KUKWE JA TÖTIKARA 4
Ja di ngwanta Conmemoración nuainkäre yebätä Jehovata kukwe kwin nuainne nikrä
“Munkwe ne nuain jankunu ti ngwankäre törö jai” (LUCAS 22:19, TNM).
KANTIKO 19 Kristo Mrö Biani Deu
KUKWE NEBÄTÄ JA TÖTIKAI a
1, 2. ¿Ñobätä nita niken kä kwatire kwatire Jesús ja nire biani ngwanta törö jai yebätä?
KÄ NIKANINA bäsi 2.000 ta yete, Jesús ja nire biani ni kräke ye köböire ni raba nüne kärekäre ie nita tö ngwen. Niara murie keta jämi ye känenkri deu niara ngwandre törö ño jai ye bämikani kukwe nuärebiti kwe ye abokän pan aune vinobiti. Nitre ja tötikaka ie niebare kwe rabadre ne nuainne jankunu niara ja tare bämikani ye ngwankäreta törö jai (1 Cor. 11:23-26).
2 Jesús tare nikwe yebätä kukwe biani kwe ye ni kristiano tä mike täte (Juan 14:15). Jesús ja nire biani ngwanta törö jai kä kwatire kwatire ye käi näire ütiäte ni kräke nita bämike. Ñodre, nita kä denkä jai orakäre, töbikatarikäre ja nire biani kwe ni ütiäre ye ütiäte ni kräke yebätä. Ne madakäre, nita kä denkä bäri jai kukwe driekäre aune ja di ngwen nitre jökrä nübaikäre köbö ütiäte ye kräke. Akwa ni ñaka tö kukwe mada tuai ja ketebätä rikakäre gätä ütiäte yebätä.
3. ¿Dre rabai gare nie kukwe ja tötikara nekänti?
3 Nitre jökrä Jehová mikaka täte ye tä ja di ngwen krubäte Jesús ja nire biani ni kräke ye ngwankäre törö jai. Kukwe ketamäbiti bämikata ye rabai gare nie kukwe ja tötikara nekänti: 1) Jesús ja nire biani ngwanta törö jai nuaindre ño niebare kwe ye erere nita nuainne, 2) nita nitre jökrä nübaire, 3) kukwe tare yebiti ta nita ja di ngwen kwen gätäbätä.
JESÚS JA NIRE BIANI NGWANTA TÖRÖ JAI NUAINDRE ÑO NIEBARE KWE YE ERERE NITA NUAINNE
4. a) ¿Kukwe metre meden mikata gare Jesukwe ja nire biani ngwanta törö jai ye ngwane? (Lucas 22:19, 20). b) ¿Kukwe metre ne rükadre gare nie ye ñobätä ütiäte krubäte?
4 Kukwe ruäre ngwantarita jai ye mikata gare kukwe kädrieta Jesús ja nire biani ngwanta törö jai kä kwatire kwatire yete ye ngwane. Ñodre, ¿ni kökadretari ye ñobätä nita ribere jai? ¿Ni itibe murie ketani ye köböire ño ngite kite raba ni jökräbiti ta? Nireta vino bätä ban kwete aune kukwe yebiti dre bämikata ye ngwanta törö nie (ñäkädre Lucas 22:19, 20 yebätä). b Kukwe kädrieta ye ngwane dre dre kwin rabadi nitre käkwe nünandi kä tibienta yekwe yebätä nita töbiketari (Is. 35:5, 6; 65:17, 21-23). Kukwe metre ne rabadre gare nie ye ütiäte krubäte aune yebätä ni ñan mikadre tuin ngwarbe jai. Jesukwe ja nire biani ni ütiäre ye ütiäte krubäte ye nitre kwati ie ñan nüke gare yebätä ñan mike ütiäte jai. Ne madakäre Jesukwe ja nire biani nuaindre ño niebare kwe ye erere ñaka tätre nuainne. ¿Ñobätä kukwe ye tä nemen bare kore?
5. ¿Nitre Apóstol bäsi jökrä krütani ye bitikäre Jesús ja nire biani ngwanta törö jai ye nuain jatani ño?
5 Nitre ja bianka kristiano jatani nüke konkrekasionte apóstol jatanina krüte jökrä ye ngwane (Mat. 13:24-27, 37-39). Kukwe ne erere biti “jatadi ni ngökö arato nitre tödekaka Jesubti diankäre jakri” (Hech. 20:29, 30). Ñodre “kukwe ngwarbe” niebare kwetre ni ngökakäre ye abokän ‘Jesús ñaka murie ketani batibe ni jökrä ngite ye ütiäre’. Jesukwe ja nire biani ni ütiäre ye nuaindre bati bobu nämäne mike gare, mika ñaka gare Bibliabätä ye erere (Heb. 9:27, 28). Kä nengwane, nitre kwati tö kukwe metre mikabätä gare jai ye tä kukwe ngwarbe drieta ye mike era jai. Ruäre tätre niken iglesiate kukwe kädekata sacrificio de la misa yebätä bämän kratire kratire o köbö kwatire kwatire. c Ne madakäre, nitre kukwe madabätä abokän tä Jesús ja nire biani ngwanta törö jai ye nuainne ruäre ngwane akwa ye dre gärätä ye nitre tä nemen yete ie ñan nüke gare. Nitre ruäre raba nemen kukwe ne ngwentari jai: “¿Metrere Jesukwe ja nire biani ye raba ngite kite ta tibiti?”. Nitre ruäre tä nemen kukwe ne ngwentari jai ñan ñobätä aune Jesukwe ja nire biani yebiti ngite kite ñaka raba nibiti ta mikata gare ietre ye tätre mike era jai. Akwa ni kristiano Jesús mikaka täte metre, ¿ye tä dre nuainne?
6. ¿Kä 1872 ye ngwane nitre kädeka nämäne ja tötikaka Bibliabätä ye ie dre nükani gare?
6 Kä setenta siglo diecinueve ye ngwane Charles Russell nämäne nitre braibe kädeka nämäne ja tötikaka Bibliabätä jie ngwen ye käkwe ja töi mikani ja tötike nguseta kukwe Ngöbökwe yebätä. Jesús ja nire biani ye ütiä nuäi aune ngwandre törö ño ye tö namani mikai gare kwin jai. Jesús ja nire biani batibe ni jökrä ütiäre ye nükani gare ietre Biblia ye köböire kä 1872 ye ngwane. Aune ñaka kukwe ye ükani kwe ja aibe kräke. Ñakare aune, mikani gare kwe tärä periódico aune täräkwata yebiti nitre jökrä ie. Kä nikani braibe ta ngwane jatani Jesús ja nire biani ye ngwenta törö jai batibe, kä kwatire kwatire te nitre kristiano siklo kena nämäne nuainne ye erere.
7. ¿Nitre kädeka nämäne ja tötikaka Bibliabätä käkwe kukwe känänbare krubäte ye köböire dre kwin tä nemen nikwe?
7 ¿Nitre kristiano metre kukwe känänbare krubäte mekerabe sete ye ñobätä kwin ni kräke kä nengwane? Ja di ngwani kwetre köböire Jehovakwe kukwe kwin mikani nemen bare kräketre, ye köböire Jesús ja nire biani aune dre kwin nuaindi kwe ni kräke ye nüke gare nie (1 Juan 2:1, 2). Ne madakäre, Biblia tä tödekara ketebu käbämike nire tä Ngöbö mike täte ye ie: nitre ruäre aibe näin kä kwinbiti ye ñaka krütai jire aune nitre kwati rabai kä tibienbätä yekwe ja nire kärekäre rabai ye nibi gare nie. Arato Jehovakwe ni tare krubäte aune Jesukwe ja nire biani ni ütiäre ye ñobätä ütiäte ni itire itire kräke yebätä nita töbiketari ngwane ja ta nemen ruin bäri Jehová ken nie. (1 Ped. 3:18; 1 Juan 4:9). Ye medenbätä, nitre Jehová mikaka täte kirabe ye erere kä nengwane nita nitre kwati nübaire jabe Jesukwe ja nire biani ngwanta törö jai ye nuainne Jesukwe nuain mananbare ye erere.
JESUS JA NIRE BIANI NGWANTA TÖRÖ JAI YEBÄTÄ NITA NITRE JÖKRÄ NÜBAIRE
¿Sö nitre nübaikäre Jesús Ja Nire Biani Ngwanta Törö Jai ye näire dre nuaindre bäri? (párrafo 8 nemen 10 mikadre ñärärä) h
8. ¿Nitre Ngöbö mikaka täte dre nuain barera nitre jökrä nübaikäre Jesús ja nire biani ngwanta törö jai yebätä? (Üai mikadre ñärärä).
8 Kä nikanina kwati ta yete ni Jehová mikaka täte tä nitre jökrä nübaire Jesukwe ja nire biani ngwanta törö jai yebätä. Kä 1881 yete täräkwata keteiti biti ja mräkätre jökrä Estados Unidos ye nübaibare ja ükekrö kä keteiti känti Allegheny gwirete (Pensilvania) Jesukwe ja nire biani ngwanta törö jai. Akwa Jesús ja nire biani ngwanta törö jai ye nuain jatani konkrekasion keteitire keteitire te. Marzo kä 1940 yete nitre kukwe driekä ie niebare nire nire niaratre käite tö nämäne kukwe mike gare jai ye rabadre nübaire. Kä 1960 ye ngwane, Betel tärä nitre nübaikäre ye imprimibare aune juani konkrekasion jökrä ie. Yete ja käne nitre testiko täräkwata nitre nübaikäre ye döräibarera kabre. ¿Ñobätä nita ja di ngwen aune kä denkä krubäte jai sribi ütiäte ne nuainkäre?
9, 10. ¿Nita nitre nübaire Jesús Ja Nire Biani Ngwanta Törö Jai yebätä ye köböire kukwe kwin tä nemen nire nire kwe? (Juan 3:16).
9 Kukwe keteitibätä nita ni jökrä nübaire Jesús ja nire biani ngwanta törö jai yebätä ye abokän Jehová aune Jesús käkwe dre nuainbare ni jökrä kräke rabadre gare ietre yekäre (ñäkädre Juan 3:16 yebätä). d Köbö yete deu dre tuadi aune kukwe nuadi krire kena kwetre ye käkwe töi mikadre Jehová mike gare bäri jai aune mike täte ye ie ni tö. Nita ja di ngwen nitre nübaire ye ñan aibekwe kukwe kwin ye tä nemen.
10 Täräkwata nitre nübaikäre yebiti nunta nitre tibo ja üairebiti nübaire arato. Niaratre tare Jehovakwe ye ngwankäreta törö ietre nunta nübaire Jesús Ja Nire Biani Ngwanta Törö Jai yebätä. Tä niken ye käita nemen juto nibätä. Ñobätä ñan aune niaratre nämäne Jehová mike täte ye ngwane kä nämäne juto bätä ye tä nüke törö ie köbö yete deu. Kukwe namani bare Monicabätä ye ani mike gare jai. e COVID-19 ye näire jataninta kukwe driere. Jesús Ja Nire Biani Ngwanta Törö Jai yebätä janamane kä 2021, ye bitikäre niebare kwe: “Jesús Ja Nire Biani Ngwanta Törö Jai ye ütiäte krubäte ti kräke. Kä nikanina 20 ta ye bitikäre krire tikwe kukwe driebareta aune nitre nübaibare köbö ütiäte ye kräke. Tikwe ye nuainba ja brukwä tätebiti Jehová aune Jesús käkwe kukwe nuainbare ti kräke yebätä tikwe debe biandre ño ie ye ñan rababa gare tie” (Sal. 103:1-4). Nitre nübaita ye kain ngäbiti kwe o ñakare, akwa yebiti ta nita nübaire ñobätä ñan aune gare metre nie nita ja di ngwen ye ütiäte krubäte Jehová kräke.
11. Nita nitre jökrä nübaire Jesús Ja Nire Biani Ngwanta Törö Jai yebätä ¿Jehovakwe kukwe kwin meden mikanina nemen bare ni kräke? (Ageo 2:7).
11 Nita kukwe ño erere nuainne nitre nübaikäre Jesús Ja Nire Biani Ngwanta Törö Jai yebätä, ye köböire Jehovakwe kukwe kwin mikanina nemen bare ni kräke. Ñodre, kä 2021 yete, pandemia COVID-19 ye köböite, ñan namani nuäre ni kräke nitre nübaikäre akwa yebiti ta nitre 21 millón 367 mil 603 kwani Jesús ja nire biani ngwanta törö jai yebätä. Ye abokän bäri kwati krubäte nitre testiko tä kä jökräbiti tibien ye kräke. Bokänä, Jehová kräke número ye ñan ai bäri ütiäte ñakare aune nire nire tä nemen yete ye ütiäte metrere niara kräke (Luc. 15:7; 1 Tim. 2:3, 4). Ja di ngwanta nitre kä jökräbiti tibien nübaikäre yebiti Jehovata nitre brukwä kwin känene ye gare metre nie (ñäkädre Ageo 2:7 yebätä). f
KUKWE TARE BITITA JA DI NGWANTA JESÚS JA NIRE BIANI NGWANTA TÖRÖ JAI NUAINNE
Nita ja di ngwen Jesús Ja Nire Biani Ngwanta Törö Jai ye nuainne yebätä Jehovata kukwe kwin mike nemen bare ni kräke (párrafo 12 mikadre ñärärä) i
12. ¿Kukwe meden raba ni ketebätä Jesús Ja Nire Biani Ngwanta Törö Jai yebätä? (Üai mikadre ñärärä).
12 Kä krüte näire nikwe ja tuai kukwe tare keta kabre ben ñodre, ni mräkätre, ni mada ja mikai ni rüere, rü, bren tare yebe ja tuai niebare Jesukwe (Mat. 10:36; Mar. 13:9; Luc. 21:10, 11). Kukwe ruäre ne raba ni ketebätä Jesús Ja Nire Biani Ngwanta Törö Jai ye nuainkäre. ¿Ja mräkätre dre nuainbarera kukwe yekänti aune Jehovakwe dimikani ño?
13. Artiomkwe ja ngwani dite aune töi kwatibiti Jesús Ja Nire Biani Ngwanta Törö Jai nuainbare yebätä, ¿Jehovakwe dre mikani nemen bare kräke?
13 Ni kitata ngite. Ja mräkätre kitata ngite ja mikabätä kukwe metre yekri akwa tätre ja di ngwen krubäte Jesús Ja Nire Biani Ngwanta Törö Jai ye nuainkäre. Ani kukwe mike gare jai Artiom yebätä. Kä 2020 yete Jesús Ja Nire Biani Ngwanta Törö Jai näire nämäne ngite kä 17 metros cuadrados (183 pies cuadrados) yete nitre 5 näre kita nämäne keteitibe o gwairebe. Akwa kukwe jökrä yebiti ta täräkwata aune jondron mada ye namani Artiomkwe. Jesús Ja Nire Biani Ngwanta Törö Jai ye nuainkäre Artiom nämäne ngite ye ngwane kukwe ükaninte kwe jai kukwe kädriekäre kaibe jabe. Akwa kukwe keteiti nämäne nemen bare: Nitre nämäne kitani ngite niarabe ye nämäne käre ñäke käme aune sö duin. ¿Artiom dre nuainbare? Ñaka sö duadre aune ñaka ñäkädre käme ora kratibe te ribebare kwe ietre. Ñan rabai bä kräketre nütübare kwe. Tä mike gare: “Jesús Ja Nire Biani Ngwanta Törö Jai ye dre gärätä ti raba mike gare tikwe nieba ietre ngwane”. Kenanbe niaratre ñan tö rababa ti kukwe nuain akwa tikwe kukwe kädrieba ünä ye bitikäre tikwe kukwe mikadre gare bäri ietre ribeba kwetre tie.
14. ¿COVID-19 yebiti ta juta Jehovakwe käkwe dre nuainbare?
14 COVID-19. Ye köböite juta Jehovakwe ie ñan namani ja ükakröbare keteitibe. Akwa ñan aibätä Jesús Ja Nire Biani Ngwanta Törö Jai ye nuainbare kwetre. g Ju Ja Ükarakrö te internet nämäne ye köböire gätä nuainbare videoconferencia yebiti. Akwa, ja mräkätre millón kwati kwe internet ñaka nämäne, ¿yekwe dre nuainbare? Juta ruäre känti kukwe kädriebare ye mikani tuare televisionte aune radiote ta. Ne madakäre, sukursalkwe grababare kukwe 500 jene jenebiti ne kwe nitre nämäne nüne mobe mentokwäre yekwe Jesús Ja Nire Biani Ngwanta Törö Jai nuaindre arato. Aune ja mräkätre ruäre nikani kukwe grababare ye ngwena ja mräkätre madai
15. Ni ja tötikaka Bibliabätä kädekata Sue yebätä, ¿dre raba nemen gare nie?
15 Ni mräkätre tä ja mike ni rüere. Kukwe ruäre bäri tare ben nitre ruäre tä ja tuin ye abokän ja mräkätre tä ja mike rüere. Kukwe ye erere namani bare ni ja tötikaka iti kädekata Suebätä ye ani mike gare jai. Kä 2021 ngwane, Jesús Ja Nire Biani Ngwanta Törö Jai nuaindre ye köböi känenkri mräkätre nämäne ja mike rüere yebätä ñan rabai nuäre kräke kukwe ye nuainkäre niebare kwe dirikä kwe ie. Ye medenbätä, dirikä kwe käkwe ñäkäbare Lucas 22:44 yebätä ie. Nita ja tuin kukwe tare ben ngwane ja ngwandre Jesús erere aune oradre Jehovai aune niarakwe ni dimikai yei ni rabadre tö ngwen kwatibe niebare kwe ie. Yebätä Jesús Ja Nire Biani Ngwanta Törö Jai näire Suekwe pan aune vino sribebare, biti programa adoración matutina ye tuani kwe jw.org yete. Ye bitikäre ja ketaninkä kwe cuartote biti programa kukwe nuabare kwe telefononte ta. Gätä kukwe nuani ünä kwe ye bitikäre kukwe tikabare kwe dirikä kwe ie aune niebare kwe ie: “Jändrin mä kukwe nieba tie ye ti dimikaba krubäte. Tikwe dre nuaindre köbö ütiäte ye kräke ye erere tikwe nuainba aune mräkä tikwe mikateba Jehová kisete. Yebätä tita debe bien krubäte aune käta juto krubäte tibätä”. Mäta ja tuin kukwe ye erere ben ngwane, ¿Jehová raba mä dimike ruin mäi?
16. Nita ja di ngwen kwankäre Jesús Ja Nire Biani yebätä, ¿Jehovakwe kukwe kwin mikai nemen bare ye ñobätä gare metre nie? (Romanos 8:31, 32).
16 Jesús ja nire biani ni ütiäre, ye nita ja di ngwen nuainne ye ütiäte krubäte Jehovakrä. Jehovakwe kukwe nuainbare ni kräke yebätä nita debe bien ngwane niarakwe kukwe kwin mikai nemen bare ni kräke ye tädre gare metre nie (ñäkädre Romanos 8:31, 32 yebätä). Kukwe ño ererebiti ta ni ñaka tö Jesús Ja Nire Biani Ngwanta Törö Jai ye juain jire ja bäre. Sö köbö ütiäte ye näire nikwe ja di ngwandre sribire bäri Jehová kräke.
KANTIKO 18 Ni kökanintari yebätä nita debe bien
a Nitre millón kwati kä jökräbiti tibien käkwe Jesús ja nire biani ngwanta törö jai ye nuaindi Köbö 4 abril 2023. Aune nitre kwati krire kwainbätä. Kä ruäre te, ni testiko ñaka nämene kwin ja üairebiti näin krire kena ye kwrere ja rabai ruin ietre. Mada abokän käkwe ja tuai kukwe keta kabre ben rikakäre Jesús ja nire biani ngwanta törö jai yebätä. Kukwe ño kwä ben mäkwe ja tuai akwa mäkwe ja di ngwain rikakäre Jesús ja nire biani ngwanta törö jai yebätä ye rabai ütiäte Jehová kräke aune kä rabai jutobätä ye tädre gare metre mäi.
b Lucas 22:19, 20, (TNM): “Ye bitikäre ban diani krati kwe, debe biani kwe Ngöböi, ötaninbätä kwe, biani kwe ietre aune niebare kwe: ‘Ne tä ti ngätä bämike, abokän biain mun ütiäre. Munkwe ne nuain jankunu ti ngwankäre törö jai’. Mröbäre ünä kwe ye ngwane ye erere nuainbare kwe vino nämäne basote yebätä. Niebare kwe ietre: ‘Vino ne abokän tä kukwe ükaninte mrä tikwe munbe ye bämike, abokän ti däriebiti namani ükaninte aune iainte mun ütiäre’”.
c Nitre kwati kukwe ngwarbe bätä tätre köbö ne käi ngwenta juto jabätä ngwane vino aune ban ye tä nikwite Jesús därie aune Jesús ngätä erere tätre nütüre. Aune batire batire tätre köbö ye ngwenta törö jai ngwane Jesuta ja nire bienta niaratre ütiäre tätre nemen nütüre.
d Juan 3:16, (TNM): “Ñan ñobätä aune Ngöbökwe ni tarebare krubäte yebätä Monso ngöräbe kwe biani kwe ne kwe ni jökrä tä tödeke ie ye ñaka gadrete, ñakare aune ja nire kärekäre rabadre kwe”.
e Nitre ruäre kä kwitani.
f Ageo 2:7: “‘Tikwe juta jökrä ye ngrükaite, aune jondron ütiäte juta jökrä te ye jatai gwä ju nete aune tikwe mikai ütiäte’, nieta Jehová nitre rükä jie ngwanka yekwe”.
g Kukwe kädekata “Conmemoración del 2021” tä jw.org ye mikadre ñärärä.
h KUKWE MIKATA GARE ÜAIBÄTÄ: Kä 1960 ye ngwane täräkwata nitre nübaikäre Jesús Ja Nire Biani Ngwanta Törö Jai kräke ye sribebare. Yete ja käne sribe jatani bäri kwin nengwane niena täräkwatare aune tä mikani internete.
i KUKWE MIKATA GARE ÜAIBÄTÄ: Kukwe ñaka kwin tä nemen bare yebiti ta ja mräkätre tä Jesús Ja Nire Biani Ngwanta Törö Jai nuainne mikata tuare üai ne känti.
