1. ¿Nitre kwati tä sribi mike tuin ño jai?

¿NITRE ni käite tä sribi mike tuin ño jai? Juta kwati te nitre tä sribire krubäte. Ye köböite, kä ñaka ietre mräkätre kwe kräke, kukwe ja üaire kräke aune ja dükakäre (Ecl. 2:23). Ne madakäre nitre mada ñan töta nemen sribidi aune tätre nemen kukwe mike jabiti ñaka nuainkäre (Prov. 26:13, 14).

2, 3. ¿Jehová aune Jesús tä kukwe meden bämike ni käne?

² Töbikata kore sribi aune ja düka yebätä ye ñaka kwin. Akwa, ¿sribi ye tuin ño Jehová aune Jesús ie? Jehová ye baliente krubäte ye Jesukwe mikani gare metre kukwe niebare kwe nebiti: “Ti Rün tikwe tä sribire käre abti kä nüke mtare abko erere tita sribire arato” (Juan 5:17). Jehovakwe Angeletre kwati krubäte, kä tibien bä nuäre te nita nüne, muke aune jondron bätäkä ngwarbe kä kwinbätä sribebare kwe yebätä töbike. Ye arabätä ni salmista käkwe niebare: “¡Jehová, mäkwe jondron sribebare krubäte! Mä töbätä ye köböire jondron jökrä ye namani bare mäi. Kä tibien yete jondron sribebare mäkwe ye tä ere krubäte” (Sal. 104:24).

³ Ngöbö töbätä ye Jesukwe bämikani kwin. Ngöbökwe kä kwinta ükaninte ngwane Jesukwe dimikani aune nämäne niara ben “ni sribikä kwin krubäte” ye kwrere (Prov. 8:27-31). Ye bitikäre nämäne kä tibienbätä ngwane, sribibare kwin krubäte kwe. Sribi nuainbare kwe ye abokän nämäne mrö kwrere niara kräke aune jondron jökrä nuainbare kwe yebiti bämikani  kwe Ngöbö ara käkwe juani (Juan 4:34; 5:36; 14:10).

4. Jehová aune Jesús tä ja düka mike tuin ño jai, ¿ye tä dre driere jai töi kräke nie?

⁴ ¿Akräke Jehová aune Jesús kukwe bämikani ye tä mike gare nikwe ñaka kä diandrekä jai ja dükakäre? Ye ñan ai gärätä. Jehová ye ñaka nainte jire, aisete niarakwe ja dükadre chi ni erere ye ñan ribere jai. Akwa Bibliabätä nieta niarakwe kä kwinta aune kä tibien sribebare ye bitikäre ñan sribibare jankunu kwe ñakare aune ja dükabare chi kwe (Éx. 31:17). Ye tä mike gare, niarakwe ñaka jondron mada sribebare aune jondron sribebare kwe ye kräke kä dianinkä kwe jai käi ngwankäre juto jabätä. ¿Nan Jesús? Niara nükani kä tibienbätä ngwane sribibare krubäte kwe akwa kä dianinkä kwe jai ja dükakäre aune mrökäre ja ketamuko kwebe (Mat. 14:13; Luc. 7:34).

5. ¿Dre ñan tä nemen nuäre nitre kwati kräke?

⁵ Ni Ngöbö mikaka täte käkwe ja ngwandre baliente aune ñaka kren ngwandre jai nieta Bibliakwe (Prov. 15:19). Nita sribire ja mräkätre ngübakäre. Aune kukwe kwin driedre ye ni kristiano jökrä käkwe nuaindre. Akwa nikwe kä diandrekä jai ja dükakäre arato. ¿Kä diandrekä jai sribi, kukwe drie aune ja düka kräke ye ñaka nemen nuäre ni kräke? ¿Nikwe ja dükadre nuäi aune sribidre nuäi ye ñokänti raba nemen gare nie?

6. ¿Sribi aune ja düka mikadre tuin ño jai ye erere Jesukwe nuainbare ye mikata gare ño Marcos 6:30-34 yebätä?

⁶ Kä diankata nuäi jai sribikäre yebätä töbikadre kwin ye ütiäte krubäte. Ngöbökwe rei Salomón mikani kukwe ne tike, “kä tärä kukwe jökrä kräke”. Kukwe niebare kwe ye ngätäite kä tärä nura nökakäre, ju sribekäre, muakäre, kötakäre, aune bailakäre niebare kwe (Ecl. 3:1-8). Ja dükadre aune sribidre ye ütiäte krubäte ja nire nikwe kräke ye nibira gare nie. Ye medenbätä mikadre tuin ño jai ye erere Jesús nämäne mike tuin jai. Bati nitre ja tötikaka Jesukwe janamane kukwe driere nükaninta ngwane “kä ñan namani mrökrä ietre” yebätä Jesukwe niebare ietre: “Brän jadüke chi kä kaibete” (ñäkädre Marcos 6:30-34 yebätä). Jesús bätä nitre ja tötikaka kwe ye ñan nämäne ja düke niaratre tö nämäne nuäi ye ererebätä akwa niaratre nämäne kä ribere jai ja dükakäre ye nämäne gare Jesús ie.

7. ¿Kukwe biani köbö sábado yebätä nikwe ja tötikai ngwane ni dimikai ño kwe?

⁷ Ruäre ngwane, kä diandrekä jai ja dükakäre o jondron mada nuainkäre ye kwin krubäte. Jehovakwe Kukwe Biani Moisés ie juta Israel kräke yebiti tä kukwe ye bämike metre nie, ye abokän niaratre rabadre köbö sábado ye mike deme jai niebare kwe ietre. Kukwe Biani Moisés ie ye nikwe mikadre täte ribe ñan niena nie nengwane, akwa nikwe ja tötikai kukwe biani köbö sábado yebätä ngwane, kukwe kwin krubäte rabai gare ja töi kräke nie. Kukwe rabai gare nie ye käkwe ni dimikai töbike kwin sribi aune ja düka mikata tuin ño jai yebätä.

8. ¿Nitre israelita rabadre dre nuainne sabadote nieta Éxodo 31:12-15 yete?

⁸ Biblia tä niere, köbö nikani kwä ti ta ye bitikäre Jehovakwe ñaka jondron mada sribebare kä tibienbätä (Gén. 2:2). Akwa Jehová ye baliente krubäte aisete tä sribi mada nuainne (Juan 5:17). Köbö ti te Ngöbökwe jondron sribebare aune köbö kükükäre yete ja dükabare kwe nieta tärä Génesis yebätä, ye erere arato köbö ti te nitre israelita sribi nuaindre aune köbö sábado yete ja dükadre kwetre. Köbö sábado ye nämäne kukwe ükaninte Ngöbökwe nitre Israel ben jai ye bämike. Köbö ye “ja dükakäre” aune “deme Jehová kräke” (ñäkädre  Éxodo 31:12-15 yebätä). * Monsotre kia, nitre klabore aune nitre jökrä ñaka rabadre sribire jire chi. Jondron nire mika ñaka nämäne sribire arato (Éx. 20:10). Ye köböire kä nämäne nemente nitre israelita ie ja töi mikakäre bäri kukwe ja üaire yebätä.

9. ¿Kukwe meden ngwarbe drie nämäne sábado yebätä Jesús näire?

⁹ Köbö sábado ye nämäne kwin nitre Ngöbö mikaka täte ye kräke. Akwa Jesús näire nitre ji ngwanka kukwe ngwarbebätä ye käkwe kukwe ribi krubäte mikani nuaindre köbö sábado yebätä. Ñodre, ñaka trigo ngokwä ötadre jire o ñaka ni bren kräkäi mikadre jire köbö sábado yete nie nämäne kwetre (Mar. 2:23-27; 3:2-5). Nitre ye erere Jehová ñaka nämäne töbike ye Jesukwe mikani gare metre nitre niara kukwe nuaka yei.

10. ¿Jesús nämäne köbö sábado mike tuin ño jai ye Mateo 12:9-12 tä mike gare ño nie?

¹⁰ Jesús aune nitre judío nänkä niara jiebiti ye nämäne köbö sábado yete ja düke ñobätä ñan aune Kukwe Biani Moisés ie ye niaratre nämäne mike täte. * Köbö sábado yete jondron kwin nuaindre ni mada kräke ye ñaka blo ye Jesukwe bämikani dre nuainbare kwe aune kukwe niebare kwe yebiti. Mikani gare  metre kwe: “Ni rabadre ni bren miketa kuinta köbö jadükakrä näire abko Kukwe Biani Ngöbökwe Moiséye käta köböi bien nie” (ñäkädre Mateo 12:9-12 yebätä). Kukwe kwin nuaindre ni mada kräke köbö sábado yete, ye ñaka nämäne tuin blo Jesús ie. Ñobätä ütiäte ñaka sribidre köbö yete ye mikani gare metre kwe kukwe nuainbare kwe yebiti. Nitre israelita nämäne ja düke köbö yete aisete kä nämäne ietre ja töi mikakäre kukwe ja üaire yebätä. Köbö sábado yete Jesús mräkätre nämäne Ngöbö mike täte ye kukwe nuainbare kwe juta Nazaret yete tä bämike. Bibliabätä nieta “köbö jadükakrä näire niara nämane niken sinagogate, känti nämane niken käre. Ye erere, bati köbö jadükakräte nikaninta, känti namani nünaninkä ñäkäkäre Ngöbö Kukweibtä” (Luc. 4:15-19).

11. ¿Sribidre ja dibiti yebätä nirekwe kukwe kwin bämikani Jesús käne?

¹¹ Sribi tuin ño Ngöböi ye Josekwe driebare Jesús ie nämäne jondron sribere kri kukwänbiti ben ye ngwane (Mat. 13:55, 56). Josekwe sribibare krubäte mräkätre ngübakäre ye jutuabare Jesús ie. Kä nikani ruäre ta yete Jesukwe kukwe ne niebare nitre ja tötikaka kwe yei: “Ni sribikä abko ie sribi ütiä biandre abko erere munkwe mrödi sribi munkwe ütiäre” (Luc. 10:7). Aisete Jesús ga ñan raba ngwarbe sribi ja dibiti yebätä.

12. ¿Sribidre ja dibiti ye texto meden Bibliabätä tä mike gare?

¹² Sribi doboko yebätä apóstol Pablo ga ñan raba ngwarbe arato. Niara nämäne kukwe kwin Jesubätä driere ye sribi bäri ütiäte nuain nämäne kwe. Akwa “nämane sribire dibire rare mrökrä jae” arato, ne kwe ñaka rabadre tribe doboko ye kwrere ja mräkätre kräke ye nämäne gare nitre Tesalónica ie (2 Tes. 3:8; Hech. 20:34, 35). Sribibare kwe Corinto yebätä nämäne blite. Yete namani Áquila aune Priscila gwirete “sribikäre ketetibe bentre”. Sribi nuain nämäne Pablokwe ye abokän nämäne “jändrän kwata” sribere jure. Sribibare kwe “dibire rare” niebare kwe ye ñan tä mike gare töi nämäne sribi aibebätä. Ñodre nitre judío ñaka nämäne sribire sábado, “köbö jadükakrä bämän kratirekratire” yete yei Pablo nämäne kukwe driere (Hech. 13:14-16, 42-44; 16:13; 18:1-4).

13. ¿Pablokwe kukwe kwin bämikani yebätä dre raba nemen gare ja töi kräke nie?

¹³ Apóstol Pablo käkwe kukwe kwin bämikani ni kräke. Sribibare kwe ja kräke akwa yebiti ta kukwe bäri ütiäte ye mikani nuaindre käne kwe jai, ye abokän nämäne “niken Ngöbö kukwei kuin Jesubtä ngwena” nitre ie (Rom. 15:16; 2 Cor. 11:23). Nitre mada nübaibare kwe ye erere nuainne arato. Áquila aune Priscila käkwe sribibare Pablobe Kristo Jesús kräke (Rom. 12:11; 16:3). “Sribi ni Dänkienkwe, yebtä munkwe ja kita ja di ngöibti” niebare Pablokwe nitre Corinto ie (1 Cor. 15:58; 2 Cor. 9:8). Aune Ngöbökwe töi mikani kukwe ne tike: “Nire nire ñan tö sribire käkwe ñan mrödre” (2 Tes. 3:10).

14. ¿Jesús tö namani dre mikai gare Juan 14:12 yete?

¹⁴ Kukwe driedre aune nitre mikadre ja tötikaka Jesukwe ye sribi bäri ütiäte kä krüte ne näire. Jesukwe sribibare ye bäri biti ta nitre ja tötikaka ben ye käkwe sribidi niebare kwe (ñäkädre Juan 14:12 yebätä). Kukwe niebare kwe yebiti ñan mikani gare kwe nitre ye käkwe kukwe ñan tuabare nuaindi, ñakare aune kukwe driedi kwetre aune nitre tötikai kwetre kä bäri mente känti aune kä bäri raire te niara kräke ye gäräbare kwe.

15. ¿Kukwe meden ni rabadre ngwentari jai aune ñobätä?

¹⁵ Sribi tärä nikwe ngwane ne ngwandretari jai: “¿Ti sribikä baliente nieta tibätä? ¿Sribi mikata ti kisete ye tita nuainne jötrö aune kwin?”. Kukwe ngwinintari nebätä nikwe jän nini ngwane, ni sribi bökänkä ye tä tö ngwen nie aune  sribi muko nikwe ye raba kukwe drieta nikwe ye kukwe nuin. Ne madakäre, kukwe drie aune nitre mikadre ja tötikaka Jesukwe yebätä kukwe ne ngwentari jai: “¿Tita ja di ngwen kukwe driere tuin tibätä nitre ie? ¿Tita niken ni tuinbiti kena ye ngwane tita ja ükete kwin? ¿Nitre töta nemen kukwe mikai gare jai ye tita tuinbiti jötrö ngwarbe? ¿Kukwe ükaninte jene jene kukwe driekäre ye käre tita ja di ngwen nuainne siba?”. Kukwe ngwinintari nebätä nikwe jän nini ngwane sribi ye käi juto nibätä.

16. ¿Jesús aune nitre apóstol ye nämäne ja düka mike tuin ño jai akwa nitre kä nengwane tä mike tuin ño jai?

¹⁶ Jesús ye käkwe kä diandrekä jai ja dükakäre nitre ja tötikaka kwebe ye nämäne gare ie. Akwa ni näire töbikata ño ja düka yebätä ye erere töbika nämäne Jesús näire arato. Ñodre niarakwe kukwe bämikani ni jondron bökäne kri yebätä. Ni jondron bökäne ye nämäne niere jai: “Mtare mentokwäre ti bike jadüke, ti bike mröre, dö ñaen amne ti bike kä ngwen nuäre jabtä kwäräkwärä” (Luc. 12:19; 2 Tim. 3:4). Ja düka aune jondron kwin ye nämäne bäri ütiäte ni jondron bökäne ye kräke. Akwa Jesús aune nitre apóstol ye ñaka ja töi mikani ye erere nuainne.

17. ¿Ni ñan sribire ye ngwane nita dre nuainne?

¹⁷ Ni ñaka sribire ngwane nita kä denkä jai ja dükakäre akwa ye ñan aibe, ñakare aune nita kukwe driere, kwen gätäbätä, yebiti nita ja ngwen Jesús erere. Kukwe ketebu ye ütiäte krubäte ni kräke yebätä käre nita ja di ngwen nuainkäre kä jökrä ngwane (Heb. 10:24, 25). Ne madakäre nita kwen gätäbätä aune ñongwane ni raba blite kukwe metre yebätä ye nita nuainne nita medente ye erere känti o vacación bianta nie ngwane (2 Tim. 4:2).

18. ¿Nikwe dre nuaindre ie Rei Jesukristo tö?

¹⁸ Sribi aune ja düka mikadre tuin ño jai ye Rei nikwe Jesukristo tä driere nie yebätä nita debe bien krubäte, ¿ñan ererea? (Heb. 4:15). Ja dükadre nuäi ye ererebätä ja dükadre ie niara tö. Aune nikwe sribidre ja dibiti ja ngübakäre bätä nikwe ja di ngwandre nitre mike ja tötikaka niarakwe ie tö arato. Ne madakäre Jesukwe dre nuainbare ni mikakäre kwäre kukwe käme krubäte kisete ye rabai gare nie kukwe ja tötikara ja känenkäre yebätä.