¿KÄRE mätä debe bien? Ni jökrä rabadre kukwe ye ngwentari jai. Ni näire nitre ñaka rabai debe bien jire niebare Bibliabätä (2 Tim. 3:2). Nitre ruäre ie ja ruin ütiäte yebätä nitre mada käkwe jondron biandre ietre aune kukwe nuaindre kräketre aune niaratre ñaka rabadre debe bien jire tätre nemen nütüre. Nitre ye kwrere gare nie. Nitre ye erere ñaka mate kwin nibätä, ¿ñan ererea?

Akwa ni Ngöbö mikaka täte käkwe debe biandre kukwe jökräbätä aune nikwe bämikadre nieta Jehovakwe (1 Tes. 5:18; Col. 3:15). Ja töi mikadre debe bien ye kwin ni kräke. ¿Ñobätä? Ye ani mike gare ruäre jai.

Debe biandre ye ütiäte krubäte ñobätä ñan aune ye köböire jata nemen ruin bäri kwin nie. Ni ie debe bianta aune ni debe bianka yei jata nemen ruin kwin. ¿Ñokänti ye nemen bare? Töbike kukwe keteiti nebätä. Ni iti tä juto biare kukwe nuainkäre ni kräke yebiti tä bämike ni ütiäte kräke aune ye nuaindre kwe ni kräke ruin ie. Kukwe nuainta ni kräke ye köböire jata nemen ruin kwin nie. Ye erere ja namani ruin Rut ie. Boaz ja ngwani mantiame niara kräke aune töi nämäne kwin kräke tuani kwe ngwane, kä namani jutobätä aune ja namani ruin kwin ie (Rut 2:10-13).

Metrere nikwe debe biandre Ngöböi. Tä ni ngübare aune tä kukwe keta kabre ja üaire bien jankunu nie yebätä ni tärä töbike ¿ñaña? (Deut. 8:17, 18; Hech. 14:17). Akwa kukwe kwin nuainta Ngöbökwe ni kräke ye nikwe ñaka jerekäbe ngwandre törö jai. Ñakare aune Ngöbö mantiame ni kräke aune ni mräkätre kräke yebätä nikwe kä diandrekä jai töbikatarikäre. Ye köböire ni töi rabai debe bianbätä bäri ie, tä ni tarere bätä ni tuin ütiäte ie ye rabai bäri era ni kräke (1 Juan 4:9).

Jehová mantiame aune tä kukwe kwin keta kabre mike nemen bare ni kräke yebätä töbikadretari, akwa ye ñan aibe ngörä, ñakare aune debe biandre ie töi kwin ni kräke yebätä (Sal. 100:4, 5). Debe bianta ni madai ye tä kä mike juto nibätä nieta.

Debe biandre ye ütiäte krubäte ñan ñobätä aune nita kite ja kete bäri kwin ja ketamuko nikwe ben. Ni mikadre ütiäte jai ie ni jökrä töta nemen. Ni madakwe kukwe kwin nuainbare ni kräke yebätä nita debe bien ja brukwä tätebiti ie ngwane nita kite ja kete bäri kwin ben (Rom. 16:3, 4). Ne madakäre, nitre debe bianka ye tä juto biare ni mada dimikakäre. Dre nuainta kräketre ye tuin ietre, aisete töita nemen biarebe kukwe kwin nuainbätä ni mada kräke. Ni mada dimikadre ye tä kä mike juto nibätä ñan ñobätä aune “nita jändrän bien ni mdaye, btä käta neme bäri nuäre” ni jondron ka ngäbitikä ye ngwä niebare Jesukwe (Hech. 20:35).

Robert Emmons ni dirikä Universidad California käkwe niebare: “Ruäre ngwane, nita ni mada dimike aune ruäre ngwane ni dimikata. Ye tä mike gare ni jökrä tä ja di ribere. Ye rükai gare nie ngwane käre nikwe debe biain”. Kukwe keta kabre känti ni madakwe ni dimikadre ne kwe ni tädre kwin aune kä tädre juto nibätä. Ñodre, ni mada tärä mrö bien nie aune kräkä bien nie ni dimikakäre (1 Cor. 12:21). Ni mada tä kukwe kwin nuainne ye ni debe bianka tä gain ngwane tä debe bien bökänbätä. Ye medenbätä, ¿kukwe nuainta mä kräke yebätä käre mätä debe bien?

Debe biandre ye ütiäte krubäte ñobätä ñan aune ye tä ni dimike ja töi mike kukwe kwinbätä.  Ni töi ye jondron jäkärate ye kwrere, tä jondron ruäre mike niken ta aune ruäre abokän tä ketebätä. Nitre debe bianka ye metrere tä ja töi mike kukwe kwin yebätä aune ñan töbike dikaro kukweta kisete yebätä. Kukwe jökräbätä nikwe ja töi mikai debe bien ngwane, bäri nikwe ja töi mikai kukwe kwin yebätä. Ye käkwe ni dimikai ja töi mike debe bien kukwe jökräbätä. Ye erere nikwe ja töi mikai ngwane ye käkwe ni dimikai apóstol Pablo kukwe niebare ne mike täte: “Käre munkwe ni Dänkien käi ngwian bäri nuäre jabtä” (Filip. 4:4).

Nikwe käre debe biain ngwane, nikwe ñaka ja töi mikai kukwe blo yebätä. Ni bätä ngwen ni madabätä, ni ulire aune ni moto nemen rubun ni mada kräke ngwane ñan tä nemen nuäre ni kräke debe bien, ¿ñan ererea? Ne madakäre, ni debe bianka ye ñaka ja töi mike nemen jondron bökäne krubäte ñan ñobätä aune jondron tä kwe ye tuin ütiäte ie aune ñaka näin jondron mada jiebiti (Filip. 4:12).

Kä krüte ne näire, kukweta nakainkä nibätä ye käkwe ni ngwandre di nekä aune ni mikadre ulire yei Satana tö ye gare ni kristiano ie. Nikwe ja töi mikadre kukwe blo ye aibebätä aune ni rabadre kukwe nebetekä kukwe jökrä rüere ie niara tö arato. Ni töi rabadre kore ye köböite nikwe ñaka kukwe driedi kwin. Akwa, käre nita debe bien ngwane, üai deme Ngöbökwe tä ni töi mike kwin ye tä nibätä nikwe bämikai. Ñodre, kä täi juto nibätä aune ni täi tödeke bäri Ngöböi (Gál. 5:22, 23).

Kukwe ninina debe biandre yebätä ye jökrä tuin metre ni Ngöbö mikaka täte ie, ¿ñan ererea? Ñan nierare ni töita nemen debe bien aune töbike kukwe kwin yebätä ye nüke gare nie. Akwa ni ñaka ja di ngwandre nekä. Ni raba ja töi mike debe bien aune nuainne jankunu. ¿Ni raba nuainne ño? Nikwe kä diandrekä jai töbikatarikäre kukwe medenbätä ni raba debe bien mantre jetebe yebätä. Käre nikwe ja di ngwain nuainne ngwane, bäri ni täi juto debe biankäre jondron jökräbätä. Ne madakäre, kä rabai bäri juto nibätä nitre töita kukwe blo aibebätä ye ngwä. Ngöbö aune nitre mada tä kukwe kwin nuainne ni dimikakäre aune kukwe meden tä kä mike juto nibätä ye jökräbätä töbikadretari. Arato ni raba ne nuainne: köbö kwatire kwatire ni raba kukwe ketamä tike jai täräbätä debe biankärebätä.

Ja töi mikata debe bien käre ngwane ni jisai tä sribire ño ye tä nikwite, ye abokän tä nemen bäri nuäre ni kräke ja töi mikakäre kukwe kwin yebätä ye gani nitre ja tötikaka krikri yekwe. Ni debe bianka yebätä käta nemen bäri juto. Ye medenbätä, kukwe kwin nuainbarera ni kräke ye nikwe ngwandre törö jai, kukwe kwin tä nemen bare ni kräke ye nikwe käi ngwandre juto jabätä aune käre nikwe debe biandre. Kukwe kwin tä nemen nikwe ye nierare nikwe ñan nütüdre, ñakare aune Biblia tä dre niere ye erere nikwe nuaindre. “Munkwe debe bian Jehovai niara töi kwin yebätä” aune jondron jökräbätä nikwe debe biandre (1 Crón. 16:34; 1 Tes. 5:18).