KUKWE griegore kwitata “carro” Biblia Traducción del Nuevo Mundo yebätä ngwane, jondron nänkrä jene jenebätä blitata (Hech. 8:​28, 29, 38). Carro te ni eunuco etíope nämäne näin ye abokän ñan carro rükäre o carro ja gakäre ye kwrere te nämäne näin, ñakare aune jondron bäri kri te nämäne näin bä raba. Ñobätä töbikata kore ani mike gare jai.

Ni etíope ye abokän ni sribikä ütiäte krubäte aune dikakabare mente kwe. ‘Ni Etíope eunuco, jutuabare Felipeye. Jreina Etiopiabo kädian nämane Candace abko kräke ni Etíope ye nämäne ngwian ngibiare’ (Hech. 8:27). Kä ye ngwane, kä Sudán aune kä Egipto mötörikri ye nämäne keteitibe kädeka nämäne Etiopía. Bäkänä ni etíope yekwe ñan dikakabare jondron keteitibe te ni raba niere, ñobätä ñan aune tribe nämäne erere kwe ngwandre kwrä kwrä jabe nämäne näin mente yebätä. Siklo kena yete carro o jondron mada mada te nitre ngwankäre. Keteiti ye abokän kareta, llanta nämäne kräbäkä aune nämäne jue mikani jökrä. Tärä keteiti tä kukwe mike gare Bibliabätä käkwe kukwe ne mikani gare: “carro yete jondron ngwan nämäne bäri, ni raba nain bäri kwin te aune raba nain bäri mente” (Acts—An Exegetical Commentary).

Ni etíope ye nämäne ñäke kukwebätä ngwane Felipe nikani ken. Kukwe ne mikata gare: “Ye erere bkänä, Felipekwe krötabare jötrö kareta ken angwane, tärä Isaías btä ni Etiopiabo nämane ñäke, ye kukwei jarabare Felipeye” (Hech. 8:30). Kareta ye ñan sribebare niakäre jötrö. Ñakare aune nämäne niken bätäre aune namani bäri nuäre ni etíope ye kräke ñäkäkäre, aisete namani bäri nuäre Felipe kräke rökrakäre ken.

Ni etíope ye käkwe “Felipe käräbare täketbe karetate” jabe (Hech. 8:31). Carro niakäre yete nitre carro ngwanka ye nämäne nemen nünaninkä krö. Akwa kareta nitre ngwankäre yete kä nämäne täkärä nitre ie, aisete ni eunuco aune Felipe ye nämäne täketubu tibien.

Hechos kapitulo 8 tä kukwe mike gare aune kukwe kira kwani ye medenbätä, Felipe ñan üai sribe niena täräkwatabätä nain carro rukäre te o carro niakäre yete ñakäre aune kareta bäri kri te.