Nitre tä kukwe ngwentari
Kukwe nämäne nemen bare ye metre o ñakare ye kräke ni nibu ribe nämäne nieta Bibliakwe (Núm. 35:30; Deut. 17:6; 19:15; Mat. 18:16; 1 Tim. 5:19). Akwa, Kukwe Biani Moisés ie yebätä nie nämäne, meri ja kukwei kitaninanka ja mäkätekäre ye ni brare käkwe mikadre ja dibiti jabe känsenta aune meri ye käkwe ngwänändrekä ngwane, ni brare ye aibe ngite rababätä meri yebe akwa meri ye abokän ñaka ngite. Meri mika nämäne ja dibiti jabe ye tuaka ñaka, ¿akwa ñobätä kukwe ye ükate nämäne kore?
Meri ye ñaka ja mike ngite ye mikakäre gare metre Deuteronomio 22:25-27 ye tikani. Ñobätä ñan aune ni brare ye nämäne ja mike ngite ye gare kwin. Ani ja tötikebätä.
Meri ja kukwei kitaninanka ja mäkätekäre ye ni brare mada nämäne mike jabe “jutate” yebätä blitata bersikulo känekäne yekänti. Ni brare ye ngite ñobätä ñan aune meri ye ja mäkäninante ye kwrere mika nämäne tuin jai abokän niara nämäne mike jabe. ¿Akwa dre nie raba meri yebätä? Meri ye “ñaka ngwänänkäbare” ja driekäre. Nuaindre kwe akräke nitre mada ie kukwe juruadre aune dimikadre kwetre, akwa niarakwe ñaka nuainbare yebätä niarakwe ja mikani ngite arato, ñobätä ñan aune meri ye ja kukwei kitaninanka ja mäkätekäre akwa namani ni yebe. Aisete nitre nibu ye ngite krubäte (Deut. 22:23, 24).
Ye bitikäre, kukwe biani yebätä kukwe mada mika nämäne gare arato: “‘Akwa, meri bati ja kukwei kitaninanka ja mäkätekäre ye ni brare ie kwani kaibe känsenta aune mikani kwe ja dibiti jabe ngwane, ni brare käkwe mikani jabe ye aibe kämikadre; meri ye tuametre jerekäbe. Niarakwe ñaka ja mikani ngite aisete ñaka murie ketadre. Kukwe ne ja erebe ni iti tä ni mada nuainne tare aune tä murie kete yebe. Ñobätä ñan aune kwani känsenta ni brare yei aune meri ja kukwei kitaninanka ja mäkätekäre ye ngwänänkäbare, akwa ni ñaka nükani niara dimikakäre’” (Deut. 22:25-27).
Kukwe nekänti meri nämäne kukwe niere ye nitre kukwe ükatekä nämäne mike era jai. Ñobätä ñan aune meri ye “ngwänänkäbare, akwa ni ñaka nükani niara dimikakäre”. Aisete niara ñaka ngite rababätä ni yebe. Akwa ni brare ye abokän ngite rababätä meri yebe aune mikabätä “ja dibiti jabe”.
Meri ñan ja mike ngite ye mikakäre gare kukwe biani ye tä blite metrere, akwa ni brare ye nämäne meri mike ja dibiti jabe aune nämäne nemen ben yebätä ni ye ngite mika nämäne gare metre. Dre nämäne nakainkä ye nitre kukwe ükatekä nämäne mike gare kwin jai aune Ngöbökwe kukwe biani nuaindre ye ererebätä niaratre nämäne kukwe ükete ye gare metre nie (Éx. 20:14; Deut. 13:14; 17:4).