1, 2. ¿Ñobätä Jehovakwe ni nübaibare nemen mräkätre kwe ye ngätäite aune nuainbare ño kwe?

JEHOVAKWE ni nübaibare kukwe kwin krubäte kräke, ye abokän ni rabadre mräkätre kwe ngätäite ie niara tö. Nitre tä nemen Jehová mräkätre ngätäite ye tä ja denkä mento Jehová kräke aune tä tödeke Jesús ja nire biani yei. Yebätä nita nüne kä jutobiti. Ni ñaka tä nüne ngwarbekäre aune ja nire käre kä kwinbiti o kä tibienbätä tä ja känenkäre ni kräke yebätä kätä juto krubäte nibätä.

² Jehová tä ni tarere krubäte yebätä kukwe ñan nuäre nuainbare kwe ne kwe ni rabadre mräkätre kwe ye ngätäite (Juan 3:16). Ngöbökwe ni “kökani” nieta Bibliakwe (1 Cor. 6:20). Ni kökanintari ye köböire ni raba ja kete kwin Ngöböbe. Ni bäri ütiäte kä kwinbätä aune kä tibienbätä yei ni raba “ti Rün” niere ye ütiäte krubäte ni kräke ¿ñan ererea? Aune nikwe mikaba gare jai kukwe ja tötikara käne yebätä erere, Ngöbö ye ni Rün bäri kwin tä nikwe.

3. ¿Kukwe meden ni raba nemen ngwentari jai? (Recuadro “ ¿Jehová töita tibätä?” mikadre ñärärä arato).

³ “¿Jehovakwe jondron jökrä kwin nuainbarera ti kräke ye tikwe ütiä biain drebiti ie?” ye ni Biblia tikaka käkwe ngwanintari jai ye erere ni raba nemen ngwentari jai arato (Sal. 116:12). Ni ñan raba ja ütiä bien jire ni Rün kä kwinbiti ie. Akwa niarata ni tarere ye tä ni töi mike niara tarere. Apóstol Juan käkwe tikani: “Ngöbökwe ni tarebare käne, ye mden kisete nita Ngöbö tarere” (1 Juan 4:19). Ye medenbätä, ¿nita ni Rün tarere ye ni raba bämike ño?

4. Santiago 4:8 tä niere erere, ¿ñobätä nikwe ja di ngwandre rökrakäre Jehová ken?

⁴ Nikwe krötadre Jehová ken aune käre ni tädre blite ben ie tö (ñäkädre Santiago 4:8 yebätä). Nikwe ñaka ja di ngwandre nekä orasion nuainkäre ie ribeta kwe nie aune tä juto ni kukwe nuakäre (Rom. 12:12). Niara tä nainte aune sribita ere kisete yebätä ñaka ni kukwe nuai kwe ye nikwe ñaka nütüdre, ñakare aune käre niarata juto ni kukwe nuakäre. ¿Ño ni raba niara kukwe nuin? Kukwe kwe tä Bibliabätä, tärä aune täräkwata sribeta Biblia mikakäre nüke gare bäri kwin jai yebätä nita ñäke ngwane nita niara kukwe nuin. Arato nita olo ketaninte kwekebe kukwe nieta gätäte yei ngwane nita niara kukwe nuin. Monso tä blite käre rün kwe ben ye köböire tä ja kete kwin ben, ye erere nita mantre jetebe blite Jehovabe ngwane käre ni täi niara ken.

5. ¿Ño ni raba orasion nuainne bäri kwin Jehovai?

⁵ ¿Nita orare ño Ngöböi? Nita orare ie ngwane nikwe orasion ye nuaindre ja brukwä tätebiti ie tö (Sal. 62:8). Ye medenbätä nikwe kukwe ne ngwandretari jai: “¿Kärera niera tita kukwe arabe kädekete orasionte? ¿O tita blite ja ketamuko kwin ben ye erere tita orare?”. Nita Jehová tarere krubäte yebätä ni tö käre ja tuai ken, ¿ñan ererea? Nikwe ñaka kämikadrekä niarabätä yekäre käre nikwe blitadre ben. Kukweta ni brukwäte ye jökrä niedre ie, ñodre dreta kä mike juto nibätä aune dreta ni mike töbike krubäte ye niedre ie. Ni raba blite ben ja di käräkäre ie ye tädre gare metre nie.

6. ¿Ni tädre käre Jehová ken yekäre dre nuaindre?

⁶ Ni tädre Jehová ken yekäre nikwe ja töi mikadre debe bien kukwe jökräbätä. Ni salmo tikaka käkwe niebare, “mäkwe jondron keta kabre nuainbarera, Ngöbö tikwe Jehová, aune jondron sribebare bä nuäre mäkwe bätä mä töi kwin nun kräke arato; ni ñaka tärä jire mä erere. Tikwe jondron ye mikadre gare aune blitadrebätä angwane, ere krubäte yebätä ñaka raba nemen niebare jökrä tie” ye erere ni töita, ¿ñan ererea? (Sal. 40:5). Ni töta nemen debe biain Jehovai akwa ye ñan aibe, ñakare aune nita bämike ie ja kukweibiti aune nita ja ngwen ño yebiti. Ye tä bämike ni ñaka ja ngwen nitre kä ne näire ye erere. Ngöböta kukwe kwin mike nemen bare nitre kräke akwa ñaka debe bien jire, nitre ye ngätäite nita nüne. Kukwe nuainta nitre kräke yebätä ñan debe bien jire ye tä mike gare metre nie, nita nüne kä krüte näire (2 Tim. 3:1, 2). Nikwe ñaka ja töi mikadre nitre ye erere.

7. ¿Nikwe dre nuaindre ie Jehová tö aune ñobätä?

⁷ Ni rüne aune ni meyere ñaka tö ngäbäkre tuai ngüdrärekä jabe ye erere Jehová ñaka tö ni tuai ngüdrärekä. Nita ja tarere kwärikwäri ye tä mike gare metre ni abokän ni kristiano metre (Juan 13:35). Ni Ngöbö mikaka täte käkwe tikani: “¡Mike ñärärä, ja mräkätre tä nüne keteitibe aune jäme jabe ye kwin krubäte aune ye tä kä mike nuäre nibätä!” (Sal. 133:1). Ja ruin salmista ye erere nie, ¿ñan ererea? Nita ja mräkätre tarere yebiti nita bämike nita Jehová tarere arato (1 Juan 4:20). Ja mräkätre moto kwin ja kräke kwärikwäri aune ni mada nemen “ruentari tare” ietre ngätäite nita ye kwin krubäte, ¿ñan ererea? (Efes. 4:32).

8. 1 Juan 5:3 tä niere erere, ¿kukwe meden bäri ütiäte abokänbätä nita Jehová mike täte?

⁸ Monsotre käkwe rün mikadre täte ie Jehová tö ye erere arato nikwe niara mikadre täte ie tö (Efes. 6:1). Nikwe niara mikadre täte ñobätä ñan aune niarakwe ni sribebare, tä ja nire bien nie aune niara ye ni rün bäri töbätä ni jökrä kräke. Akwa nita  niara tarere ye kukwe bäri ütiätebätä nita niara mike täte (ñäkädre 1 Juan 5:3 yebätä). Ebökänä kukwe keta kabrebätä nikwe niara mikadre täte akwa ñaka tä ni mike ja dibiti ja mike täte. Ni törbadre dre nuain ye erere tä ni tuenmetre den jai, akwa nita ja töi mike niara mike täte tare nikwe yebätä ngwane kätä nemen jutobätä.

9, 10. ¿Ngöbökwe kukwe ükaninte ye nikwe mikadre gare jai aune mikadre täte ye ñobätä ütiäte?

⁹ Monsotre tädre kwin yei nitre rüne tö, ye medenbätä tätre kukwe ruäre ükete mikakäre täte monsotre kwe ie. Monsotre tä kukwe ye mike täte yebiti tä bämike tä tö ngwen rün aune meye kwe ie aune tä mike ütiäte jai. Ye erere arato, ni Rün kä kwinbiti kukwe ükaninte ye nikwe mikadre gare jai aune mikadre täte ye ütiäte krubäte. Ye erere nikwe nuaindi ngwane nikwe bämikai Jehovai nita niara tarere aune mike ütiäte jai. Ye köböire nikwe nünain kwin (Is. 48:17, 18). Akwa nitre tä Jehová kukwei mike ngwarbe jai ye tä kukwe tare mike nemen bare akwle jabätä (Gál. 6:7, 8).

¹⁰ Nünandre Jehová tö ie erere ye tä ni kriemike kukwe ja üairebiti, töbikakwe tä nemen ni kisete yebätä aune kukwe tare raba nemen bare nibätä yebätä. Dre ñaka raba kukwe blo mike nemen bare nibätä ye gare Jehovai. Meri Testiko nünanka Estados Unidos kädekata Aurora tä niere: “Jehová mikadre täte ye köböire nünanta kwin ye gare tie”. Kukwe keta kabre känti ye erere nemen bare. Yebätä ni raba ngwentari jai: “¿Tita ja jie ngwamana  Jehovai ye köböire kukwe meden kwin namanina tikwe?”.

11. ¿Orasion tä ni dimike dre nuainne?

¹¹ Orasion ye tä ni dimike Jehová mike täte aune ñan tä nemen nuäre ni kräke mikakäre täte ye ngwane tä ni dimike arato. Ni jökrä töi ngite yebätä ruäre ngwane Jehová mikadre täte ye ñan tä nemen nuäre ni kräke. Akwa nikwe mikadre täte jankunu. Ni salmo tikaka töi rabadre Jehová mike täte yekäre ja di ribebare kisere kwe ie (Sal. 51:12). Prekursora regular kädekata Denise tä niere: “Jehová tä kukwe nuainmana ye ñan tä nemen nuäre ti kräke mikakäre täte ngwane, tita ja di kärere ie kukwe kwin ye nuainkäre”. Ngöböta orasion ye kwrere kain ngäbiti ye tädre gare metre nie (Luc. 11:9-13).

12. ¿Efesios 5:1 tä dre nuainmana nie?

¹² (Ñäkädre Efesios 5:1 yebätä). * Ni abokän ngäbäkre tare Jehovakwe, ye medenbätä nita ja di ngwen ja ngwen niara erere. Nita ni mada tarere, blite töi jämebiti aune ngite juen ta ni madabiti yebiti nita ja töi mike niara erere. Nita ja ngwen kwin ye tä tuin nitre ñaka Ngöbö mike täte yei, ye raba niaratre töi mike Ngöbö mike gare bäri jai (1 Ped. 2:12). Jehová tä ja ngwen ño nibe ye erere nitre rüne aune meyere rabadre ja ngwen monsotre kwe ben. Ye erere nuaindi kwetre ngwane monsotre ye töi raba kite ja kete ni Rün ni tarekä yebe.

13. ¿Kä jürä ganainkäre aune blitakäre Jehovabätä ni madabe drebätä ja töi mikadre?

 ¹³ Monso yebätä rün kwe käi juto aisete tä blite kä jutobitibätä. Ye erere arato ni Rün kä kwinbiti ye ütiäte krubäte ni kräke aune nitre mada ie niara rabadre gare yei ni tö. Rei David käkwe tikani: “Kä jutobiti tikwe blitai Jehovabätä”. Ye erere ja nemen ruin nie, ¿ñan ererea? (Sal. 34:2). Akwa ni ruäre abokänbätä kä jürätä nemen yebätä ñan tä nemen nuäre kräke blitakäre Jehovabätä. Ye erere ngwane, ¿dre raba ni dimike? Ni ni kukwe nuaka yekwe kukwe kwin rabai aune nikwe kä mikai juto Jehovabätä yebätä ja töi mikadre ye käkwe ni dimikai. Jehovakwe ni dimikai ja ngwen dite. Niarakwe ja mräkätre siklo kena dimikani ye erere arato ni dimikai kwe (1 Tes. 2:2).

14. ¿Kukwe meden meden ütiätebätä kukwe driedre nitre mikakäre ja tötikaka Jesukwe?

¹⁴ Jehová tä ni kain ngäbiti ja erebe jökrä, aisete nita nitre jökrä kain ngäbiti ja erebe ye tä kä mike jutobätä (Hech. 10:34, 35). Nita kukwe driere ngwane nita ni mada tarere krubäte ye nita bämike (Mat. 28:19, 20). ¿Kukwe drie ye köböire dre raba nemen bare? Ye raba nitre tä ni kukwe nuin ye dimike nüne kwin kä nengwane aune raba dimike tö ngwen nüna kärekäre yei (1 Tim. 4:16).

15, 16. ¿Kukwe meden meden tä kä mike juto nibätä?

¹⁵ Jehová ye ni Rün ni tarekä krubäte aune kä tädre juto niara mräkätrebätä yei tö (Is. 65:14). Kukwe tare ben nita ja tuin akwa kukwe kwin keta kabre yebätä kä tädre juto nibätä. Ñodre, ni Rün kä kwinbiti ye tä ni tarere krubäte ye gare metre nie. Aune kukwe metre Bibliabätä ye niena gare nie (Jer. 15:16). Arato ja mräkätre tä Jehová tarere, kukwe ükaninte Ngöbökwe tarere aune tätre ja tarere kwärikwäri ngätäite nita ye kwin krubäte (Sal. 106:4, 5).

¹⁶ Ni raba kä ngwen juto jankunu jabätä ñobätä ñan aune gare metre nie ja känenkäre ni rabai nüne bäri kwin. Arato Jehová köböra nitre käme ye gainte aune Gobran kwe ye köböire kä tibien ne kwitai bä nuäre kwe. Ne madakäre, kukwe bä nuäre krubäte ie nita tö ngwen ye abokän nitre krütani ye rükaita nire aune rabaita keteitibe mräkätre kwe ben (Juan 5:28, 29, TNM). Ye kwin krubäte, ¿ñan ererea? Akwa bäri ütiäte kä jökräbiti tibien aune kä kwinbiti Jehová ni Rün ni tarekä ye aibe mikai ütiäte jai, käikitaikä aune aibe mikai täte.