä ja kriemikakäre, ye erere tita ja ketete Jehovabätä ja kriemikakäre”. Tä niere arato: “Ngöböta ti dimike ne kwe tikwe kukwe driedre jankunu kä jutobiti”. ¿John abokän käkwe dre nuainbare? Niara tä niere, kä 1998 yete niara kädekani dirikä Kwela Känti Nitre Tötikata Sribi Ngöbökwe Jie Ngwankäre yete aune niarakwe ja tötikani krubäte. Ja tötikani kwe ye köböire, nämäne kukwe driere jankunu kä jutobiti nememe ñaka namanina ni ni tuabitikä erere. Niara tä mike gare ñaka namanina konkrekasion tuinbiti ngwane, niara aune muko kwe kräke namani nuäre kukwe ye ka ngäbitikäre, ñobätä ñan aune Jehová nämäne dre ribere ietre ye niaratre nämäne juto nuainkäre aune kukwe yebätä niaratre ñaka ja töi kwite mikata gare kwetre.
Kukwe nieta Salmo 64:10 ye metre ye nitre kristiano kwati käkwe tuanina nemen bare. Ja mräkä iti aune muko kwe käkwe sribibare Betel Estados Unidos yete kä 30 biti bäri te aune ye bitikäre niaratre juani sribi prekursor especial nuainne, yebätä ani kukwe mike gare jai. Niaratre tä niere metre: “Sribi tuin kwin nie ye tä nete nikän ngwane, nita nemen ulire. Akwa, ni ñaka raba nemen ulire jankunu”. Konkrekasion känti niaratre juani, yete bengwairebe namanintre kukwe driere. Tätre niere arato: “Kukwe meden nämä nun mike töbike ye nun nämä niere metre orasionte. Jehová nämä orasion nunkwe kain ngäbiti nämä nüke gare nunye ngwane, kä nämä nemen juto nunbätä aune nun nämä nementa dite. Nun rababa konkrekasionte ngwane, kä rikaba braibe ta yete ja mräkätre mada ja mikaba prekursor. Ne madakäre, nun nämä nitre nibu tötike Bibliabätä ye jataba nirien kukwe ja üairebiti, yekwe kä mikaba juto nunbätä”.
KÄ NGWAIN “JUTO JABÄTÄ KÄREKÄRE”
Kä tädre käre juto nibätä ye ñaka nuäre. Ruäre ngwane ja rabai ruin ulire nie. Akwa kukwe nieta Salmo 64:10 yebiti Jehovata ni töi mike jäme. Ni tädre di nekä, akwa “Jehová köböire ni kukwe kwin nuainkä yebätä kä rabai juto” ie ni raba tö ngwen. Ye tä mike gare, dre dre rabadre bare nibätä akwa nikwe Jehová mikai täte metre ngwane, kä täi juto nibätä. Köbö rükadi ngwane niarakwe “kä kwin mrä aune kä tibien mrä” käbämikani ye mikai nemen bare. Nitre Ngöbö mikaka täte ye rabai töi metre aune kä ngwain “juto jabätä kärekäre” kwetre Jehovakwe jondron jökrä sribedi yebätä (Is. 65:17, 18).
Ani kukwe ne bämike ja töite: ni ñaka rabai bren aune köbö kwatire kwatire ni rükai ngwäte kä jutobiti. Kukwe meden ñaka kwin namani bare nibätä ye ñaka rükaita törö nie. Jehovata kukwe ne käbämike, “jondron nämene känekäne ye ñaka rabaira törö aune ñaka rükaita jire mun brukwäte”. Nitre krütani gaikröta ye köböire, ni rabaita keteitibe ni mräkätre tare nikwe krütani yebe. Ñodre, monso merire biti kä 12 ganinkröta Jesukwe ngwane, rün aune meye yebätä kä namani juto, ye erere ni kwati krubäte yebätä kä rabai juto ye ni raba bämike ja töite (Mar. 5:42). Köbö rükadi ngwane, nitre kukwe kwin nuainkä nünanka Kä tibienbätä ye rabai nüne kwin aune “Jehová köböire [...] kä rabai juto” nitre yebätä kärekäre.