1. Jehová ye dite krubäte, ¿akwa tä nitre tuenmetre dre nuainne?

JEHOVAKWE jondron jökrä sribebare. Niara bäri töbätä aune dite krubäte ni jökrä ngwä. Bati Job niebare, Ngöbö töita dre nuainbätä ye erere raba mike nemen bare jökrä ye namani gare ie. Niara kräke jondron jökrä nuäre nuaindre (Job 42:2). Ne madakäre, ni madakwe dimikadre ye ñaka ribere jai. Akwa yebiti ta, tä nitre mada tuenmetre sribire jabe. Yebiti tä bämike niara tä nitre ye tarere krubäte.

2. ¿Jehovakwe sribi meden ütiäte biani Jesús ie?

² Ngöbökwe Monso kwe Jesús ye sribebare kena. Ye bitikäre Monso kwe yei sribi ütiäte biani kwe. Tuanimetre kwe ja dimike jondron jökrä mada mada ye sribere (Juan 1:1-3, 18). Apóstol Pablo niebare Jesús ye köböire “jändrän jökrä käinta amne tementa dätebare. Amne jändrän tuen nie amne jändrän tuen ñakare nie abko dätebare kwe”. Aune niebare kwe arato “jändrän jökrä namani dätebare kore niara köböire amne niara kräke” (Colosenses 1:15-17). Aisete Jehovakwe Jesús mikani ütiäte jai yebätä sribi  ütiäte krubäte biani kwe ie aune mikani gare kwe nitre madai.

3. a) ¿Jehovakwe Adán tuanimetre dre nuainne? b) ¿Ñobätä Jehovakwe Adán tuanimetre ja dimike?

³ Jehová tä ni kä tibienbätä tuenmetre sribire jabe arato. Ñodre, Adán tuanimetre kwe ja dimike jondron nire keta kabre ye kädeke (Génesis 2: 18, 19, 20). Adán sribi ye nuainbare kä jutobiti raba ruin nie. Niara rabadre jondron nire keta kabre ye kädeke yekäre ja tötikabare kwe jondron nire ye abokän ño aune nämene dre nuainne yebätä. Jehavá rabadre sribi ye nuainne näre, ñobätä ñan aune niarakwe jondron nire ye jökrä sribebare. Akwa Adán nämene tare krubäte kwe, yebätä tuanimetre kwe ja dimike. Ne madakäre, niara Kä tibien ye jökrä kwitadre bä nuäre niebare kwe ie (Génesis 1:27, 28). Akwa ja känenkäre, Adán ja töi mikani ñaka sribire jankunu Jehovabe. Ye köböite, Adán aune ni jökrä kite niarakri ye tä ja tare nike krubäte (Génesis 3:17-19, 23).

4. ¿Nire nire käkwe sribibare Ngöböbe niara tö dre nuain ye mikakäre nemen bare?

⁴ Ye bitikäre, Ngöbökwe nitre mada tuanimetre sribire jabe. Ñodre, Noé arka sribebare ne kwe niara aune mräkätre kwe rabadrete nire Ñü Kri yete. Moisés nitre Israel dianinkä kä Egipto yekänti. Josué nikani nitre israelita ye ngwane kä käbämikani ietre Ngöbökwe yekänti. Salomón templo Jerusalén ye sribebare. Aune María namani Jesús meyere. Nitre Ngöbö mikaka täte ja ngwani metre aune nitre mada kwati käkwe sribibare Jehovabe ne kwe niara tö dre nuain ye rabadre nemen bare.

5. a) ¿Sribi meden ni jökrä raba nuainne? b) ¿Nikwe Jehová dimikadre sribi ye nuainne tä ribere jai? (Üai bämikani kena mikadre ñärärä).

⁵ Ni raba dre dre nuainne abokän nikwe nuaindre Gobran Jehovakwe dimikakäre ye Jehová tä ni nübaire nuainne kä nengwane. Ni raba nuainne kukwe keta kabrebiti. Ni jökrä ñaka raba kukwe arabe nuainne, akwa ni jökrä raba kukwe driere Gobran Ngöbökwe yebätä. ¿Nikwe Jehová dimikadre sribi ye nuainne tä ribere jai? Ñakare. Niara törbadre akräke, raba kä kwinbiti blite ni kä tienbätä yebe. Aune Jesús niebare Jehová raba jä mike blite Rei tä Gobrane yebätä nitre ben (Lucas 19:37-40). Akwa Ngöböta ni tuenmetre “sribi[re]” jabe (1 Corintios 3:9). Apóstol Pablo tikabare: “Ne medenbätä nun abrä sribikä niarabe, nun bike mäträre munbätä, mun ñansi käin Ngöbökwe kain ngäbiti ngwarbe” (2 Corintios 6:1, Ngöbö Täräe [NGT], tärä okwä ükaninte). Sribidre Jehovabe ye ütiäte krubäte. Ñobätä tä kä mike juto nibätä ye ani mike gare ruäre jai.

6. ¿Jesús nämene sribire Rünbe yebätä ja nämene ruin ño ie?

⁶ Ni Ngöbö mikaka täte tä sribire Jehovabe ye tä käre kä mike jutobätä. Jesús jämi kite Kä tibienbätä ye känenkri, sribibare kwe Jehová kräke “ni sribikä kwin krubäte” ye kwrere, ye abokän ni ie jondron sribe gare meden gärätä. Ngöbö nämene niara tarere krubäte ye nämene gare ie yebätä niebare kwe: “Niara ngwärekri kä näma juto käre tibätä” (Proverbios 8:22, 30). Jesús nämene sribire Rünbe ye käkwe kä mikani juto krubätebätä ñobätä ñan aune sribi keta kabre nuainbare kwe aune Ngöbö nämene niara tarere ye nämene gare ie. ¿Aune ni? ¿Ja raba nemen ruin ye erere nie?

7. ¿Ñobätä kukwe driedre ye tä kä mike juto nibätä aune jata nemen ruin kwin nie?

⁷ Nita jondron bien ni madai ye tä kä mike juto nibätä aune ni mada tä jondron bien nie ye ngwane kätä nemen juto nibätä arato niebare Jesukwe (Hechos 20:35). Kukwe metre  driebare nie ye ngwane, kä namani juto krubäte nibätä. Akwa nita kukwe metre driere nitre madai ye ngwane, kätä nemen juto nibätä aune jata nemen ruin kwin nie arato. ¿Ñobätä? Ñobätä ñan aune kukwe nieta Bibliabätä ye tä nemen gare ietre aune Ngöbö tä kite gare ietre ye ngwane, kätä nemen juto krubäte bätätre ye nita tuin. Tätre nüne ño ye erere ñaka tärä kite nüne aune tätre ja töi kwite tuata nikwe ye käita nemen juto nibätä. Ja ketadre Ngöböbe ye köböire niaratre raba nüne kärekäre ye gare nie (2 Corintios 5:20). Erametre, kukwe driedre ye sribi bäri ütiäte tä nuaindre nie aune ye aibe raba kä mike juto nibätä.

8. ¿Nitre Testiko ruäre tä sribire Jehovabe yei ja ruin ño?

⁸ Nita ni mada dimike Ngöbö mike gare jai ye ngwane, ni käita nemen juto Jehovabätä ye gare nie aune nita ja di ngwen ye tä mike ütiäte jai. Ye tä kä mike juto nibätä aune jata nemen ruin kwin nie arato (ñäkädre 1 Corintios 15:58 yebätä). Ni Testiko käi Italia kädekata Marco tä niere: “Tita ja di tätebiti sribire kwin Jehová kräke yebätä kätä juto tibätä aune tita sribi nuainne niara kräke ye niarakwe ñaka käi kwitaikä jabiti”. Ni Testiko mada käi Italia kädekata Franco tä niere: “Biblia, tärä aune täräkwata ni kristiano kräke bätä gätä yebiti, Jehová tä mantre jetebe ngwen törö nie ni tare krubäte kwe. Ni ñaka tä sribi nuainne krubäte raba ruin nie, akwa nita ja di ngwen sribikäre ye ütiäte krubäte Jehová kräke. Ye medenbätä, tita sribire Ngöböbe ye tä kä mike juto krubäte tibätä aune ye tä kukwe keta kabrebätä ti töi mike nüne”.

9. a) ¿Jehová aune Jesús nämene ja kete ño jabe? b) ¿Ñobätä Jehová aune Jesús nämene keteitibe jabe?

⁹ Ni tare nikwe ben nita sribire ye ngwane, nita nemen ja kete bäri kwin ben. Ni ye tä ja ngwen ño aune töi meden meden kwin ye tä nemen gare bäri kwin nie. Aune ni ye töita sribi meden meden nuainbätä aune tä dre  nuainne ne kwe rabadre bare ie ye tä nemen gare nie. Jesús jämi kite Kä tibienbätä ye ngwane, sribibare kwe millón kwati krubäte Jehovabe. Niaratre nämene ja tarere krubäte yebätä kukwe mada ñaka niaratre mikani ja denkä mento. Yebätä Jesús niebare: “Ti Rün btä ti, [...] nunta ketetibe” (Juan 10:30). Erametre, niaratre nämene keteitibe jabe ñobätä ñan aune nämenentre kä jutobiti sribire gwairebe jabe aune nämenentre ja dimike kwärikwäri.

10. ¿Ñobätä kukwe drieta ye tä ni mike ja kete Jehovabe aune ja mräkätre bätä ja ngwaitre yebe?

¹⁰ Jehová rabadre nitre ja tötikaka ye kriemike Jesús ribebare ie. ¿Ñobätä? Jesús arabe käkwe niebare ie: “Ne kwe niaratre rabadre itibe nita itibe ye kwrere” (Juan 17:11, TNM). Ngöböta dre niere nie Bibliabätä ye nita mike täte aune nita kukwe driere ye ngwane, Jehová töi meden meden kwin ye tä nemen gare bäri kwin nie. Nikwe tö ngwandre ie ye bäri kwin aune niara tä dre niere nie ye nikwe käre mikadre täte ye tä nüke gare nie. Aune nikwe ja di ngwain ja kete ben angwane, niara ja ketai nibe (ñäkädre Santiago 4:8 yebätä). Nita kukwe driere ye tä ni mike ja kete ja mräkätre aune ja ngwaitre yebe arato, ñobätä ñan aune niaratre tä ja di ngwen ne kwe Jehovakwe kadre ngäbiti ye nita tuin. Ne madakäre, nita ja tuin kukwe tare ja erebe ben, kätä juto ja erebe nibätä aune ni töita sribi ja erebe nuainbätä ye nüke gare nie. Yebätä nita sribire gwairebe, kätä nemen juto gwairebe nibätä aune nita kä ngwen nüke gwairebe jai. Meri Testiko käi Gran Bretaña kädekata Octavia tä niere: “Tita sribire Jehovabe ye tä ti mike ja kete ben aune ja mräkätre bätä ja ngwaitre yebe arato”. ¿Ñobätä? Ñobätä ñan aune niara töita sribi nuainbätä ye arabe ja ketamuko kwe töita nuainbätä mikata gare kwe. Ja ruin ye erere nie arato, ¿ñan ererea?

11. ¿Ñobätä kä bä nuäre yete ni rabai bäri keteitibe ja mräkätre aune ja ngwaitre bätä Jehová yebe?

¹¹ Erametre, kä nengwane Jehová aune ja mräkätre bätä ja ngwaitre ye tare krubäte nikwe. Akwa nikwe niaratre taredi bäri Kä Bä Nuäre yete. Ja känenkäre nikwe sribi kwin nuaindi gwairebe jabe yebätä mä raba töbike. Nitre krütanina gaikröta ye nikwe kai ngäbiti aune nikwe diridi ietre Jehová yebätä. Nikwe Kä tibien jökrä kwitai bä nuäre. Kä rabai juto krubäte nibätä sribire gwairebe aune bätärekä bätärekä ni töi jatai nemen metre Kristo rabai gobrane ye ngwane. Köbö kwatire kwatire ni täi bäri keteitibe ja mräkätre aune ja ngwaitre bätä Jehová yebe. Erametre nita dre dre ribere jai ye jökrä biain kwe nie (Salmo 145:16).

12. ¿Ñobätä kukwe drie ye tä ni kriemike?

¹² Nitre gobrainta Satanakwe ye ngätäite nita nüne aune ni ngite. Nikwe ñaka ja ngübaibiti angwane, ni raba kite töbike aune ja ngwen nitre gobrainta Satanakwe ye erere. Aisete nita ja mäke Jehovabe ye nikwe kriemikadre. Akwa yekäre nikwe ja di ngwandre krubäte. Ye  abokän nita jübenkä ñö nente ngäbiti ye kwrere. Ñö nente ye ñaka rikadre ni ngwena mentokwäre ie ni tö angwane, nikwe ja di ngwandre jübenkä. Kukwe drieta ye tä ni dimike nita ja kete Jehovabe ye kriemike. ¿Ñobätä? Ñobätä ñan aune nita blite Ngöbö aune Biblia yebätä, ye tä ni töi mike kukwe bäri ütiäte aune jondron kwin yebätä. Jondron meden raba tödeka nikwe mike di nekä yebätä ni ñaka tä töbike (Filipenses 4:8). Nita kukwe driere ye tä tödeka nikwe mike bäri dite ñobätä ñan aune tä kukwe käbämikani aune ükaninte Ngöbökwe ye ngwenta törö nie. Ne madakäre, tä ni dimike ja töi mike bäri kwin ni kristiano erere ye tä ni kriemike Satana aune nitre gobrainta kwe yebätä (ñäkädre Efesios 6:14-17 yebätä).

13. ¿Ñobätä ni Testiko käi Australia ye tä kukwe drie ye mike ütiäte jai?

¹³ Kukwe drie, ja tötika aune ja mräkätre bätä ja ngwaitre dimikadre ye tä ni kriemike arato ñobätä ñan aune ye tä ni dimike ñaka töbike krubäte kukweta ni kisete yebätä. Ni Testiko käi Australia kädekata Joel ye kräke ñobätä kukwe drie ye ütiäte krubäte ye tä mike gare. Kukwe drie ye tä niara dimike ñaka nitre tä ja tuin kukwe kri ben ye käi kwitekä jabiti. Ne madakäre, kukwe drie ye tä niara dimike kukwe nieta Bibliabätä mäträkäre ye ngwen törö jai. Aune tä niere: “Kukwe drie ye tä ti dimike ja töi mike bobre aune tö ngwen Jehovai bätä ja mräkätre aune ja ngwaitre ie”.

14. ¿Ngöböta ni dimike üai kwe yebiti ye ñokänti gare nie?

¹⁴ Kukwe drieta ye tä mike gare nie arato Jehová tä ni dimike üai deme kwe yebiti. Rükadre gare nie yekäre, ani bämike keteiti. Mätä nüne yekänti ni mada käkwe mrö döräi manandre mäi nitre nünanka mä bäre yebiti. Akwa ni ye käkwe ñaka ütiä biain mäi, ñakare aune mäkwe ja ütiä biain jökrä. Ne madakäre, mä rikadre mrö ye ngwena nitre ie, yei niaratre ñaka tö aune nitre ruäre abokän brukwä rabai mä kräke sribi ye nuainbätä ye gare ie. ¿Mäkwe kä ngwain nüke jai sribi ye nuainbätä? Erametre gwäune mäkwe ja di ngwandre nekä aune mä ñaka rabadre nuainne jankunu. Ye erere arato, nita niken kukwe Ngöbökwe ye mike gare nitre ie. Nita kä denkä jai, aune ngwian nikwe ye nita kitekä bätä nitre tä ni kötaire o brukwä nemen ni kräke sribi ye nuainbätä. Akwa kä kwatire kwatire nita jankunu kukwe driere. Ye tä mike gare Jehová tä ni dimike üai kwe yebiti, ¿ñan ererea?

15. ¿Ñobätä kukwe drie ye ütiäte krubäte?

¹⁵ Kukwe drie ye ütiäte krubäte, ñobätä ñan aune tä ni dimike Ngöbö töita ño ni kä tibienbätä kräke ye mike nemen bare. Jehová tö namani ni kä tibienbätä tuai nüne kärekäre, akwa Adán ja mikani ngite ye ngwane niarakwe ñaka ja töi kwitani (Isaías 55:11). Ni mikakäre kwäre ngite aune gata yebätä, Jehovakwe Jesús juani Kä tibienbätä ne kwe ja nire biandre kwe ni kräke. Akwa Jesús ja nire biani ni kräke ye  köböire jondron kwin rabadre nikwe ie ni tö aune ni tö nünain kärekäre angwane, nikwe Ngöbö kukwei mikadre täte. Nikwe dre nuaindre ie Ngöbö tö ye Jesukwe driebare nitre ie, aune nitre ja tötikaka kwe ye juani kwe kukwe ye arabe driere nitre madai. Ye medenbätä nita kukwe driere aune nita nitre mada dimike ne kwe rabadre nemen ja ketamuko Ngöbökwe. Nita nuainne ye ngwane, nita sribire Jehovabe aune nita nitre dimike nemen kwäre ja mika ngite aune gata yebätä.

16. Nita kukwe driere ye ngwane, ¿nita dre bämike?

¹⁶ Kukwe biani Ngöbökwe ye meden bäri ütiäte ye ni ji ngwanka kukwebätä käkwe ngwanintari Jesús ie ye ngwane, Jesukwe niebare ie: “‘Mäkwe Jehová Ngöbö mäkwe taredre ja brukwä tätebiti, ja nire tätebiti aune ja töi tätebiti’. Kukwe ye bäri kri aune biani kena. Ketebukäre, bä kwrere, abokän ne: ‘Mäkwe ni mada taredre mätä ja tarere ye kwrere’” (Mateo 22:37-39, TNM). Ja nire kärekäre ye raba nemen ño nikwe yebätä nita kukwe driere aune dirire nitre ie, yebiti nita bämike ni mada aune Jehová taredre niebare ye nita mike täte (ñäkädre Hechos 10:42 yebätä). “Ni jökrä diain[dre]tari amne, kukwe era metre Jesubtä rabadre gare ni jökräye” yei niara tö ye gare nie (1 Timoteo 2:4).

17. ¿Mätä sribire Jehovabe ütiäte krubäte yebätä mätä töbike ño?

¹⁷ Nita sribire Jehovabe ye ütiäte krubäte yebätä nikwe debe biandre krubäte. Nita sribire ben ye tä kä mike juto nibätä aune jata nemen ruin kwin nie, tä ni mike ja kete Jehovabe aune ja mräkätre bätä ja ngwaitre ben, aune tä ni kriemike. Ne madakäre, yebiti ni raba bämike Jehová aune ja mräkätre bätä ja ngwaitre tare nikwe. Kä jökräbiti tibien nitre Ngöbö mikaka täte tä millón kwati krubäte, aune ni jökrä tä ja tuin kukwe jene jene ben. Ni tä bati o ni niena umbre, ni jondron bökäne o ni bobre, ni tä dite o ni ñaka dite akwa yebiti ta ni jökrä tä ja di ngwen kukwe driere. Meri Testiko käi Francia käkwe kukwe niebare ne erere ja ruin nie, niarakwe niebare: “Ni bäri ütiäte kä kwinbiti, jondron jökrä Sribekä, Ngöbö kä jutobätä ye tä niere tie: ‘Nän aune mäkwe blita tibätä. Mäkwe blita ja brukwä tätebiti. Tikwe ja di biain mäi, ti ja kukwei biain mäi, tikwe angeletre mikai mä dimike aune tikwe ni juain kukwe driere mäbe. Mäkwe nuaindre ño ye tikwe driei mäi aune mä rabai ja di ribere ye ngwane mäkwe dre nuaindre ye tikwe mikai gare mäi’. Jehovata ni tuenmetre niara töi mike nemen bare aune tä ni tuenmetre sribire jabe. ¡Sribi ye ütiäte krubäte!”.