¿Törö mäi?
¿Kukwe tä täräkwata Ni Mikaka Mokre 2019 yebätä kukwe ngwantarita ne mä raba mike gare?
¿“Jondron keta kabre rükäre yebiti ja mikai mä rüere, akwa kukwe tare ñaka nuaindi mäbätä” käbämikani Ngöbökwe ye dre gärätä? (Is. 54:17).
Ngöbökwe ni kriemikai “nitre bikaka kri” yebätä yei nikwe tö ngwandre (Is. 25:4, 5). Nitre ja mikaka ni rüere käkwe kukwe nuaindi nibätä akwa ye ñaka nuaindi kärekäre kwetre (w19.01, página 6, 7).
Nitre Canaán aune nitre israelita ja ngwani käme kräke Ngöbökwe kukwe ükaninte ngwane, ¿niarata kukwe ükete metre ye bämikani ño kwe?
Nitre namani kämekäme jabe aune nitre käkwe meri bätä monsotre ngwani ja tare nike ye Ngöbökwe mikani ja ngie nuin. Akwa nitre käkwe kukwe kwin nuainbare aune niara mikani täte ye kräke kukwe kwin mikani nemen bare kwe (w19.02, página 22, 23).
¿Ni ñan Testiko käkwe oradre ni okwäbiti ngwane dre nuaindre?
Ni rabadre kwekebe aune ni mada tä dre nuainne ye mikadre ütiäte jai akwa nikwe ñaka “amén” niedre bentre aune nikwe ñaka ja kadre kisebiti. Ni raba orasion nuainne käbube jakrä (w19.03, página 31).
¿Küdreta monsotre kiabätä ye käme krubäte?
Küdreta monsotre kiabätä ye käme krubäte ñobätä ñan aune ja mikata ngite konkrekasion rüere, nitre sribikä gobran kräke ye rüere aune Ngöbö rüere. Kä ruäre känti kukwe ye kwrere ükadrete ribeta ngwane, nitre umbre ji ngwanka tätre mike täte (w19.05, página 9, 10).
¿Ni raba ja töi kwite ño o ja töi ükete ño?
Kukwe ketamä ütiäte ni raba nuainne. Nikwe oradre Jehovai, dreta ni töite yebätä töbikadretari ja trä tuakäre aune ja ketamuko kwin känändre (w19.06, página 11).
¿Ni raba dre nuainne ja mikakäre juto ni rüe rakadrekä ye känenkri?
Nita ja kete Jehovabe ye mikadre dite, niarata ni tarere aune ñaka ni tuainmetre jire kwe ye nikwe mikadre tuin era jai, ñäkädre Bibliabätä bätä käre oradre. Gobran Ngöbökwe ye käkwe kukwe jökrä ükaite ye mikadre era jai aune texto ütiäte ni kräke ye mikadre ja töibätä aune kantiko arato (w19.07, página 2-4).
¿Ni raba dre nuainne ni mräkätre dimikakäre ne kwe rabadrete kwäre?
Niaratre töi mikadre nüke gare jai, nikwe ja ngwandre kwin, niaratre ngübadre bätärekä aune taredre ye ütiäte krubäte (w19.08, página 15-17).
Mateo 11:28 tä kukwe käbämike erere, ¿Jesús tä ni mike ño jäme?
Ni ji ngwanka bäri kwin, sribi muko kwin aune sribi bäri kwin tä nikwe (w19.09, página 23).
¿Ño Jehovakwe ni töi mikai sribire aune ja di biain kwe nie nuainkäre? (Filip. 2:13).
Nita ñäke Bibliabätä aune töbiketaribätä ngwane, tä ja di bien nie ja töi mikakäre nemen bare aune tä ja di bien nie sribikäre. Jondron nuain gare nie ye üai deme tä ni dimike nuainne bäri kwin (w19.10, página 21).
¿Kukwe ütiäte dian jämi nuaindre jai ye känenkri dre nuaindre?
Kukwe ketarike nuaindre: Ngöbökwe ni mikadre töbätä ye ribedre ie, ja tötikadre nguseta kukwe yebätä, nuainta jondron täri ya yebätä töbikadre, kä diandrekä jai kukwe mikakäre nemen bare aune raba nemen bare o ñakare yebätä töbikadre (w19.11, página 27-29).
¿Satana kukwe niebare Eva ie yete ja käne nita krüte üai tä niken nüne kä madakänti drie jatani?
Ñakare raba ruin nie. Eva krütai akwa üai näin nüne kä madakänti ye ñan ai niebare Satanakwe ie. Ñakare aune, Eva ñaka krütai jire niebare kwe ie. Kukwe ngwarbe mika nämäne täte ye ganinte jökrä Ñü Kri Noé näire yete. Kira blita nämäne kukwe keteitibebiti akwa juta Babel yete Jehovakwe nitre kukwei kwitani jene jene ye känenkri, ni nire tä krüte üai tä niken nüne kä madakänti ye mika jatani täte (w19.12, página 15).