1. ¿Ñöbätä nita debe bien krubäte Biblia biani nie yebätä?

 ¡JEHOVAKWE Biblia biani nie yebätä nita debe bien krubäte! Biblia yebätä kukwe töbätäbiti mäträta kwe nibätä, kukweta nemen ni kisete ye ngwane. Arato tä kukwe kwin käbämike tödekara nie ja känenkäre. Aune bäri ütiäte töita ño ye tä mike gare nie. Jehová töi ño yebätä nita töbiketari ngwane, tä ni töi mike ñan krütare. Ye tä ni mike nökrö bäri niara ken aune nemen ja ketamuko kwe (Sal. 25:14).

2. ¿Kukwe mikakäre gare jabätä Jehovakwe dre nuainbare?

² Ni jökrä ie Jehová rabadre gare ie niara tö. Ye medenbätä, kirabe kukwe mikani gare kwe jabätä angeletre yebiti aune kukwe mikani tuare kwe köböre yebiti arato (Núm. 12:6; Hech. 10:3, 4). Kukwe jokrä ne ñan tikadre akräke ni ñan raba ja tötikebätä. Yebätä, niara tö namani dre mikai gare nie ye tikamana kwe “täräbätä” nitre kä nebätä ye ie (Jer. 30:2). Ye medenbätä, kukwe ütiäte ne mikani gare kwe nie aune mikani gare kwin kwe, ñobätä ñan aune “ji Ngöbökwe ye kwin aune metre” (Sal. 18:30).

3. ¿Jehovakwe dre nuainbare ne kwe Biblia tädre nikwe kä nengwane? (Isaías 40:8).

³ (Ñäkädre Isaías 40:8 yebätä). b Kä nikanina 1,000 ta yete, Kukwe Ngöbökwe ye käkwe nitre niara mikaka täte ye jie ngwani kwin krubäte. Akwa, ¿ne tä nemen bare ño? Metrere, Biblia ye tikabare jondron niken ngwarbe jötrö yebätä. Aune gare metre, jondronbätä kukwe tikani ye ñan niena. Metrere, Ngöbö kukwei ye copia sribedre ye mikani gare kwe jai. Nitre copista copia sribekä ye ngite, akwa ja di ngwani kwe sribi ne nuainne kwin krubäte. Tärä Hebreo yebätä, ni ja tötikaka kri  käkwe kukwe ne niebare: “Biblia ye ñan ja erebe tärä mada yebe, tikani metre ta tärä mada tikani kirabe ye kräke”. Nitre ngite käkwe tikabare jondron niken ngwarbe jötrö ngwarbe yebätä akwa nibira gare metre nie, nita ñäke Bibliabätä ye tä, Jehová töi mike gare.

4. ¿Dre rabai gare nie kukwe ja tötikara nekänti?

⁴ “Ngöbö ye ara jire käta jändrän jökrä kwin aune metre ni die mikakrä ye bien nie”, ñobätä ñan aune kite niarakri aune Biblia ye regalo bäri kwin biani kwe nie (Sant. 1:17). Regalo bianta nie ye tä kukwe keta kabre mike gare nie nire tä bien nie yebätä. Ñobätä ñan aune, ni gare kwin ie aune dre ribeta nikwe jai ye gare metre ie. Ye erere tä nemen bare Biblia yebätä. Nita töbiketaribätä ngwane, Jehovata nüke gare bäri kwin nie. Ni gare ie aune dre ribeta nikwe jai ye gare kwin ie tä nemen gare nie. Jehová töi kwin ketamä, ñodre: töbätä, tä kukwe ükete kwin aune ja tare bämike Biblia tä mike gare metre ta, ye rabai gare nie kukwe ja tötikara nekänti. Kena, Jehová töbätä ye ani mike gare jai.

5. ¿Jehová töbätä krubäte Biblia tä mike gare, ye raba nemen gare kukwe medenbiti nie?

⁵ Kukwe töbätä ye nita ribere jai ye gare metre Jehovai yebätä Biblia känti, kukwe töbätä raba nemen gare nie ye biani kwe nie. Aune tä mäträre kwin krubäte nitrebätä ye tä nemen gare nie. Ñobätä ñan aune, Biblia ye raba nitre töi kwite. Tärä kena Bibliabätä Moisekwe tikani ye ngwane, kukwe ne niebare kwe juta Ngöbökwe ye ie, nitre israelita: “Kukwe ne abokän ñan ngwarbe mun kräke, ñakare aune ja nire munkwe” (Deut. 32:47). Nire nire käkwe kukwe tikani ne mikai täte yebätä kä täi juto aune kukwe kwin rabai bare kräke (Sal. 1:2, 3). Kirabe Biblia tikani akwa täbe dite krubäte nitre töi kwitakäre. Ñodre, serie de artículos “La Biblia les cambió la vida” tä jw.org, yekänti nitre 50 biti bäri käkwe ja töi kwitani aune ja jie ngwani Bibliabiti ye raba kwen mäi (1 Tes. 2:13).

6. ¿Tärä mada ñaka Biblia erere ye ñobätä nita niere?

⁶ Biblia ye abokän ñaka tärä mada ye erere. ¿Ñobätä? ñobätä ñan aune, Jehová ye Biblia bokänkä, niara dite, nüne kärekäre aune töbätä ni ñaka niara ye erere. Tärä keta kabrebätä ñäkäta, akwa ni tärä bökänkä tä krüte ye bitikäre tä mäträre ye ñan tä kitera ütiäte. Akwa ye erere ñan tä nemen bare Bibliabätä. Biblia tä mäträre kukwe töbätäbiti ye abokän ñaka kwita raba jire, käre tä ütiäte krubäte aune nitre kwati kä jene jene näire ye dimikanina kwe. Nita ñäke tärä deme nebätä, aune töbiketari mäträta kwin kwe yebätä ngwane, ni tärä ne bökänkä tä ni dimike üai deme yebiti kukwe nieta kwe ye mikakäre täte (Sal. 119:27; Mal. 3:16; Heb. 4:12). Ni Biblia bökänkä ye tö ja brukwä tätebiti ni dimikai, yebätä töbike. Metrere kukwe ne raba ni töi mike kwatibe ja tötike Bibliabätä ¿ñan ererea?

7. ¿Biblia ye käkwe juta Ngöbökwe ye dimikani nüne ño keteitibe?

⁷ Biblia ye Ngöbö töbätä kukwei, kukwe mada tä mike gare, ñobätä ñan aune tä juta kwe ye mike keteitibe. Nitre israelita namani nüne kä käbämikani ie yekänti ngwane, namanintre nüne kä jene jene känti. Ñodre, ruäre namanintre gwa kitaka, nibi ngibiaka o sribire tirete. Nämenentre nüne mente  yebätä ñaka tädre keteitibe nütü raba. Akwa Jehovakwe nitre jökrä töi mikani ja ükekrö keteitibe niara kukwe nuakäre aune mikakäre gare bäri jai (Deut. 31:10-13; Neh. 8:2, 8, 18). Nitre israelita ja ngwanka metre nämäne nüke Jerusalén ye ngwane, nitre kwati juta jene jene te nämäne nüke Jehová mikakäre täte, nitre israelita ie ja nämäne ruin ño ye bämike ja töite. Ne erere, Jehovakwe niaratre dimikani ne kwe tädre keteitibe. Ja käne mada, siklo kena yete konkrekasion kristiana kömikani. Nitre brare aune merire nünanka jene, jondron bökäne, bobre aune blite kukwe jenebiti ye nämäne konkrekasion yete. Akwa niaratre jökrä nämäne kukwe Ngöbökwe ye tarere yebätä nämäne sribire gwairebe Jehová kräke. Aune nitre mrä mrä nämäne nüke konkrekasionte ye ie Ngöbö kukwei nämäne nüke gare ñobätä ñan aune, nitre kristiano mada nämäne dimike Ngöbö kukwei ye mike gare jai aune nämänentre ja ükekrö gwairebe yebätä (Hech. 2:42; 8:30, 31).

8. ¿Biblia yebiti Jehovata juta kwe käne ngwane ye mike ño keteitibe?

⁸ Kä nengwane, Jehová täbe Biblia yebiti juta kwe ye tötike aune dimike nüne keteitibe. Mrö ja üaire bianta nie ye jökrä kite Biblia yekri. Ni kristiano ye tä käre ja ükekrö gätäte aune gätä kri yebätä, känti ñäkäta Bibliabätä aune töbikatarita kukwe yebätä arato kukwe mada tä nemen gare nie Bibliabätä. Aisete nemen gare metre nie Jehová tä  Bibliabiti ja töi mike nemen bare, tä nitre niara mikaka täte ye mike “sribire gwairebe” niara kräke (Sof. 3:9).

9. ¿Biblia rükadre gare nie yekäre nikwe ja töi mikadre ño? (Lucas 10:21).

⁹ Jehová töbätä krubäte yebätä ani kukwe mada mike gare jai. Nitre ja töi mike bobre ye ie kukwe Bibliabätä rükadre gare yebätä ja töi mikani kwe (ñäkädre Lucas 10:21 yebätä). Nitre kä jökräbiti tibien tä ñäke Bibliabätä. Ni ja tötikaka kri käkwe niebare: “Tärä nebätä ñäkäta bäri käbiti tibirn ye ñan ngörä” ñakare aune ja tötikata bäri ngusetabätä. Akwa nitre töi bobre ie aibe raba nüke gare aune mike tä te (2 Cor. 3:15, 16).

10. ¿Kukwe meden madabiti Jehová töbätä ye raba nemen gare nie?

¹⁰ Biblia yebätä Jehová töbätä ye kukwe mada tä mike gare nie. Ye abokän Biblia yebiti tä nitre kwati tötike akwa ye ñan ngöräbe, ñakare aune tä ni itire itire tötike aune töi mike jäme. Nita ñäke Jehová kukweibätä ngwane, niara töita ni itire itirebätä tä nemen gare metre nie (Is. 30:21). Nita ja tuin kukwe tare ben ngwane, nita kukwe ribere jai ye erere tä kwen nie nita ñäke texto keteitibätä ngwane. Metrere bäsi käre tä nemen bare nibätä. Biblia ye tikani ni jökrä kräke akwa, ¿ñobätä kukwe ben ni itire itire tä ja tuin ye kräke kukwe raba kwen bätä nie? Tä nemen bare ñobätä ñan aune Biblia ye ni bäri töbätä kukwei (2 Tim. 3:16, 17).

11. ¿Biblia tikani ye ngwane, Jehová ñan ni kitete ye bämikani ño kwe?

¹¹ Jehová töi kwin mada ye abokän niara ye kukwe ükatekä kwin (Deut. 32:4). Jehová ye töita kukwe ükatebätä kwin ye bäsi ja erebe ni kitate ñaka yebe ye medenbätä niara ñan ni kitete (Hech. 10:34, 35; Rom. 2:11). Kukwebiti tärä Bibliabätä tikamananbare kwe yebiti tä bämike. Tärä 39 kena tikabare bäsi jökrä kukwe hebreore yebiti, ñobätä ñan aune juta Ngöbökwe kä ye näire ie kukwe nämäne nüke gare kukwe yebiti. Nitre kwati nämäne blite kukwe griegobiti nitre kristiano kira ye näire. Ye medenbätä, tärä 27 mrä ye tikani kukwe yebiti. Jehová tö namani ja kukwei tikamana kukwe jökräbiti. Kä nengwane, nitre bäsi 8 mil millón tä kä jökräbiti tibien aune blitata kukwe jene jenebiti. Akwa, ¿dre köböire Jehová raba nemen gare nie?

12. ¿Kä krüte ne näire Daniel 12:4 ye tä nemen bare ño?

¹² “Kukwe metre ye ririai bäri” kä krüte ye näire ye Jehovakwe käbämikani ni kukwe niekä Daniel yebiti, ye abokän nitre kwati ie kukwe Bibliabätä ye rabai nüke gare meden gärätä (ñäkädre Daniel 12:4 yebätä). c Tärä, täräkwata kwitanina bätä tuatebare aune döräibare ye köböire tä nemen bare. Ñodre, kirabe nükebe kä nengwane Biblia ye kwitanina aune döräita bäri tärä mada ye kräke. Kwitanina kabre aune rürübäinta kabre krubäte. Akwa juta Jehovakwe käkwe Biblia ye kwitanina 240 biti bäri täte o ötare, nitre kä jökräbiti tibien kwe Biblia ye raba nemen. ¿Ye köböire dre namanina bare? Nitre kwati kä jene jene känti tä “kukwe kwin gobran Ngöbökwe” ye kain ngäbiti kä jämi krüte ye känenkri (Mat. 24:14). Jehová ye abokän ni kukwe ükatekä kwin, ye medenbätä ni jökrä ie niara rabadre gare ie niara tö tä ñäke  Bibliabätä ye ngwane. ¿Dre tä töi mike ye nuainne? Ñobätä ñan aune niara tä ni tarere krubäte.

13. ¿Jehovakwe ni tare ye Biblia tä bämike ño? (Juan 21:25).

¹³ Biblia bokänkä ye töi meden bäri ütiäte ye Biblia tä mike gare, ye abokän: ja tare (1 Juan 4:8). Ñodre, dre tikamananbare kwe aune meden ñaka tikamananbare kwe yebätä ani töbike. Dre ribeta rabakäre ja ketamuko kwe, nünankäre kä jutobiti aune ja nire kärekäre rabadre nikwe yekäre ye mikani gare metre ta kwe nie. Akwa ni tare krubäte Jehovakwe ye medenbätä kukwe ni ñan ribere krubäte jai ye ñan tä mike gare nie (ñäkädre Juan 21:25 yebätä).

14. ¿Kukwe meden madabiti Jehovata ni tarere mikata gare Bibliakwe?

¹⁴ Jehovata blite nibe ye ngwane, tä ni mike ütiäte jai yebiti tä ni tarere tä bämike. Aune kukwe kiakia nuainta nikwe ye ngwane nikwe dre nuaindre aune ñaka dre nuaindre ye niara ñaka ükaninte jatäri Bibliabätä mikakäre täte. Ñakare aune, kukwe namani bare metre nitrebätä, profecía ütiäte aune mäträta kwin kwe nibätä yebiti tä ni dimike kukwe kwin den nuaindre jai. Yebiti Biblia tä ni dimike Jehová tarere bäri aune mike täte ja brukwä tätebiti.

15. a) ¿Jehová töita krubäte nibätä ye Biblia tä mike gare ño nie? b) ¿Monso chi, ja mräkä bati, meri umbre tä üaibätä ye tä nitre kirabe medenbätä töbiketari? (Gén. 39:1, 10-12; 2 Rey. 5:1-3; Luc. 2:25-38).

¹⁵ Jehová töita krubäte nibätä ye Biblia tä mike gare metre nie. Gare nie, ñobätä ñan aune niara kukwei yebätä ja namani ruin ño nitre ie ye erere raba kwen krubäte nie Bibliabätä. Nitre Biblia tikaka ye töi raba nüke gare nie, ñobätä ñan aune niaratre “abko ni mda mda kwrere” arato (Sant. 5:17).  Aune bäri ütiäte nita ja tötike Jehovakwe nitre ni erere ye mikani tuin ño jai yebätä ngwane, Jehová “abko moto kuin nikrä amne nita nebe ruentari tare ie” ye tä nemen gare bäri kwin nie (Sant. 5:11).

16. ¿Nitre kirabe käkwe ja mikani ngite krubäte yebätä kukwe mikata gare ye tä dre driere Jehovabätä nie? (Isaías 55:7).

¹⁶ Biblia yebiti kukwe madabiti Jehovata ni tarere ye tä nemen gare nie. Nita ja mike ngite ye ngwane, Jehová ñaka ni mikete kaibe ye tä nemen gare nie Biblia yebiti. Bä kabre nitre israelita nämäne ja mike ngite Jehová rüere akwa nämäne ja töi kwite bökän ngwane niara nämäne ngite kite tabiti (ñäkädre Isaías 55:7 yebätä). d Nitre kristiano siklo kena ie nämäne gare metre Jehová nämäne tarere. Ñodre, Jehovakwe apóstol Pablo töi mikani nitre kristiano dimike ne kwe nire nämäne nemen käme käme jabe ye ja töi kwitadre töi bökänbiti yebiti ta rabadre ngite kite aune töi mike jäme (1 Cor. 5:1-5; 2 Cor. 2:6, 7). Nitre nämäne ja mike ngite ye ie Jehovakwe ñaka trö kwitani. Ñakare aune dimikani töi kwinbiti kwe aune nübaibare kwe nökröta ja kokwäre. Ye erere, kä nengwane nire nire tä ja mike ngite aune tä ja töi kwite töi bökänbiti ye niara töita erere kräke (Sant. 4:8-10).

17. ¿Biblia ye regalo bäri ütiäte ye ñobätä ni raba niere?

¹⁷ Jehovakwe regalo bäri kwin biani nie. ¿Ñobätä kukwe kwe ye ütiäte krubäte? Nibira gare nie erere Jehová ye kukwe ükatekä kwin, töbätä aune tä ni tarere krubäte ye Biblia tä driere nie. Ni rabadre niara mike gare jai aune nemen ja ketamuko kwe ye tärä ne tä mike gare nie arato.

18. ¿Biblia ye regalo bäri ütiäte yebätä nita debe bien ye nita bämike ño?

¹⁸ Kukwe Ngöbökwe ye ni ñan mikadre tuin ngwarbe jai. Ñobätä ñan aune Jehovakwe jondron “jökrä kuin” ye biani nie (Sant. 1:17). Yebätä käre ni rabadre debe bien regalo ütiäte nebätä. Nita orare ye bitikäre nita ñäke kukwe Ngöbökwe yebätä aune töbiketaribätä ye ngwane nita debe bien ye nita bämike. Nita ja di ngwen yebätä Biblia bökänkä käkwe kukwe kwin mikai nemen bare ni kräke aune “kukwe drieta Ngöbökwe” ye kwain nie ye gare metre nie (Prov. 2:5).