Nitre israelita rabadre ja ngwen deme ye Jehovakwe niebare ietre. Akwa ye rabadre bare ietre yekäre Jehovakwe kukwe ne niebare ietre: “Mä ñan kukwe ngwarbe nie ni madabätä juta mäkwe yete. Mä ñan rüka krö ja mikakäre ja nire ni madakwe ye rüere. Ti abokän Jehová” (Lev. 19:2, 16).

Kukwe hebreore nämäne dre niere ye mikata gare metre ta kukwe nebiti “ñan rüka krö ja mikakäre”, ¿akwa ye dre gärätä? Nitre judío käkwe kukwe tikabare tärä Levítico yebätä tä kukwe ne niere: “Bersikulo ne ñaka nuäre rükakäre gare ñobätä ñan aune kukwe hebreorebiti ne mika tö gare ñaka tädre ‘nünaninkä ken o ngwäre ta’ aune yebiti mikata gare kwin o ñakare, ñaka tä nemen gare metre”.

Kukwe nieta Levítico 19:15 yete “Mun tädre kukwe ükete ye ngwane munkwe ükate metre. Munkwe ñaka ni bobre ye mika tuin ngwarbe jai aune munkwe ñaka ja mika ni jondron bökäne yekri. Munkwe kukwe ükate metre ni mada kräke”. Kukwe ye arabebätä blitata bersikulo 16 yete ye nitre ja tötikaka kukwe yebätä tä mike gare. Kukwe ye metre akräke mä ñaka rüka krö ja mikakäre nieta bersikulo 16 yete ye abokän nitre israelita käkwe kukwe ükadrete kwin kukwe kwin nuaindre jondron rürübäinta o mräkätre kwetre ye kräke. Ne madakäre, niaratre ñaka rabadre kukwe käme nuainne kukwe kwin mikakäre nemen bare ja kräke ye meden gärätä raba ruin nie. Bäkänä ni ñan raba kukwe ye erere nuainne akwa kukwe nieta bersikulo 16 yete ye raba kukwe mada mike gare nie.

Kukwe meden nieta kena bersikulo nebätä ye ani mike ñärärä. Nitre israelita ñaka rabadre kukwe blo niere nitre madabätä ye Ngöbökwe niebare ietre. Kukwe blo niedre aune nitre kädriedre jerekäbe ye ñaka ja erebe ye nikwe ngwandre törö jai, akwa ni mada kädriedre ye raba kukwe mike ni kisete arato (Prov. 10:19; Ecl. 10:12-14; 1 Tim. 5:11-15; Sant. 3:6). Bä kabre nire tä kukwe blo niere ni madabätä ngwane tä nierare nuainne ni ye bämikakäre käme nitre mada okwäbiti. Nireta kukwe blo niere ye tä kukwe ngwarbe niere ni madabätä ni ye murie ketadre yebiti ta. Kukwe ye erere namani bare Nabotbätä. Nitre ruäre käkwe kukwe blo niebare niara rüere ye köböite niara ñaka ngite akwa murie ketani jäbiti (1 Rey. 21:8-13). Ye medenbätä, kukwe blo nieta ni mada rüere ye abokän nita nüke krö ja mikakäre ja nire ni madakwe rüere nieta Levítico 19:16 yete ye erere.

Ne madakäre, ni iti tä kukwe blo niere ni madabätä ngwane brukwäta kräke bämikata kwe. Aune Juan 3:15, (NGT) yete nieta: “Ni jökrä tä ja eteba mike tuin ngwarbo jai, ne nie abrä ni kämikaka. Gare mun ie, ni ja kämikaka ni abrä te, ja nirekrä käre ñan tärä”. Aune Ngöbökwe kukwe niebare Levítico 19:16 yete ye ütiäte krubäte yete niebare kwe: “Mä ñaka moto rabadre ja brukwäte mä eteba kräke” (Lev. 19:17).

Ye medenbätä, kukwe nieta Levítico 19:16 yete tä kukwe ütiäte niere ni kristiano mikakäre mokre ni ñaka rabadre ja töi mike käme aune nikwe ñaka blitadre blo jire chi ni madabätä. Ni rükadre krö ni mada rüere o nikwe blitadre blo ni madabätä ñobätä ñan aune ñaka mate kwin nibätä o nita bätä ngwenbätä yebätä yebiti ni brukwäta kräke ye nikwe bämikai aune ni kristiano brukwä ñaka rabadre jire chi ni madakrä (Mat. 12:36, 37).