KÄ RAIRE deu ni rikadre ji ngrabare ye ani bämike ja töite. Batibe, ni iti jatadre ni jiebiti jutuadre nie. Nikwe nünandrekä angwane, ni yekwe nünandrekä arato. Ni rikadre bäri jötrö angwane, rikadre bäri jötrö arato. Ye ngwane ja ketamuko nikwe tädre nüne känime yere rükadre törö nie. Aisete ni rikadre betekä nememe gwirete. Niarakwe jukwe tikadre nie aune ni mikadre näin gwä ye ngwane, ni töi rabadreta jäme ñobätä ñan aune ni rabadrera kwäre ye gare nie.

Kukwe ye erere ñaka rababare bare jire nibätä raba ruin nie. Akwa kukwe mada mada tärä ni mike töbike raba ruin nie. Ñodre, nita ja di ngwen kukwe blo ruäre tuametrekäre akwa nita jankunu ja mike ngite bä kabre. Kä kwati krubäte te ni kitaninkä sribibätä aune sribi mada kwandre nie ye ñaka nuäre ni kräke. Nita kite umbre aune bren ye tä ni mike töbike krubäte. Aune kukwe mada tärä ni mike töbike.

Kukwe ño ño raba ni mike töbike, akwa ja ketamuko rabadre nikwe abokän käkwe ni kukwe nuadre aune törbadre ni dimikai ye bäri kwin. ¿Ja ketamuko ye erere tärä nikwe? Jän. Jehová ye ja ketamuko nikwe. Niara nämene ja kete kwin Abrahán ni niara mikaka täte metre yebe, nieta Isaías 41:8-13 yekänti ye erere. Bersikulo 10 yekänti, Jehová tä käbämike ni itire itire ie: “Mäkwe ñaka kä jürä ngwan jabätä, ñobätä ñan aune tita mäbe. Mäkwe ñaka ja töibika, ñobätä ñan aune ti Ngöbö mäkwe. Tikwe mä mikai dite, jän, tikwe mä dimikai, erametre ti kise ruinkri kukwe metre nuainkäre yebiti tikwe mä ketaite dime”. Aune bersikulo 13 tä niere: “Ti Jehová Ngöbö mäkwe, tita mä kani mä kise ruinkri yebiti, tita niere mäi: ‘Mäkwe ñaka kä jürä ngwan jabätä. Tikwe mä dimikai’”.

Kukwe nieta Jehovakwe tärä Isaías yekänti ye tä ni dimike krubäte. ¿Jehovata kukwe käbämike nie ye ni tärä bämike ja töite? Nita dikekä gwaire Jehovabe ye bersikulo ye ñaka niere ye nikwe mikadre ñärärä. Ye erere akräke, niarakwe ja “kise ruinkri” yebiti ni kise ngeberekri ye ketadrete. Akwa bersikulo ye tä niere Jehová tä ja “kise ruinkri kukwe metre nuainkäre” ye ngököte aune tä ni kise ruinkri ketete, tö ni jäkäita aune diainkä kukwe ñaka nuäre yebätä ye kwrere. Niara tä ni kise ruinkri ye ketete angwane, tä niere nie ni dimikakäre: “Mäkwe ñaka kä jürä ngwan jabätä. Tikwe mä dimikai”.

¿Nita Jehová mike tuin jai ja ketamuko nikwe aune ni rün ni tarekä ye kwrere? ¿Kukwe kri rabai ni kisete ye ngwane niarakwe ni dimikai yei nita tö ngwen? Niara töita nibätä aune tö ni dimikai. Kukwe kri rabadre ni kisete ye ngwane ni töi rabadre jäme ie niara tö. ¿Ñobätä? Ñobätä ñan aune niarakwe ni tare krubäte. “Nita ja tuin kukwe tare ben ye ngwane tä juto biare ni dimikakäre” (Salmo 46:1).

Nitre kristiano ruäre ja mikani ngite mekerabe yebätä tätre nemen töbike jankunu aune Ngöbökwe ngite juani ta niaratre yebiti o ñakare ye tätre ngwentari jai. Ja ruin ye erere nie angwane, nikwe töbikadre Job  ni Ngöbö mikaka metre täte yebätä. Niara nämene bati ye ngwane ja mikani ngite kwe ye nämene gare ie (Job 13:26). David nämene bati ye ngwane ja mikani ngite kwe ye nämene gare ie arato. Ye medenbätä Jehovakwe ñaka ngite kwe ye ngwandre törö jai ribebare kwe ie (Salmo 25:7). Ni kä tibienbätä ye jökrä ngite, yebätä Biblia tä niere “ni jökrä ja mikaka ngite aune ni ñaka töi raba nemen Ngöbö erere” (Romanos 3:23, TNM).

Isaías 41 yekänti kukwe nieta ye tikani nitre israelita kräke. Niaratre ja mikani ngite krubäte yebätä jänrikadre ngite Babilonia mikakäre ja ngie nuin niebare Jehovakwe (Isaías 39:6, 7). Akwa niaratre ye meden meden käkwe ja töi kwitai kukwe blo yebätä aune jataita niara kokwäre angwane, mikai kwäre kwe käbämikani kwe ietre (Isaías 41:8, 9; 49:8). Kä nengwane, nire nire tä ja töi kwite ja brukwä tätebiti kukwe blo yebätä aune tä ja di ngwen kukwe kwin nuainkäre angwane, Jehovata tarere aune mike tuin bobre jai arato (Salmo 51:1).

Ni kristiano kädekata Takuya yebätä ani blite. * Ni üai butiere tua nämene krubäte kwe aune nämene küdrere akwle jabätä ye tuametrekäre nämene ja di ngwen. Akwa käre nämene ja mike ngite. Ja ñaka nämene nemen ruin ütiäte ie nieta kwe. Akwa Jehovakwe ngite juandre ta niarabiti ye nämene ribere ie angwane, Jehová nämene niara dimike nämene ja mike ngite ye bitikäre nämene nemen ruin ie. ¿Jehová nämene niara dimike ño? Nitre umbre ji ngwanka konkrekasionte yebiti. Nitre umbre ji ngwanka yekwe niebare Takuya ie batire batire niarakwe ja mikadreta ngite ye ngwane rabadre niaratre ben blite teléfono yebiti. Niarakwe blitadre nitre umbre yebe teléfono yebiti ye ñaka nämene nemen nuäre kräke nieta kwe, akwa nämene nuainne ye ngwane, ja nämene nementa ruin bäri kwin ie nieta kwe. Bati, nitre umbre ji ngwanka ribebare ni circuito tuabitikä ie rabadre niken Takuya tuinbiti dimikakäre kukwe ja üairebiti. Ni circuito tuabitikä yekwe niara tuaninbiti ye ngwane, ñaka nükani ja töbiti niara känti niebare kwe ie, ñakare aune nitre umbre ji ngwaka yekwe niara juani Takuya tuabitikäre niebare kwe ie. Takuya nämene ja mike ngite, akwa Jehovakwe nitre umbre ji ngwanka yebiti dimikani nieta kwe. Ja känenkäre, kukwe blo ye tuanimetre kwe aune ja mikani kwe prekursor regular. Kä nengwane tä sribire sukursal keteiti känti. Jehovakwe ni Testiko ye dimikani aune nikwe ja mikai ngite ye ngwane ni dimikai kwe arato.

Ni ruäre kitaninkä sribibätä aune sribi mada kwandre nie ye ñaka tä nuäre ni kräke ye tä ni mike töbike krubäte. Jefe itire itire käkwe ñaka ni kadre ngäbiti ye ñaka nuäre ye ani bämike ja töite. Ye köböite ni kwati ie jata nemen ruin ñaka ütiäte. Kukwe ye erere tärä nemen bare nibätä ngwane, ¿Jehová raba ni dimike ño? Niara ñaka raba sribi kwin bien jötrö nie, akwa David kukwe niebare ne nikwe ngwandre törö jai ye raba ni dimike: “Ti nämä bati aune nengwane ti niena umbre, akwa ti ñaka ni kukwe kwin nuainkä ye tuin jire mikaninte kaibe, bätä ti ñaka monsotre kwe ye tuin ban känene” (Salmo 37:25). Jehová kräke ni ütiäte krubäte. Niara tä ja “kise ruinkri kukwe metre nuainkäre” ye käbämike nie ni dimikakäre ne kwe nita dre dre ribere jai ye rabadre nemen nikwe niara mikakäre täte jankunu.

Juta Colombia yekänti, Meri Testiko kädekata Sara ye Jehovakwe dimikani ño ye tuani kwe. Niara nämene sribire köbö täte ni sribi bökänkä iti ütiäte krubäte kräke aune nämene ngwian ganainne ere jai. Akwa tö namani sribidi bäri Jehová kräke. Aisete sribi ye  tuanimetre kwe aune ja mikani prekursor kwe. Niarakwe sribidre köbö ruäre te ribe nämene kwe jai ye ñaka namani nuäre kwandre ie, yebätä jatani helado rürübäine. Akwa ngwian ñaka namani ie ye ngwane ñaka namanina helado rürübäine. Kä komä nikani ta ye namani raire krubäte niara käne nieta kwe, akwa Jehovakwe niara dimikani kä ngwen nüke jai. Dre dre ribe nämene metrere kwe jai aune niarakwe dre nuaindre ne kwe ñaka rabadre töbike krubäte jondron köbö jetebe kräke yebätä ye namani gare ie (Mateo 6:33, 34, TNM). Kä nikani ta ye bitikäre, jefe kwe käne yekwe blitabare ben sribi nämene käne kwe ye arabe biankäreta ie. Jefe ye niara mikadre sribire köbö ruäre te aune kä biandre kwe ie nänkäre gätäbätä aune gätä krikri yebätä ye aibe ngwane raba sribi kain ngäbiti niebare kwe ie. Namani debe jefe ye kräke. Kä nengwane Sara ñaka tä ngwian ganainne ere käne ye erere, akwa tä sribi prekursor ye nuainne jankunu. Kukwe kri ben niara nämene ja tuin ye ngwane Jehovakwe dimikani nieta kwe.

Nitre kwati tä kite umbre aune gwäune kä rabai niaratre yebiti jubilakäre ye tä niaratre mike töbike krubäte. Ngwian täi ere nünankäre jäme ietre o ñakare ye tätre ngwentari jai. Niaratre raba nemen bren ja känenkäre ye tä niaratre mike töbike krubäte arato. Rei David kukwe ne ribebare Jehovai raba ruin nie: “Ti jatadre umbre ye ngwane mäkwe ñan ti tuanmetre; ti di jatadre krüte ye ngwane mäkwe ñan ti tuanmetre” (Salmo 71:9, 18).

¿Dre käkwe nitre kite umbre ye dimikai ñaka töbike krubäte kä ja känenkäre yebätä? Niaratre tä tödeke Ngöböi ye rabadre mike bäri dite aune dre dre ribeta kwetre jai ye jökrä niarakwe biain ietre yei rabadre tö ngwen. Niaratre ruäre kwe ngwian nämene bäri ye ngwane jondron ruäre namani kwetre. Ye medenbätä rabadre ja kite nünanbätä bäri jondron braibebiti aune jondron tädre braibe kwetre ye käi ngwandre juto kwetre jabätä. Niaratre tädre kwin yekäre “legumbre kwetadre blato kwati” kwetre ye bäri kwin raba nemen gare ietre (Proverbios 15:17). Nikwe ja töi mikai metrere Jehová mike täte angwane, ni jatai umbre ye ngwane nikwe dre dre ribei jai ye jökrä biain kwe nie.

Ani töbike José aune Rose yebätä, kä nikanina 65 ta yete nitre gure ye tä sribire köbö täte Jehová kräke. Kä nikani ta ye jökrä te kukwe keta kabre tare ben ja tuanina kwetre. Ñodre, Rose käkwe rün ngübabare dibire rare muko kwe yebe. Ne madakäre, José operabare bren cáncer ye kisete aune kräkäi mika nämene bren cáncer yebätä. ¿Jehovakwe nitre gure niara mikaka täte metre yei ja kise ruinkri ye biani ño dimikakäre? Nitre Testiko nibu kädekata Tony aune Wendy yebiti dimikani kwe. Niaratre yekwe cuarto nämene kwati aune tö nämene bian ngwarbe nitre prekursor sribikä köbö täte Ngöbö kräke yei. Tony nämene näin colegiote ye ngwane, käre nämene nikren ventanante ta aune nämene José aune Rose tuin kukwe driere ye törö ie. Niara nämene niaratre tuin kukwe driere kä jutobiti yebätä töi namani ñan krütare. José aune Rose nämene kä kwati krubäte te sribire Jehová kräke, yebätä Tony aune Wendy käkwe cuarto kwe driebare ietre nünankäre. Kä nikanina 15 ta yete niaratre José aune Rose dimikanina aune kä nengwane kä niena 85 näre bititre. José aune Rose tä Tony bätä Wendy mike tuin jai Jehovakwe jondron biani ietre ye kwrere.

Jehová tä kukwe ne käbämike nie: “Mäkwe ñaka kä jürä ngwan jabätä. Tikwe mä dimikai”. Niara tä ja “kise ruinkri kukwe metre nuainkäre” ye käbämike nie ni dimikakäre arato. ¿Nikwe ja kise ngökaite niara kise ye ketatekäre?