1. ¿Ni iti törbadre blitai rei Persia ben ngwane rabadre dre nuainne?

NÜNANTA juta kira Persia yete ye bämike ja okwäte. Ni törbadre blitai reibe aisete ni rikadre känti juta Susa yete blitakäre ben. Akwa blitakäre reibe permiso kärädre ñobätä ñan aune permiso bian ñaka nie ngwane ni murie ketadre (Est. 4:11).

2. ¿Kä jürä rabadre nibätä blitakäre Jehovabe ie niara tö?

² Jehová ñaka rei juta Persia ye erere yebätä nita debe bien krubäte. Niara ye bäri kri gobrantre kä nebätä kräke akwa ni raba blite kä jökrä ngwane ben. Nikwe blitadre töi jämebiti ben ie tö. Niara kädekata kukwe krubärebiti. Ñodre, Ngöbö Kri ni Sribekä, Ngöbö Bäri Dite Krubäte aune Däkien Gobranka Kri nieta ie. Akwa nikwe ti “Rün” niedre ie niara tö (Mat. 6:9). Niara tö ni tuai ja kete kwin jabe ye tä kä mike juto nibätä, ¿ñan ererea?

3. ¿Ñobätä ni raba ti “Rün” niere Jehovai aune nibike dre mikai gare jai kukwe ja tötikara nekänti?

³ Ni raba ti “Rün” niere Jehovai ñobätä ñan aune niarakwe ja nire biani nie (Sal. 36:9). Niara ni Rün yebätä nikwe mikadre täte. Tä dre nuainmana nie ye erere nikwe nuaindi ngwane, kukwe keta kabre kwin rabai nikwe (Heb. 12:9). Ñodre nüna kärekäre kä kwinbiti o kä tibienbätä rabai nikwe aune kukwe kwin rabai nikwe kä nengwane arato. Ni Rün Jehová tä ni tarere ye tä bämike ño aune ñaka ni tuainmetre jire kwe ye ñokänti raba nemen gare nie ye nibike mike gare jai. Akwa ye känenkri, ni Rün kä kwinbiti tä ni tarere krubäte aune tä ni ngübare kwin ye ñokänti gare nie ye ani mike gare jai.

4. Jehová mikadre tuin jai ja Rün erere, ¿ye ñobätä ñan nemen nuäre nitre ruäre kräke?

⁴ ¿Jehová mikadre tuin jai ja Rün erere ye ñan nemen nuäre mä kräke? Jehová ye kri krubäte aisete ni ñaka ütiäte kräke ni ruäre tä nemen nütüre. Ngöbö dite kri töita ni itire itirebätä ye ñan tä nemen era kräketre. Akwa ni Rün ni tarekä ye ñan tö ni tuai töbike kore. Ja nire biani kwe nie aune nikwe niara känändre ja ketakäre ben yei niara tö. Kukwe metre ne apóstol Pablo käkwe mikani gare ye bitikäre nitre niara kukwe nuaka Atenas yei niebare kwe, Jehová ye “tä känime ni jökrä ken” (Hech. 17:24-29). Monso chi tare krubäte rünkwe yebätä monso tä blite töi jämebiti ben ye erere Jehová tö ni tuai blite jabe.

5. ¿Kukwe namani bare meri Testiko itibätä ye tä dre driere nie?

⁵ Ne madakäre Jehová mikadre tuin jai ja rün erere ye ñan tä nemen nuäre ni ruäre kräke ñobätä ñan aune rünkwe tarebare bäräkä o ñan tarebare jire chi yebätä. Meri Testiko käkwe niebare: “Ti rün nämä ñäke tare tie köböite ti nämä ja tare nike krubäte. Ti tötika jataba Bibliabätä ngwane, ja ñaka nämä nemen ruin ni Rün kä kwinbiti ye ken tie. Akwa Jehová rababa gare kwin tie ngwane ti töi ñan rababa ye erere mada”. ¿Ja ruin kore mäi? Ye erere ngwane ñan ja di ngwan nekä, Jehová ye raba nemen tuin mäi ja Rün bäri kwin ye erere.

6. Mateo 11:27 tä niere erere, ¿Jehovakwe dre nuainbare ni dimikakäre niara mike tuin jai ja Rün erere?

⁶ Jesús kukwe nuainbare aune kukwe driebare ye Jehovakwe tika mananbare Bibliabätä ni dimikakäre niara mike tuin jai ja Rün erere (ñäkädre Mateo 11:27 yebätä). Jehová tä ja ngwen ño ye erere Jesukwe ja ngwani ye medenbätä kukwe ne niebare kwe: “Nire nire käta ti tuen, ye abko tä ti Rün tuen arato” (Juan 14:9). Bä kabre Jesukwe Jehová bämikani ni Rün ye kwrere. Jesukwe ti “Rün” niebare Jehovai ye tä tikani 165 näre Evangelio ketabokä yete. ¿Ñobätä blitabare kwe krubäte Jehovabätä? Ñobätä ñan aune Jehová ye ni Rün ni tarekä krubäte ye rabadre gare metre nitre ie ye Jesús tö namani mikai gare (Juan 17:25, 26).

7. ¿Jehovakwe ja ngwani ño Jesús ben ye tä dre driere nie?

⁷ Jehovakwe ja ngwani ño Jesube aune ye tä dre driere nie ye ani mike gare jai. Käre Jehová nämäne monso kwe kukwe nuin aune dre ribe nämäne kwe ie ye nämäne mike nemen bare kräke (Juan 11:41, 42). Kukwe ñokwä ben Jesukwe ja tuani akwa käre Rün kwe nämäne dimike aune tarere ye jutuabare ie (Luc. 22:42, 43).

8. ¿Dre drebiti Jehovakwe Jesús ngübabare?

⁸ Jehovakwe ja nire ye biani Jesús ie aune dre ribe nämäne kwe jai ye biani kwe ie yebätä Jesukwe niebare: “Ti Rün [...] köböire tita nüne” (Juan 6:57). Jesukwe tö ngwani kwatibe Jehovai aune dre ribe nämäne kwe jai ja ngübakäre ye Jehovakwe biani ie. Akwa bäri ütiäte Jehovakwe ngübabare kukwe ja üairebiti (Mat. 4:4).

9. ¿Jehová nämäne Jesús tarere ye bämikani ño kwe?

⁹ Jehová nämäne juto Jesús dimikakäre ye mikani gare metre kwe ie, yebiti bämikani kwe niara ye ni Rün ni tarekä krubäte (Mat. 26:53; Juan 8:16). Kukwe tare tare ben Jesukwe ja tuani ye jökräbätä ñan kriemikani kwe akwa dimikani kwe kä ngwankäre nüke jai. Kukwe tare rabadre bare Jesubätä akwa ye ñan nuai raire ye nämäne gare kwin Jesús ie (Heb. 12:2, TNM). Jehovakwe Jesús kukwe nuani, niara nämäne dre ribe jai nünankäre ye biani kwe ie, tötikani kwe aune dimikani  kwe. Yebiti bämikani kwe nämäne Ngobo kwe ngübare (Juan 5:20; 8:28, TNM). Ye erere ni Rün kä kwinbiti tä ni ngübare ño ye ani mike gare jai mada.

10. 1 Pedro 3:12 tä niere erere, ¿ni tare Jehovakwe ye tä bämike ño nie?

¹⁰ Jehová tä orasion nikwe kukwe nuin (ñäkädre 1 Pedro 3:12 yebätä). Ni tö blitai drebätä Jehovabe, bäbe aune nuäi yebätä nikwe ñaka kä jürä ngwandre jabätä ie niara tö, ñakare aune tä ni nübaire orare käre jai (1 Tes. 5:17). Ne madakäre, nita jondron nuainne o ñakare o ni tädre medente akwa ni raba blite töi jämebiti ben. Niara ñaka nainte jire ni kukwe nuakäre ñakare aune tä juto biare ni kukwe nuin. Jehová tä orasion nikwe kukwe nuin ye tä nüke gare nie ngwane ni töta nemen ja ketai bäri ben. Ni salmo tikaka käkwe niebare: “Tita Jehová tarere ñobätä ñan aune tä ti kukwe nuin” (Sal. 116:1).

11. ¿Nita kukwe kärere Jehovai orasionte ye tä mike nemen bare ño ni kräke?

¹¹ Ni Rün ñan tä orasion kukwe nuin jerekäbe, ñakare aune nita dre kärere ie ye erere tä mike nemen bare ni kräke. Kukwe ye metre mikakäre gare nie, apóstol Juan käkwe niebare: “Ngöbö tö dreye nikrä abko erere nita kärere ie, ye ngwane tä ni kukwei kaen ngäbti ja moto kuinbti” (1 Juan 5:14, 15). Akwa nikwe jondron käräbare ie yebätä raba ñakare niere nie o ruäre ngwane nikwe kukwe ye ngübadre bätärekä raba mike gare nie, ñobätä ñan aune dre kwin ni kräke aune dre ñaka kwin ni kräke ye gare ie (2 Cor. 12:7-9).

12, 13. ¿Nita kukwe ja üaire ribere jai aune jondron ribere jai nünankäre ye Jehovata bien ño nie?

¹² Nita dre ribere jai ye Jehovata bien nie. Nitre ji ngwanka mräkätre käne käkwe dre nuaindre nieta kwe ietre ye erere niarata nuainne arato (1 Tim. 5:8). Nita dre ribere jai ye erere tä bien nie. Nikwe dre kwetai, dän ño kitai jabätä aune nünain ju ño te yebätä ñaka tö ni tuai ja töibikaire (Mat. 6:32, 33; 7:11). Tä ni tarere yebätä nikwe jondron ribedi jai ja känenkäre ye kräke kukwe ükaninante kwe, ne kwe jökrä rabadre nikwe.

¹³ Bäri ütiäte nita dre ribere jai kukwe ja üairebiti ye tä bien nie. Niara tö dre ie, ñokäre nita kä tibienbätä, dre rabai bare ja känenkäre aune niara ye abokän ño ye mikani gare kwe nie Bibliabiti. Kukwe metre namani gare nie ngwane niarakwe ja töi mikani bäri nibätä, ni rün o ja mräkä ni tötikaka Bibliabätä yebiti ni dimikani kwe ne kwe niara rabadre gare kwin nie. Tä ni tarere yebätä tä jankunu ni dimike nitre umbre ji ngwanka yebiti aune ja mräkätre ünä kukwe ja üairebiti yebiti. Aune gätäte tä ni tötike gwaire ni mräkätre kukwe ja üairebiti yebe ne kwe niara rabadre gare nie. Kukwe ne aune kukwe mada keta kabrebiti tä bämike nie niara ye ni Rün töita nibätä (Sal. 32:8).

14. ¿Ñobätä Jehovata ni tötike aune tä nuainne ño?

¹⁴ Jehová tä ni tötike. Jesús ye töi metre akwa ni abokän töi ngite, ye medenbätä ni tötikakäre ni Rün ni tarekä ye tä mäträre nibätä nita ribere jai ngwane. Niara kukwei tä ngwen törö nie, nire nire tareta kwe abokän “tä kaen olobti” (Heb. 12:6, 7). Tä mäträre nibätä kukwe jene jenebiti. Ñodre ja töi ükatekäre tä mäträre nibätä kukwe nieta gätäte yebiti aune Biblia yebiti. Arato tä ni dimike nitre umbre ji ngwanka konkrekasionte yebiti. Ni tare Jehovakwe yebätä käre tä ni kain olobiti mäträkäre nibätä (Jer. 30:11).

15. ¿Jehovata ni kriemike ño?

¹⁵ Jehová tä ni dimike kä ngwen nüke jai kukwe tare näire. Ni rüne tä monso kwe tarere ngwane tä ngübare, ye erere nita ja tuin  kukwe tare ben ngwane ni Rün kä kwinbiti tä ni ngübare. Tä üai demebiti ni kriemike ne kwe ni tädre kwin kukwe ja üairebiti (Luc. 11:13). Nita kite di nekä aune töbikakwe tä nemen ni kisete yebätä tä ni kriemike arato. Ñodre, kukwe kwin krubäte tä käbämike nie ja känenkäre ye tä ni dimike ja tuin kukwe tare ben. Kukwe meden raba ni ngwen ja tare nike ye jökräbätä ni Rün ni tarekä käkwe ni mikaita räre. Kukwe tare tä nemen bare kä nengwane ye näin ta akwa Jehovata kukwe kwin käbämike ye nuai kärekäre (2 Cor. 4:16-18).

16. ¿Adankwe ñaka Rün kwe mikani täte ngwane dre namani bare?

¹⁶ Adán ñaka Jehová mikani täte ngwane Jehovakwe ja töi mikani dre nuainne ye tä bämike ni tare krubäte kwe. Kukwe namani bare ye köböite Adán ngäbriänkätre jatani jatäri ye ñaka namanina Jehová mräkätre ye ngätäite (Rom. 5:12; 7:14). Akwa Jehová ñaka namani kwekebe.

17. ¿Adán ja mikani ngite ye bätäräbe Jehovakwe dre nuainbare?

¹⁷ Jehovakwe Adán mikani ja ngie nuin akwa ngäbriänkätre jatani jatäri ye kräke kukwe kwin ükaninte kwe. Adankwe ja mikani ngite ye bätäräbe Jehovakwe käbämikani, ni kä tibienbätä ja ngwanka metre ie ye rabaita niara mräkätre ye ngätäite (Gén. 3:15; Rom. 8:20, 21). Monso tare krubäte kwe ye juani kwe ja nire bien ni ütiäre yebiti ni kökanintari kwe. Biani kwe ni ütiäte yebiti bämikani kwe niara tä ni tarere krubäte (Juan 3:16).

18. Nikwe ja dianinkä mento Jehovabätä, ¿akwa tä ni tarere monso jakwe erere ye ñobätä gare metre nie?

¹⁸ Ni töi ngite akwa yebiti ta Jehová tö ni tuai mräkätre kwe ye ngätäite aune ni ñan tribe doboko ye kwrere kräke. Ni raba niara mike ulire o ni raba ja denkä mento niarabätä, akwa ñongwane ni kwainta kokwäre ye käre tä  jiebäre. Monso kämikaninkä rünbätä abokänbiti Jesukwe kukwe bämikani ye tä mike gare metre Jehová tä ni tarere krubäte (Luc. 15:11-32). Ni rüne bämikani Jesukwe ye ngobo rükaita känti yei käre nämäne tö ngwen. Monso nükaninta känti ngwane rün nikani betekä ngäbiti kä jutobiti. Nikwe ja dianinkä mento Jehovabätä akwa nikwe ja töi kwitani ngwane, Jehová tä juto biare ni ka ngäbitikäre ye tädre gare metre nie.

19. ¿Adankwe ja mikani ngite ye ükatekäreta Jehovakwe dre nuain?

¹⁹ Adán ja mikani ngite ye köböite kukwe tare tä nakainkä, ye jökrä ni Rün kä kwinbiti käkwe ükaite. Adán ja mikani Jehová rüere ngwane, Jehovakwe ja töi mikani nitre 144,000 ye kain ngäbiti ja ngäbriänkäre rabakäre reire aune sacerdotere kä kwinbiti Monso kwe ben. Jesús aune nitre gobranka ben ye käkwe ni kä tibienbätä ja ngwanka metre ye dimikai nementa töi metre kä bä nuäre yete. Niaratre nuaite mrä ye bitikäre Ngöbökwe ja nire käre ye biain ietre. Ni töi metre aibe rabai kä tibienbätä ye käkwe kä mikai juto ni Rünbätä. Ye kwin krubäte, ¿ñan ererea?

20. ¿Jehová tä ni tarere krubäte ye tä bämike ño nie aune nikwe dre mikai gare jai kukwe ja tötikara mada yekänti?

²⁰ Jehová tä ni tarere krubäte ye bämikanina kwe. Niara ye ni Rün bäri kwin tä nikwe. Tä orasion nikwe kukwe nuin aune nita dre ribere jai kukwe ja üairebiti aune nünankäre ye tä bien nie. Arato tä ni tötike aune tä ni dimike bätä tä kukwe kwin krubäte käbämike ja känenkäre. Ni Rün tä ni tarere krubäte aune tä ni ngübare ye tä kä mike juto nibätä, ¿ñan ererea? Ni niara ngobo, aisete nita debe bien ie tä ni tarere yebätä ye ni raba bämike ño, ye nikwe mikai gare jai kukwe ja tötikara mada yekänti.