KUKWE nieta nete ne tä mike gare niaratre nämene ruäre ngwane kukwe ye mike täte. Deuteronomio 24:14, 15 tä niere: “Ni sribikä tä jondron ribere jai aune bobre yekän mä ñaka rabadre gore, ni ye mä etebatre o ni menteni tädre nüne mä käite, juta mäkwe yete ye kärera. [...] Mäkwe ñaka nuaindi ngwane, niarakwe mä kitai ngise Jehovai aune ngite näin mäbiti”.

Siklo VII kä 1 känenkri yete, fragmento de cerámica yebätä kukwe tikani ye kwani juta Asdod ye ken. Deuteronomio 24 yete kukwe nieta ye erere nämene tikani fragmento de cerámica yebätä. Ni nura nökaka käkwe kukwe ye niebare, ñobätä ñan aune nura ngwä biandre nuäi kwe ye erere ñaka biani kwe raba ruin nunye. Kukwe ne nämene tikanibätä: “Ni sribikä käkwe nura ükaninkrö ye bitikäre köbö nikani ruäre ta yete, Hoshayahu, Shobay ngobo nükani aune nikani dän tikwe ye ngwena. [...] Nitre jökrä nämä sribire tibe kä ngirete ye raba kukwe nieta tikwe ye mike gare metre. Ti abokän ñaka ngite kukwe yebätä. [...] Dän biandreta ni sribikä ne ie ye ñaka tä gare ni ji ngwanka ie rabadre nütüre ye ngwane, rabadre tuin bobre ie yebätä nuaindre kwe. Ni sribikä mä kräke yekän dän goidre ye ngwane, mä ñaka rabadre kwekebe”.

Simon Schama, ni kukwe kira tikaka tä niere, “ni sribikä ye ñan nämene töbike krubäte dän goibare kän ye aibebätä ñakare aune nämene töbike kukwe madabätä arato”. Tä niere jankunu: “Yebiti tä mike gare arato ni sribikä yei kukwe meden ükaninte Bibliabätä ye nämene gare kwin. Kukweta tikani Levítico aune Deuteronomio yebätä nitre bobre mika nämene ja tare nike dimikakäre ye nämene gare metrere ie”.