KUKWE JA TÖTIKARA 7
Kukwe ükaninte ji ngwankäre konkrekasionte
“Nitre tödekaka Kristobti abko tä Kristo ngrabare kwrere amne Kristo abko tä ji dokwäte kräke” (EFES. 5:23).
KANTIKO 137 Meritre ja ngwanka metre Jehovai
KUKWE NEBÄTÄ JA TÖTIKAI *
1. ¿Kukwe meden köböire Jehová mräkätre tä keteitibe?
NITA Jehová mräkätre ngätäite siba ye tä kä mike juto nibätä, ¿ñan ererea? Jehovakwe ji dokwäte ükaninte ji ngwankäre ye nita ja di ngwen mike ütiäte jai, ye köböire nita nüne jäme aune keteitibe. Kukwe ükaninte ji ngwankäre ye nüke gare bäri kwin nie ngwane nita nemen bäri keteitibe.
2. ¿Kukwe meden ngwantarita nibike mike gare jai kukwe ja tötikara nekänti?
2 Ji dokwäte ükaninte ji ngwankäre konkrekasionte yebätä ani blite kukwe ja tötikara nekänti. Kukwe ngwantarita ne ani mike gare jai. ¿Kukwe meden tä nuaindre meritre ie? ¿Ja mräkätre jökrä tä ji dokwäte meritre kräke ye bäkänä ya? ¿Ni umbre ji ngwanka ye tä ji dokwäte konkrekasion kräke ni ji ngwanka mräkätre käne tä ji dokwäte muko kwe aune monsotre kwe kräke ye erere? Kukwe meden tä nuaindre meritre ie aune nikwe mikadre tuin ño jai ye ani mike gare käne jai.
¿NIKWE MERITRE MIKADRE TUIN ÑO JAI?
3. ¿Dre käkwe ni dimikai meritre mike bäri ütiäte jai kukwe nuainta kwetre yebätä?
3 Meritre tä kukwe jökrä nuainne mräkätre kwe ngübakäre, kukwe driekäre aune ja mräkätre konkrekasionte dimikakäre yebätä nikwe mikadre ütiäte jai. Akwa Jehová, Jesús aune apóstol Pablo käkwe mikani tuin ño jai yebätä nikwe töbikai ngwane, meritre ye rabai bäri ütiäte ni kräke.
4. ¿Nitre brare aune merire ye ütiäte ja erebe Jehová kräke ye mikata gare ño Bibliabätä?
4 Nitre brare aune merire ye ütiäte ja erebe Jehová kräke mikata gare Bibliabätä. Siklo kena ye ngwane Jehovakwe üai deme biani nitre brare aune merire ie ne kwe rabadre kukwe ñan tuabare nuainne, ñodre, blite kukwe jene jenebiti (Hech. 2:1-4, 15-18). Nitre dianinkä nänkäre kä kwinbiti käkwe gobrandi Kristobe ye ngätäite nitre brare aune merire tä (Gál. 3:26-29). Ye erere arato, Jehovakwe nüna kärekäre kä tibienbätä biandi nitre brare aune merire ie (Apoc. 7:9, 10, 13-15). Aune Jesukwe kukwe driemana aune nitre mada tötikamana nitre brare aune merire ie (Mat. 28:19, 20). Ñodre, tärä Hechos yebätä blitata meri kristiana kädeka nämäne Priscila yebätä. Niara aune muko kwe Áquila käkwe ji Ngöbökwe mikani gare bäri metre mada ni iti kukwe nämäne gare krubäte kädeka nämäne Apolos ye ie (Hech. 18:24-26).
5. Lucas 10:38, 39, 42 tä niere erere, ¿Jesús nämäne meritre mike tuin ño jai?
5 Jesús nämäne meritre mike ütiäte jai. Jesukwe ñaka ja ngwani nitre fariseo erere. Nitre fariseo nämäne meritre mike tuin ngwarbe jai, ñaka nämäne blite meritre ben nitre mada okwäbiti aune bärira jire, kukwe Bibliabätä yebätä ñaka nämäne blite meritre ben. Akwa Jesukwe ñaka ja ngwani kore. Jesukwe blitabare kukwe ja üaire nguseta yebätä meritre ben aune nitre brare ben (ñäkädre Lucas 10:38, 39, 42 yebätä). * Meritre kwati tuanimetre kwe kukwe driere jabe arato (Luc. 8:1-3). Aune niara ganinkröta ye meritre ruäre juani kwe mike gare nitre apóstol ie (Juan 20:16-18).
6. ¿Pablo nämäne meritre mike ütiäte jai ye bämikani ño kwe?
6 Timoteokwe meritre mikadre ütiäte jai ye Pablokwe niebare ie. Meritre bäri umbre mikadre tuin kwe jai “ni meye” kwrere aune meritre bäri bati mikadre tuin kwe jai ja ngwai kwe erere niebare kwe ie (1 Tim. 5:1, 2). Pablokwe ja di ngwani tödeka Timoteokwe mikakäre dite, akwa Timoteo meye aune mölöi käkwe “Ngöbö Kukwei deme” ye mikani gare Timoteo ie ye nämäne gare metre Pablo ie (2 Tim. 1:5; 3:14, 15). Ne madakäre, Pablokwe kukwe tikani nitre romano ie yete köbö kwin juani kwe meritre kwati kräke aune kädekaninte kwe kä kwetre yebiti. Meritre ye nämäne kukwe meden nuainne ye nükani gare ie aune sribi nuain nämäne kwetre ye nämäne ütiäte kräke mikani gare kwe ietre (Rom. 16:1-4, 6, 12; Filip. 4:3).
7. ¿Kukwe meden ngwantarita nibike mike gare jai?
7 Nibira gare nie ye erere, meritre bäri ngwarbe ja mräkätre kräke ye mika ñaka gare Bibliabätä. Töi kwinbiti aune töi mantiame yebiti meritre tä konkrekasion dimike krubäte. Tätre nitre umbre ji ngwanka dimike ne kwe konkrekasion tädre jäme aune keteitibe. Akwa, kukwe täbe mikadre gare jai kukwe ngwantarita nebätä. Meritre käkwe ja dokwä jue mikadre ruäre ngwane, ¿ye ñobätä Jehovata niere ietre? Nitre brare aibe kädekata ji ngwanka aune siervo ministerial. Meden kisete, ¿niaratre jökrä tä ji dokwäte meritre kräke ya?
¿JA MRÄKÄTRE JÖKRÄ TÄ JI DOKWÄTE MERITRE JÖKRÄ KRÄKE YA?
8. Efesios 5:23 tä niere erere, ¿ñobätä ja mräkätre jökrä ñan tä ji dokwäte meritre jökrä kräke?
8 Kukwe chitanibiti ñakare. Kristo aibe ji dokwäte meritre jökrä kräke konkrekasionte (ñäkädre Efesios 5:23 yebätä). Nitre ja mräkäre ngätäite ni brare gure aibe tä ji dokwäte muko kwe kräke, akwa monso brare ja ngökani ñöte ye ñaka ji dokwäte meye kwe kräke (Efes. 6:1, 2). Konkrekasionte, nitre umbre ji ngwanka tä ji dokwäte ja mräkätre merire brare ye jökrä kräke, akwa ñan kukwe jökräbätä (1 Tes. 5:12; Heb. 13:17). ¿Aune meri kaibe ñan niena nüne rün aune meye ben yebätä dre nie raba? Täbe rün aune meye mike ütiäte jai, akwa rün ñaka niena ji dokwäte niara kräke. Tä nitre umbre ji ngwanka mike ütiäte jai, akwa ja mräkätre brare konkrekasionte erere, ji dokwäte itibe tä kwe, ye abokän Jesús.
Nitre kaibe ñan niena nüne rün aune meye ben akwa Jesús tä ji dokwäte kräke. (Párrafo 8 mikadre ñärärä)
9. ¿Ñobätä meritre rabadre ja dokwä jue mike ruäre ngwane?
9 Konkrekasion tädre keteitibe jankunu ie Jehová tö. Ye medenbätä Jesús kädekani kwe ji dokwä ngwanka nitre brare kräke. Aune Ngöbökwe ni brare mikani konkrekasion jie ngwankäre aune ñaka meritre kädekani kwe sribi ye kräke (1 Tim. 2:12). Sribi nuainta nitre brarekwe ye ruäre meritrekwe nuaindre ngwane ja dokwä jue mikadre kwe ribeta ie Jehovakwe (1 Cor. 11:4-7). * Kukwe ne nuaindre kwe ye ñan bämikakäre ngwarbe, ñakare aune kukwe ükaninte ji ngwankäre ye mikata ütiäte kwe jai bämikakäre. Kukwe ngwantarita ne ani mike gare jai. ¿Ni ji ngwanka mräkätre käne aune ni umbre ji ngwanka konkrekasionte ye kötärä sribi meden tä?
SRIBI TÄ NUAINDRE NI JI NGWANKA MRÄKÄTRE KÄNE AUNE NI UMBRE JI NGWANKA KONKREKASIONTE IE
10. ¿Ñobätä ni umbre ji ngwanka konkrekasionte raba töbike kukwe ükete mikakäre täte ja mräkätre ie?
10 Nitre umbre ji ngwanka tä Kristo tarere aune oveja ngübamana Jehovakwe aune Jesukwe ietre ye tarere (Juan 21:15-17). Töi kwinbiti, ni umbre ji ngwanka ie ja raba nemen ruin ja mräkätre rüne konkrekasionte. Raba nemen töbike ne erere raba ruin nie: “Ni ji ngwanka mräkätre käne raba kukwe ükete mräkätre kwe kriemikakäre, aisete ni umbre ji ngwanka konkrekasionte raba kukwe ükete oveja Ngöbökwe kriemikakäre arato”. Aune ja mräkätre ruäre raba nitre mada mike töbike kore arato, nitre umbre ji ngwanka kukwe diandre nuaindre jai niaratre kräke ye raba ribere ietre. ¿Akwa ni ji umbre ngwanka konkrekasionte aune ni ji ngwanka mräkätre käne ye kötärä sribi ja erebe tä?
Nitre umbre ji ngwanka konkrekasionte tä ja mräkätre tarere, mike ütiäte jai aune dimike tödeke bäri. Nire tä ja mike ngite ñaka tä ja töi kwite ye niaratre raba kitekä konkrekasionte, sribi ye Jehovakwe mikani niaratre kötärä. (Párrafo 11 aune 12 mikadre ñärärä)
11. ¿Ni ji ngwanka mräkätre käne aune nitre umbre ji ngwanka konkrekasionte ye kötärä sribi meden ruäre ja erebe tä?
11 Ni ji ngwanka mräkätre käne aune ni umbre ji ngwanka konkrekasionte ye kötärä sribi ruäre ja erebe tä, mikani gare Pablokwe (1 Tim. 3:4, 5). Ñodre, nitre ja mräkäre käkwe ji ngwanka mräkätre käne ye kukwei mikadre täte ie Jehová tö. Aune ja mräkätre konkrekasionte käkwe ni umbre ji ngwanka konkrekasionte mikadre täte ie Jehová tö arato (Col. 3:20). Ni ji ngwanka mräkätre käne aune nitre umbre ji ngwanka konkrekasionte käkwe nitre ngübabitita kwetre ye taredre, mikadre ütiäte jai aune dimikadre tödeke bäri ie Jehová tö. Ni ji ngwanka mräkätre käne töi kwin erere, nitre umbre ji ngwanka konkrekasionte tä ja mräkätre dimike dre ribeta kwetre jai yebätä (Sant. 2:15-17). Ne madakäre, nitre umbre ji ngwanka konkrekasionte aune ni ji ngwanka mräkätre käne rabadre nitre mada dimike Ngöbö mike täte aune kukwe tä tikani Bibliabätä ye aibe mike täte ie Jehová tö (1 Cor. 4:6).
Ni ji ngwanka mräkätre käne ye Jehovakwe mikani mräkä kwe jie ngwankäre. Ni ji ngwanka mräkätre käne töi kwin tä blite muko kwe ben kukwe diandre nuaindre kwe jai ye känenkri. (Párrafo 13 mikadre ñärärä)
12, 13. Romanos 7:2 tä niere erere, ¿ni ji ngwanka mräkätre käne aune nitre umbre ji ngwanka konkrekasionte ye kötärä sribi meden ñaka ja erebe tä?
12 Akwa, kukwe ruäre ñaka ja erebe tä nitre umbre ji ngwanka konkrekasionte aune ni ji ngwanka mräkätre käne ye kötärä. Keteiti ye abokän Jehovakwe nitre umbre ji ngwanka konkrekasionte mikani sribikäre ni kukwe ükatekä erere aune nire tä ja mike ngite ñaka tä ja töi kwite ye kitakakäre konkrekasionte (1 Cor. 5:11-13).
13 Ne madakäre, Jehovakwe sribi ruäre mikani ni ji ngwanka mräkätre käne ye kötärä abokän nitre umbre ji ngwanka konkrekasionte ñaka raba nuainne. Keteiti ye abokän ni ji ngwanka mräkätre käne raba kukwe ükete mikakäre täte mräkä kwe ie aune mräkä kwe käkwe mikadre täte ye mikadre gare kwe jai (ñäkädre Romanos 7:2 yebätä). Ñodre, ni ji ngwanka mräkätre käne raba ora ükete monsotre kwe kräke rükakäreta gwi deu aune ñaka kukwei mikai täte kwetre ngwane raba tö den (Efes. 6:1). Akwa, kukwe ükadrete mikakäre täte kwe ye känenkri ni ji ngwanka mräkätre käne töi kwin tä blite muko kwe ben ñobätä ñan aune niaratre ye “ni itibe kwrere” yebätä (Mat. 19:6). *
KRISTO TÄ JI DOKWÄTE KONKREKASION KRÄKE YE MIKADRE ÜTIÄTE JAI
Jesús, Jehovakwe kädekani konkrekasion jie ngwankäre. (Párrafo 14 mikadre ñärärä)
14. a) Marcos 10:45 tä niere erere, ¿se ñobätä Jehovakwe Jesús kädekani konkrekasion jie ngwankäre? b) ¿Kukwe meden tä nuaindre Nitre Braibe Konkrekasion Jökrä Ngübabitikä ie? (Recuadro “ Kukwe tä nuaindre Nitre Braibe Konkrekasion Jökrä Ngübabitikä ie” ye mikadre ñärärä).
14 Ni kökanintari ye köböire Jehovakwe ni jökrä konkrekasionte aune nitre jökrä tä tödeke Jesubiti ye kökani (ñäkädre Marcos 10:45 yebätä; Hech. 20:28; 1 Cor. 15:21, 22). Kristo murie ketani ni jökrä kräke, ye medenbätä Jehovakwe kädekani konkrekasion jie ngwankäre. Yebätä, Jesús raba kukwe ükete mikakäre täte nitre ie, nitre ja mräkäre ie aune konkrekasion jökrä ie aune mikai täte kwetre o ño ye mikakäre gare jai (Gál. 6:2). Akwa ñaka tä kukwe ükete mikakäre täte nie aibe, ñakare aune tä ni buke aune ni ngübare ja üairebiti (Efes. 5:29).
15, 16. ¿Marley aune Benjamin tä dre niere yebätä dre nü gare mäi?
15 Kristokwe nitre kädekani konkrekasion ngübakäre ye meritre tä mike täte ngwane, Kristo ji dokwäte ye mikata ütiäte kwetre jai bämikata kwetre. Meri testiko kädekata Marley nünanka Estados Unidos tä niere: “Sribi tä nuaindre tie meri gure erere aune meri konkrekasionte erere ye ütiäte krubäte tikrä. Kukwe ükaninte ji ngwankäre Jehovakwe ye tikwe mikadre tuin ño jai ye erere tikwe ja di ngwandre mikakäre tuin jai. Akwa ti muko aune ja mräkätre konkrekasionte tä ti mike ütiäte jai aune dre dre nuainta tikwe ye ütiäte kräketre bämikata kwetre tie yebätä ñan tä nemen tare tikrä mikakäre täte”. Meri testiko tä kukwe ne niere ye erere ja ruin meritre kwati ie raba ruin nie.
16 Kukwe ükaninte ji ngwankäre ye ja mräkätre tä mike ütiäte jai bämikata kwetre meritre mikata ütiäte jai kwetre yebiti. Ja mräkä Benjamin nünanka Inglaterra tä niere: “Meritre tä blite gätäte, ja tötikadre ño nieta kwetre, kukwe driedre ño aune nitre tötikadre ño bäri kwin nieta kwetre yebätä kukwe namanina gare krubäte tie. Niaratre tä sribi ütiäte krubäte nuainne ruin tie”.
17. ¿Kukwe ükaninte ji ngwankäre ye ñobätä nikwe mikadre ütiäte jai?
17 Ñobätä kukwe ükaninte ji ngwankäre ye ni jökrä konkrekasionte, nitre brare, nitre merire, nitre ji ngwanka mräkätre käne, nitre umbre ji ngwanka käkwe mikadre nüke gare jai aune mikadre ütiäte jai ngwane, konkrekasion täi nüne jäme krubäte. Aune bäri ütiäte nikwe ni Rün kä kwinbiti Jehová töi kwin krubäte ye käikitaikä (Sal. 150:6).
KANTIKO 123 Jehová tä kukwe ükete ye mikadre täte
^ párr. 5 ¿Kukwe meden tä nuaindre meritre ie konkrekasionte? ¿Ja mräkätre jökrä tä ji dokwäte meritre käne? ¿Nitre umbre ji ngwanka aune nitre ji ngwanka mräkätre käne ye tä ji ngwen ja erebe? Kukwe bämikata Bibliabätä yebätä nibike ja tötike käkwe kukwe ngwantarita ne mikai gare nie kukwe ja tötikara nekänti.
^ párr. 5 Párrafo 6 tä kukwe ja tötikara kädekata “Meritre testiko mikadre ütiäte jai” tä täräkwata Ni Mikaka Mokre septiembre 2020 yebätä mikadre ñärärä.
^ párr. 9 Recuadro “ ¿Ñongwane meritre ja dokwä jue mikadre?” ye mikadre ñärärä.
^ párr. 13 Párrafo 17 nemen 19 kukwe ja tötikara kädekata “Ja mräkätre tä konkrekasion Jehovakwe te ye mikadre ütiäte jai” tä täräkwata Ni Mikaka Mokre agosto 2020 yebätä yekänti nitre ja mräkäre rikadre konkrekasion meden te ye nirekwe diandre nuaindre jai mikata gare yete.
^ párr. 56 “Ngwärekri” nieta, ye abokän meri muko o ni brare ja ngökani ñöte tädre känime yere, tädre jondron mada nuainne akwa meri tä orare o dirire ye jutuen ie aune kukwe ruin ie meden gärätä arato.
^ párr. 58 “Ngwärekri” nieta, ye abokän meri muko o ni brare ja ngökani ñöte tädre känime yere, tädre jondron mada nuainne akwa meri tä orare o dirire ye jutuen ie aune kukwe ruin ie meden gärätä arato.
^ párr. 59 Tärä “Munkwe Ngöbö taredre jankunu” apéndice kädekata “¿Ñongwane ja dokwä jue mikadre aune ñobätä?” yete kukwe ne kädrieta bäri nguseta.
^ párr. 66 Kukwe tä nuaindre Nitre Braibe Konkrekasion Jökrä Ngübabitikä ie ye mikata gare bäri kwin Ni Mikaka Mokre 15 julio 2013 página 20 nemen 25 yebätä.
