MEKERA sete meri nämäne ja mäkete ye ngwane kukwe muko kwe nämäne ütiä bien mräkätre kwe ie. Ütiä bian nämäne ngwianbiti, jondron nirebiti o jondron ütiätebiti. Ñodre ruäre ngwane, sribi yebiti ütiä bian nämäne. Nuainbare Raquel ütiäre ye erere. Jacob sribidi kä kwä kükü te Raquel ütiäre jürü kwe kräke ye ükaninte kwe ben (Gén. 29:17, 18, 20). Meri ja kukwe mukore kä ye näire ütiä biandre, ¿ye ñobätä mika nämäne täte?

Ni kukwe mikaka gare jai Bibliabätä Carol Meyers tä niere: “Meri ye ñan sribidi jankunu mräkätre kwe ben yebätä kukwe muko kwe nämäne ütiä bien mräkätre kwe ie raba ruin nie. Nitre ja mräkäre nämäne sribire tirete ye kräke kukwe ne nämäne ütiäte krubäte”. Jondron ütiäte bian nämäne meri iti ütiäre ye köböire meri aune brare ye mräkätre nämäne nemen keteitibe raba ruin nie. Aune kukwe tare ye näire nitre ja mräkäre ye nämäne ja dimike kwärikwäri. Meri bäkänkä nämänena nemen aune rün bätä meye, ye nämäne kriemike aune ngübare akwa ja känenkäre muko kwe käkwe kriemikadi aune ngübadi ye nämäne bämike jondron bian nämäne kwe ütiäre yebiti.

Jondron ngwarbe ye kwrere meri ye rürübäindre o kökadre ye ñan ai gärätä jondron bian nämäne ütiäre yebiti. Tärä El libro Instituciones del Antiguo Testamento tä mike gare: “Ngwian o jondron ye närebiti bian nämäne meri ütiäre mräkätre ie yebiti meri ye köka nämäne ye bä raba nemen ni okwäte. Akwa […] meri ye ütiä nuäi ye ererebätä jondron bian nämäne mräkätre kwe ie ye ñan ai gärätä ñakare aune jerekäbe jondron bian nämäne ütiäre ye kwrere”. *

Kä nengwane juta ruäre känti meri köböra ja mäkete ye ngwane jondron bian täbe ütiäre. Nitre kristiano rüne ñaka jondron ribere krubäte ngängän kwe ütiäre ngwane, niara ye abokän töbike kwin ye raba bämike nitre mada okwäte (Filip. 4:5; 1 Cor. 10:32, 33). Yebiti niaratre ñaka tä “ngwian tarere bäri” ye bämikadi kwetre (2 Tim. 3:2). Ne madakäre, jondron ñan kärädi krubäte ie ngwane, ja mäkädrete kwetre ye ñan köböi kitadi bäri ja känenkäre kwetre, nemen ütiä kwandre täte kukwe muko brare ie ye ngwane. Aune kukwe muko kwe ye prekursor ngwane, ñaka prekursor ye tuainmetre kwe sribikäre köbö täte, ne kwe ütiä kwandre jökrä ie ye kräke.

Juta ruäre känti gobran tä kukwe ükete ne kwe ngwian o jondron biandre nuäi meri ütiäre ye nitre rüne kristiano tä mike täte. “Nikwe nitre gobranka mikadre täte” aune kukwe ükateta kwe ye nuaindre ye ie Ngöbö tö ye medenbätä nitre kristiano tä mike täte (Rom. 13:1; Hech. 5:29).