¿Nireta juta Ngöbökwe jie ngwen kä nengwane?
“Nire nire käkwe ji ngwiani mun käne, [...] ye abko munkwe ngwianta töre jae” (HEBREOS 13:7).
KANTIKO: 34, 43
1, 2. Jesús nikani kä kwinbiti ye bitikäre, ¿nitre apóstol namani dre ngwentari jai raba ruin nie?
NITRE apóstol nämene ngutuä Olivo yekänti dirikä aune ja ketamuko kwetre Jesús yebe. Batibe, Jesús jatani niken ño kä kwinbiti aune nikani nekä mutate ye tuani kwetre (Hechos 1:9, 10). Jesukwe niaratre tötikani, dimikani aune jie ngwani kä kubu näre te. Akwa Jesús ñaka namanina bentre yebätä, ¿dre nuainbare kwetre?
2 Jesús rikadre kä kwinbiti ye känenkri, niebare kwe nitre ja tötikaka kwe yei: “Mun [...] näin kukwe kuin tibtä ye niere juta Jerusalénte amne kä Judeate amne kä Samariate. Erere arato, mun näin kukwe kuin ye niere kä jökräbti temen” (Hechos 1:8). ¿Sribi ye nuaindre ño kwetre? Üai deme Ngöbökwe niaratre dimikai ye Jesukwe käbämikani ietre (Hechos 1:5). Akwa, ¿nirekwe niaratre jie ngwandre aune kukwe ükadrete kukwe driekäre kä jökräbiti tibien? Kirabe sete Jehovakwe nitre kä nebätä yebiti nitre israelita jie ngwani ye nämene gare nitre apóstol ie. Yebätä Jehovakwe ni mada kädekai niaratre jie ngwankäre o ñakare ye namanintre ngwentari jai raba ruin nie.
3. a) Jesús nikani kä kwinbiti ye bätäräbe, ¿nitre apóstol ja ngwani metre Ngöböi ye kukwe meden ütiäte diani nuaindre jai? b) ¿Kukwe meden meden ngwantarita abokän nibike mike gare jai kukwe ja tötikara nekänti?
Hechos 1:15-26). ¿Ñobätä niaratre kukwe diani nuaindre jai ye namani ütiäte krubäte niaratre aune Jehová kräke? Ñobätä ñan aune nitre apóstol tätre 12 ye ütiäte nükani gare ietre * (nota mikadre ñärärä). Jesukwe nitre apóstol ye dianinkä aune tötikani sribi ütiäte krubäte nuainkäre juta Ngöbökwe yete. ¿Ye sribi meden? ¿Jehová aune Jesús niaratre dimikani ño sribi ye nuainkäre? ¿Nitre braibe tärä kä nengwane abokän tä sribi ye kwrere nuainne? Aune nitre tä juta Ngöbökwe jie ngwen, metrere “ni klabore ie tö ngwan raba bätä töbätä”, ¿ye ñokänti ni raba ngwen törö jai? (Mateo 24:45, TNM; Hebreos 13:7). Ani mike gare jai.
3 Jesús nikani kä kwinbiti ye bätäräbe, nitre ja tötikaka kwe ja tötikabare Kukwe Ngöbökwe yebätä, ja di ribebare kwetre Ngöböi aune Matías dianinkä kwetre Judás Iscariote ye täte. Ye köböire nitre apóstol namaninta 12 (JESÚS TÄ NITRE BRAIBE KONKREKASION JÖKRÄ NGÜBABITIKÄ YE JIE NGWEN
4. ¿Sribi meden meden nämene nitre apóstol aune nitre mada umbre ji ngwanka Jerusalén ye kisete?
4 Pentecostés kä 33 yete, nitre apóstol jatani konkrekasion kristiano ye jie ngwen. Biblia tä niere, “nitre ni jätäbti iti [...], ben Pedro namani nünaninkä krö” aune kukwe metre raba nitre mike kwäre ye driebare kwe nitre kwati krubäte yei (Hechos 2:14, 15). Nitre ye kwati krubäte ja mikani kristiano. Aune ye bitikäre, nitre ja mikani kristiano ye namani “kukwe diribare nitre Jesu kukwei ngwiankakwe, yebtä [...] ja kite köbö kwatirekwatire” (Hechos 2:42). Nitre apóstol ye nämene ngwian konkrekasion yekwe ngübarebiti (Hechos 4:34, 35). Ne madakäre, nämenentre juta Ngöbökwe ye tötike aune orare niaratre kräke. Ñodre, niaratre niebare: “Nun abko käkwe blitadi janknu Ngöböbe amne nunkwe Ngöbö kukwei kuin [...] diridi janknu arato” (Hechos 6:4). Nitre apóstol nämene nitre kristiano ie kukwe gare krubäte ye juen kukwe drie ñaka jire yekänti kukwe driere (Hechos 8:14, 15). Ye bitikäre, nitre mada umbre braibe dianinkä nänkäre kä kwinbiti käkwe nitre apóstol dimikani konkrekasion jene jene ngübarebiti. Niaratre ye jökrä namani nitre braibe konkrekasion jökrä ngübabitikä abokän nämene konkrekasion jene jene ye jie ngwen (Hechos 15:2).
Jehová nämene nitre braibe konkrekasion jökrä ngübabitikä jie ngwen Jesús yebiti ye nämene gare kwin nitre kristiano siklo kena yei
5, 6. a) ¿Üai deme nitre braibe konkrekasion jökrä ngübabitikä ye dimikani ño? (Üai bämikani kena mikadre ñärärä). b) ¿Angeletre nitre braibe konkrekasion jökrä ngübabitikä ye dimikani ño? c) ¿Ngöbö Kukwei nitre braibe konkrekasion jökrä ngübabitikä ye jie ngwani ño?
5 Jehová nämene nitre braibe konkrekasion jökrä ngübabitikä ye jie ngwen Jesús yebiti ye nämene gare kwin nitre kristiano siklo kena yei. ¿Ñobätä ye nämene gare kwin ietre? Kena, ñobätä ñan aune üai deme nämene nitre braibe konkrekasion jökrä ngübabitikä ye dimike (Juan 16:13). Erametre üai deme ye namani nitre dianinkä nänkäre kä kwinbiti ye jökräbätä, akwa metrere üai deme yekwe nitre apóstol aune nitre umbre ji ngwanka Jerusalén ye dimikani konkrekasion jene jene ye jie ngwankäre kwin. Ñodre, kä 49 yete üai deme käkwe nitre braibe konkrekasion jökrä ngübabitikä ye dimikani kukwe ükete ni tarei kwata tikadrekä o ñakare yebätä. Nitre braibe konkrekasion jökrä ngübabitikä kukwe ükaninte nuaindre ye konkrekasion jene jene käkwe mikani täte yebätä “namanintre [...] tödeke bäri [...] amne, köbö kwatirekwatire ni kwati mda namani Jesu kukwei kaen ngäbti” (Hechos 16:4, 5). Ni tarei kwata tikadrekä o ñakare yebätä kukwe ükaninte abokän juani konkrekasion jene jene ie, ye tä mike gare nitre braibe konkrekasion jökrä ngübabitikä yebätä üai deme Ngöbökwe nämene aune niaratre nämene ni mada tarere bätä nämene tödeke (Hechos 15:11, 25-29, TNM; Gálatas 5:22, 23).
6 Ketebukäre, ñobätä ñan aune angeletre nämene nitre braibe konkrekasion jökrä ngübabitikä ye dimike. Ñodre, ni kädeka nämene Cornelio ye rabadre apóstol Pedro känene ye angel iti niebare ie. Cornelio ye ñaka nämene ni judío aune tarei kwata ñaka nämene tikaninkä. Pedro kukwe driebare Cornelio aune mräkätre kwe ie ye bitikäre, niaratre brare ye tarei kwata ñaka nämene tikaninkä, akwa üai deme namani bätätre. Ye erere Cornelio namani ni kristiano kena abokän ñaka judío aune tarei kwata ñaka nämene tikaninkä. Nitre apóstol aune ja mräkätre bätä ja ngwaitre mada ie kukwe ye namani gare angwane, Ngöbö tö namani drei ye kani ngäbiti kwetre aune nitre ñaka judío bätä tarei kwata ñaka nämene tikaninkä ye kani ngäbiti kwetre töi kwinbiti konkrekasionte (Hechos 11:13-18). Ye tä mike gare, nitre braibe konkrekasion jökrä ngübabitikä nämene kukwe drie jie ngwen ye angeletre nämene dimike (Hechos 5:19, 20). Ketamäkäre, ñobätä ñan aune Ngöbö Kukwei nämene nitre braibe konkrekasion jökrä ngübabitikä ye jie ngwen. Niaratre nämene käre ja tuenmetre jie ngwandre Ngöbö Kukwei yei, kukwe diankäre nuaindre jai kukwe ruäre mika nämene täte yebätä aune konkrekasion jene jene jie ngwankäre (Hechos 1:20-22; 15:15-20).
7. Jesús nämene nitre kristiano siklo kena jie ngwen, ¿ye ñobätä ni raba niere?
7 Nitre braibe konkrekasion jökrä ngübabitikä ye nämene kädekani ji ngwankäre konkrekasionte, akwa Jesukristo nämene niaratre Jie Ngwen ye nämene gare kwin ietre. ¿Ñobätä ye gare nie? Ñobätä ñan aune apóstol Pablo niebare, Kristo nämene nitre ruäre kädeke “Jesu kukwei ngwianka”. Aune Kristo ye tä konkrekasion jie ngwen niebare kwe arato (Efesios 4:11, 15). Ne madakäre, nitre nänkä Jesús jiebiti ye ñaka rabadre kädekani ni apóstol erere, ñakare aune kädekadre ni kristiano erere yei Ngöbö tö namani (Hechos 11:26). Ütiäte krubäte nitre apóstol aune nitre mada umbre ji ngwanka konkrekasionte nämene dre driere ye mikadre täte ye nämene gare Pablo ie, ñobätä ñan aune niaratre nämene ja tuenmetre jie ngwandre Ngöbö Kukwei yei. Akwa yebiti ta Pablokwe niebare: “Kristo tä ji dokwäte ni brare jökrä kräke”. Pablo kukwe ye niebare nitre braibe konkrekasion jökrä ngübabitikä ye itire itire kräke arato. Aune ye bitikäre Pablo niebare: “Kukwe rükadre gare metre munye, ie ti tö abko krörö: Ngöbö abko tä ji dokwäte Kristo kräke” (1 Corintios 11:2, 3). Erametre Jehovakwe Monso kwe, Jesukristo ye kädekani konkrekasion jene jene jie ngwankäre.
“SRIBI NE ÑAKA NI KÄ NEBÄTÄ YEKWE”
8, 9. ¿Ja mräkä Russell sribi meden ütiäte nuainbare?
8 Kä 1870 yete ja känenkäre, Charles Taze Russell aune ja ketamuko ruäre kwe ye jatani ja di ngwen Ngöbö mike täte Biblia tä driere ye erere. Niaratre tö namani nitre mada tuai ye erere nuainne aune tö namani nitre blite kukwe madabiti ye tuai nuainne arato. Ye kräke Sociedad Zion’s Watch Tower Tract Society ye ükaninte kwetre kä 1884 yete. Ja mräkä Russell namani ji ngwen corporación yete * (nota mikadre ñärärä). Niara nämene ja tötike kwin Bibliabätä, ye köböire kä jürä ñaka namanibätä niekäre nitre madai, nitre Iglesiate nämene kukwe ruäre driere ye ñaka nämene Bibliabätä. Ñodre: Ni Nimä Ngöböre Itibe mika nämene täte aune ni nire tä krüte ye üaita nemente nire drie nämene ye ñaka metre niebare kwe. Ja mräkä Russell ie nükani gare arato, Kristo ñaka rükaita metre aune kä 1914 yete “nitre ñakare israelitare, kräke Ngöbökwe köbö kitani nuäi” ye rikai ta (Lucas 21:24). Niarakwe die kwe, kä nämene ie aune ngwian kwe yebiti kukwe metre driebare nitre ie. Erametre, Jehová aune Jesús niara mikani konkrekasion jie ngwen köbö ütiäte krubäte yete.
9 Nitre mada ja mräkä Russell mikadre ütiäte jai yei ñaka tö namani. Kä 1896 yete tikabare kwe, nitre mada käkwe niara aune ja mräkätre nämene kädekani mikadre ütiäte jai yei niaratre ñaka tö namani. Arato nitre mada niaratre kädekadre ni ütiäte kwrere aune nitre ruäre rabadre niaratre kä ye ngwen jabätä yei ñaka tö namani. Kä nikani ruäre ta ye bitikäre, ja mräkä Russell käkwe niebare: “Sribi ne ñaka ni kä nebätä yekwe”.
“Ni klabore ie tö ngwan raba bätä töbätä” ye Nitre Braibe Konkrekasion Jökrä Ngübabitikä, niaratre dianinkä nänkäre kä kwinbiti arato
10. a) ¿Ñongwane Jesukwe “nitre braibe konkrekasion jökrä ngübabitikä” ye kädekani? b) Nitre Braibe Konkrekasion Jökrä Ngübabitikä ye ñaka nämene sribi ja erebe nuainne Sociedad Watch Tower yebe ye mikani gare ño metre ye mä raba mike gare.
10 Ja mräkä Russell krütani ye bitikäre kä nikani komä ta ye ngwane, kä 1919 yete Jesukwe “ni klabore ie tö ngwan raba bätä töbätä” ye kädekani. ¿Ñokäre kädekani kwe? Ni nänkä niara jiebiti ye “bukakäre kätä nüke ye näre te” (Mateo 24:45, TNM). Kä ye ngwane, nitre braibe nänkä kä kwinbiti nämene sribire oficina bäri kri Brooklyn (Nueva York) yekänti, ye namanina mrö ja üaire bien nitre nänkä Jesús jiebiti yei. “Nitre braibe konkrekasion jökrä ngübabitikä” nieta ye tika jatani tärä aune täräkwata nikwe yebätä kä 1940 yete ja känenkäre. Kä ye ngwane, “nitre braibe konkrekasion jökrä ngübabitikä” ye nitre ji ngwanka Watch Tower Bible and Tract Society yete nie nämene. Akwa kä 1971 yete mikani gare metre, Nitre Braibe Konkrekasion Jökrä Ngübabitikä ye ñaka nämene sribi ja erebe nuainne Sociedad Watch Tower yebe. Ñobätä ñan aune kukwe ükadrete gobranbe ye aibe Sociedad Watch Tower nämene nuainne. Yete ja känenkäre, ja mräkätre dianinkä nänkäre kä kwinbiti ye ruäre ñaka nämene ji ngwen Sociedad yete ye nübai jatani rabakäre Nitre Braibe Konkrekasion Jökrä Ngübabitikä. Bitinkä, Sociedad Watch Tower aune corporación mada mada yebiti juta Ngöbökwe tä sribi Ngöbökwe nuainne yete ja mräkätre “obeja mda mda” kädeka jatani ji ngwankäre. Ye köböire, Nitre Braibe Konkrekasion Jökrä Ngübabitikä ye raba ja töi mike kwatibe juta Ngöbökwe jie ngwen aune mrö ja üaire bien ietre (Juan 10:16; Hechos 6:4). Täräkwata Ni Mikaka Mokre 15 julio 2013 käkwe mikani gare, “ni klabore ie tö ngwan raba bätä töbätä” ye Nitre Braibe Konkrekasion Jökrä Ngübabitikä, niaratre dianinkä nänkäre kä kwinbiti arato.
Nitre braibe konkrekasion jökrä ngübabitikä kä 1950 yete.
11. ¿Nitre Braibe Konkrekasion Jökrä Ngübabitikä ye tätre gwairebe kukwe ükete ño nuaindre jai?
11 Nitre Braibe Konkrekasion Jökrä Ngübabitikä tätre gätäre jabe bämän kratire kratire ye ngwane, tätre gwairebe kukwe ütiäte ükete nuaindre jai. Gätä nuainta kwetre bämän kratire kratire ye tä niaratre dimike blite kwin jabe aune nemen keteitibe (Proverbios 20:18). Nitre Braibe Konkrekasion Jökrä Ngübabitikä ye iti ñaka bäri ütiäte mada ye kräke. Ye medenbätä, Nitre Braibe Konkrekasion Jökrä Ngübabitikä ye ñaka itibe tä kä kwatire kwatire te gätä nuainta bämän kratire kratire kwetre ye jie ngwen (1 Pedro 5:1). Aune ye erere nitre keta ti ükaninte kwetre ye tätre sribire jabe arato. Nitre Braibe Konkrekasion Jökrä Ngübabitikä ye iti ie ja ñaka ruin ni ji ngwanka bäri kri ja mräkätre mada ye kräke. Niaratre itire itire ye tä “nitre gwi” nieta ye ngätäite arato (recuadro “¿Dre gärätä?” mikadre ñärärä). Aisete ni klabore ie tö ngwan raba ye tä mrö ja üaire bien niaratre itire itire ie aune tätre ja tuenmetre jie ngwandre ni klabore yei.
Kä 1919 yete ni klabore ie tö ngwan raba ye kädekani aune yete ja känenkäre tä mrö ja üaire bien juta Ngöbökwe ie. (Párrafo 10 aune 11 mikadre ñärärä).
“¿NIRE ABOKÄN ERAMETRE, NI KLABORE IE TÖ NGWAN RABA BÄTÄ TÖBÄTÄ?”
12. ¿Kukwe meden meden ngwantarita abokän nibike mike gare jai ja känenkäre?
12 Nitre Braibe Konkrekasion Jökrä Ngübabitikä yei Ngöbö ñaka kukwe mike tuare metre aune niaratre ye töi ñaka metre. Aisete tätre kukwe Bibliabätä mike gare o tätre kukwe niere nuaindre ye ngwane, ruäre ngwane ñaka raba mike gare kwin. Ñodre: Índice de las publicaciones Watch Tower yete kukwe ükaninte jatäri ye keteiti kädekata “Aclaración de creencias”. Kä 1870 yete ja känenkäre, kukwe Bibliabätä drieta abokän mikata gare bäri kwin ye tä ükaninte jatäri yete. Jesukwe niebare ni klabore ie tö ngwan raba yekwe mrö ja üaire kwin biain nie. Akwa, “ni klabore ie tö ngwan raba bätä töbätä” yebätä Jesús blitabare, ¿ye abokän nire? (Mateo 24:45, TNM). ¿Nitre Braibe Konkrekasion Jökrä Ngübabitikä ye abokän ni klabore ie tö ngwan raba nieta ye dre tä mike gare? Üai deme, angeletre aune Ngöbö Kukwei ye nitre braibe konkrekasion jökrä ngübabitikä siklo kena yete dimikani, ye erere tä nitre braibe kä nengwane dimike ño ye ani mike gare jai.
13. ¿Üai deme Nitre Braibe Konkrekasion Jökrä Ngübabitikä ye dimikanina ño?
13 Üai deme tä Nitre Braibe Konkrekasion Jökrä Ngübabitikä ye dimike. Kukwe Bibliabätä drieta ye ruäre ñaka nämene nüke gare kwin Nitre Braibe Konkrekasion Jökrä Ngübabitikä yei, akwa üai deme niaratre dimikanina mike nüke gare bäri kwin jai. Ñodre, párrafo käne yebätä “Aclaración de creencias” nieta yekänti kukwe tä ükaninte jatäri yebätä ani töbike. Ni kä tibienbätä yei “kukwe kaibe tiebe Ngöbökwe” ye ñaka raba nüke gare aune ñaka raba mike gare akwle (ñäkädre 1 Corintios 2:10 yebätä). Apóstol Pablo kukwe niebare ne erere Nitre Braibe Konkrekasion Jökrä Ngübabitikä töita: “Jändrän kuin biani nie Ngöbökwe, yebtä nunta blite. Ne ñan kukwe ükaninte ni töbtäkwe, btä nunkwe ja töitikani au, bti nunta blite jändrän Ngöbökwebtä, akwa Ngöbö Üai tä dre niere, ye erere nunta mike gare” (1 Corintios 2:13). Kä kwati krubäte te nitre kukwe ngwarbe driekä käkwe nitre ngökani kukwe ngwarbe yebiti aune ñaka nitre jie ngwani kwin kwetre kukwe ja üairebiti. Akwa, ¿ñobätä kä 1919 yete ja känenkäre kukwe Bibliabätä tä nüke gare bäri kwin? Ñobätä ñan aune Jehová tä ni dimike üai deme kwe yebiti.
14. Apocalipsis 14:6, 7 tä niere ye erere, ¿angeletre tä Nitre Braibe Konkrekasion Jökrä Ngübabitikä aune juta Ngöbökwe dimike ño?
14 Angeletre tä Nitre Braibe Konkrekasion Jökrä Ngübabitikä ye dimike. Nitre 8 millón biti bäri tä kukwe driere kä jökräbiti tibien ye kräke Nitre Braibe Konkrekasion Jökrä Ngübabitikä tä kukwe ükete, ye sribi kri krubäte tä niaratre kisete. ¿Ñobätä sribi nuainta ye tä nemen bare kwin krubäte? Kukwe keteitibätä tä nemen bare kwin ye abokän angeletre tä ni dimike sribi ye nuainbätä (ñäkädre Apocalipsis 14:6, 7 yebätä). Bä kabre, angeletre ja mräkätre aune ja ngwaitre ye jie ngwanina blitakäre ni iti käkwe krire ja di käräbare Ngöböi yebe * (nota mikadre ñärärä). Nitre tä ja mike ja mräkätre aune ja ngwaitre rüere yekänti kukwe Bibliabätä drieta aune mikata gare bäri. Angeletre tä ni dimike ye köböire sribi ye tä nemen bare kwin arato.
15. Ñobätä Nitre Braibe Konkrekasion Jökrä Ngübabitikä ye töi ñaka ja erebe nitre ji ngwanka kukwe ngwarbe yebätä ben, ye mä raba mike gare keteiti.
15 Ngöbö Kukwei tä Nitre Braibe Konkrekasion Jökrä Ngübabitikä ye jie ngwen (ñäkädre Juan 17:17 yebätä). Kä 1973 yete dre namani bare yebätä ani töbike. Kä yete täräkwata La Atalaya 15 octubre yebätä kukwe ne ngwanintari: “¿Nire nire jämi sö dua tuenmetre ye raba ja ngökö ñöte?”. Ñakare niebare täräkwata yebätä aune Biblia tä dre niere yebiti kukwe ye mikani gare. Ni iti ñaka sö dua tuenmetre ye ñobätä kitadrekä konkrekasionte ye mikakäre gare täräkwata yebätä texto keta kabre Bibliabätä kädriebare (1 Corintios 5:7; 2 Corintios 7:1). Täräkwata La Atalaya yebätä mikani gare arato kukwe ükateta nuaindre ye ñaka kite ni kä tibienbätä yekri, ñakare aune kite “Ngöbö yekri abokän mikata gare Kukwe kwe yebiti”. Nitre testiko Jehovakwe ye aibe tä ja tuenmetre jie ngwandre Ngöbö Kukwei yei. Ñaka nemen nuäre niaratre ruäre kräke akwa yebiti ta tätre ja tuenmetre jie ngwandre ie. Kä Estados Unidos yete kukwe keta kabre mikata täte yebätä tärä keteiti tä blite yekwe niebare bitinkä: “Nitre ji ngwanka kukwebätä ye tätre kukwe mikata täte kwetre ye tuinte käre ne kwe dre mikata täte bäri aune dre tuin bäri kwin nitre ie ye ererebätä tätre ükete”. Akwa dre tuin bäri kwin nitre kwati ie yebiti Nitre Braibe Konkrekasion Jökrä Ngübabitikä ye ñaka tä ja jie ngwen. Ñakare aune, tätre ja tuenmetre jie ngwandre Ngöbö Kukwei yei. Ye tä mike gare Jehová tä juta kwe jie ngwen.
“NIRE NIRE KÄKWE JI NGWIANI MUN KÄNE, [...] YE ABKO MUNKWE NGWIANTA TÖRE JAE”
16. ¿Kukwe medenbiti ni raba Nitre Braibe Konkrekasion Jökrä Ngübabitikä ye ngwen törö jai?
16 (Ñäkädre Hebreos 13:7 yebätä). Biblia tä niere nikwe “nitre [ni] jie ngwanka” ye ngwandre törö jai. Kukwe keteitibiti ni raba nuainne ye abokän nikwe oradre Nitre Braibe Konkrekasion Jökrä Ngübabitikä ye kräke (Efesios 6:18). Sribi keta kabre tä nuaindre ietre. Ñodre, niaratre tä mrö ja üaire bien nie, kukwe drieta kä jökräbiti tibien ye tätre jie ngwen aune ngwian bianta ja töi jeñebiti juta Ngöbökwe ie ye tätre ngübarebiti. Erametre, nikwe oradre käre ja mräkätre ye kräke tätre ribere jai.
17, 18. a) ¿Nita Nitre Braibe Konkrekasion Jökrä Ngübabitikä ye dimike ño? b) ¿Ñobätä ni rabadre ja di ngwen kukwe driere?
17 Arato Nitre Braibe Konkrekasion Jökrä Ngübabitikä tä kukwe niere ni jie ngwankäre ye nita nuainne angwane, niaratre törö nie ye nita bämike. Nitre Braibe Konkrekasion Jökrä Ngübabitikä ye tä ni jie ngwen tärä aune täräkwata, gätä aune gätä krikri nuainta yebiti. Ne madakäre, niaratre tä nitre circuito tuabitikä ye kädeke, aune nitre circuito tuabitikä ye tä nitre umbre kädeke ji ngwankäre konkrekasionte. Nitre Braibe Konkrekasion Jökrä Ngübabitikä tä kukwe niere ni jie ngwankäre ye nitre circuito tuabitikä aune nitre umbre ji ngwanka konkrekasionte tätre nuainne angwane, tätre niaratre ngwen törö jai ye tätre bämike. Aune nitre kädekani ni jie ngwanka kä nengwane ye nita mike täte angwane, nita ni Jie Ngwanka, Jesús ye mike ütiäte jai (Hebreos 13:17).
18 Nita Nitre Braibe Konkrekasion Jökrä Ngübabitikä ngwen törö jai, ye ni raba bämike nita ja di ngwen kukwe driere yebiti arato. Hebreos 13:7 tä ni dimike tödeke nitre tä ni jie ngwen ye erere. Nitre Braibe Konkrekasion Jökrä Ngübabitikä tätre kukwe kwin ye driere kä jutobiti aune tätre jie ngwen yebiti tätre bämike tätre tödeke krubäte. ¿Nita niaratre dimike sribi ütiäte krubäte yebätä? Nikwe niaratre dimikai angwane, Jesukwe kukwe ne niedi nie ye ngwane kä rabai juto krubäte nibätä: “Ti mräkätre bäri bobre, kräke munkwe jändrän kuin nuenbare kore, ye ti ne ara jire munkwe die mikani abko ti tö nibi niei metre kore munye” (Mateo 25:34-40).
19. ¿Ñobätä ni töita kwatibe nänkäre ni Jie Ngwanka, Jesús ye jiebiti?
19 Jesús nikaninta kä kwinbiti ye ngwane, nitre ja tötikaka kwe ye ñaka mikaninte kaibe kwe (Mateo 28:20). Niara nämene kä tibienbätä ye ngwane, üai deme, angeletre aune Ngöbö Kukwei yekwe niara dimikani nitre ja tötikaka kwe jie ngwen ye nämene gare kwin ie. Aune kä nengwane niara tä üai deme, angeletre aune Ngöbö Kukwei yebiti ni klabore ie tö ngwan raba ye dimike arato. “Ni Kordero kwrere [tä] niken mdente erere abko jiebti” Nitre Braibe Konkrekasion Jökrä Ngübabitikä ye tätre niken (Apocalipsis 14:4). Aisete, Nitre Braibe Konkrekasion Jökrä Ngübabitikä tä dre niere ni jie ngwankäre ye erere nita nuainne angwane, metrere nita näin ni Jie Ngwanka, Jesús ye jiebiti. Gwäune, niarakwe ni jie ngwain “ñö ni mikaka nüne kärekäre” ye kokwäre aune nikwe nünain kärekäre (Apocalipsis 7:14-17). Ni kä nebätä ji ngwanka ye ñaka raba kukwe ye kwrere käbämike nie.
^ párr. 3 Nibira gare nie ye erere, nitre apóstol 12 ie Jehová tö namani ne kwe rabadre “jä [...] kwä jätäbti kubu” Jerusalén Mrä ye “gräre” (Apocalipsis 21:14). Ye medenbätä nitre apóstol ja ngwani metre krütani Jesús bitikäre ye täte ni mada kädekadre ye ribe ñaka nämene.
^ párr. 8 Kä 1955 yete ja känenkäre, corporación ye kädekata Watch Tower Bible and Tract Society of Pennsylvania.
^ párr. 14 Tärä “Testimonio cabal” del Reino de Dios, página 58 aune 59 ye mikadre ñärärä.