¿Mäkwe ñäkäbarera täräkwata Ni Mikaka Mokre mrä mrä yebätä? Ye erere ngwane, mä raba kukwe ngwantarita ne mike gare ño ye mike gare jai.

¿Nitre dianinkä üai demebiti ye mikadre tuin ño jai?

Niaratre tä tödeke ye tuin ütiäte nie, akwa ni ñaka niaratre käikitekä krubäte. Ni ñaka ja ngwen nitre nänkä ni kä nebätä jiebiti ye erere (Jud. 16). Niaratre dianinkä üai demebiti yebätä ni ñaka kukwe bätäkä ngwentari ietre (w20.01, página 29).

¿Jehová töita nibätä ye ñobätä gare metre nie?

Ni jämi därere ye känenkri Jehovakwe ja töi mikanina nibätä mikata gare Bibliabätä. Orasion nikwe ye kukwe nuata kwe. Dreta ni brukwäte aune nita drebätä töbike ye gare jökrä ie. Dre nuainta nikwe ye tä niara mike ulire o tä kä mike jutobätä (1 Crón. 28:9; Prov. 27:11). Aune niara jatani ni ngwena ja kokwäre (w20.02, página 12).

¿Ñongwane nikwe blitadre aune ñongwane nikwe ñaka blitadre?

Nita blite Jehovabätä ni madabe ye tä kä mike juto nibätä. Ni mada tä kite niken ji blobiti ngwane nikwe blitadre. Mäträdre ja mräkätrebätä ngwane nitre umbre ji ngwanka tä blite ben. Juta känti sribi Ngöbökwe ñäkäibare ye nuainta ño ye ni ñaka niere ni madai aune ni ñaka kukwe ngwentaribätä arato. Kukwe bäin yebätä ni ñaka blite ni madabe (w20.03, página 20 aune 21).

Trödabätä blitata Joel kapitulo 2 yete aune trödabätä blitata Apocalipsis kapitulo 9, ¿ye ñobätä ñaka ja erebe?

Joel 2:20-29 tä niere, Ngöbö näin tröda ngwena mobe mentokwäre aune tröda käkwe dre nuainbare ye ükaiteta kwe käbämikani kwe. Ye bitikäre üai deme biani kwe. Nitre babilonio juta Israel diani jai ye näire kukwe ye namani bare aune ja känenkäre arato. Apocalipsis 9:1-11 yete blitata nitre dianinkä nänkäre kä kwinbiti ni näire yebätä. Ngöbökwe kukwe tare nuaindi nitre blo yebätä ye mikata gare metre kwetre aune ye ñaka tä mate kwin nitrebätä (w20.04, página 3 nemen 6).

¿Nire abokän rei ngwitärikri nengwane?

Ye abokän Rusia aune juta ja ketaka ben. Kukwe drie ñäkäibare kwe aune brukwä nitre testiko kräke yebiti tä ja mike juta Ngöbökwe rüere. Rei ngwitärikri tä rüre rei mötörikri ye rüere (w20.05, página 13).

¿Kukwe keta ökän tä Gálatas 5:22, 23 ye aibe üai deme tä ni töi mike nuainne?

Ñakare. Üai deme tä ni dimike kukwe kwin mada ye nuainne arato. Ñodre, tä ni töi mike kukwe metre nuainne (Efes. 5:8, 9) (w20.06, página 17).

¿Üai, video aune kukwe tikata nikwe redes sociales yete ye raba kukwe meden tare mike ni kisete?

Dre dre mikata nikwe redes sociales yete yebiti ni ñaka töi bobre, ñakare aune ni bike kri ni raba bämike (w20.07, página 6 aune 7).

¿Nitre gwakitaka kwin yebätä ni raba dre mike gare jai?

Medente aune ñongwane gwa tärä yete nitre gwakitaka kwin tä gwakite, jondron gwakitakäre yebiti gwakita gare ietre aune kä ño erere te tätre ja di ngwen gwakitakäre. Ye erere ni raba nuainne nita kukwe driere ngwane (w20.09, página 5).

¿Ni raba dre nuainne nitre ja tötikaka dimikakäre Jehová tarere bäri?

Ni raba niaratre töi mike ñäke mantre jetebe Bibliabätä, dimike töbiketari kukwebätä ñäkäta kwetre yebätä aune oradre ño ye driedre ietre (w20.11, página 4).

“Kristo köböire Ngöbökwe ni jökrä [...] mikadita nire”, ¿ye nire nire gäräbare Pablokwe? (1 Cor. 15:22).

Ni jökrä rükaita nire ye ñan ai gäräbare apóstol Pablokwe, ñakare aune “ni jökrä” niebare kwe ngwane, nämäne blite nitre dianinkä nänkäre kä kwinbiti yebätä, abokän ‘Kristo Jesu köböire Ngöbökwe käräbare nünankäre deme ja kräke’ (1 Cor. 1:2; 15:18) (w20.12, página 5 aune 6).

Trompeta jükadi mrä ngwane nitre näin kä kwinbiti ye rikwitadi batibe “nita okwä kwata metete jötrö ngwarbe” ye kwrere, ¿ye bitikäre dre nuaindi kwetre? (1 Cor. 15:51-53).

Jesús dimikai kwetre juta jökrä ngübare “krito ribi jierore” yebiti (Apoc. 2:26, 27) (w20.12, página 12 aune 13).