1, 2. Kä 2018 yete, ¿gätä meden käkwe ni kwati mikai keteitibe aune ñobätä gätä ye ütiäte krubäte? (Üai bämikani kena mikadre ñärärä).

KÖBÖ 31 marzo 2018 yete, Ñänä näin nekä ye bitikäre, nitre kwati Ngöbö mikaka täte aune nitre tö kukwe mikai gare jai käkwe ja ükaikrö Däkien Jesús Mrö Biani Deu ye nuainkäre. Jesús Ja Nire Biani Ngwanta Törö Jai nuainta batibe kä kwatire kwatire te ye tä nitre mike keteitibe, abokän erere ñaka nemen bare nitre ñaka Ngöbö mike täte tä gätä nuainne yekänti.

² Kä jökräbiti tibien gätä ütiäte yebätä nitre kwati krubäte tä nemen ye käita nemen juto krubäte Jehová aune Jesubätä raba ruin nie. Bibliabätä mikani gare: “Ni kä jökräbti temen näma kwati, [...]. Ni bätäkä ngwarbe amne ni kukwe bätäkä ngwarbe näma, erere arato ni nünanka juta bätäkä ngwarbe, ye näma kwati kwati krübäte [...]. Nitre rababa kwati krübäte, aisete ñan rababa tanre jire chi. [...] Angwane rababa ngrente ja dibti, kä rababa niere krörö: ¡Ngöböta täkänintbe kürä gobrankräbti amne ni Kordero kwrere, ye aibe köböire nita nebe dianintari jökrä!”  (Apoc. 7:9, 10). Jesús Ja Nire Biani Ngwanta Törö Jai kä kwatire kwatire yete nitre kwati krubäte tätre Jehová aune Jesús mike ütiäte jai ye kwin krubäte.

3. ¿Kukwe meden meden ngwantarita abokän nibike mike gare jai kukwe ja tötikara nekänti?

³ Kukwe ketabokä ngwantarita abokän nibike mike gare jai kukwe ja tötikara nekänti. Kena, ¿Jesús Ja Nire Biani Ngwanta Törö Jai ye kräke ni raba ja mike ño juto aune ñaka juen ja bäre? Ketebukäre, Jesús Ja Nire Biani Ngwanta Törö Jai, ¿ye ñobätä tä ni Ngöbö mikaka täte ye dimike nemen keteitibe? Ketamäkäre, ¿ni raba ni mada töi mike ño nemen keteitibe? Aune ketabokäkäre, ¿Jesús Ja Nire Biani Ngwanta Törö Jai ye nikwe nuaindi mrä? Ye erere ngwane, ¿ñongwane rabai bare?

4. ¿Ñobätä ütiäte krubäte nikwe ja di ngwandre niken Jesús Ja Nire Biani Ngwanta Törö Jai yebätä?

⁴ ¿Ñobätä ütiäte krubäte ni rikadre Jesús Ja Nire Biani Ngwanta Törö Jai yebätä? Gätä nuainta yebiti nita Ngöbö mike täte arato ye nikwe ngwandre törö jai. Gätä ütiäte nuainta kä kwatire kwatire te yete nire nire tä ja di ngwen nüke ye Jehová aune Jesús tä mike ñärärä. Ni tädi gätä yete abokän jutuadre Jehová aune Jesús ie yei ni tö. Akwa ni tädre bren ye aibe ngwane ni ñaka rabadre gätä yebätä. Gätä ye ütiäte krubäte ni kräke ye nikwe bämikai nita dre nuainne yebiti ngwane, ni kä täi tikani jankunu Jehovai ‘tärä ni ngwankäre törö jai’ yebätä. Nire nire ie Jehová tö ja nire kärekäre biain ye kä tä tikani “tärä ja nire kräke” yebätä (Mal. 3:16; Rev. 20:15, TNM).

5. Jesús Ja Nire Biani Ngwanta Törö Jai ye köböi känenkri, ¿nita tödeke o ñakare ye ni raba mike gare ño jai?

⁵ Jesús Ja Nire Biani Ngwanta Törö Jai ye köböi känenkri, nikwe kä diandrekä jai orakäre aune nita ja kete ño Jehovabe yebätä töbikatarikäre (ñäkädre 2 Corintios 13:5 yebätä). ¿Ni raba nuainne ño? Pablo niebare, nita tödeke o ñakare ye nikwe mikadre gare jai. Yekäre, nikwe kukwe ne ngwandretari jai: “¿Juta ükaninte Jehovakwe abokänbiti tä sribi kwe nuainne yete tita siba ye era ti kräke? ¿Tita ja di ngwen kukwe kwin Gobran Ngöbökwe yebätä driekäre? Nita nüne kä krüte te aune Satana tä gobrane abokän gate köböra, ¿ye era ti kräke ye tita bämike ño? ¿Tikwe ja dianinkä mento Ngöbö kräke ye näire nükebe nengwane ti täbe tö ngwen Jehová aune Jesús ie?” (Mat. 24:14, TNM; 2 Tim. 3:1; Heb. 3:14). Kukwe ngwantarita ye mikadre gare ño yebätä nikwe töbikaitari ngwane, ni dimikai jankunu kwe nita ja ngwen ño ye ‘mike ñärärä kwin jabätä’.

6. a) ¿Dre aibe köböire ja nire käre raba nemen nikwe? b) ¿Ni umbre ji ngwanka ye tä ja ükete ño Jesús Ja Nire Biani Ngwanta Törö Jai ye kräke? c) ¿Ni raba ja ükete ño niara erere?

⁶ Köbö ütiäte yebätä tärä aune täräkwata tä blite yebätä nikwe ñäkädre aune töbikadretaribätä ja ükatekäre Jesús Ja Nire Biani Ngwanta Törö Jai ye kräke (ñäkädre Juan 3:16; * 17:3 yebätä). * Nikwe Jehová mikadre gare jai aune tödekadre Jesús ie ye köböire ja nire käre raba nemen nikwe. Jesús Ja Nire Biani Ngwanta Törö Jai kräke nikwe ja ükadrete yekäre, ni raba ja tötike kukwe meden raba ni dimike nökrö bäri niaratre ken yebätä. Ni umbre ji ngwanka ie kukwe gare krubäte tä dre nuainne ye ani mike gare jai. Jesús Ja Nire Biani Ngwanta Törö Jai aune Jehová bätä Jesús tä ni tarere yebätä La Atalaya tä blite ye niara tä ükökrö jai mekerabe nükebe kä nengwane. Kä kwatire kwatire te, köbö ye känenkri, tä ñäketa täräkwata yebätä aune ñobätä köbö ye ütiäte yebätä tä töbiketari. Nane nane, tä täräkwata mada mike täräkwata ükakröta kwe yebe. Niara tä ñäke Bibliabätä Jesús Ja Nire Biani Ngwanta Törö Jai ye kräke aune tä töbiketaribätä. Ye köböire kukwe mrä mrä tä nemen gare ie kä kwatire kwatire te nieta kwe. Akwa niara tä ja tötike ye köböire tä Jehová aune Jesús tarere bäri. Nikwe ja tötikadre ye erere ngwane, nikwe Jehová aune  Jesús taredi bäri. Arato niaratre kukwe nuainbare ni kräke yebätä ni törbai debe biain ietre aune Jesús Ja Nire Biani Ngwanta Törö Jai ye nikwe ñaka juain jabäre.

7. a) ¿Däkien Jesús Mrö Biani Deu ye näire dre ribebare kwe orasionte Ngöböi? b) ¿Jesukwe orabare ye Jehovata kain ngäbiti ye ñokänti gare nie?

⁷ Däkien Jesús Mrö Biani Deu ye näire, ribebare kwe orasionte Ngöböi, niara aune Jehová tä keteitibe ye erere nitre ja tötikaka kwe rabadre keteitibe arato (ñäkädre Juan 17:20, 21 yebätä). Erametre, Jesukwe orabare ye Jehová tä kain ngäbiti. Jesús Ja Nire Biani Ngwanta Törö Jai ye tä mike gare metre ni testiko Jehovakwe tä keteitibe. Köbö yete, nitre kwati krubäte kä jökräbiti tibien juta jene jene te aune kwata bä jene jene ye tätre ja ükökrö aune Jehovakwe Jesús juani ye tätre mike era jai. Kä ruäre känti, gätä ne erere känti nitre kwata bä jene jene tä nemen ye tua ñaka krubäte o ñaka nemen tuin kwin nitre ie. Akwa nita keteitibe ye tuin kwin krubäte Jehová aune Jesús ie.

8. ¿Ni täi keteitibe yebätä Jehovakwe dre mikani gare Ezequiel ie?

⁸ Ni Jehová mikaka täte täi keteitibe ye gare nie. Ezequiel ni Ngöbö kukwei niekä ie Jehovakwe kukwe ye biani mikadre gare. Kukwe mikani gare yekänti niebare, krimana “Judá kräke” bätä krimana “José kräke” ye ketai jabätä aune rabai krimana kratibe ye kwrere (ñäkädre Ezequiel 37:15-17 yebätä). * Täräkwata Ni Mikaka Mokre julio 2016 yebätä sección “Nitre tä kukwe ngwentari” yekänti mikani gare: “Ezequiel kukwe niebare yebiti, Jehovakwe mikani gare nitre niara mikaka täte ye jataita Kä Käbämikani ietre yekänti aune rabaita bobukäre juta keteitibe ye kwrere. Aune kä krüte nete juta Ngöbökwe rabai keteitibe ye mikani gare kwe arato”.

9. ¿Ezequiel kukwe niebare ye tä nemen bare ño metre Jesús Ja Nire Biani Ngwanta Törö Jai kä kwatire kwatire yete?

⁹ Kä 1919 yete ja känenkäre, nitre dianinkä nänkäre kä kwinbiti nämene krimana “Judá kräke” kwrere ye Jehovakwe ükaninteta käne aune bätärekä bätärekä mikaninta keteitibe kwe. Ye bitikäre, nitre tö nämene nünain kärekäre Kä tibienbätä ye jatani bäri kwati krubäte ja kete nitre yebe. Nitre tö nünain kä tibienbätä ye krimana “José kräke” ye kwrere. Jehovakwe käbämikani, krimana krobu ye niarakwe ketai jabätä aune mikai nemen “krimana kratibe” ye kwrere (Ezeq. 37:19). Niara köböire nitre dianinkä nänkäre kä kwinbiti aune “obeja mda mda” ye namani “nüne ki kwatibe teri” ye kwrere (Juan 10:16; Zac. 8:23). Kä nengwane, nitre ye tä sribire keteitibe aune Jesukristo tä Reire kä kwinbiti ye aibe tä niaratre jie ngwen, abokän Ezequiel kukwe niebare yekänti Ngöbökwe kädekani “David ni ti mikaka täte” (Ezeq. 37:24, 25). Kä kwatire kwatire te, nitre dianinkä nänkäre kä kwinbiti aune oveja mada mada tä ja ükökrö Jesús Ja Nire Biani Ngwanta Törö Jai kräke ye ngwane, ni täi keteitibe niebare Ezequielkwe ye tä nemen bare metre. Akwa, ¿ni itire itire rabadre dre nuainne nita keteitibe ye kriemikakäre aune nitre töi mikakäre nemen keteitibe?

10. ¿Nikwe dre nuaindre ne kwe ni tädre keteitibe juta Ngöbökwe yete?

¹⁰ Kena, nikwe ja töi mikadre bobre ye köböire ni raba nemen keteitibe juta Ngöbökwe yete. Jesús nämene kä tibienbätä ye ngwane, niebare kwe nitre ja tötikaka kwe ie niaratre rabadre ja töi mike bobre (Mat. 23:12). Nitre ñaka Ngöbö mike täte ye käre tätre nütüre niaratre ye bäri ütiäte nitre mada kräke. Akwa, ni töi bobre ngwane, nikwe ja mräkätre tä ji ngwen konkrekasionte ye mikai ütiäte jai. Ni tö konkrekasion tuai keteitibe ngwane, nikwe nitre ji ngwanka ye mikadre täte. Akwa, ni töi bobre abokän  rabai kwin Jehová kräke ye bäri ütiäte, ñan ñobätä aune “nire nire käta bike kri abko rüere Ngöbö motota nebe romon. Akwa nire nire käta bike tidrä Ngöbö ngwärekri abko kräke Ngöböta ja moto mike kuin” (1 Ped. 5:5).

11. Ban aune vino ye tä dre bämike yebätä nikwe töbikadretari, ¿ye ñobätä tä ni dimike ni mada töi mike nemen keteitibe?

¹¹ Ketebukäre, Jesús Ja Nire Biani Ngwanta Törö Jai yete ban aune vino ye tä dre bämike yebätä nikwe töbikadretari ye köböire ni raba ni mada töi mike nemen keteitibe. Köbö ütiäte ye känenkri nikwe nuaindre aune metrere köbö yete nikwe nuaindre (1 Cor. 11:23-25). Ban ñaka mritani levadurabe ye tä Jesús ngrabare ñaka ngite biani kwe ni ütiäre ye bämike aune vino ye abokän tä ja därie biani kwe ye bämike. Akwa ban aune vino ye tä dre bämike ye ñan aibe nikwe mikadre nüke gare jai. Ñakare aune nikwe ngwandre törö jai, Jesús ja nire biani ni ütiäre yebiti niaratre nibu ni tarebare krubäte ye bämikani kwe: Jehovakwe Jesús biani ni mikakäre kwäre yebiti ni tare kwe ye bämikani kwe aune Jesús nämene juto biare ja nire biankäre ni ütiäre yebiti ni tare kwe ye bämikani kwe arato. Jehová aune Jesukwe ni tare yebätä nikwe töbikadretari ye raba ni töi mike niaratre tarere arato. Ni aune ja mräkätre tä Jehová tarere ye tä ni dimike nemen keteitibe.

12. Jehová tö ni tuai ngite juen ta ja mräkätre yebiti, ¿ye Jesukwe mikani gare ño metre kukwe bämikani kwe yebiti?

¹² Ketamäkäre, töi bökänbiti nikwe ngite juain ta ni madabiti ye köböire ni raba ni mada töi mike nemen keteitibe. Nire nire tä ñäke tare nie yebiti nita ngite juen ta ye ngwane, Kristo ja nire biani ni ütiäre ye köböire Jehová raba ngite juen ta nibiti yebätä nita debe bien ye nita bämike. Jesukwe kukwe bämikani abokän tä tikani Mateo 18:23-34 yekänti yebätä nikwe töbikadretari. Nikwe ngwandretari jai: “¿Jesús kukwe bämikani ye erere ti töita nuainbätä? ¿Tita ja mräkätre ngübare bätärekä aune tita niaratre töi mike nüke gare jai? ¿Tita juto biare ngite juankäre ta nitre tä ñäke tare tie yebiti?”. Erametre, ruäre ngwane ja mikata bäri ngite krubäte. Ne madakäre, ni ngite yebätä ñaka tä nemen nuäre ni kräke ngite juankäre ta ni madabiti. Akwa Jehová tö ni tuai dre nuainne ye Jesukwe mikani gare metre kukwe niebare kwe yebiti (ñäkädre Mateo 18:35 yebätä). Nikwe ñaka ngite juain ta ni madabiti ngwane, Jehovakwe ñaka ngite juain ta nibiti ye Jesukwe mikani gare metre. Nikwe töbikadre kwin kukwe yebätä. Nita Jesús mike täte aune ngite juen ta ni  madabiti ngwane, nita keteitibe ni madabe ye kriemikata nikwe aune nita ni mada töi mike nemen keteitibe.

13. Nita ja mäke jäme ni madabe ye ngwane, ¿nita ni mada töi mike ño nemen keteitibe?

¹³ Nita ngite juen ta ja mräkätre yebiti ngwane, nita ja mäke jäme bentre. Nikwe ja di ngwandre ja brukwä tätebiti ‘üai deme köböire ja mäke ni itibe kwrere’ niebare apóstol Pablokwe ye nikwe ngwandre törö jai (Efes. 4:3). Nita ni mada mike tuin ño jai yebätä nikwe töbikadretari kwin Jesús Ja Nire Biani Ngwanta Törö Jai ye känenkri aune metrere köbö yete deu. Nikwe ngwandretari jai: “¿Tita ja ngwen ño yebiti tita mike gare metre ti ñaka nemen rubun käre ni mada kräke? ¿Tita ja di ngwen ni mada töi mikakäre ja mäke jäme aune nemen keteitibe?”. Köbö ye ngwane, nikwe töbikadretari kukwe ütiäte krubäte ngwantarita yebätä.

14. ¿Nita ja tarere kwärikwäri ye ni raba bämike ño?

¹⁴ Ketabokäkäre, nikwe ni mada taredre Jehová Ngöbö ni tarekä erere ye köböire nikwe ni mada töi mikai nemen keteitibe (1 Juan 4:8, TNM). Nikwe ñaka kukwe ne erere niedre jire: “Tikwe ja mräkätre töi mikadre nüke gare jai, akwa ye ñan aibätä niaratre matadre kwin tibätä”. Nikwe töbikadre ye erere ngwane, ni kristiano ‘ja kadre ngäbiti kwärikwäri aune ja taredre kwärikwäri’ niebare Pablokwe ye ni ñaka tädre mike täte (Efes. 4:2). Nikwe ja kadre ngäbiti kwärikwäri ye ñan aibe niebare kwe, ñakare aune nikwe ‘ja taredre kwärikwäri’ niebare kwe yebätä nikwe töbikadre. Kukwe ketebu ye ñaka ja erebe, ¿ñan ererea? Jehová tä ni bätäkä ngwarbe ye töi mike kite konkrekasion keta kabre yete (Juan 6:44, TNM). Yebätä tä niaratre tarere. Aisete, ni ñaka raba ja mräkätre tarere ye nikwe ñaka niedre. Jehová tö ni tuai nitre jökrä tarere ye erere nikwe nuaindre (1 Juan 4:20, 21).

15. ¿Jesús Ja Nire Biani Ngwanta Törö Jai nuaindi mrä ye ñokänti gare nie?

¹⁵ Jesús Ja Nire Biani Ngwanta Törö Jai ye nikwe nuaindi mrä. ¿Ñokänti ye gare nie? Pablo niebare nitre dianinkä nänkäre kä kwinbiti ie, kä kwatire kwatire te niaratre tä Jesús murie ketani ngwenta törö jai ye ngwane, “ni Dänkien krütani [o murie ketani] ni täte amne ni kräke abko [...] [niaratre] tädi bä mike batire batire abti ni Dänkien jatadi nüketa” (1 Cor. 11:26). Kä krüte yebätä Jesukwe blitabare ye ngwane, niara jataita ñongwane yebätä blitabare kwe arato. Kukwe tare krubäte köböi nibira känime yebätä kukwe ne niebare kwe: “Ni Kä Nebtä Ngobo jatadita abko bä mikadi kore kä käinbti sete abko ni jökrä käkwe tuadi. Ye ngwane abko ni kä jökräbti temen rabadi nekwetekä krübäte ja jiebti, käkwe ja müaidi angwane, [...] Ni Kä Nebtä Ngobo abko jatadi tuen ja di kri bä nuärebti mütabti abko ni jökrä käkwe tuadi. Angwane tikwe angeletre tikwe juandi drü jüke krikri käkwe ni dianinkä jen jakrä ükadikrö jökrä ketetibe. Ni dianinkä jen jakrä nünanka nindrini, kä driri, sekri, nekri abko ükadikrö jökrä kwe” (Mat. 24:29-31). Nitre dianinkä nänkäre kä kwinbiti täi Kä tibienbätä ye jänäin kä kwinbiti ye ngwane, Jesukwe ‘nitre dianinkä’ ye ükaikrö keteitibe. Kukwe tare krubäte kömikai ye bitikäre kukwe ye rabai bare, akwa Armagedón kömikai ye känenkri rabai bare. Rü yete, Jesús aune nitre 144,000 käkwe gobrantre Kä tibienbätä ye ganaindi (Apoc. 17:12-14). Jesús rikai nitre dianinkä ngwena kä kwinbiti ye känenkri Jesús Ja Nire Biani Ngwanta Törö Jai ye nuaindi mrä.

16. Jesús Ja Nire Biani Ngwainta Törö Jai kä nete, ¿ye ñobätä mä töita kwatibe ñaka juen jabäre?

¹⁶ Jesús Ja Nire Biani Ngwanta Törö Jai nuaindi köbö 31 marzo 2018 yete ye nikwe ja töi mikadre kwatibe ñaka juen jabäre. Aune Jehovakwe ni dimikadre jankunu juta kwe töi mike nemen keteitibe ye nikwe ribedre ie (ñäkädre Salmo 133:1 yebätä). * Jesús Ja Nire Biani Ngwanta Törö Jai abokän nuaindi mrä yebätä ni täi siba ye nikwe ngwandre törö jai. Köbö ye ngübakäre, Jesús Ja Nire Biani Ngwanta Törö Jai ye näire nita nemen keteitibe ye ütiäte krubäte ni kräke ye nikwe bämikadre.