1, 2. ¿Pentecostés kä 33 yete kukwe meden ñan tuabare namani bare?

PENTECOSTÉS kä 33 yete, nitre ja tötikaka Jesukwe 120 nämäne ja ükaninkrö ju dokwäte kwin Jerusalén domingote dekä (Hech. 1:13-15; 2:1). Kukwe ütiäte rabai bare yebätä niaratre ja mikadrete jutate ribebare Jesukwe ietre köbö nikani ruäre ta ye känenkri (Hech. 1:4, 5). ¿Dre nakaninkä?

² “Te batibe müreta kite mate bäri ribi krübäte ngöta neme, ye kwrere jire kä ngö jatani kä käinbti timonkwäre abko ngö nükani mate gwita temen”. Ye bitikäre “jändrän bä namani ñukwä jutra kwrere” nitre ja tötikaka Jesukwe ye dokwäbiti aune “Ngöbö Üai Deme namani täte jökrä btätre” (Hech. 2:2-4). Kukwe ñan tuabare yebiti Jehovakwe ja üai deme ye biani nitre ja tötikaka Jesukwe yei (Hech. 1:8). Nitre ye dianinkä käne üai demebiti * gobrankäre Jesube kä kwinbiti.

3. ¿Nitre kristiano yei ñobätä namani gare metre niaratre dianinkä üai demebiti?

³ Mä tädre siba nitre ja tötikaka Jesukwe ye ngätäite ngwane kukwe namani bare köbö yete ye ñaka käi rikwitadrekä jire mäbiti. Jondron ñukwä trä kwrere rabadre mä dokwäbiti aune mä rikadre blite ni menteni kukwei keta kabrebiti  (Hech. 2:5-12). Kukwe ye köböire rabadre gare metre mäi, mä dianinkä üai demebiti. Akwa Ngöböta nitre denkä üai demebiti ngwane, ¿käre tä nuainne kukwe ñan tuabare yebiti? Ñakare. ¿Ñobätä kukwe ye gare nie? ¿Ñongwane niaratre ye dianinkä üai demebiti?

4. Siklo kena yete, ¿ñongwane nitre mada ye dianinkä üai demebiti?

⁴ Ñongwane ni kristiano diankata üai demebiti yebätä ani blite käne. Nitre kristiano 120 ye ñan aibe dianinkä üai demebiti Pentecostés kä 33 yete. Köbö ye arabe näire nitre 3,000 yebiti üai deme käbämikani Jesukwe ye namani. Niaratre ye ja ngökani ñöte ngwane dianinkä üai demebiti (Hech. 2:37, 38, 41). Kä nikani ta yete nitre mada dianinkä üai demebiti, akwa ja ngökani ñöte kwetre ye ñan ai ngwane namani bare. Ñodre nitre samaritano ja ngökani ñöte ye bitikäre kä nikani ruäre ta ngwane dianinkä üai demebiti (Hech. 8:14-17). Aune Cornelio bätä mräkä kwe jämi ja ngökö ñöte ye känenkri dianinkä üai demebiti (Hech. 10:44-48).

5. 2 Corintios 1:21, 22 tä niere erere, ¿ni kristiano diankata ye ngwane dreta nemen bare?

⁵ Ni kristiano diankata üai demebiti ngwane, dreta nemen bare yebätä ani blite mada. Ni dianinkä ye ruäre kräke ñan tä nemen nuäre Jehovakwe dianinkä ye mikakäre era jai, aisete tä nemen ngwentari jai, “¿ñobätä ti?”. Niaratre itire itirebätä kukwe ye ñaka mate ja erebe akwa apóstol Pablo niebare, niaratre jökräbätä kukwe ne tä nemen bare: “Munkwe [kukwe metre] mikani era jai, ye bitikäre niara ye köböire üai deme käbämikani yebiti mun täräi mikaninkä [o sello mikani] * arato, ye abokän jondron biani käne nie jondron tä biandre nie bämikakäre” (Efes. 1:13, 14, TNM). Jehová tä ja üai deme yebiti mike gare metre ietre niaratre ye abokän dianinkä. Üai deme ye bianta käne ietre, ja känenkäre nünain kärekäre kwetre kä kwinbiti  aune ñaka kä tibienbätä ye mikakäre gare metre ietre (ñäkädre 2 Corintios 1:21, 22 yebätä).

6. ¿Ni kristiano dianinkä ye käkwe dre nuaindre ne kwe rikadre kä kwinbiti?

⁶ ¿Akräke ni kristiano diankata üai demebiti ye nibira jerekäbe nänkä kä kwinbiti? Niaratre ñaka ja ngwain metre ngwane, ñaka näin kä kwinbiti. Aisete niaratre diankata üai deme yebiti ngwane, diankata jerekäbe jenena (Filip. 3:12-14; Heb. 3:1; Apoc. 2:10). Yebätä kukwe nieta mikakäre mokre ne ngwandre törö kwetre jai: “Ti mräkätre tikwe, Ngöbökwe mun käräbarera jakrä amne mun dianinkära jenena jakrä kwe, [...] aisete jändrän ye jiebti mun rankwa kisere janknu, ñobtä ñan angwane munkwe ye nuendre [jankunu] ne ngwane, munkwe ñan ni Dänkien gibiadrekäta jire chi” (2 Ped. 1:10).

7. ¿Nitre dianinkä nänkäre kä kwinbiti ye ñokänti tä nemen gare ietre?

⁷ ¿Nitre kristiano diankata üai demebiti ye ñokänti tä nemen gare ietre? Ja mräkätre nämäne Roma “käräbare [...] nünankäre deme” yei Pablo kukwe tikani ye tä kukwe ye mike gare metre. Niebare kwe ietre: “Ngöbö Üai tä mun itire itire btä, ye abko käkwe ñan Ngöbö käi mikadita tare mun okwäte, ni klabore ütiäte ñakare käta bkänkä jürä ngwen jabtä ye kwrere; akwa Ngöbö Üai käta mun mike Ngöbö ngäbriänkäre [...] köböire Ngöbö abko ni Rün nikwe käita nebe nuäre nibtä, käta ¡Abba! ¡Tata tikwe! niere Ngöböye. Ye abko, ni [...] abko Ngöbö ngäbriänkä era metre abko Ngöbö Üai ye arabe tä mike gare nie” (Rom. 1:7; 8:15, 16). Jän, üai deme yebiti Ngöböta mike gare metre ietre niaratre ye dianinkä nänkäre kä kwinbiti (1 Tes. 2:12).

8. 1 Juan 2:27 tä niere erere, ¿nitre dianinkä üai demebiti ye ni madakwe niedre ietre ye ñobätä ñan ribere jai?

⁸ Nitre dianinkä näin kä kwinbiti ye Jehová tä mike gare metre brukwäte aune töite (ñäkädre 1 Juan 2:27 yebätä). * Ni kristiano jökrä erere, nitre dianinkä nänkäre kä kwinbiti yei Jehovakwe diridre konkrekasionte ye tätre ribere jai arato. Akwa niaratre dianinkä üai demebiti ye ni madakwe niedre ietre ye ñan ribere jai. Jehová tä kukwe ye mike gare metre ietre üai demebiti.

9. Efesios 1:18 tä niere erere, ¿nitre diankata ye ngwane dreta nemen bare bätätre?

⁹ Jehová tä ni kristiano denkä üai demebiti ngwane dreta nemen bare ye ñan tä nemen nüke gare nitre kristiano madai. Ñan tä nemen nüke gare ietre ñobätä ñan aune nitre ye ñan dianinkä üai demebiti yebätä. Ngöbökwe ni sribebare nünankäre kä tibienbätä, ñan nünankäre kä kwinbätä (Gén. 1:28; Sal. 37:29). Akwa niarata nitre ruäre denkä nünankäre kä kwinbätä, nitre ye diankata kwe ngwane niarata töi kwite drekebe ne kwe niaratre törbadre nünain kä kwinbiti (ñäkädre Efesios 1:18 yebätä).

10. ¿Nitre tä därereta ye dre gärätä? (Nota mikadre ñärärä arato).

¹⁰ Ni kristiano diankata üai demebiti ngwane, ni ye tä därereta bobukäre. * Ni ñan därereta bobukäre yei kukwe ye mikadre gare ye  ñaka nuäre ye Jesukwe bämikani (Juan 3:3-8).

11. ¿Kukwe meden medenbätä ni kristiano dianinkä ye töita nikwite?

¹¹ ¿Nitre diankata ye ngwane drebätä töita nikwite? Dianka jämi ye känenkri, nünain kä tibienbätä kwe yei nämäne tö ngwen ja brukwä tätebiti. Jehovakwe kukwe käme ye diainkä aune kä tibien rabai bä nuäre ye ngüba nämäne krubäte kwe aune mräkätre kwe krütani ye kain ngäbitita kwe kä jutobiti ye bä nämäne nemen okwäte. Akwa diankata ye ngwane töita nikwite, ¿ñobätä? Nüna kä tibienbätä ñan niena tuin ütiäte ietre, tätre ulire o tätre ja tare nike kä tibienbätä ye ñan aibätä töita nikwite. Ñakare aune Jehovata ja üai deme yebiti niaratre töi mike tö ngwen kukwe mrä ie.

12. 1 Pedro 1:3, 4 tä niere erere, ¿ni dianinkä tä töbike kukweta kräke ja känenkäre yebätä ngwane jata nemen ruin ño ie?

¹² Ni kristiano diankata üai demebiti ngwane kukwe ütiäte krubäte ye ñan kräke nütüta nemen kwe, akwa Jehovata denkä ye gare metre ie. Kukwe kwin krubäte tä kräke ja känenkäre yebätä tä töbike ngwane, kätä nemen juto krubätebätä aune tä debe bien krubäte (ñäkädre 1 Pedro 1:3, 4 yebätä).

13. ¿Nitre dianinkä yei nüna kä tibienbätä tuin ño?

¹³ ¿Ye tä mike gare nitre dianinkä ye tö ja tuai krüte? Kukwe ngwantarita ne mikakäre gare apóstol Pablo käkwe nitre dianinkä ye bämikani ju nuäre ngwandre yebätä, niebare kwe, “ni ngrabare tä niken ngwarbe jötrö, ye abko ju nuäre ngwiandre kwrere amne nita nüne te kä nebtä angwane, nita täkekäbe jabe kukwe taretare kisete”, niara tö namani ju ye diainkä jabätä ye ñan aibätä kukwe ye niebare kwe, ñakare aune Ngöbökwe “ngrabare mdara jire biandre” ie yebätä niebare kwe (2 Cor. 5:4). Ni dianinkä ye ñan nebera ja nire kwe tarere aune tö ja tuai krüte jötrö ye ñan ai gärätä. Ñakare aune ja nire kwe ye käi jutobätä aune töita sribibätä Jehová kräke mräkätre kwe ben aune ja ketamuko kwe ben. Kukwe ñokwä nuainta kwetre akwa kukwe kwin krubäte tä kräketre ye käre tä töite (1 Cor. 15:53; 2 Ped. 1:4; 1 Juan 3:2, 3; Apoc. 20:6).

14. Kukwe ja üaire ye ütiäte krubäte ni kräke aune Jehovata ni dimike tuin metre nie, ¿ye tä bämike ni dianinkä üai deme yebiti?

¹⁴ ¿Jehovakwe mä dianinkä üai demebiti ruin mäi? Ye erere ngwane, mäkwe kukwe ne ngwandretari jai ye ütiäte krubäte: “¿Ngöbö tö dre ie ye ti töita nuainbätä krubäte? ¿Kukwe drie ye käi juto krubäte tibätä? ¿Ti töta nemen ñäkäi Bibliabätä aune ‘kukwe kaibe tiebe Ngöbökwe’ ye ti töta mikabätä gare bäri jai? ¿Jehová tä kukwe kwin mike nemen bare ti kräke tita kukwe driere ngwane? ¿Ti töita kwatibe ni mada dimikabätä ne kwe ja ketadre kwin kwe Jehovabe? ¿Kukwe keta kabre känti Jehová tä ti dimike tuin metre tie?” (1 Cor. 2:10). Kukwe jökrä yebätä mäkwe jän nini ngwane, ¿mä dianinkä nänkäre kä kwinbiti? Ñakare, ñobätä ñan aune nitre jökrä sribikä Jehová kräke, dianinkä nänkäre kä kwinbiti aune ñaka dianinkä yei ja raba nemen ruin mä erere. Ne madakäre nitre dianinkä aune ñan dianinkä yei Jehová raba ja di bien ja erebe jökrä. Mä dianinkä üai deme yebiti ruin mäi, akwa ñan gare metre ta mäi ye ara tä mike gare mä ñan dianinkä. “¿Ti dianinkä ya rä?” ye nitre dianinkä nänkäre kä kwinbiti ñan ngwentari jai ñobätä ñan aune gare metre ietre.

15. ¿Nitre ie üai deme bianta akwa ñan näin jökrä kä kwinbiti ye ñokänti gare nie?

 ¹⁵ Nitre kwati ja ngwanka metre yei Jehovakwe ja üai deme biani kädrieta Bibliabätä akwa nitre ye ñan nünain kä kwinbiti. Ñodre üai deme yekwe David jie ngwani (1 Sam. 16:13). Ye köböire kukwe keta kabre nguseta Jehovabätä nükani gare ie aune üai deme ye käkwe niara töi mikani tärä ruäre Bibliabätä tike (Mar. 12:36). Akwa apóstol Pedro ne niebare Davidbätä: “Ngöbö ñan nikani niara ngwena kä käinbti” (Hech. 2:34). Ne madakäre Juan Bautista yebätä “Ngöbö Üai Deme” nämäne täte (Luc. 1:13-16). Jesús käkwe niebare: “Ni ñakare jire iti abko bäri ütiäte Juan Bautistakrä”. Akwa Juankwe ñaka gobrandi siba kä kwinbiti niebare Jesukwe (Mat. 11:10, 11). Jehovakwe ja üai deme ye biani nitre ja ngwanka metre yei kukwe keta kabre ñan tuabare nuainkäre akwa ñan dianinkä kwe nänkäre kä kwinbiti. ¿Ye tä mike gare niaratre ye käkwe ñan ja ngwani metre krubäte? Ye ñan ai gärätä, ñakare aune Jehovakwe gaikröta nünankäre kä tibien bä nuäre yete (Juan 5:28, 29, TNM; Hech. 24:15, TNM).

16. ¿Nitre kwati krubäte Ngöbö mikaka täte tä tö ngwen nüna medente ie?

¹⁶ Abrahán, Sara, David, Juan Bautista aune nitre kwati krubäte kirabe ye käkwe nünain kä tibienbätä Gobran Ngöbökwe yete (Heb. 11:10). Ye erere, kä nengwane nitre kwati krubäte Ngöbö mikaka täte tä tö ngwen nüna kä tibienbätä ie.

17. ¿Kukwe meden meden ngwantarita abokän mikai gare kukwe ja tötikara mada yekänti?

¹⁷ Nitre dianinkä nänkäre kä kwinbiti ye nebera braibe kä tibienbätä. Ye medenbätä ni raba kukwe ne erere ngwentari jai (Apoc. 12:17). ¿Nitre dianinkä ye rabadre ja mike tuin ño jai? Jesús Ja Nire Biani Ngwanta Törö Jai yete, ¿ni iti konkrekasionte jatadre ban kwete aune vino ñain ngwane mikadre tuin ño jai? Kä kwatire kwatire nitre ja bianka nänkä kä kwinbiti jatadre nirien bäri ngwane, ¿nikwe töbikadre krubäte kukwe yebätä? Kukwe ngwantarita ne kukwe ja tötikara mada ye käkwe mikai gare nie.