Kä kwinbiti, töi kwin keta kabre yebätä Jesukwe ja kitani sribikäre kwin nitre madabe. Biti nämäne kä tibienbätä ngwane kukwe kwin bämikani kwe nitre nämäne sribire ben ye käne. Kukwe bämikani kwe ye tä ni dimike ño, yebätä nikwe ja tötikai ngwane kukwe ketamä ja jie ngwankäre ye rabai gare nie ye käkwe ni dimikai nemen sribi muko kwin, nemen keteitibe aune sribire gwairebe.

Nire ie sribi gare ni madabe ye abokän töi bobre, nire tä sribire ben ye mikata ütiäte kwe jai aune ñan bike bäri. Jehová töi bobre ye jutuabare Jesús ie. Jehová ye aibe jondron Sribekä nie raba akwa ngobo kwe nämäne sribire gwairebe ben ye nämäne ütiäte kräke mikani gare kwe ye nemen gare metre nie kukwe nebiti: “Ari ni dätere bäsi ja kwrere” (Gén. 1:26, JK). Jehovakwe kukwe ye niebare ngwane Jehová ye töi bobre krubäte nükani gare Jesús ie (Sal. 18:35).

Jesús nämäne kä tibienbätä ngwane ja töi mikani bobre kwe arato. Nämäne dre nuainne yebätä nitre nämäne käi kitekä ngwane käre nämäne Jehová käi kitekä (Mar. 10:17, 18, TNM; Juan 7:15, 16). Ne ben arato, ja di ngwani kwe nünankrä jäme nitre ja tötikaka kwe yebe aune mikani tuin kwe jai ja ketamuko ye kwrere, ñaka ni klabore erere (Juan 15:15). Nitre ja tötikaka kwe ye ngoto bätäninte kwe ja töi mikadre bobre ye driekäre ietre (Juan 13:5, 12-14). Jesús erere sribi muko nikwe ye ni tö mikabätä ütiäte jai aune töita  drebätä ye ni tö mikabätä bäri ütiäte jai ja töi ye kräke. Nita ja mike ütiäte jai kwärikwäri aune nire käikitadrekä ye ni ñaka tä töbike metrere ngwane kukwe kwin keta kabre raba nemen bare nie (Rom. 12:10).

“Nitre kwati tä blite jabe kukwe ükatekäre ye köböire kukwe kwin tä nemen bare” ye nüke gare ni töi bobre ie arato (Prov. 15:22). Kukwe gare krubäte nie o sribi nuain gare krubäte nie yebiti ta kukwe jökrä ñan gare nie ye nikwe ngwandre törö jai. Jesús ie kukwe ñaka nämäne gare jökrä ye mikani gare kwe arato (Mat. 24:36, TNM). Ne ben arato, nitre ja tötikaka kwe töi ngite akwa nämäne töbike ño ye nämäne ütiäte kräke (Mat. 16:13-16). Ye medenbätä, nitre sribikä ben ye ie ja nämäne nemen ruin kwin niarabe. Ye erere arato nita ja töi mike bobre, ni ñaka raba kukwe jökrä nuainne aune nitre mada tä kukwe niere ye nita juto biare kukwe nuakäre ngwane nita ja töi mike nüne jäme aune nita sribire gwairebe, kukwe kwin tä nemen bare.

Metrere nitre umbre ji ngwanka tä sribire gwairebe jabe ngwane rabadre ja töi mike bobre Jesús ye erere ye ütiäte krubäte. Üai deme ye raba ni umbre ji ngwanka iti dimike kukwe keteiti niere ne kwe nitre umbre ji ngwanka jökrä raba kukwe keteiti ütiäte den nuaindre jai ye rabadre ngwen törö jai. Tädre gätä nuain jabe ngwane gätä ye nuaindre kwin kwe, ne kwe rabadre nuäre ni jökrä kräke blitakäre, ye köböire kukwe diandi kwetre ye käkwe konkrekasion jökrä dimikai.

Sribi muko kwin ye tä töbike kwin ni mada kräke yebätä kukwe nieta ni madakwe ye tä kain ngäbiti aune tä nemen debe kräke. Erametre Jehová ye töbike kwin tuani bä kabre Jesukwe. Ñodre, ni kä nebätä tä gataka jerekäbe akwa Jehovakwe niara juani mikakäre kwäre (Juan 3:16, TNM).

Ñongwane ribe nämäne aune ñongwane nuaindre ye ngwane Jesukwe ni mada kukwe kani ngäbiti. Niara juani juta Israel ye aibe dimikakäre akwa meri fenicia dimikani kwe ye nikwe ngwandre törö jai (Mat. 15:22-28). Nitre ja tötikaka käkwe kukwe nuaindre bäri ye ñaka ribebare kwe yebiti nämäne ja töi mike kwin namani gare. Ja ketamuko kwe Pedro käkwe rükaninte bämä jire akwa Jesús nämäne juto biare ngite juankäre tabiti aune ja känenkäre sribi ütiäte biani kwe ie (Luc. 22:32; Juan 21:17; Hech. 2:14; 8:14-17; 10:44, 45). Ni mada tä kukwe niere ye ni rabadre kain ngäbiti ye köböire nita jä töi mike kwin rabai  gare, ye nemen gare metre nie Jesukwe kukwe bämikani yebiti (Filip. 4:5).

Nita ja töi mike kwin ngwane ni täi juto biare sribikäre gwairebe ni bätäkä ngwarbe ben arato. Jesús nämäne ja ngwen kwin nitre ben yebätä nitre ja mikaka niara rüere namani mokrerebiti aune nitre impuesto käräkä aune nitre ja mikaka ngite nämäne niara kukwe kain ngäbiti yebe nämäne ja kete, yebätä nitre ja mikaka niara rüere ñäkäbare niara rüere (Mat. 11:19). ¿Jesukwe kukwe kwin bämikani ye erere ni raba ja ngwen aune sribire kä jutobiti nitre mada ñaka ja erebe nibe yebe? Ja mräkä iti kädekata Louis sribibarera ni circuito tuabitikä erere, betelte aune ja mräkätre bätäkä ngwarbe ben sribibarera kwe, niara tä niere: “Ja mräkätre ruäre ye abokän ju bätärita sribeta jä meden ererebiti ye kwrere ti kräke. Jä jene jene ye ükateta niken kwin jabiti ye köböire ju bätärita raba nemen metre. Tikwe ja di ngwanina ja töi ye ükatekäre sribikäre jäme ni mada ben aune ye köböire sribi rabadre bare kwin yekäre”. ¡Töbikadre kore ye kwin krubäte!

¿Ni raba dre nuainne rabakäre sribi muko töi kwin ye kwrere konkrekasionte? Ñodre, grupo nikwe kukwe driekäre yete ja mräkätre kä nuäi ererebiti tärä o sribi bätäkä ngwarbe tärä nuaindre ie mräkätre kwe ngibiakäre ñaka nikwe ye erere. Nita kukwe driere bentre ngwane niaratre kukwe driedi ño aune kukwe driedre ño tuin kwin ie ye ererebätä, ¿ni raba kukwe ükete jai ne kwe kukwe drie ye käi rabadre jutobätä?

Sribi muko töi kwin ye tä “juto biare jondron biankäre jai kwärikwäri” (1 Tim. 6:18). Jesukwe sribibare Jehovabe ngwane, Jehová ñaka nämäne jondron üke kaibe ja kräke jutuabare ie. Jehovakwe kä kwinta sribebare ngwane Jesús nämäne yete aune nämäne ja kitebätä (Prov. 8:27). Ja känenkäre kukwe meden namani gare Jesús ie Jehovabätä ye mikani gare kwe nitre ja tötikaka kwe ie (Juan 15:15). Ni raba ja ngwen Jehová erere kukwe meden gare nie ye ni tädre juto biare mikakäre gare ja mräkätre ie. Sribi muko töi kwin ye ie kukwe gare o kukwe ütiäte gare ye ñaka tä üke ja aibe kräke ye nemen gare metre. Ñakare aune kukwe meden kwin namanina gare ie ye tä juto biare mikakäre gare nitre madai.

Kukwe madabiti nikwe jondron biain ni madai ye abokän nikwe kukwe kwin niedre ja mräkätre dimikakäre. Nita ja di ngwen ye jutuai nitre madai aune tä debe bien nie ja brukwä ngöibiti ngwane jata nemen ruin kwin nie, ¿ñan ererea? Nitre sribikä Jesube yekwe kukwe meden kwin nämäne ye nämäne kä denkä jai mikakäre gare ietre (Mateo 25:19-23; Luc. 10:17-20 mikadre ñärärä). Nitre ja tötikaka kwe ye käkwe sribi bäri kri nuaindi niebare kwe ietre arato (Juan 14:12). Köbö te deu kämikadre ye känenkri kukwe kwin niebare kwe nitre apóstol ja ngwanka metre ie, niebare kwe: “Tikwe ja tare nikaba angwane, käre mun näma ketetibe tibe” (Luc. 22:28). Kukwe niebare kwe ye käkwe nitre ja tötikaka dimikani krubäte aune töi mikani kukwe nuainne raba ruin nie. Nikwe kä diainkä jai kukwe kwin niekäre ja mräkätre ie ngwane, kä rabai bäri juto bätätre aune ja di ngwain bäri kwetre sribikäre.

Ja mräkä kädekata Kayode tä niere: “Mä rabadre sribi muko kwin yekäre mä rabadre kukwe metre nuainne ye ñan ribeta akwa mä raba kä mike juto ni madabätä aune dimike sribire nuäre”. ¿Ye erere nie raba mäbätä? ¿Mä sribi muko kwin o ño ye ñobätä mä ñan ngwentari ja mräkä madai? ¿Nitre ja tötikaka ie ja nämäne nemen ruin kwin Jesube ye erere jata nemen ruin ni madai sribibätä mäbe? Ye erere akräke mä raba niere apóstol Pablo ye erere: “Nunbrä sribi muko munkwe kä mikare nuäre munbätä” (2 Cor. 1:24).