1. ¿Ni kökanintari ye köböire dre dre kwin raba nemen nikwe?

JESUKRISTO ni kökanintari ye köböire kukwe kwin keta kabre raba nemen nikwe. Ñodre, ni kökanintari ye köböire Adán monsoitre jökrä tä kukwe metre tarere ye rabaita Ngöbö ngäbriänkä ye ngätäite (recuadro “¿Dre gärätä?” mikadre ñärärä). Aune ni kökanintari ye köböire ni raba nüne kärekäre kä jutobiti arato. Akwa ni kökanintari ye köböire kukwe ye ñan aibe rabai bare. Ñakare aune ni kökanintari ye köböire kukwe meden meden ütiäte krubäte rabadre bare angeletre aune ni Kä tibienbätä jökrä kräke ye mikai nemen bare (Hebreos 1:8, 9).

2. a) ¿Kukwe meden meden ütiäte mikadre nemen bare kä kwinbiti aune Kä tibienbätä abokän mikata gare Orasion padrenuestro yete? (Üai bämikani kena mikadre ñärärä). b) ¿Kukwe ja tötikara nekänti nibike dre dre mike gare jai?

² Kä namanina kubu Jesús murie ketadre ye känenkri, nitre ja tötikaka kwe oradre ño ye driebare kwe ietre. Niebare kwe: “Nun Rün kä kwinbiti, mä kä ye mikadre deme. Gobran mäkwe jatadre. Mä töi ye erere rabadre bare, tä nemen bare kä kwinbätä ye kwrere, rabadre bare kä tibienbätä arato” (Mateo 6:9, 10, TNM). Ni kökanintari ye köböire  kukwe ketamä ne mikai nemen bare ño ye nibike mike gare jai kukwe ja tötikara nekänti: 1) Jehová kä ye mika raba ño deme, 2) Gobran Ngöbökwe dre dre kwin mikai nemen bare aune 3) Ngöbö töi mikai nemen bare ño.

3. a) ¿Ngöbö kä nieta ye dre gärätä? b) ¿Satanakwe Jehová kä ye mikani ño käme?

³ Ngöbö kä ye mikadre deme ye Jesukwe ribebare kena orasion padrenuestro yete. Ye abokän, Ngöbö kä ye deme yebätä mikadre ütiäte jai ribebare kwe. Ngöbö kä nieta ye Jehová gärätä aune niara ye abokän ño ye tä mike gare. Niara ye Ni bäri dite aune töi kwin krubäte. Jesukwe Jehová kädekani “Tata, [...] deme” (Juan 17:11). Jehová ye deme, yebätä tä jondron jökrä nuainne ye deme aune kukwe kwe ye deme arato. Akwa ni kä tibienbätä ie kukwe biandre nuaindre abokän tä gare Ngöböi ye rüere Satana ñäkäbare tare krubäte jardín Edén yete. Kukwe ngwarbe niebare kwe Jehová yebätä aune niara kä ye mikani käme kwe (Génesis 3:1-5).

4. ¿Jehová kä ye mikani ño deme Jesukwe?

⁴ Satanakwe Jehová kä ye mikani käme, akwa Jesús nämene Jehová kä ye tarere. Ye medenbätä ja di ngwani kwe Jehová kä ye mikakäre deme (Juan 17:25, 26). ¿Jehová kä ye mikani ño deme kwe? Kukwe nuainbare kwe aune kukwe driebare kwe yebiti mikani deme kwe. Ye köböire, Jesukwe nitre mada dimikani mike nüke gare jai Jehová kukwe ükaninte ye metre aune Jehová tä kukwe jökrä ribere nuaindre nie ye ni dimikakäre (ñäkädre Salmo 40:9, 10 yebätä). * Satana köböite Jesús murie ketani, akwa yebiti ta Jesukwe ja ngwani metre Ngöböi. Niarakwe bämikani ni töi metre ye raba Jehová mike täte metre.

5. ¿Ni raba Jehová kä ye mike ño deme?

⁵ Aune ni, ¿Jehová kä ye tare nikwe ye nita bämike ño? Nita ja ngwen ño yebiti nita bämike. Jehová tö ni tuai ja ngwen deme (ñäkädre 1 Pedro 1:15, 16 yebätä). Ye medenbätä, nita niara aibe mike täte ja brukwä tätebiti. Aune ja mikata ni rüere, akwa yebiti ta nita ja di ngwen nüne Jehová tä driere nie ye ererebätä. Kukwe ükaninte Jehovakwe ye nita mike täte angwane, nita niara käikitekä (Mateo 5:14-16). Ne madakäre, kukwe biani kwe ye kwin aune Satana ni ngökö ye nita bämike arato. Erametre, ni ngite yebätä nita ja mike ngite. Akwa, nita ja töi kwite kukwe blo yebätä aune kukwe meden tä Jehová kä ye mike käme ye nita ja di ngwen ñaka nuainne (Salmo 79:9).

6. Ni ngite akwa, ¿ñobätä Jehová raba ni kädeke ni kukwe metre nuainkä?

⁶ Ni dianinkä nänkäre kä kwinbiti o ni abokän “obeja mda mda”, akwa nita tödeke ni kökanintari yei angwane, Jehová tä ngite juen ta nibiti. Nire nire tä ja denkä mento niara kräke ye niarata kain ngäbiti ni niara mikaka täte erere. Niara tä nitre kristiano dianinkä nänkäre kä kwinbiti ye kädeke ni kukwe metre nuainkä aune tä kain ngäbiti niara ngäbriänkä erere. Aune tä “obeja mda mda” ye kädeke ni kukwe metre nuainkä aune tä kain ngäbiti ja ketamuko erere arato (Juan 10:16; Romanos 5:1, 2; Santiago 2:21-25). Ni kökanintari ye köböire, kä nengwane ni raba ja kete kwin ni Rün Jehová yebe aune niara kä ye mike deme arato.

7. ¿Ni kökanintari ye köböire Gobran Ngöbökwe dre dre kwin mikai nemen bare?

⁷ Orasion padrenuestro yete, Jesukwe niebare: “Gobran mäkwe jatadre”. ¿Ni kökanintari ye köböire Gobran Ngöbökwe dre dre mikai nemen bare? Jesús aune nitre 144,000 dianinkä ni Kä tibienbätä ngätäite ye tä Gobran Ngöbökwe yete ye gare nie. Ni kökanintari ye köböire nitre dianinkä ye gakröta nünankäre kä kwinbiti (Apocalipsis  5:9, 10; 14:1). Yete niaratre rabai reire aune sacerdotere bätä kä 1,000 te gobrandi kwetre Jesube Kä tibienbiti. Kä ye näire, Ngöbökwe gobran kwe yebiti Kä tibien kwitai bä nuäre aune nitre jökrä dimikai kwe nemen töi metre. Mrä mada, angeletre aune ni Kä tibienbätä Jehová mikaka täte ye rabai keteitibe ni ja mräkäre ye kwrere (Apocalipsis 5:13; 20:6). Jesukwe Satana gaite aune Satana köböite kukwe tare tä nemen bare ye jökrä diainkä kwe (Génesis 3:15).

8. a) ¿Gobran Ngöbökwe ye ütiäte krubäte ye Jesukwe nitre ja tötikaka kwe dimikani ño mike nüke gare jai? b) ¿Nita ja ngwen metre Gobran Ngöbökwe ie ye nita bämike ño?

⁸ Gobran Ngöbökwe ye ütiäte krubäte ye Jesukwe nitre ja tötikaka kwe dimikani mike nüke gare jai. ¿Nuainbare ño kwe? Niarakwe ja ngökani ñöte ye bätäräbe, nikani “kukwe kwin Ngöbö gobrain käibätä” ye driere kä ketare ketare känti (Lucas 4:43, Ngöbö Täräe [NGT], tärä okwä ükaninte). Ne madakäre, Jesukwe niebare nitre ja tötikaka kwe yei, niaratre rabadre niken “kä jökräbti temen” kukwe mike gare niarabätä nitre madai (Hechos 1:6-8). Kä nengwane, kukwe drieta ye köböire ni kökanintari yebätä kukwe raba nemen gare nitre ie aune niaratre raba nüne Gobran Ngöbökwe rabai gobrane yete. Nita nitre dianinkä nänkäre kä kwinbiti dimike kukwe kwin ye driere kä jökräbiti tibien angwane, nita ja ngwen metre Gobran Ngöbökwe yei bämikata nikwe (Mateo 24:14; 25:40).

9. Ngöbö töita ño ni kä tibienbätä kräke abokän rabai bare metre, ¿ye ñobätä ni raba tö ngwen ie?

⁹ Orasion padrenuestro yete, Jesukwe niebare arato: “Mä töi ye erere rabadre bare”. ¿Kukwe yebiti dre gäräbare kwe? Dre rabai bare nieta Jehovakwe ye ngwane, erere tä nemen bare (Isaías 55:11). Satana ja mikani Jehová rüere yekwe ñaka Jehová töi ye kwitani. ¿Ngöbö töi nämene ño Kä tibien kräke? Adán aune Eva monsoitre töi metre ye rabadre monso ngübare kwati nünankäre kä jökräbiti tibien ie niara tö namani (Génesis 1:28). Adán aune Eva ñaka monso ngübadre krütadre ye känenkri akräke, Ngöbö tö namani Adán aune Eva tuai monso ngübare kwati nünankäre Kä jökräbiti tibien ye ñaka rabadre bare. Yebätä Jehovakwe niaratre tuanimetre monso ngübare. Ni kökanintari ye köböire nitre jökrä tä tödeke Ngöböi ye töi rabai metre aune nünain kärekäre kwetre. Jehová tä ni tarere aune niara tö ni tuai nüne kwin tö namani kena ie ye erere.

10. ¿Ni kökanintari ye köböire Ngöbökwe dre nuaindi nitre krütanina ye kräke?

¹⁰ Nitre kwati krubäte krütanina yei Jehová ñaka namani gare. ¿Ngöbökwe dre nuaindi niaratre kräke? Ngöbö tö ni tuai nüne jankunu, yebätä nitre krütanina gaikröta kwe. Ni kökanintari ye köböire nitre krütanina ye gaikröta. Nitre krütanina ye gaikröta angwane, kä rabai ietre Jehová mikakäre gare jai aune nünankäre kärekäre (Hechos 24:15). Jehová ye ja nire bianka, yebätä niara rabai nitre rükaita nire ye jökrä Rüne (Salmo 36:9). Yebätä Jesukwe niebare orasion padrenuestro yete, Jehová ye ni Rün “kä kwinbiti” (Mateo 6:9, TNM). Jehovakwe Jesús kädekani nitre krütanina ye gakrökäreta. Ye medenbätä Jesukwe niebare: “Ti abrä ni mikakata nire, aune ja nire bianka” (Juan 6:40, 44; 11:25, NGT).

11. ¿Ngöbö töita ño nitre “kwati krübäte” ye kräke?

¹¹ Jesukwe niebare arato: “Nire nire käta Ngöbö kukwei mike täte, ni ye abko ti etba tikwe, ti ngwai tikwe amne ti meye tikwe” (Marcos 3:35). Nitre juta jene jene te, kwata bä jene jene aune blite kukwe jene jenebiti yekwe Ngöbö mikadre täte ie niara tö. Biblia tä niere nitre ye “ni [...] kwati krübäte [...] ñan [...] tanre jire chi”. Niaratre tä tödeke ni kökanintari yei aune tö Ngöbö mikai täte. Tätre niara käikitekä aune tätre niere arato: “¡Ngöböta täkänintbe kürä gobrankräbti amne ni Kordero kwrere, ye aibe köböire nita nebe dianintari jökrä!” (Apocalipsis 7:9, 10).

12. ¿Orasion padrenuestro ye tä dre dre driere nie Jehová töita ño ni kä tibienbätä kräke yebätä?

¹² Orasion padrenuestro ye tä kukwe keta  kabre driere nie Jehová aune niara töita ño ni kä tibienbätä kräke yebätä. Kena, nikwe ja di ngwandre täte Ngöbö kä ye mikakäre deme aune mikakäre ütiäte jai (Isaías 8:13). Ni kökanintari ye köböire ni raba nemen kwäre aune Ngöbö kä ye mika raba ütiäte. Ye medenbätä, Jesús kä ye abokän “Jehová Ye Ni Mikaka Kwäre” meden gärätä. Ketebukäre, ni kökanintari ye köböire Jehovakwe kukwe keta kabre mikai nemen bare ni niara mikaka täte kräke Gobran kwe yebiti. Aune ketamäkäre, Jehová töita ño mikadre nemen bare ye ketabätä ñaka raba jire (Salmo 135:6; Isaías 46:9, 10).

13. ¿Ñobätä nita ja ngökö ñöte?

¹³ Nita ja denkä mento Jehová kräke aune nita ja ngökö ñöte, yebiti ni kökanintari yebätä nita debe bien ye bämikata nikwe. Ye köböire nita tödeke ni kökanintari yei aune “ni Dänkienta [“Jehová”, TNM] ni bkäne” ye nita bämike (Romanos 14:8). Ne madakäre, nita ja ngökö ñöte yebiti niarakwe “ni töi mikadre merebe” nita ribere ie (1 Pedro 3:21). Aune ni kökanintari ye köböire kukwe kwin raba nemen nikwe ye Ngöböta bien nie. Ye medenbätä niarata kukwe käbämike nie ye jökrä biain kwe nie yei nita tö ngwen (Romanos 8:32).

14. ¿Ñobätä nikwe nitre mada taredre nieta Ngöbökwe nie?

¹⁴ Jehová tä kukwe jökrä nuainne ni tare kwe yebätä. Nire nire tä niara mike täte yekwe ja ngwandre niara erere aune ja taredre kwärikwäri kwetre ie niara tö (1 Juan 4:8-11, TNM). Nita nitre mada tarere angwane, nita mike gare metre ni tö ja tuai ni “Rün tä kä käinbti” ye ngäbriänkäre (Mateo 5:43-48). Bibliabätä kukwe bäri ütiäte biani nuaindre nie ye abokän nikwe Jehová taredre. Aune ketebukäre abokän nikwe nitre mada taredre (Mateo 22:37-40, TNM). Nita blite kukwe kwin Gobran Ngöbökwe yebätä nitre ben ye ngwane, nita bämike niaratre tare nikwe. Nikwe nitre mada taredre, metrere ja mräkätre aune ja ngwaitre ye nikwe taredre nieta Ngöbökwe nie ye nita mike täte angwane, nita niara tarere “metre” (1 Juan 4:12, 20).

15. a) ¿Kä nengwane Jehová tä kukwe meden meden kwin mike nemen bare ni kräke? b) ¿Aune ja känenkäre kukwe meden meden kwin mikai nemen bare kwe ni kräke?

¹⁵ Ni kökanintari yei nita tödeke angwane, Jehová raba ngite nikwe “ye d[en]kä jire jökrä  mento” nibätä tä mike gare metre nie. Ye abokän niara raba ngite juen täte ta nibiti ye meden gärätä (ñäkädre Hechos 3:19-21 yebätä). Nikwe miri gare käne jai ye erere, ni kökanintari ye köböire Jehová tä ni kä tibienbätä ye ruäre denkä ja ngäbriänkäre nünankäre kä kwinbiti. Nitre ye abokän nitre dianinkä nänkäre kä kwinbiti (Romanos 8:15-17). Ne madakäre, ni kristiano tä “obeja mda mda” ngätäite ye Jehová tä nübaire ja mikakäre niara ngäbriänkäre Kä tibienbätä. Niaratre töi rabai metre ye ngwane nuaite mrä. Niaratre ja ngwain metre Jehovai angwane, Jehovakwe niaratre diainkä rabakäre niara ngäbriänkare arato (Romanos 8:20, 21; Apocalipsis 20:7-9). Käre Jehovakwe ngäbriänkä jökrä taredi. Aune ni kökanintari ye köböire, Ngöbökwe kukwe kwin mikai nemen bare kärekäre ni kräke (Hebreos 9:12, TNM). Jehovakwe jondron ütiäte krubäte ye biani nie aune dianka ñaka raba jire nikän.

16. ¿Ni kökanintari ye tä ni mike ño kwäre?

¹⁶ Nita ja mike ngite yebätä nikwe ja töi kwitai angwane, ni rabadre Jehová ngäbriänkä ngätäite yebätä Diablukwe ñaka ni ketaibätä jire. Jesukwe ja nire biani ni ütiäre “batibe amne kärekäre”. Ye abokän ñaka ni kökaitarita bobukäre ye meden gärätä (Hebreos 9:24-26). Adán köböite nita krüte, akwa Jesús ja nire biani ni ütiäre ye köböire nüna kärekäre rabai nikwe. Ni kökanintari ye köböire ni raba nemen kwäre nitre gobrainta Satanakwe ye kisete aune ni ñaka raba gata jürä ngwen jabätä (Hebreos 2:14, 15).

17. Jehová tä ni tarere krubäte yebätä nita töbike angwane, ¿jata nemen ruin ño nie?

¹⁷ Jehová tä kukwe käbämike nie abokän rabai bare metre yei nikwe tö ngwandre. Kukwe ükaninte jondron jökrä sribebare kräke ye ñaka nikwite jire bä jene, ye erere Jehovakwe ñaka ja töi kwitai jire kukwe käbämikani kwe yebätä. Niarakwe ñaka ni ngökai jire (Malaquías 3:6). Jehová ñaka tä ja nire ye aibe bien nie ñakare aune tä ni tarere arato. “Ngöböta ni tarere era bkänä, yebti nita tödeke amne nita mike era. Ngöbö abko ni jökrä tarekä” (1 Juan 4:16). Jehová tä kukwe käbämike ye käre tä mike nemen bare, yebätä gwäune Kä tibien jökrä kwitai bä nuäre kwe. Ni jökrä ja ngwain Jehová erere aune nikwe ja taredi kwärikwäri. Ye ngwane, angeletre aune ni Ngöbö mikaka täte Kä tibienbätä ye jökrä käkwe Ngöbö käikitaikä aune niei kwetre: “Ni jökrä raba Ngöbö demaine amne käikitekä amne, Ngöbö aibe töbtä kri amne ni jökrä raba kuin niere kärekäre ie. Erere arato, Ngöbö aibe mika ütiäte jae amne niara aibe di kri jändrän jökrä bti ta. [...] kärekäre [...] ¡Amen!” (Apocalipsis 7:12).