1. Rei David erere, ¿nitre kristiano ruäre raba kukwe meden ngwentari jai?

NI JÖKRÄ tö nünain jäme. Ni ñaka tö akwa nikwe ja tuai kukwe taretare ben ruäre ngwane. Nitre kristiano ruäre ie ja raba nemen ruin rei David erere. Niarakwe kukwe ne ngwanintari Jehovai: “¿Ñongwane ti ñan rabaira ja töibikaire aune töbike kri mada? ¿Ñongwane kä ñan rabaira ulire ti brukwäbätä köbö kwatire kwatire?” (Sal. 13:2).

2. ¿Dre rabai gare nie kukwe ja tötikara nekänti?

² Ni ñaka raba ngitie täte töbikakwe ye ngäniene, akwa ni raba kukwe ruäre nuainne ñaka töbikakäre krubäte. Dre raba ni mike ja töibikaire krubäte ye nibike mike gare käne jai kukwe ja tötikara nekänti. Biti, kukwe keta ti nuain raba nikwe ja töi mikakäre jäme kukwe tare käne ye nibike mike gare jai arato.

3. ¿Dre raba ni mike ja töibikaire krubäte aune ni raba ketebätä ya?

³ Ni raba nemen ja töibikaire kukwe keta kabrebätä aune kukwe ruäre ye ni ñaka raba ükete jire. Ñodre, mrö, dän aune ju ye ütiä kite bäri kabre kä kwatire kwatire aune ni ñaka raba ketebätä. Ñongwane sribi muko nikwe o ni nänkä kwelate nibe käkwe ni töi mikai kukwe blo nuainne siba bentre ye ñaka gare nie arato. Aune nita nüne yekänti nitre tä ja ngwen käme bätä ni mada nuainne tare ye ni ñaka raba ketebätä jire. Nitre töita ño kä nengwane ye tä nemen gare nie kukwe tä nakainkä yebiti ñobätä ñan aune nitre ñaka tä ja jie ngwen kukwe Bibliabätä yebiti. Nitre ruäre rabai ja töibikaire krubäte jondron kä nebätä ye jiebiti, köböite ñaka rabai nuäre kräketre Jehová mikakäre täte ye gare ni kä ne gobranka, Satana ie (Mat. 13:22; 1 Juan 5:19). Kukwe ye arabätä kukwe kri tä nemen bare käbiti tibien ye tä nitre mike töbike krubäte.

4. Kukwe keta kabre tä ni kötärä ngwane, ¿ni raba kite ja ngwen ño?

 ⁴ Kukwe keta kabre tä ni kötärä ngwane ni raba nemen ja töibikaire krubäte. Ñodre, ngwian ñan rabai käte nie jondron ribeta nikwe jai ye kräke yebätä ni raba nemen ja töibikaire. Ni raba nemen bren o sribi raba nente nikän ye raba ni mike töbike. Ni nuaite ngwane ni ñaka ja ngwain metre Ngöböi yebätä ni raba nemen ja töibikaire arato. Aune Satana bätä nitre gobrainta kwe ja mikai juta Ngöbökwe rüere ngwane, nikwe ja töi mikai ño yebätä nita nemen töbike ngwane ni raba nemen ja töibikaire krubäte. Aisete ni raba nemen kukwe ne ngwentari jai: “¿Kukwe nebätä tikwe ja töibikadre ye blo ya?”.

5. ¿“Munkwe ñan töbika krubäte dikaro” niebare Jesukwe yebiti dre gäräbare kwe?

⁵ “Munkwe ñan töbika krubäte dikaro” niebare Jesukwe nitre ja tötikaka kwe ie Mateo 6:25 yete. ¿Akräke ni ñan raba ja töibikaire jire chi ai gäräbare kwe ya? Ñakare, ye ñan ai gäräbare kwe. Nitre Jehová mikaka täte kirabe ye ruäre namani ja töibikaire, akwa ye ñan aibätä Jehovakwe ñaka kani ngäbiti (1 Rey. 19:4; Sal. 6:3). * Metrere, Jesús nämäne ni töi mike jäme ne kwe kukwe ño ño rabadre ni kisete ye ñaka rabadre ni di gainkä Jehová mikakäre täte. Ye medenbätä, nita nemen ja töibikaire krubäte ngwane, ¿ni raba dre nuainne? (Recuadro “ Ni raba nuainne ño” ye mikadre ñärärä).

6. Filipenses 4:6, 7 tä niere erere, ¿dre raba ni töi mike jäme nita nemen ja töibikaire ngwane?

⁶ 1) Mäkwe oradre käre. Kukwe keta kabre rabadre mä kötärä ngwane, mäkwe oradre ja di tätebiti Jehovai ye köböire ja rabai ruin jäme mäi (1 Ped. 5:7). Mäkwe oradi käre ye köböire “Ngöbökwe kä jäme jakwe” ye biandi mäi, “kä jäme Ngöbökwe abko ñan rükadre gare jire ni kä nebtäye” (ñäkädre Filipenses 4:6, 7 yebätä). Üai deme dite krubäte yebiti Jehovata ni töi mike jäme dre tä ni mike ja töibikaire yebätä (Gál. 5:22).

7. Nita orare Ngöböi ngwane, ¿nikwe dre ngwandre törö jai?

⁷ Mätä orare Jehovai ngwane mäkwe ja drie ie ja brukwä ngöibiti. Kukwe ño ben mätä ja tuin aune ye köböite ja ruin ño mäi ye mäkwe nie metre ta ie. Kukwe ye ükate raba ngwane, mä mikadre töbätä kwe aune ja di biandre kwe mäi kukwe ye ükatekäre aune kukwei mikakäre täte mäkwe ribe ie. Kukwe ye ükate ñaka raba ngwane, mäkwe ja di kärädre Jehovai ne kwe mäkwe ñaka ja töibikadrebätä biti bäri. Kukwe ño ben mätä ja tuin ye mätä niere metre ta orasionte ngwane, kä näin ta yete Jehová tä mä dimike ño kukwe yebätä ye rabai bäri nuäre mä kräke mikakäre gare jai. Niara ñaka tä kukwe ye ükete jötrö ngwarbe mä kräke ngwane, ñan ja di ngwen nekä. Kukwe ben mätä ja tuin ye mäkwe niedre metre ta Jehovai ye ñan aibe ie töta nemen, ñakare aune mäkwe oradre käre ie kukwe yebätä ye töta nemen arato (Luc. 11:8-10).

8. ¿Nikwe dre kädekadrete orasionte?

⁸ Kukwe keta kabre tä mä kötärä yebätä mä rikadre ja driere Jehovai orasionte ngwane, dre kwin niena mäkwe yebätä mäkwe töbikadre aune mäkwe debe biandrebätä ye ütiäte krubäte. Ruäre ngwane kukwe ñaka kwain jire mäi ja ruin ño mäi ye mikakäre gare ie. Akwa, “¡Mäkwe ti dimika tita ribere mäi!” ye aibe kwain mäi niekäre Jehovai ngwane, niara raba orasion ye kukwe nuin mäkwe ngwandre törö jai (2 Crón. 18:31; Rom. 8:26).

9. ¿Nire raba ni kriemike kwin?

⁹ 2) Mäkwe tö ngwan Jehovai aune ñaka  tö ngwan akwle jai. Siklo keta kwä Kristo känenkri yete, nitre asirio ye jürä nämäne nitre judío yebätä aune ñaka tö namanintre nemen klabore niaratre kisete yebätä ja di käräbare kwetre nitre Egipto ie (Is. 30:1, 2).Ye köböite kukwe tare raba nemen bare bätätre yebätä Jehovakwe mikani mokre (Is. 30:7, 12, 13). Niaratre raba ja kriemike ño metrere ye Jehovakwe mikani gare ietre Isaías yebiti. Isaiakwe niebare: “Munkwe tö ngwan jäme Jehovai aune mun rabai dite” (Is. 30:15b).

10. ¿Kukwe meden medenbätä ni raba tö ngwen Jehovai?

¹⁰ Kukwe meden medenbätä ni raba tö ngwen Jehovai ye ani mike gare jai. Sribi ütiäte driedre mäi känti mäkwe ngwian ganain ere, akwa sribi yekwe kä diainkä mäkän aune ñaka mä tuainmetre kukwe ja üaire nuainne krubäte yebätä töbike. O sribi muko mäkwe merire o brare ñaka testiko ja töi mikadre mäbätä. Aune mä mräkä tare mäkwe käkwe kukwe keteitibe aune mrä ne diamana jai mäi: “Mäkwe ja mikai nirekri ye den nuaindre jai: mäkwe ja mikai Ngöbökri o tikri”. Ja tuadre kukwe yebe ye ñaka nuäre, akwa kukwe keteitire keteitire yekänti Jehová raba ni jie ngwen (Mat. 6:33; 10:37; 1 Cor. 7:39). Akwa, ¿mätä tö ngwen Jehovai aune ja jie ngwamana ie?

11. Ja mikadre ni rüere ngwane ni töi tädre jäme yekäre, ¿nire nire kädrieta Bibliabätä abokänbätä ja tötikadre?

¹¹ 3) Nitre kirabe yebätä mäkwe kukwe mika gare jai ja töi kräke. Bibliabätä nitre kwati käkwe kukwe kwin bämikani aune ruäre abokän kukwe ñaka kwin bämikani. Ni ñan rabadre nekwetekä, ñakare aune ni rabadre tö ngwen Jehovai ye ñobätä ütiäte tä nemen gare nie nitre jene jene yebätä. Nitre kukwe kwin bämikani yebätä mäkwe ja tötikai ngwane, dre käkwe niaratre dimikani ñaka nekwetekä rüe nakaninkä ngwane yebätä mäkwe töbika. Ñodre, nitre judío kukwe ükatekä kukwe drie ñäkäibare nitre apóstol ie ngwane niaratre ñaka ja tuanimetre ietre, ñakare aune töi kwatibebiti niebare kwetre: “Nunkwe Ngöbö mikadre täte, akwa mun abko ñan kukwei mikadre täte nunkwe” (Hech. 5:29). Niaratre nuainbare tare, akwa yebiti ta ñaka kä jürä ngwani kwetre jabätä ñobätä ñan aune Jehová nämäne niaratre dimike aune nämäne niaratre kain ngäbiti nämäne gare ietre. Ye medenbätä kukwe kwin ye driebare jankunu kwetre (Hech. 5:40-42). Ye erere arato, Esteban murie keta jababare ngwane niara nämäne jäme aune “ngwäre namani tuen angele ngwäre kwrere” mikata gare Hechos 6:12-15 yete. ¿Ñobätä? Ñobätä ñan aune Jehová nämäne niara kain ngäbiti nämäne gare metre ie.

12. 1 Pedro 3:14 aune 4:14 tä niere erere, ¿ñobätä kä täi juto nibätä ja mikai ni rüere yebiti ta?

¹² Jehovakwe ja di biani nitre apóstol ie kukwe ñan tuabare nuainkäre. Yebiti nämäne gare ietre Jehová nämäne niaratre dimike (Hech. 5:12-16; 6:8). Ye erere Jehová ñan tä nuainne ni kräke kä nengwane, akwa niarata ni kain ngäbiti ye tä mike gare nie Bibliabiti. Aune ni ngwain ja tare nike kukwe kwin nuainbätä ngwane, üai deme biain kwe nie käbämikata kwe (ñäkädre 1 Pedro 3:14; 4:14 yebätä). Aisete ja mikai ni rüere ja känenkäre ngwane, yebätä nikwe ja töi mikai ño yebätä ñan töbikadre krubäte, ñakare aune ni raba dre nuainne nengwane tö ngwankäre bäri Jehovai ja di biain kwe nie aune ni mikai kwäre kwe yebätä ja töi mikadre ye bäri kwin. Nitre apóstol ye erere, Jesukwe kukwe käbämikani ne nikwe ngwandre törö jai: “Tikwe ja kukwei töbtä kri mikadi gare munye blitakäre ja dokwäre, ye käkwe mun rüe kukwe ötadi jökrä angwane, rabaditre kwekbe jökrä mun käne”. Ne madakäre, kukwe ne käbämikata kwe nie arato: “Munkwe nünanka dite jabtä angwane, mun rabadi dianintari” (Luc. 21:12-19).  Aune kukwe ne ñaka käi rikwitadrekä nibiti: Ni Jehová mikaka täte ja ngwanka metre ie tä krüte ngwane, kukwe kia kia jökrä niarabätä ye törö Jehovai aune mikaita nire kwe.

13. Nitre namani nekwetekä aune ñaka tö ngwani Jehovai yebätä nikwe ja tötikai ngwane, ¿dre ütiäte raba nemen gare nie?

¹³ Nitre namani nekwetekä aune ñaka tö ngwani Jehovai yebätä kukwe raba nemen gare nie ja töi kräke arato. Dre käkwe niaratre ngwani ngoto ritekä yebätä nikwe ja tötikai ye käkwe ni dimikai ñaka kukwe ye erere nuainne. Ñodre, kenanbe rei Asá käi Judá nämäne tö ngwen Jehovai. Aisete rübare kwe nitre rükä kwati krubäte yebe ngwane Jehovakwe dimikani rüe ganainne (2 Crón. 14:9-12). Akwa kä nikani ta ye bitikäre rübare kwe nitre rükä braibe rei Baasá käi Israel yebe ngwane, ¿dre namani bare? Nuainbare käne kwe erere, Jehová känändre kwe ja dimikakäre näre, jerekäbe ja dimikamana kwe nitre sirio ie aune ütiä biani kwe ietre (2 Crón. 16:1-3). Aune niara namani bren jume aune jababare krüte ngwane ñaka Jehová känänbare kwe ja dimikakäre (2 Crón. 16:12).

14. ¿Asá kukwe ñaka kwin nuainbare ye tä dre driere ja töi kräke nie?

¹⁴ Kenanbe, kukwe nämäne nemen Asá kisete ngwane nämäne Jehová känene ja dimikakäre. Akwa kä nikani ta ye bitikäre ñan jatani ja di kärere Jehovai, ñakare aune kukwe nämäne tuin ño ie ye erere jatani ükete jai. Asakwe ja di käräbare nitre sirio ie rükäre nitre Israel yebe, kukwe ükaninte kwin kwe jai raba nemen tuin nie. Akwa, ye ñaka namani bare kwin ie. Jehovakwe niebare ie ni niara kukwei niekä yebiti: “Mätä tö ngwen rei Siria ie aune ñaka tö ngwen Jehová Ngöbö mäkwe ie, yebätä nitre rükä rei Siria yekwe ye kwäräbeni mä kisete” (2 Crón. 16:7). Ni jatadre tö ngwen akwle jai aune kukwe tuin ño nie ye erere ni jatadre ükete jai aune ñaka Jehová känene ja dimikakäre Kukwe kwe yebiti, yebätä nikwe ja ngübadrebiti. Batibe nikwe ja tuadi kukwe ñaka nuäre ben ye ngwane jötrö ngwarbe ni rabadre kukwe den nuaindre jai. Akwa yebiti ta, ni ñan rabai nekwetekä ñakare aune nikwe tö ngwandi Jehovai ye rabai bäri kwin ni kräke.

15. ¿Nita ñäke Bibliabätä ngwane ni raba dre nuainne?

¹⁵ 4) Mäkwe bersikulo Bibliabätä mika ja töite. Ni ñan rabadre nekwetekä ñakare aune nikwe tö ngwandre Jehovai yekwe ni mikai dite ye texto Bibliabätä meden tä mike gare yebätä mäkwe ñäkäi ngwane, mäkwe ja di ngwan mike ja töite. Mäkwe ñäkädre texto yebätä ja kukwei kribiti o mäkwe tikadre täräbätä jai aune biti mäkwe ngwandreta törö jai bati bobu, ye rabai kwin mä kräke. Kukwe biani nämäne tikani täräbätä yebätä Josué rabadre ñäke aune töbiketaribätä dibire rare ja ngwankäre töbätä ye Jehovakwe ribebare ie. Kukwe ngwan nämäne törö ye käkwe niara dimikai ñaka kä jürä ngwen jabätä kukwe ño ño ben ja tuadre kwe yebiti ta (Jos. 1:8, 9). Kukwe ütiäte raba kwen nie Kukwe Ngöbökwe yebätä ye käkwe ni dimikai ñaka nekwetekä kukwe meden raba kä jürä mike nibätä o ni mike töbike yebätä (Sal. 27:1-3; Prov. 3:25, 26).

16. ¿Jehová tä ja mräkätre yebiti ni dimike ño ñaka nekwetekä aune tö ngwen ie?

¹⁶ 5) Mäkwe kä dianka jai ja mräkätre kräke. Jehová tä ja mräkätre yebiti ni dimike ñaka nekwetekä aune tö ngwen ie. Dre drieta gätäte, ja mräkätre tä kukwe niere gätäte aune nita blite ja mräkätre ben gätäte ye raba kukwe kwin mike nemen bare ni kräke (Heb. 10:24, 25). Ja ketamuko nikwe konkrekasionte ie nikwe ja driedre ja brukwä tätebiti ye käkwe ni dimikai arato. Ja ketamuko kwin tä “kukwe kwin” niere nie ye raba ni dimike ñaka ja töibikaire krubäte kukwe ño ño rabadre ni kötärä yebätä (Prov. 12:25).

17. Hebreos 6:19 tä niere erere, ¿tö ngwanta Gobran Ngöbökwe ie ye raba ni mike ño dite ja tuakäre kukwe tare ben?

 ¹⁷ 6) Kukwe kwin ie mätä tödeke ye tädre käre mä töite. Gobran Ngöbökwe kukwe kwin nuaindi ie tö ngwanta nikwe “ye abko jä doboko ye kwrere” tä ni mike dite ja tuakäre kukwe tä nemen ni kisete aune töbika yebe (ñäkädre Hebreos 6:19 yebätä). Nita töbike blo jabätä ye ja känenkäre ñaka rabaira jire käbämikata Jehovakwe yebätä nikwe töbikadre (Is. 65:17). Mä niena nüne kä bä nuäre yete, kukwe tare ñaka aune nünandi jäme ye bämike ja töite (Miq. 4:4). Kukwe ie nita tödeke ye tädre käre ni töite yekäre ni raba kukwe mada nuainne arato. Ye abokän, ni raba blite kukwe yebätä ni madabe. Ye medenbätä, mäkwe ja di ngwan täte kukwe driere aune nitre mike ja tötikaka. Ye erere mäkwe nuaindi ngwane, “jändrän kuin ngibiata [ni]kwe Ngöböye, ye erere rabadi täte jökrä [ni]kwe” (Heb. 6:11).

18. ¿Ni kebera ja tuin kukwe ño ño ben aune dre käkwe ni dimikai ja tuin kukwe yebe?

¹⁸ Kä ne jataira krüte ngwane bäri nikwe ja tuai kukwe tare ben, kukwe rabai bäri ni kisete aune kukwe keta kabre raba kite ni mike ja töibikaire bäri arato. Yebätä dre käkwe ni dimikai ja tuin kukwe tare yebe, ñaka nekwetekä ñakare aune tö ngwen Jehovai aune ñaka tö ngwen akwle jai ye texto kä 2021 kräke tä ngwen törö nie. Kä nete, nita tödeke kukwe käbämikata Jehovakwe ne ie ye nikwe bämikadre kukwe nuainta nikwe yebiti: Mäkwe tö ngwan jäme tie aune mä rabai dite (Is. 30:15).