Nitre tä kukwe ngwentari
Ezequiel kapitulo 37 tä blite krimana krobu ketani jabätä aune namani krimana kratibe kwrere yebätä. ¿Ye dre gärätä?
Ezequiel kukwe niebare yebiti, Jehovakwe mikani gare nitre niara mikaka täte ye jataita Kä Käbämikani ietre yekänti aune rabaita bobukäre juta keteitibe ye kwrere. Aune kä krüte nete ni Ngöbö mikaka täte ye rabai juta keteitibe ye kwrere mikani gare kwe arato.
Jehovakwe niebare Ezequiel ni niara kukwei niekä yei niara rabadre krimana krobu den jai aune rabadre kukwe tikebätä. Krimana krati yebätä niara rabadre kukwe tike: “Judá kräke aune juta Israel kräke bätä nitre tä niaratre ben ye kräke”. Aune krimana mada krati yebätä rabadre kukwe tike: “José kräke, krimana Efrainkwe yebätä aune ju Israelkwe jökrä tä niaratre ben ye kräke”. Ngöbö nämene blite krimana krobu yebätä Ezequiel ben ye ngwane, niebare kwe ie: “Rabai krimana kratibe ye kwrere mä kisete” (Ezequiel 37:15-17).
¿“Efraín” nieta ye tä nire bämike? Efraín mräkätre ye nämene bäri dite gobran Israelkwe ye kräke, niaratre ye dianinkä juta keta jätä ngwitärikri yete. Ñodre, rei kena käkwe gobranbare ye kädeka nämene Jeroboán aune jatani Efraín mräkätre yekri (Deuteronomio 33:13, 17; 1 Reyes 11:26). Efraín mräkätre ye jatani José ngobo kädeka nämene Efraín yekri (Números 1:32, 33). Aune Jacob jondron ütiäte biani ngobo José ie. Aisete “krimana Efrainkwe” ye erametre nämene juta keta jätä gobran ngwitärikri yekwe bämike. Ezequiel jämi kukwe mikani gare kwe ye tike känenkri kä nikani kwati krubäte ta yete, nitre Asiria käkwe gobran ye diani jai aune nikani nitre ngwena ngite. Kä 740 Kristo känenkri yete namani bare (2 Reyes 17:6). Kä nikani ta ye bitikäre, nitre Babilonia käkwe nitre Asiria ganainbare. Aisete krimana krobu yebätä kukwe mikani gare ye Ezequiel tikani ye ngwane, nitre israelita ye jökrä bäsi nämene nüne kä jene jene gobrain nämene nitre Babiloniakwe yete.
Kä 607 Kristo känenkri yete, nitre Babilonia käkwe gobran nitre Judá yekwe diani jai, gobran yekwe juta nämene ketebu kä mötörikri yekänti. Ne madakäre, nikani nitre ngwena Babilonia. Nitre ja mikaninte gobran ngwitärikri yekänti ye jänikani kwetre arato raba ruin nie. Nitre nämene reire gobran mötörikri yekänti ye jatani Judá mräkätre yekri. Aune nitre sacerdote nämene nüne Judá arato, ñobätä ñan aune niaratre nämene sribire templo Jerusalén yete (2 Crónicas 11:13, 14; 34:30). Aisete krimana nämene “Judá kräke” ye erametre nämene juta ketebu gobran mötörikri yekwe bämike.
¿Ñongwane krimana krobu ye ketani jabätä? Kä 537 Kristo känenkri yete namani bare. Kä ye ngwane, nitre ruäre sribikä gobran mötörikri aune ngwitärikri yebe ye nükaninta Jerusalén templo sribekäreta. Ye ngwane ja känenkäre, juta Israel ñaka namanina ñäkäninbiti. Nitre israelita namaninta Jehová mike täte keteitibe (Ezequiel 37:21, 22). Nitre rabai keteitibe yebätä kukwe mikani gare nämene blite ye Isaías aune Jeremías ni Ngöbö kukwei niekä käkwe tikani arato, Ezequiel ye erere (Isaías 11:12, 13; Jeremías 31:1, 6, 31).
¿Ezequiel dre mikani gare kukwe metre yebätä? Mikani gare kwe Jehovakwe ni niara mikaka täte metre ye jökrä mikai nemen keteitibe “krimana kratibe” ye kwrere (Ezequiel 37:18, 19). Ni näire, kukwe käbämikani ye jatani nemen bare kä 1919 yete. Kä ye känenkri, Satana ja di ngwani nitre Ngöbö mikaka täte ye ñäkebiti kärekäre. Akwa kä 1919 yete, niaratre jataninta ja ükete bätärekä bätärekä aune namaninta keteitibe.
Kä ye ngwane, nitre Ngöbö mikaka täte ye jökrä bäsi nämene tö ngwen niaratre rabadre reire aune sacerdotere Jesube kä kwinbiti yei (Revelación 20:6 TNM). Niaratre ye nämene krimana ye kwrere Judá kräke. Akwa niaratre ye braibe nämene tö ngwen nüna kärekäre Kä tibienbätä yei. Ja känenkäre, nitre ye jatani nirien bäri kwati krubäte (Zacarías 8:23). Niaratre ye nämene krimana ye kwrere José kräke.
Kä nengwane, nitre ketebu ye tä Jehová mike täte keteitibe aune rei itibe tä kwetre, ye abokän Jesukristo. Ezequiel kukwe mikani gare yekänti, rei ye kädekani “David ni ti mikaka täte” (Ezequiel 37:24, 25). Jesús nämene blite nitre ja tötikaka kwe yebätä angwane, ribebare kwe Rünye: “Ma ti Rün tikwe töita ketetibe tibe amne tita ketetibe mabe, ye kwrere nitre tödekaka tibti tibti, ye makwe die mika ja töi mike gwaire jökrä” (Juan 17:20, 21). * (Nota mikadre ñärärä). Jesús mikani gare arato nitre braibe dianinkä nänkäre kä kwinbiti aune “obeja mda mda” ye rabai “ki kwatibe teri”. Aune niaratre jökrä käkwe nändi “ngibiaka [...] itibe” jiebiti (Juan 10:16). Jesús kukwe mikani gare ye erere, nitre Ngöbö mikaka täte tö nünain kärekäre kä kwinbiti o kä tibienbätä akwa niaratre jökrä tätre keteitibe kä nengwane.
^ párr. 10 Kä krüte yebätä Jesús kukwe mikani gare ye ngwane, kukwe keta kabre bämikani kwe nitre ja tötikaka kwe yei. Ütiäte krubäte niarakwe blitabare käne “ni klabore ie tö ngwan raba bätä töbätä” yebätä, ye nitre braibe dianinkä nänkäre kä kwinbiti tä juta Ngöbökwe jie ngwen meden gärätä (Mateo 24:45-47, TNM). Ye bitikäre kukwe keta kabre bämikani kwe ye nämene nitre braibe dianinkä nänkäre kä kwinbiti ye jökrä bämike (Mateo 25:1-30). Aune nitre käkwe Kristo etebatre dimikai aune nünain kärekäre kwetre Kä tibienbätä yebätä blitabare mrä kwe (Mateo 25:31-46). Ye erere arato, kukwe rabai bare niebare Ezequielkwe jatani nemen bare ni näire ye ngwane, namani bare käne nitre töita nünanbätä kä kwinbiti yebätä. Aune juta keta jätä nitre Israelkwe ye ñaka tä nitre nünain kärekäre Kä tibienbätä ye bämike, akwa Ezequiel kukwe mikani gare yekänti blitata nitre täi keteitibe yebätä ye tä nitre nünain Kä tibienbätä aune nitre braibe dianinkä nänkäre kä kwinbiti tä keteitibe ye ngwen törö nie.
