RUÄRE nitre Biblia tikaka yekwe kukwe ja erebe tikani. ¿Ñobätä nämäne nuainne? Kukwe ketamä mikata gare ye ani mike gare jai:

Ñongwane tikani. Nitre nünanka Israel kira näire ye kwati kwe copia leikwe ñan nämäne jeñe. Bäsi käre nämänentre kukwe nuin ñäkä nämänebätä, o nitre jökrä nämäne ja ükekrö templote ye ngwane (Deut. 31:​10-12). Ñäkä nämäne ngwane ñan kukwe nua nämäne kwin, ñobätä ñan aune ora kabre te nitre kwati ye nämäne nünaninkä krö ye bämika raba ja töite (Neh. 8:​2, 3, 7). Ye ngwane, kukwe arabe nie nämäne bä kabre ye nämä nemen bäri nuäre ketatekäre ja töite aune nuainkäre. Ne madakäre nämä nemen bäri ütiäte, kukwe nie nämäne mikakäre täte o kukwe ükadrete ño yebätä ngwane (Lev. 18:​4-22; Deut. 5:1).

Tikani ño. Kukwe ruäre tikani Bibliabätä kansion erere, ñodre tärä Salmos, El Cantar de los Cantares aune Lamentaciones. Ruäre känti kukwe arabe nieta bobukäre. Ne nuain nämäne drebätä blita nämäne ye mikakäre gare, aune ngwankäre törö bäri kwin jai. Ne erere tä tikani Salmo 115:​9-11: “Oh, Israel, tö ngwen Jehovai. (Niara mä dimikaka aune escudo mäkwe). Oh, Aarón mräkätre, tö ngwen Jehovai. (Niara mä dimikaka aune escudo mäkwe). Munta Jehová jürä ngwen jabätä, tö ngwen Jehovai. (Niara mä dimikaka aune escudo mäkwe)”. Nire nämä kansion ne kantaire ye ie kukwe bä nuäre nieta nete, nämäne nemenkä töite.

Ñobätä tikani. Nitre Biblia tikaka ruäre nämäne kukwe arabe tike, kukwe ütiäte mikakäre gare. Ñodre Jehovakwe däri kweta ye ñäkäibare nitre israelita ie, aune ñobätä ñäkäibare kwe ye Moisekwe ngwandre törö bati bobu ietre ribebare Jehovakwe. Ja nire ye tä jondron nire ye däriete ye Ngöbö tö namani mikai gare mrebe niaratre ie (Lev. 17:​11, 14). Kä nikani kwati ta yete, nitre apóstol aune nitre umbre ji ngwanka ye blitabare dre nuaindre Ngöbökwe ni kadre ngäbiti yebätä, ye ngwane kukwe niebare Ngöbökwe däri yebätä ye ngwaninta törö kwetre (Hech. 15:​20, 29).

Ruäre ngwane kukwe arabe nieta Bibliabätä, ye ñan aibätä ni rikadre kukwe arabe kädekete (ritual), ñakare aune kukwe ütiäte ja töikrä ye ni tö mikai gare jai. Jesús ara käkwe kukwe ne niebare: “Mun rika blite Ngöböbe angwane, nitre ñakare israelitare tä kukwe arabe niere bäre bare […] ye kwrere munkwe ñan blita Ngöböbe” (Mat. 6:7). Ne madakäre kukwe tuin kwin Ngöböi ni raba niere orasionte kädekaninte ruäre kwe (Mat. 6:​9-13). Bäkänä nita orare Jehovai ye ngwane ni ñan tä kukwe ja erebe kädekete, akwa kukwe keteitibätä ni raba käre blite ben o nita ja tuin kukwe keteiti ben yebätä ni raba ja driere bä kabre ie (Mat. 7:​7-11).

¡Kukwe ruäre nieta bati bobu Bibliakwe ye kwin krubäte! Ye abokän kukwe keteitibiti Ni Tötikaka Bäri Kri tä ni tötike aune kwin ni kräke (Is. 48:​17, 18).