1, 2. ¿Kukwe ngwarbe nieta Jehovabätä ye ngwane, jata nemen ruin ño ie ye bämikata kukwe medenbiti?

 KUKWE ne bämike ja töite, ni iti tare mäkwe käkwe kukwe ngwarbe niedre mäbätä. Kukwe ye ñan metre gare mäi, akwa nitre ruäre käkwe mikadre era jai aune mä kädriedre jankunu kwetre, ¿Ja rabadre ruin ño mäi? Metrere nitrekwe töbikadre blo mäbätä yekwe mä mikadre töbike krubäte aune ja rabadre ruin blo krubäte mäi, ¿ñan ererea? (Prov. 22:1).

² Ja namani ruin ño Jehovai ye nüke gare bäri kwin nie kukwe nebiti, Jehová monso üaire yekwe kukwe ngwarbe niebare Jehovabätä aune kä kwe mikani käme kwe. Eva käkwe kukwe ngwarbe ye mikani era jai, ye köböite ni rün kena Adán bätä Eva ñaka Jehová mikani täte. Aune ni jökrä jatani jatäri ye töi ngite aune nita krüte (Gén. 3:​1-6; Rom. 5:12). Satana kukwe ngwarbe niebare jardín Edén yete, ye köböite kukwe tare nakainkä käbiti tibien, ñodre, gata, rüta aune ja tare nikata krubäte. Kukwe ngwarbe niebare ye köböite kukwe tare nakainkä, yebätä ja ruin ulire Jehovai. Akwa ye ñan aibätä tä rubun o kukwe ye tä kwekebe töite. Ñakare aune Biblia tä kädeke “Ngöbö kä juto bäkänkä” (1 Tim. 1:11 TNM).

3. ¿Kukwe kwin meden nuain raba?

³ Jehová käikitadrekä aune kä mikadre deme ye sribi ütiäte tä ni kisete. Akwa, ¿nikwe nuaindre ño? Kukwe ütiäte ne nikwe mikadre täte: “Jehová kä ye käikitekä” (Sal. 113:1). ¿Akwa nikwe nuaindre ño? Jehová kä deme yebätä blitadre  kwin. ¿Mä töita ye erere nuainbätä? Ani kukwe ketamä mike ñärärä käkwe ni dimikai Jehová kä käikitekä, ja brukwä tätebiti.

NITA KÄ MIKE JUTO JEHOVABÄTÄ

4. ¿Ñobätä Jehová käikitakata ngwane käta nemen jutobätä? (üai mikadre ñärärä).

⁴ Jehová ni Rün kä kwinbiti, käikitadrekä ye tä nemen tuin kwin ie (Sal. 119:108). Nitre kä nebätä käikitadrekä ne kwe ja rabadre ruin kwin ie, ¿ye erere Jehová töita? Ñakare. Kukwe ye rükadre gare kwin nie yekäre ani kukwe ne bämike, ni rüne iti kwe ngängän chi tä aune ngängän chi ye jatadre kise kite ngärä aune niedre kwe ie: “¡Tata mätä ti ngübare kwin yebätä tä debe!”. Monso ye käita nemen juto rünbätä kukwe nieta töi bökänbiti kwe yebätä aune jata nemen ruin kwin ie. ¿Ni rün yei ja ruin ngwarbe aune kukwe ye erere niedre ie yekäre ja rabadre ruin kwin ie ye ai ribeta kwe jai? Ñakare jire. Ñakare aune monso yekwe niara tare aune tä debe bien ie ye käi jutobätä. Ne madakäre niara rabai ünä ngwane, töi kwin yekwe kä mikai jutobätä ye gare ie. Ye erere arato, nita Jehová käikitekä ngwane, käta nemen jutobätä. Niara ni rün bäri kwin.

5. ¿Jehová käikitakata ye ngwane, dre bämikata?

⁵ Satanakwe kukwe ngwarbe niebare, ye niebare kwe ni rüere arato. Ni kä nebätä nuaite aune nikwe trö kwitadre Ngöböi ye kwin rabai ruin nie ngwane, nikwe ñaka ja ngwian metre Ngöböi nieta Satanakwe (Job 1:​9-11; 2:4). Akwa Satana ye ni ngökaka ye Job ja ngwanka metre käkwe bämikani. ¿Aune dre nie raba nibätä? Nita Jehová käikitekä ngwane Satana ñan tä kukwe metre niere ye nita bämike arato. Ja mikata Jehovakri aune ja ngwanta metre ie yebiti kä mikata jutobätä ye kukwe bäri kwin nuainta ni itire itirekwe (Prov. 27:11).

6. ¿Ni raba dre nuainne rei David aune nitre levita ye erere? (Nehemías 9:5).

⁶ Nire tä Jehová tarere ye töita kwatibe niara kä ye käikitekä. Rei David käkwe tikani: “Jehová käikitekä, ja nire tikwe; kukwe jökrä tibätä yekwe niara kä deme ye käikitaka” (Sal. 103:1). Jehová kä käikitakata aune Jehová käikitadrekä ye ja erebe nükani gare David ie. Jehová käikitakata ye abokän blitata kwinbätä, niara töi kwin ye mikata gare aune jondron jökrä sribebare kwin kwe yebätä blitata. David tö namani Jehová käikitaikä aune kä kwe ye mikai deme. Tö namani Jehová käikitaikä ja nire tätebiti niebare kwe. Nitre levita käkwe ja töi mikani ye erere nuainne arato, Jehová käikitaninkä kwetre. Niaratre Jehová käikitaninkä akwa dre nuaindre kwe yebiti ñan rabadre debe bianbare Jehovai ye mikani  nüke gare kwetre jai ja töi bobrebiti (ñäkädre Nehemías 9:5 yebätä). a ¡Kukwe niebare ja töi bökänbiti kwetre ye kukwe nuani Jehovakwe ngwane, kä namani juto krubäte bätä ye ni raba bämike ja töite!

7. ¿Kukwe drieta aune kukwe nuainta köbö kwatire kwatire yebiti ni raba Jehová käikitekä ño?

⁷ Ni blitai kwin Jehovabätä aune debe bian ie ngwane, nikwe niara käikitaikä. Nita niken kukwe driere ye ngwane, nitre rökradre Jehová ken aune rabadre Jehová tarere, ni erere ie ni tö (Sant. 4:8). Jehová töi kwin keta kabre ye ni töta mikai gare Biblia yebiti nitre ie. Ñodre, tä ni tarere, niara töbätä, dite aune kukwe ükatekä kwin ni kräke. Kukwe madabiti ni raba Jehová käikitekä aune kämike jutobätä, niara töi ño ye erere ni rabadre nuainne (Efes. 5:1). Ni ne erere nuaindi ngwane, nita ja ngwen jene nitre mada yebätä ye ga raba, ye ngwane ñobätä nita ja ngwen kore ye nitre raba nemen ngwentari jai (Mat. 5:​14-16). Aune köbö kwatire kwatire kä rabadre nemente nie kukwe ye mikakäre gare ietre. Ye ngwane nitre brukwä kwin raba nökrö Jehová ken. Nikwe Jehová käikitaikä ne erere ngwane, nikwe kä mikai jutobätä (1 Tim. 2:​3, 4).

KÄ MIKADRE JUTO JESUBÄTÄ

8. ¿Jehová käikitadrekä ño ye Jesukwe bämikani bäri kwin ni käne ye ñobätä nie raba?

⁸ Jesús ie Rün kwe ye gare bäri kwin ni mada ye kräke (Mat. 11:27). Jesukwe Rün tare yebätä Jehová käikitadrekä ño ye bämikani kwin kwe ni käne (Juan 14:31). Murie ketadre ye känenkri deu, orabare kwe Rün kwe ie ye ngwane, dre nuainbare kä tibienbätä kwe ye mikani gare kwe kukwe braibebiti: “Tikwe ma mikanina gare ietre” (Juan 17:26). ¿Akwa nuainbare ño kwe?

9. ¿Dre bämikani Jesukwe Jehová abokän ño mikakäre gare?

⁹ Jesús ñan Ngöbö kä Jehová ye aibe mikani gare nitre judío ie. Ñobätä ñan aune ye nämänena gare ietre. Ñakare aune “Jehová ye ño” ye mikani gare kwe ietre (Juan 1:​17, 18). Ñodre, tärä tikani Hebreo yebätä Jehová ye abokän ni mikaka tuin bobre jai aune ni ruentari tare ie nieta yete (Éx. 34:​5-7). Kukwe ne mikakäre nüke gare bäri kwin Jesukwe kukwe bämikani krörö, monso käkwe kämikaninkä rünbätä biti jataninta kokwäre yebiti. Nita ñäkebätä ngwane, monso ye “nämane mente se kwrere angwane, jatabare rünye”, nikani betekä ngäbiti aune kise kitani kwe ngärä yebiti ngite kitani ta kwe biti töi bökänbiti raba nüke gare nie, kukwe nebiti nüke gare metre nie Jehová ye ni mikaka tuin bobre jai aune ni ruentari tare ie (Luc. 15:​11-32). Jesukwe nitre mada dimikani Jehová ño ye mike nüke gare kwin jai aune ye era ni kräke.

10. a) ¿Jesukwe Rün kä ye kädekaninte aune nitre mada käkwe nuaindre arato ie tö namani ye ñokänti gare nie? (Marcos 5:19; üai mikadre ñärärä). b) ¿Nikwe dre nuaindre ie Jesús tö?

¹⁰ ¿Nitre madakwe Ngöbö kä ño ye niedre ye ie Jesús tö namani? Jän. Akwa nitre ji ngwanka kukwe ngwarbebätä kä ye näire nämäne nütüre Ngöbö ye abokän kä deme ye medenbätä ñaka diandre kadate jire chi. Nitre nämäne töbike ño yekwe niara ketadrebätä Ngöbö kä ño mike gare ye ie Jesús ñan tö namani. Ani ngwenta törö jai Jesukwe ni brare iti mikaninta kwin üai käme yebätä kä geraseno yekänti. Nitre nekwetaninkä ja jiebiti, yebätä Jesús kämikadrekä yete ye ribebare kwe ie (Mar. 5:​16, 17). Nitre jökrä ie Jehová kä rabadre gare ie Jesús tö namani. Yebätä jämi nikenta ye känenkri, ribebare kwe ni iti bätä üai  käme dianinkä kwe yei, Jehovakwe niara mikani räre aune Jesús ñan aikwe nuainbare niedre kwe nitre ie yekäre (ñäkädre Marcos 5:19 yebätä). b Ye erere nikwe Jehová kä ye mikadre gare nitre jökrä ie ye Rei nikwe Jesús tö (Mat. 24:14; 28:​19, 20). Nita ye erere nuainne ngwane, kä mikata jutobätä.

11. ¿Nitre ja tötikaka käkwe oradre ngwane dre niedre kwe orasionte niebare Jesukwe ietre? Aune ¿ye ñobätä ütiäte mikata gare Ezequiel 36:23 yekänti?

¹¹ Jehová tö kä kwe ye mikai deme ye nämäne gare kwin Jesús ie ye abokän kukwe ngwarbe nieta niarabätä, kätä kä kwe ye mike käme ye niara tö tuai mrebe. Ye medenbätä Jesús käkwe ja tötikaka kwe ie ora mananbare ne erere: “Nun Rün kä käinbti, ma aibe kä raba mikani ütiäte ni jökräkwe” (Mat. 6:9). Jondron mada ñaka jire bäri ütiäte Jehová kä mikakäre deme ye kräke nämäne gare kwin Jesús ie (ñäkädre Ezequiel 36:23 yebätä). c Ne madakäre ni mada ñaka jire käkwe kukwe ne erere nuainbare Jehová kä mikakäre deme. Akwa yebiti ta niara rakadre ye känenkri, ¿drebätä niara kani ngite? Metrere niara nämäne rün kä kwe ye mike käme ye niebare niarabätä. Aune Jehová kä ye mikadre käme ja mika ngite bäri käme krubäte. Ye medenbätä niara kadre ngite ye känenkri ja namani ruin käme krubäte ie, ñobätä ñan aune kukwe ngwarbe niebarebätä aune niara murie ketai kukwe ngwarbe yebätä ye nämänena gare ie. Ye arabätä kadre ngite känenkri, “namani ja tare nike bäri krübäte” (Luc. 22:​41-44).

12. ¿Jehová kä mikakäre deme Jesukwe dre nuainbare?

¹² Jesús kötaidre, nuaindre tare aune kukwe ngwarbe niedrebätä ye kräke nämänena juto Jehová kä ye mikakäre deme. Niarakwe ja mikani täte ye nämäne gare kwin ie, aisete ñan rabadre ruin blo jire ie (Heb. 12:​2, TNM). Kukwe tare ye näire nämäne gare ie Satana ara nämäne ja mike rüere (Luc. 22:​2-4; 23:​33, 34, TNM). Jesús ñaka ja ngwandre metre Jehovai yei Satana tö namani, akwa ñaka namani bare ie; ¡ngwarbekrä ja töi mikani kore kwe! Jesús bämikani metre Satana ie,  nitre kwati raba ja ngwen metre Jehovai kukwe tare yebiti ta.

13. ¿Nikwe dre nuaindre kä mikakäre juto Rei nikwe Jesús yebätä?

¹³ ¿Mä tö kä mikai juto Rei Jesubätä? Erere ngwane, Jehová käikitekä jankunu aune Jehová ño ye mike gare nitre madai. Mäkwe nuaindi ngwane, mä ja ngwain Jesús erere (1 Ped. 2:21). Aune kä mikai juto Jehovabätä Jesús erere aune Satana ni ngökö ye bämikai.

NITA NITRE DIMIKE NEMENTE KWÄRE

14, 15. Kukwe metre drieta nikwe nitre mada ie ngwane, ¿dre kwin tä nemen bare?

¹⁴ Nita nitre dimike nemente kwäre ye ngwane, nita Jehová käikitekä, ¿ñobätä nie raba? Ñobätä ñan aune “nitre ñan tödekaka kristobiti” ye abokän Satana tä “mike ngwarbe kä drünente” yebätä (2 Cor. 4:4). Yebätä nitre kwati tä kukwe ye mike era jai aune Jehová tä mente, töi ñaka nibätä o niara ñaka metre, ne madakäre niara ye ni käme krubäte aune ni ja ngwanka käme ye tä mike ja tare nike kärekäre nitre tä nütüre. Kukwe ngwarbe jökrä ne abokän Jehová kä mikakäre käme aune bämikakäre käme krubäte ne kwe ni ñaka rökradre jire chi ken. Nita kukwe driere aune nitre tötike yebiti nita bämike Satana tä kukwe niere ye ñaka metre aune nita Jehová käikitekä. ¿Ye köböire dre tä nemen bare?

¹⁵ Kukwe metre Bibliabätä ye dite krubäte. Nire abokän Jehová aune töi ño ye drieta nitre ie ngwane, kukwe ñan tuabare tä nemen bare. Kukwe ngwarbe nieta Satanakwe ye bätärekä bätärekä ñan tärä kite mike era jai aune tätre okwä ngiente, yete ja käne tä ni Rün kä kwinbiti ye mike tuin jai ni erere. Niara dite krubäte yebätä tä töbike ngwane, töita nemen niä (Is. 40:26). Niara kukwe ükatekä metre yebätä jata nemen ruin kriemikani ie (Deut. 32:4). Jehová töbätä kri krubäte ye töta nemen mikabätä gare jai (Is. 55:9; Rom. 11:33). Jehová ye abokän ja tare metre bäkänkä tä nemen gare ietre ngwane, töita nemen jäme (1 Juan 4:8). Niaratre tä nökrö bäri Ngöbö ken ye ngwane nünain kärekäre kwe aune rabai monso Ngöbökwe ye kwrere ye tä nemen bäri era kräketre. Nita nitre mada dimike nökrö Jehová ken ye sribi bäri ütiäte tä  ni kisete, ¿ñan ererea? Ne madakäre, nita ye erere nuainne ngwane niara tä ni kädeke “ni sribikä ben” (1 Cor. 3:​5, 9).

16. ¿Ngöbö kätä nemen gare ye köböire dre kwin tä nemen bare? Mä raba mike gare.

¹⁶ Kenanbe nita niken blite ni madabe ye ngwane, nita Ngöbö kä Jehová mike gare. Akwa ni brukwä kwin ye aibe tä ja töi kwite. Ñodre, monso bati kädekata Alía d ririabare kukwe ngwarbe mika nämäne täte yete. Akwa kukwe mika nämä täte kwe ye ñaka nämä kä mike jutobätä aune ja ñaka nämäne nemen ruin Ngöbö ken ie. Niara jatani ja tötike nitre testiko Jehovakwe ben ngwane, ñan namanina töbike kore. Ngöbö kä ye dianinkä täte Däkien mikani namani gare ie, yekwe töi mikani ñan krütare. Ngöbö kä namani gare ie yekwe töi kwitani bitikäre jatani mike tuin jai ja ketamuko kwrere. Töi namani niä, niara niebare: “¡Ja ketamuko bäri kwin tikwe ye kä tärä!”. Tä niere mada: “Nengwane ti töita jäme. Kä juto tibätä”. Steve ye abokän musika täkäkä, niara ye mräkä judío, ñaka ja ngwen aune töbike ni mada erere. Nitre nämäne jerekäbe ja bämike ye nämäne tuin ie, yebätä ñaka tö nämäne ja mikai kukwebätä jire. Akwa bati mräkä iti krütani ye ngwane, ni testiko Jehovakwe nämäne ni mada tötike ye nikani kukwe nuin siba. Ngöbö kä namani gare ie ye matani brukwäte. Niara tä niere: “Ngöbö kä tärä ye ñaka nämä gare jire tie”. Tä niere mada: “Kenanbe Ngöbö ye rababa tuin ni metre ye erere tie. Ye ngwane, ja ketamuko kwanba tie”.

17. ¿Ñobätä mä tö Jehová kä ye käikitaikä jankunu? (Üai mikadre ñärärä).

¹⁷ Nita niken kukwe driere ye ngwane, ¿Jehová töi kwin keta kabre aune kä kwe ye nita mike gare nitre madai? Nita ne erere nuainne ngwane, nita Jehová kä ye käikitekä. Yebätä nitre mada dimike jankunu Jehová ño ye mike gare bäri kwin jai aune kä deme ye käikitadrekä kwetre yekäre. Ne erere nuaindi ngwane, nikwe nitre mada dimikai nemente kwäre aune Jesús Rei nikwe käkwe nuainbare erere nikwe, kä mikai juto Jehovabätä. Arato ni Salmo 145:​2, tikaka erere nikwe niei: “Tikwe mä kä ye mikai ütiäte kärekäre”.