Ñakare. Kukwe ye erere nuain nämäne kirabe ye mika ñaka gare Bibliabätä aune tärä kirabe mada yebätä.

Pablo näire nitre ruäre nämäne ja ngökö ñöte ni krütanina ye täte, ye erere bersikulo ye kwitata Biblia keta kabrebätä. Ñodre, Biblia Kukwe Kuin Ngöbökwe yete nieta krörö: “Ni krütani krütani ñan rükadreta nire ni ruäre tä niere, ¿se drekäre abko ni ruäre tä ja ngökö ñöte ni krütani diäre?”.

Akwa nitre kukwe känänkä Bibliabätä nibu käkwe dre tikani ye ani mike gare jai. Ni iti nämäne ja ngökö ñöte ni krütanina ye täte yebätä töbikadre, akwa kukwe ye erere nakaninkä o ño ye mika ñaka gare Bibliabätä aune kukwe kirabe mada yebätä ye teólogo Gregory Lockwood käkwe mikani gare. Ye erere arato profesor Gordon Fee käkwe kukwe ne tikani: “Ni iti ja ngökani ñöte ni krütanina ye täte ye erere mika ñaka gare Bibliabätä jire chi. Nuevo Testamento yete kukwe ye kwrere ñaka kwen jire. Nitre kristiano siklo kena nämäne ja ngökö ñöte ni krütanina ye täte ye mika ñaka gare. Aune nitre apóstol krütani ye bitikäre iglesia jene jene namani ükaninte yete kukwe ye erere nuain nämäne ye mika ñaka gare arato”.

Biblia tä mike gare erere, Mateo 28:19, 20 yete Jesukwe niebare: “Mun nän, amne nitre nünanka kä jökräbti temen, ye [...] mika ja töitikaka siba tibe amne munkwe niaratre ngöka ñöte [...]. Amne kukwe diribare tikwe munye, ye erere munkwe diri jökrä ietre amne niaratre käkwe [...] mikadre täte jökrä arato”. Ye medenbätä, ni iti rabadre ja tötikaka Jesukwe aune ngökadre ñöte yekäre, rabadre kukwe mike gare jai Jehovabätä aune Jesubätä, rabadre niaratre nibu ye mike era jai aune kukwei mike täte. Aune gare metre nie, nire krütanina aune doboi mikanina ye ñaka raba kukwe ye nuainne aune ni kristiano tädre nire ñaka raba ja ngökö ñöte ni krütani ye täte (Ecl. 9:5, 10; Juan 4:1; 1 Cor. 1:14-16).

Aisete 1 Corintios 15:29 yete, ¿dre gäräbare Pablokwe?

Nitre krütani gaikröta ye nitre kristiano ruäre konkrekasion Corinto yete ñaka nämäne mika era jai (1 Cor. 15:12). ¿Pablokwe niaratre töi ükaninte ño? “Köbö kwatire kwatire tita kä krubätete rätäninkä gatabti” niebare kwe ietre. Pablo nämäne nire aune nämäne ja tuin kukwe taretare ben, akwa yebiti ta niara krütadre ye bitikäre rükaita nire ni üaire dite Jesús erere yei nämäne tö ngwen (1 Cor. 15:30-32, 42-44).

Nitre kristiano Corinto ye dianinkä nänkäre kä kwinbiti, aisete köbö kwatire kwatire ja tuai kwetre kukwe tare ben aune gadrekröta ye känenkri krütai ye tädre gare metre ietre. Ja ngökadre ñöte Kristo Jesús käbiti ye abokän ja ngökadre ñöte Jesús murie ketani yete meden gärätä (Rom. 6:3). Ye abokän Jesús ja tare nikani ye erere niaratre ja tare nikai aune niaratre gadrekröta nünankäre kä kwinbiti ye känenkri krütai meden gärätä.

Jesús ja ngökani ñöte ye käi nikani kubu ta ye bitikäre, nitre apóstol nibu ie kukwe ne niebare kwe: “Ti ngökata ño ñöte yebiti mun ngökai ñöte arato” (Mar. 10:38, 39, TNM). Jesús kukwe ye niebare ngwane, nämäne ja ngökö ñöte ye ñan ai gärätä, ñakare aune, ye abokän ja ngwanbätä metre Ngöböi Jesús murie ketai meden gäräbare kwe. Nitre dianinkä nänkäre kä kwinbiti ye ja tare nikai Kristobe rabakäre ütiäte siba ben tikani Pablokwe (Rom. 8:16, 17; 2 Cor. 4:17). Ye abokän niaratre gadrekröta nünankäre kä kwinbiti ye känenkri krütai arato meden gärätä.

Ye medenbätä Pablokwe kukwe tikani ye kwita raba metre ta kore: “Ye ñaka kore akräke, ¿nitre tä ja ngökö ñöte rabakäre ni krütanina erere sekwe ja nuaindi? Ni krütanina ñaka gaikröta akräke, ¿ñobätä niaratre tä ja ngökö ñöte kukwe ye kräke arato?” (TNM).